Ukusōka 2

Ukupapịgwa kwa Mose

1Lelo ālịko jumo umụ̄ndu ugwa nkikolo kya Lebị jo alinkwega unkịkulu (Johebeti) ugwa nkikolo kyake umwana gwa Lebị. 2Unkịkulu jujuju alinkukaba ikifụba alinkumpāpa umwana unndumyana, lelo bo āgịle ukuti mwana nnụnụ fị̄jo alinkumfịsa imyesị mịtatu. 3Lelo kafịkịle akabalilo kakutolịgwa ukumfịsa, alinkwenda nukuluka ikị̄bo kya ndete. Alinkusị̄ngula numpūlya alinkunndāmbalika umwana jula jula nkati, ikịbo alinkwakukifịsa pa kigugu pambali palwisi. 4Lelo ulịlūmbu ālyimịle pabutalị, ukulōnda ukusịkēta isị sịkummbonekelaga umwana. 5Lelo po papo unsyala umwana gwa Falao unndīndwana alinkusụlụka ukubūka kulwisi kukōga, lelo bo abalindwana aba bēndaga nagwe bịkwenda kumbali kulwisi, alinkukibona ikị̄bo nkigugu alinkuntuma unndīndwana jumo ukwakummwegela ikị̄bo. 6Lelo bo ịgwịle ikị̄bo kila kila alinkummwagamo umwana; umwana alinkulila fị̄jo. Po unsyala kilinkwenda nukummwaga ikisa ātịle: Uju mwana gwa Bahịbulị, 7Po papo ulị̄lūmbu alinkujoba ku Nsyala alinkuti: Bule ngakulōndele unkīkulu jumo Unhịbụlị ukuti jo akongekesyege umwana uju? 8Umwana gwa Falao unndīndwana jula jula ātịle: E, būka kāndōndele. Po papo unndīndwana jula ājakunkōlela unna gwa mwana jula jula. 9Po lelo Unsyala ātịle: Ummwege umwana uju ukaswililege, nisakukufwika umfwalo kunōngwa ja kūswilila umwana uju. Alinkwenda nukummwega alinkwakunswila. 10Umwana alinkwenda nukukula, uju ammongesyaga jula alinkuntwalila umwana gwa Falao unndīndwana jula jula, po papo alinkwịpela ukuja mwanake, alinkumpa ingamụ ija Mose, kokuti: Numfyulịle mmisi.

Mose ịkujongela ku Mịtyạnị

11Ilịsịku limo, bo Mose akulịle alinkubūka kukubakēta abakamụ kuno babōmbaga imbōmbo ingafụ; po papo alinkummbona umw'Egịpịtị jumo ịkunkoma Unhịbuli, ugwa nkikolo kyake Mose. 12Mose ạkelengenịe kosa, bo āgịle atịkummbona najumo enda nukunngoga umw'Egịpịtị jula ansyila mụnsanga. 13Bo abūkịle kangi kilābo kyake alinkubāga Abahịbulị babili bịkulwa. Alinkundālūsya jumo uju Inōngwa syake syali ndobe alinkuti: Kunkoma fịkị Unhịbụlị nnịno? 14Jula ālyamwịle atịle: Jwanị akubīkịle ugwe ukuja nkulūmba gwitu gwakutulonganịa? Kulōnda ukūngoga bo apa gwalinngogịle umw'Egịpịtị mmajolo? Po papo Mose alinkwenda nukutetema, bo āgịle ukuti isị sịmanyị̄gwe sịli pabwelu. 15Bo Falao asịpilike sịsịsị, alinkulōnda ukunngoga Mose. Lolị Mose alinkunnjōnga Falao, alinkwakutūgala nkị̄su kya Mịtyanị; ātūgēle pabupị̄pị nikisịba. 16Lelo umpụ̄tị gwa Mmịtyanị ali nabana abalindwana bahāno na babili; bo balinkwịsa pakunega amīsi, balinkwisusya amīsi mụno basịnwekesyaga īng'ōsị sya gwịsabo, nukusyosya. 17Po pāpo abatị̄mị balinkwịsa balinkubakaga abalindwana bala bala. Po papo Mose alinkusụmụka alinkubatūla, enda nukubanwekesya ing'ōsị syabo. 18Bo bagomwịke kugwịsabo Lwelị, ābalālūsịsye ātịle: Sịli bule bule ukuti umwịsyugu mwịsege nakalinga buno buno? 19Bātịle: Umw'Egịpịtị jumo atupokịle nkiboko kya batị̄mị kangi atunegị̄le amīsi nukusịnwesya ing'ōsi. 20Umwene ābalālūsịsye ātịle: Alikūgu? Fịkị mụkị̄sa nagwe lelo? Amụkammbilikile ịse alyemo ifị̄ndu. 21Po papo Mose alinkuhoboka ịtolo ukugona pa mụ̄ndu jula, umụ̄ndu jula jula alinkumpa Mose umwanake unndīndwana, Sịpola, ukuja nkasị. 22Alinkumpāpila umwana unndumyana, jo alinkumpa ingamu ja Gelịsomụ, ko kuti: Une nndi nhēsya gwa kị̄su ikihesya.

23Kunyụma bo fịkīndịle ifyinja fịngị umalafyale gwa Egịpịtị alinkwenda nukufwa lọli abany'Ịsịlaelị balinkuja mụ ndukubilo lwabo lwa butumwa, balinkulila, balinkukụ̄ta ingụ̄to jilinkwakufịka kwa Kyala. 24Kyala alinkwenda nukupilika ingụ̄to jābo alinkukumbuka lōpe nulufị̄ngo ulu āfị̄ngịle na Abụlahamụ, na Ịsịhaka na Jakobụ. 25Kyala alinkukētako kubany'Ịsịlaelị alinkwenda nukusyaganịa ingubilo syabo alinkubapākisya.

Currently Selected:

Ukusōka 2: NYB96

Highlight

Copy