Ukusōka 4

Kyala alinkumpa Mose amaka agakuswịgisya

1Po papo Mose alinkubụsya alinkuti: Lolị ukēte, batịsakunyịtika isị ngwakubabūlaga kangi batisakulipilika ilịsyu lyangu; papo bịkwakutigi UNTWA akākusetukị̄le. 2UNTWA alinkunndālūsya alinkuti: Fịndu fịkị ifyo ukolị̄le nkiboko kyako? Ālyamwịle ātịle: Ngịlị. 3Ātịle: Jitāge pāsi. Mose ājitāga pāsi jēnda nukwịpela njoka. Mose alinkwenda nukubopa ukujitị̄la. 4UNTWA alimmbūlịle Mose ātịle: Golosya ikiboko kyako, ukajikole unswịgala. Alinkugolosya ikiboko kyake alinkujikola, jilinkusanụka ukuja ngịlị nkiboko kyake. 5Kyala alimmbūlịle sịsịsị kokuti sịkabakolege ukuti UNTWA, Kyala gwa Abụlahamụ, Kyala gwa Ịsịhaka, Kyala gwa Jakobụ ākusetukị̄le nalolị 6UNTWA alinkummbūla kangi alinkuti: Lilino bīka ikiboko kyako pakipāmbaga kyāko, Alinkubīka ikiboko kyake pakipāmbaga kyake; lelo bo ịkukisōsyapo, alinkwaga ikiboko kili nubukoma, kị̄pelịle kyelụ bo īngala. 7Ātịle: Bīka kangi ikiboko kyako pakipāmbaga; alinkukibīka kangi ikiboko kyake pakipāmbaga, lelo bo akisōsịsyepo, alinkunyomoka kinụnụ ịtolo kili bo ulwa bwịla mụno gujīlị̄le ummbili gwake. 8Kyala ātịle: Linga batịkusị̄tika isị kubabūla, pamo linga sịkabakola isya kị̄ka kya kwanda, sịsakubakola nkị̄ka kya bubili. 9Linga batịkwịtika kufị̄ka fyo fịbīli, pamo batịkulị̄tika ilịsyu lyako, kwakwegaga amīsi ndwisi Naịlị kwakōnaga pāsi pabūmụ; po amīsi galagala aga unegịle mwa Naịlị gịkwakwanduka gịkwakuja ịlopa bo gali pamfụ umūmụ.

10Lolị Mose alinkwamụla ku NTWA alinkuti: Gwe NTWA gwangu ungandumaga une ngamanya ukujoba mbūmị bwangu, pōpe naulu ūmbūlịle ne mụ̄ndu gwako. Ngujoba panāndi panāndi kangi ngutabilila ịtolo ukujoba. 11Po lelo UNTWA alimmwamwịle ātịle: Jwanị apelịle unndomo gwa mụ̄ndu? Jwani ịkumpelela ukusịtakujoba pamo ukuja gwa mapuli, pamo ukukēta pamo ukuja mfwamāso? Ngaja joune ne NTWA? 12Bo buno buno lelo ubūkege, nịsakujaga nndomo gwako, kangi nịsakukumanyịsyaga isị kwakujobaga. 13Lolị umwene ālyamwịle ātịle: Gwe NTWA gwangu, ngukusūma ntume ujūngi. 14Po Pāpo ingalalisị sya NTWA sịlinkwenda nukunkịmbukila Mose, UNTWA ātịle: Akajako ugwamyinụ Alonị, unnya Lēbị? Mmēnye, ukuti amēnye ukujoba, kēta ịkwakwịsa kukwaganịla nanụngwe, kangi bo ịkukubona ịkwakuja nulusekelo mụ̄nda. 15Po ugwe kwakujoba nagwe, kwakugabịka amasyu mmyake; po lelo une ngwakujaga nndomo gwako na nndomo gwake, lelo ngwakubamanyịsyaga isya kubōmba. 16Umwene ịkwakukujobelaga kubāndu; ịkwakuja nndomo gwako, ugwe kumyake kwakufwanaga gwe Kyala. 17Kubūkaga ni ngịlị nkiboko kyako, jo iji kwakubōmbelaga ifị̄ka.

Mose ịkugomokela mw'Egịpịtị

18Mose alinkugomoka ukubūka kwa Jetịlo unko, alinkwakummbūla alinkuti: Ngusūma ukubūka ku bākikolo kyangu mw'Egịpịtị, ngabakēte linga bakāli balịko kubūmị. Po papo Jetịlo alinkunndaga Mose alinkuti: Ubūkege nu lutengāno. 19UNTWA alinkujoba na Mose Mmịtyanị alinkuti: Ugomokege ubūkege mw'Egịpịtị; namanga abāndu bosa aba bālōndaga ukukugoga bafwịle. 20Po papo lelo Mose alinkummwega unkasị na bāna abālumyāna alinkubakwesya pa mbụ̄nda; alinkugomoka ukubūka mw'Egịpịtị nkiboko kyake Mose alinkukolela īngịlị ja Kyala.

21Po Papo UNTWA alinkummbūla Mose alinkuti: Bo kugomoka ukubūka mw'Egịpịtị, ukakumbukege ukubōmba nkyenị mwa Falao ifị̄ka ifị mfịbīkịle mmaka gạko; une ngwakujipelaga indụmbụla jāke ukuja ngafụ; po lelo atịkwakwịtikaga ukubasụmụsya abany'Ịsịlaelị. 22Po ugwe kwakummbūlaga Falao kwakutigi: Bo ịkuja UNTWA ịkuti, Ịsịlaelị jo mwanāngu unndumyana ugwa kipānda, 23lelo ngukubūla nguti: Unndekesye umwanāngu ịsege ambōmbelege. Linga kunsịtila, ukēte āngunngogaga umwanako unndumyana ugwa kipānda.

24UNTWA alinkwaganịla na Mose panjila pabugonelo alinkulōnda ukunngoga. 25Po papo Sịpola alinkwenda nukwega ilịbwe ilyugị alinkubụ̄ta unngubo gwa kusụlo ku kyenị kumwanake unndumyana alinkwakumpyagīsya nago Mose mmalūndi gāke, alinkuti: Uli nndume gwangu gwa mwịlopa nalōlị! 26Po papo UNTWA alinkunndeka Mose, alinkusịtakunngoga. Po lelo panyụma pali sịsịsị Sịpola alinkujoba alinkuti: Uli nndume gwangu gwa mwịlopa panōngwa ja bubūtịgwa bwa kukyenị.

27Po papo UNTWA alinkummbūla Alonị alinkuti. Ubūke nndungalāngala ukāganịle na Mose. Po papo alinkubūka alinkwakwaganịla nagwe pa kyamba kya Kyala, alinkumfịpa pakumponịa. 28Po lelo Mose alimmbūlịle Alonị amasyu ga NTWA aga alintumịle kukugajoba, ni sya fị̄ka fyosa ifị ālindagị̄le ukufị̄bomba, 29Po papo lelo Mose na Alonị balinkubūka balinkwakugabūnganīa amafụmụ ga Ịsịlaelị gōsa. 30Alonị alinkwenda nukugajoba amasyu gōsa UNTWA ājobịle kwa Mose, po Mose alinkubōmba ifị̄ka bo bịkukēta abāndu bōsa. 31Po papo abāndu balinkwenda nukwịtika kangi bo bapilịke ukuti UNTWA ịsịle kumyabo nukuti asịbwene ingubilo syabo isị bābōmbelịgwaga, balinkwịnama pāsi balinkwịpụ̄ta.

Currently Selected:

Ukusōka 4: NYB96

Highlight

Copy