Ukusōka 5

Mose na Alonị bịkwima nkyenị mmalafyale gwa mw'Egịpịtị

1Po pāpo lelo Mose na Alonị balinkubūka kwa Falao balinkwakummbūla balinkuti: UNTWA Kyala gwa Ịsịlaelị ịkuti: ubābule abāndu bāngu ukuti bakambōmbele ulusekelo nndungalāngala. 2Lolị Falao ālyamwịle ātịle: UNTWA jwanị ugwakuti mbilikege ilịsyu lyake nukubasōsya abany'Ịsịlaelị? Une ngammanya UNTWA, kangi ndikubasōsyaga abany'Ịsịlaelị. 3Kangi balimmbūlịle bātịle: Kyala gwa Bahịbulị āganị̄le nanụswe; utwịtikisye tukukusūma ukuti tujege ni njila ja masịku matatu nndungalāngala tukampe amakemo UNTWA Kyala gwitu. Linga tukabōmba sịsịsị ịsakututwalila ububịne twịsakufwa, pamo twịsakufwa īngwego. 4Lolị umalafyale gwa mw'Egịpịtị alinkubalālūsya alinkuti: Umwe ba Mose na Alonị, nōngwa ja fịkị mukubasōsyapo abāndu pambōmbo? Amụbagomole abatumwa babūkege kumbōmbo! 5Kangi Falao ājobịle ātịle! Lilino abāndu aba babēle bịngị ukubakīnda na ba mw'Egịpịtị, po mụkulōnda ākuti bangalege ịtolo bangabōmbaga najimo. 6Po papo ilịsịku lilyo Falao alinkwenda nukubalagilila abalindililị ba bāndu ba bakulūmba ba babōmbị bịnābo alinkuti: 7Mụngandisya kangi ukubapa abāndu aba ilị̄su lya kutendekekesya amapāmba, ukufụma umwịsyugu; babūkege bābo bakị̄būnganịkisyege ilị̄su. 8Lolị amapāmba aga bịkubūmbaga gafwanege ịtolo ubwịngị bo aga bābūmbaga ulutasị, linganaganịkangapo ilịpāmba nalimo. Imbōmbo iji bịkubōmba nāndi, fyobene bịkūsūma une ukuti mbị̄tikisye ukusōka kukwịkemēsya kwa Kyala gwabo. 9Abāndu aba bapēgịgwe imbōmbo ingafụ ija kubakufya ko kuti bangaja na kabalilo ka kupilikila isya butūngulu.

10Po papo abalindililị na bakulūmba ku babōmbi abị̄nābo balinkwakubabūla abāndu balinkuti: Falao ātịle: Mutikupēgigwaga ilị̄su kangi. 11Mụkubūkaga jujumwe kukwega ilị̄su kuno linga mụlyagịle; lolị imbōmbo jīnụ jo kukajapo ukonangịkapo napanāndi, amapāmba gịkufwanaga ịtolo ubwịngị bo lulo gịkuja bwịla. 12Po papo abāndu balinkubalanịla nkị̄su kya Egịpịtị kyosa nkubūngānịa utupịkị twa lị̄su. 13Abalindililị balinkubatụgụ̄ndanịa balinkuti: Malaga imbōmbo jīnụ ja pịsịku bo lulo mwabōmbaga ulutasị bo mụkutwalilịgwa ilị̄su. 14Abalindililị balinkubakoma ni ngịlị abakulūmba kubabōmbị abị̄nābo balinkuti: Fịkị mụkabūmba amapāmba mịngị bo ulu mụkubūmba bwịla?

15Po papo abakulūmba kubabōmbị bị̄nābo abany'Ịsịlaelị balinkubūka kukulila kwa Falao balinkwakuti: Fịkị kutubōmbela sịsịsị twe babōmbi bāko? 16Tutikutwalilịgwa ilị̄su nalimo twe babōmbi bāko po bịkutubūla bịkuti: Bumbaga amapāmba. Kangi twe babōmbị bāko tukukomịgwa; lolị ababị̄bị bo bāndu bāko, ko kuti jo ugwe kutukoma. 17Umalafyale ābāmwịle ātịle: Mụli bōlo, mụli bōlo, uketege mụkūsūma ukubịtikisya ukuti mụsōke mụbūke kukwịkemēsya ku NTWA. 18Lululu mụgomokelege kūmbōmbo; mụtịkutwalilịgwaga ilị̄su nalimo, lolī ubwịngị bwa mapāmba bo bụkufwanaga bo lūlo mwabūmbaga bwịla. 19Po papapo abīmililị ba bị̄nābo abany'Ịsịlaelị, bo babūlị̄gwe ukuti bịkutendekesyaga amapāmba amị̄ngị bo aga bātendekesyaga ulutasị, balinkusyaganịa ukuti bali ndukubilo. 20Balinkwaganịla nabo ba Mose na Alonị, bịkubagụ̄lila, bo bafụmịle kwa Falao; 21balinkujoba nabo balinkuti: UNTWA asịbwene isị mụbōmbịle, lelo aịkubafụndaga papo jo umwe mụtịle umalafyale nababōmbị bāke batubēnge uswe. Mụbapele nkiboko kyabo īngwego jakutugogela uswe.

22Po papo Mose alinkugomokela kangi ku NTWA alinkuti: Gwe NTWA, fịkị kubabōmbela imbị̄bị abāndu aba? Kali gwandumaga fịkị une? 23Namanga lūlo mbūkị̄le kukujoba nagwe Falao mụ ngamụ jāko, ịkubabōmbela imbị̄bị abāndu aba, lolị ugwe nakamo ukuti ubapoke abāndu bāko.

Currently Selected:

Ukusōka 5: NYB96

Highlight

Copy