Ukusōka 3

Kyala ịkummbilikila Mose

1Ilịsịku limo bo Mose alipakutị̄ma ing'ōsị sya nko Jetịlo, umpụ̄tị gwa Mmịtyanị, alinkusịtwala ing'ōsị kulubafụ lwa kubujōngelo mmatēngele alinkwakufịka ku Holebụ, ikyamba kya Kyala. 2Kula kula ko ugwandumị gwa Kyala alinkunsetukila ndulapi lwa moto ukufụmila pakati pa kisyanju; alinkukēta alinkwaga ikisyanju kikwaka, lolị kitịkupya. 3Po papo Mose alinkuti: Nsegelele nkikēte bunụnụ ikikulūmba iki, fịkị ikisyanju kitịkupya? 4Bo UNTWA ammbwene asyụmbụtwịke kukukikēta, Kyala alinkōlị̄le, ilịsyu lilinkufụma nkisyanju lilinkuti: Mose! Mose! Lelo ātịle: Une ndi apa. 5Po papo alinkujoba alinkuti: Ungasegelelaga; fụ̄la ifịlato fyako mmalūndi, papo ubujo ubo gwimịlepo bujo bwịkemo. 6Kangi ātịle: Une ne Kyala gwa gūso, ne Kyala gwa Abụlahamụ, ne Kyala gwa Ịsịhaka, ne Kyala gwa Jakobū. Po papo Mose alinkwenda nukwịkụpikila kumāso, papo ātị̄laga ukunkēta Kyala.

7Lelo UNTWA alinkuti: Nkubwene ukukubilwa kwa bāndu bāngu mw'Egịpịtị, mbilị̄ke ni ngụ̄to jābo ukulōnda ukuti mbapoke kuli aba bịkubimilila nukubatāmnya fị̄jo. Nsịmenye ingubilo syabo syosa. 8Lelo nsụlwịke kukubapoka kukiboko kya Begịpịtị, ukuti mbasōsyemo nkị̄su kila mbatwale kukị̄su ikyamboto ikyelēfụ ikya lukama ulwịngị nulūkị ulwịngị, kukị̄su iki lilino balịmo Abakananị na Bahịtị, na Bamolị na Bapelịsị, na Bahịfị, na Bajebusị. 9Ukēte lelo lilino īngụ̄to ja bany'Ịsịlaelị jifịkịle kumyangu, kangi mbubwene nubutolwe ubu bịkubōmbelịgwa na bāndu ba mw'Egịpịtị. 10Lelo nikukutuma ugwe kwa Falao ukuti ukabasōsyemo abāndu bangu, abany'Ịsịlaelị, mw'Egịpịtị. 11Umwene Mose alinkubụsya alinkuti: Ne anị nịne ukuti mbūke kwa Falao, ngabasōsyemo abany'Ịsịlaelị mw'Egịpịtị? 12Po papo umwene alinkuti: Ngujaga nanụngwe; iki kịkujaga kyo kimanyịlo kya kumanyịlamo ukuti ngutumịle une: Bo ubasōsị̄sye abāndu mw'Egịpịtị, kwịsakummbōmbelaga Kyala pa kyamba iki.

13Kangi Mose alinkujoba kwa Kyala alinkuti: Lelo bo mfịkịle kubany'Ịsịlaelị ngujoba nabo ukuti: Kyala gwa bị̄sēmwe āndumịle kumyinụ, po lelo linga bịkuti: Jwani ingamụ? Po ngabāmụlege ngatubelege? 14Kyala alimmbūlịle Mose ātịle. UNE JOUNE UJU ALỊKO. Alinkummbūla alinkuti: Bo ukajege ku abany'Ịsịlaelị ukatigi: JOUNE āndumịle kumyinụ. 15Kangi Kyala alimmbūlịle Mose ātịle: Ukajobege isị kubany'Ịsịlaelị ukatigi: UNTWA, Kyala gwa bịsēmwe, Kyala gwa Abụlahamụ, Kyala gwa Ịsịhaka, Kyala gwa Jakobụ āndumịle kumyinụ; iji jo ngamụ jāngu ja bwịla bwịla, po lelo kūmbagị̄le isị ukuja syakungumbukilamo mụngulilo syosa ịtolo isị sịkwịsaga. 16Ubūke ukabakomānịe abakulūmba ba Ịsịlaelị, ukababūle ukuti UNTWA, Kyala gwa Jakobụ āsetukị̄le atịle: Mbakētịle, nsịbwene nisị mụkubōmbelịgwa mw'Egịpịtị; 17Lelo ngufị̄nga ukuti āngubasōsyamo mbutolwe ubu mūkutamịgwa mw'Egịpịtị, ngubatwala kukị̄su kya Bakanānị na Bahịtị na Bamolị na Bapelịsị na Bahịfị na Bajebusị, kukị̄su iki kị̄swịle ulukama nulūkị. 18Po lelo bịkwakupilikaga ilịsyu lyako; po ugwe na bakulūmba ba Ịsịlaelị mụkwakubūkaga ku malafyale gwa Egịpịtị mụkwakummbūlaga mụkwakutigi: UNTWA, Kyala gwa Bahịbulị āganị̄le nanụswe; lelo lilino tukukusūma utwịtikisye tubūke mmatēngele tukịkemēsyege ku NTWA Kyala gwitu. 19Mmēnye ukuti umalafyale gwa Egịpịtị atịkwakubịtikisya, lolị pēne papo linga afịmbilisị̄gwe ni kiboko kya maka. 20Bo buno buno nịsakugolosyaga ikiboko kyangu pakunkoma Egịpịtị ni fịswịgu fyosa ifị nisakufịbombaga mụla mụla; pa nyụma pali sịsịsị, ịsakubịtikisya ukubūka. 21Abāndu bababa nịsakubapelelaga ubukūndwe nkyenị mmbāndu ba mw'Egịpịtị; kangi bo mụkubūka mụtịsakubūkaga bo mụkakolela nafịmo mmaboko, 22Lolị kukuti nkị̄kulu ịsakusūmaga kumpalamanị gwake, na kunhēsya gwake nnyụ̄mba jāke akabwe akapala ka fesa na ka sahabu, numwenda, to mwịsakubafwikaga abānīnụ abālumyāna na balindwana; mo mụno samụkufịpupilaga ifyuma fya Begịpịtị.

Currently Selected:

Ukusōka 3: NYB96

Highlight

Copy