Ubwandilo 50

1Po papo Josefụ alinkunkūmbatila ugwịse nukumfịpa. 2Po papo alinkubabūla abagānga aba bāli pa mbōmbo jāke ukuti bagupake ummbili gwa gwịse ni mịkota igi gịkukānịsya ukubola. Buno buno abagānga bala balinkugupaka umfị̄mba gwa Ịsịlaelị ni mịkota. 3Balinkubōmba īmbōmbo jijiji amasịku amalōngo mana (40); namanga go masịku aga abāndu bēgaga bwịla ukugipaka imifị̄mba gyabo ni mịkota. Ab'Egịpịtị balinkunndilila īfwa Jakobụ amasịku amalōngo mahāno na mabili (70). 4Bo gamalị̄ke amasịku ga kulilila īfwa, Josefụ alinkujoba kubā nnyụ̄mba ja Falao, alinkuti: Nịkubasūma ukuti mụkānjobele kwa Falao amasyu aga: Bo tāta alipị̄pị nu kufwa ālīngomēlị̄sye ukuti: 5Mfị̄nge ulufị̄ngo nkyenị mmyake ulwakuti nịsakwakunsyila mwịpūmba ili ālitendekị̄sye umwene nkị̄su kya Kanānị. Buno buno lelo ngusūma ukuti ngansyile tāta po lelo ngwakwịsa kangi. 6Po papo Falao alinkwamụla alinkuti: Būkaga, ukansyile ugūso bo mụmo ākulagilị̄le. 7Po papo Josefụ alinkusụmụka alinkufyuka kukunsyila Ugwịse alinkulōngosanịa na babōmbị bōsa ba Falao; 8Kangi na ba nnyụ̄mba ja Falao na bakulūmba bōsa aba nkị̄su kya. Egịpịtị kangi na ba nnyụ̄mba ja Josefụ na bāmyabo, kangi na ba nnyụ̄mba ja gwịse. Bēne babānābo bo balinkusyala, mụ Gosyenị ni mịtị̄mo gyabo igya ng'ōsị ni gya ng'ōmbe. 9Amageletị pamopēne naba bālị̄togịle pa falāsị balinkufyuka nabo, kilinkuja kilūndilo ikikulūmba fị̄jo. 10Bo bafịkịle pa kipalo iki kyali pa Atatị, kubusōkelo ilịsuba ku lusōko lwa Jolịtanị, balinkukụ̄ta īngụ̄to īngulūmba fị̄jo kangi ija kitịma. Josefụ alinkunndilila ugwịse amasịku mahāno na mabili. 11Abāndu ba nkị̄su kila kya Kanānị, bo bapilị̄ke ingụ̄to pa kipalo kya Atatị, balinkuti: Īji jo mfwa ingulūmba fị̄jo ab'Egịpịtị. Bunobuno ubujo bula balinkubupa ingamụ ja Abelị Mịsalaịmụ; ubujo bububu buli kubusōkelo ilịsuba. Pị̄sīlya lila lya lwisi lwa Jolịtanị 12Buno buno abāna ba Jakobụ bālintendekị̄sye ugwịsabo bo mụmo ābalagilị̄le. 13Balinkugupīmba umfị̄mba gwake ukubūka nago ku kị̄su kya Kanānị nu kwakunsyila mụ mbako iji jāli mụnngūnda gwa Makipela, iji Abụlahamụ ālyulịle kwa Efụloni ugwa kikolo kya ba Hịtị, kubusōkelo ilịsuba kubujo bwa Mamule, ukuti bujege bujo bwabo bwa kusyilịgwapo. 14Lelo bo Josefụ ansyilịle ugwịse, alinkugomokela ku kị̄su kya Egịpịtị pamopēne na bāmyabo na bāndu bōsa aba ābūkịle nabo kukunsyila ugwịse.

Josefụ ịkubabūla abāmyabo ukuti bangapasyaga atịkubafịnga

15Bo ugwịsabo afwịle, abāmyabo ba Josefụ balinkuja nulutēnde, balinkwịnogona ukuti, pamo Josefụ ịkubakalalilaga nukubabụkisya imbị̄bị isị abēne bālimmbōmbị̄le. 16Buno buno balinkutuma amasyu kwa Josefụ balinkuti: Ugūso bo akāli ukufwa ālagị̄le ukuti: Mụkāmbūlile Josefụ mukati: 17Nịkukusūma ukuti ubahobokelege abāmyinụ ku mbị̄bi Syabo isị bākubōmbị̄le; lilino tukukusūma ukuti utuhobokele imbị̄bị syitu twe babōmbị ba Kyala gwa bāgūso. Po papo Josefụ alinkwenda nukulila amāsosị bo bajobịle sịsịsị. 18Buno buno abāmyabo balinkwịsa nkyenị mmyake balinkufụgama pāsi nukungwila ulupị Josefụ, balinkuti: Uswe tulibabōmbị bāko. 19Umwene Josefụ alinkubabūla alinkuti: Mụngatị̄laga: ngīmba ne Kyala une? 20Umwe mwalịnogwịne ukumbōmbela īmbị̄bị; lolị Kyala alinkusyandula ukuja nụnụ, ko kuti abupoke ubūmị bwa bāndu abị̄ngị aba bo mụno sịjīlị̄le lilino. 21Buno buno lelo mụngatị̄laga une ngubaswilaga pamopēne na banīnụ. Buno buno alinkubasūbisya nukujoba nabo kanụnụ.

Ubufwe bwa Josefụ

22Po papo Josefụ alinkwịtūgala nkị̄su kya Egịpịtị pamopēne na ba nnyụ̄mba ja gwịse. Josefụ alinkugona ifyinja īmịa jimo ni fyinja kalōngo. 23Josefụ alinkubabona abāna nabābịsukulu ba Efulaịmụ aba ngulilo ija butatu: abāna ba Makịlị, Umwana gwa Manasị, bōpe bākētịgwaga ukuja bāna ba Josefụ. 24Josefụ alinkubabūla abāmyabo alinkuti: Une ndi pị̄pị ukufwa; lolị Kyala jo ịsakubịsilaga umwe, kisịta kwịlāmwa, kangi nkị̄su iki, ukubatwala ku kị̄su iki āfị̄ngịle nabo ba Abụlahamụ, na Ịsịhaka, na Jakobụ. 25Po papo Josefụ alinkubakomēlesya abāmyabo ukuti bafị̄nge ulufị̄ngo ukuti: Linga Kyala abị̄sị̄le umwe, mụkwịsa kusụmụkaga ni fịfụpa fyangu bo mụkusōkamo nkị̄su iki. 26Po papo Josefụ alinkufwa; bo ali nifyinja imịa jimo ni fyinja kalōngo (110). Balinkugupaka umfị̄mba ni mịkota gyakukānisya ukubola balinkugubīka mwịbokosị, mụla mula nkị̄su kya Egịpịtị.

Currently Selected:

Ubwandilo 50: NYB96

Highlight

Copy