Ukusōka 1
1
Abany'Ịsịlaelị bikubombeligwa isya kubatamya mw'Egịpịtị
1Isị syo ngamụ sya bana abanyambala ba Jakobụ uju āli jo Ịsịlaelị aba bālịsịle mw'Egịpịtị, uju naba nnyụ̄mba jāke uju naba nnyụ̄mba jāke: 2Lubenị, Sịmyonị, Lebị na Jụ̄ta, 3Isakalị, Sebulonị na Benjamịnị, 4Ndanị, Nafụtalị, Gandi na Aselị. 5Aba nkikolo kya Jakobụ bōsa pamopēne bāli abāndu amalōngo mahāno na mabili; Josefụ jo ājīlị̄lemo ngānịla mw'Egịpịtị. 6Lelo Josefụ āfwịle, na bamyabo bōsa, ni ngulilo jōsa jila jila. 7Lolị aba nkikolo kya Jakobu balyolwịke bābēle bāli bịngị fị̄jo; bābēle kangi bali na maka fị̄jo; ikị̄su kyalịswịle bābo batupu.
8Po papo alinkuboneka umalafyale ujūngi ugwa kulagila mw'Egịpịtị uju akālimmēnye Josefụ. 9Jo alinkubabūla abāndu alinkuti: Mụkēte abany'Ịsịlaelị aba babēle bakindilị̄le; kangi bali namaka ukutukīnda uswe. 10Oko tulōnde amahala gamo agakubabōmbela, ukuti bangakindililaga ubwịngị, papo linga babēle fị̄jo lelo ubwịte bumo bukutwịsila, bịkubāmbaga na balugu pa kulwa na nụswe po lelo abēne bēnde nukusokamo nkị̄su. 11Po papo balinkubabīka abalindililị abakubakufya nimbōmbo ingafụ. Po papo balinkunnjengela Falao utwaja, Pitomu na Lamasesị, utwakulundikamo fyosa ifya kubōmbela umalafyale. 12Loli napapo babatamyaga fị̄jo ukubakatasya ni mbombo, abēne balinkōngelela ukōloka nukubāla nkị̄su kyosa. Po papo abāndu ba mw'Egịpịtị balinkwenda nukubatị̄la abany'Ịsịlaelị. 13Balinkubakatasya fị̄jo abany'Ịsịlaelị ni mbōmbo ingafụ fị̄jo kisịta kisa na kimo. 14Babapēle ulutamyo lwa butumwa ulukulūmba fị̄jo mbūmị bwabo; bābapaga imbōmbo sya kubūmba amapāmba gakujengela inyụ̄mba, ni mbōmbo sya mịgūnda isya luko nu luko; mụmbōmbo syosa babīmililaga nubukali fị̄jo.
15Po papo umalafyale gwa Egịpịtị alinkubabūla abakịkulu Abahịbulị aba bāpāpisyaga abāna, ba Sifala na Pūja, alinkuti: 16Bo mụkubapāpisya abāna abakịkulu Abahịbulị, bo bịkupāpa, linga mwagịle umwana nnyāmbala mụkanngogege; lolị linga nkị̄kulu jo mụngaja kunngogaga. 17Lolị abapāpisya bāna bala bala bantị̄laga Kyala, bakākōngịle isị umalafyale abalagị̄le, balinkusịta ukubagoga abāna abanyambala aba bapāpịgwa. 18Po papo umalafyale gwa mw'Egịpịtị alinkubabilikila abapāpisya bāna bababa, alinkubalālūsya alinkuti: Fịkị mụkabōmba isị mbalagị̄le, mụtịkubagoga abāna abālumyāna? 19Abapāpisya bāna bala balimmwamwịle Falao bātịle: Abakịkulu Abahịbulị bakafwana nabakịkulu ba mw'Egịpịtị; tukwakwaga bapāpịle. 20Po papo lelo Kyala ābịmịle abapāpisya bāna bala, abāndu balinkōngelela ukubāla nukuja namaka mịngị. 21Panongwa jakuti abapāpisya bāna bala bantị̄laga Kyala, Kyala ābapēle utwāja twābo nabāna. 22Po Papo Falao alinkusōsya ululagilo ku bāndu bāke alinkuti: Umwana gwesa Unhịbụlị uju ịkupāpịgwa, linga nndumyana mụntāgege ndwisi Naịlị, lolị uju linga nndindwana jo mụnndekege mụngantāgaga.
Currently Selected:
Ukusōka 1: NYB96
Highlight
Share
Copy
Want to have your highlights saved across all your devices? Sign up or sign in
Nyakyusa Bible © Bible Society of Tanzania, 1996.
