Ubwandilo 49

Amasyu ga Jakobụ aga kubumalikisyo

1Po papo Jakobụ alinkubakōlela abānāke, alinkubabūla alinkuti: Amụbūngāne pamopēne mwesa, kokuti mbabūle isị sịsakubị̄silaga mmasịku aga gịkwịsaga. 2Amụbūngāne mwesa, mụpilikisyege; mwe bāna ba Jakobụ. Mụmbilikisye une ne gwịsēmwe Ịsịlaelị.

3Lubenị gwe gwakipānda gwangu, gwe maka gangu;

Gwe gwakwanda mbukusị bwangu,

Ubakīndịle abāngi ubukulūmba na maka.

4Papo uli mwalo, ukagumanya umwịko ukufwana mīsi aga gatēkịle, ko kuno utikujaga nkulūmba:

papo gwafyukịle pakitala kya gūso.

ulinkwenda nukukinyasya,

papo gwagonịle nunkasị gwangu.

5Sịmyonị na Lēbị banyamụ̄ndu;

Īnyūbo syabo bịkusịpelaga ukuja fịlwilo, fyakugogela abāngi.

6Gwemojo gwangu, ungajangamo sịku nsya mbụtị̄tu syabo.

Gwe ndụmbụla jāngu, ūngasụlwa ukwịjị̄ngisya ndukomāno lwabo; namanga mbukalale bwabo, babagogịle abāndu. Kangi mmatị̄ngo gābo babụ̄tịle amakīno ga ng'ōmbe.

7Sịgụnịgwege īngalalisị syabo īmbela lutēnde;

lyope ni lyojo lyabo, ili likaja nulupākisyo nalumo;

Nisakubabalanịaga nkị̄su kya Jakobụ, nịsakubanyāmbanịa mbany'Ịsịlaelị.

8Ugwe Jụta abāmyinụ bịsakukutụ̄fyaga, ikiboko kyako kisakubakolaga abalugu mmakosị.

Bōpe nabāmyinụ bịsakwịnamaga nkyenị mmyako.

9Jụta ali bo īngalamụ īndụbwa, iji jifyukịle jifụmịle nkufwima; iji jịkwịnama jịkulāmbalala, bo īngalamụ īngị̄kulu, jwanị abagị̄le ukujisāka?

10Ubunyafyale butịsakusōkangamo mwa Jụta, jōpe ningịlị ja bulagilị jitịsakusōkangapo pa malūndi gāke, mpaka papo ịsakwịsilaga umwene bulagilị, uju bōsa bịsakummwimịkaga.

11Mụmpịkị gwake ugwa

Māfị̄lu, mo ịsakujikūngaga

Īmwana ja mbụ̄nda;

Mbwalwa bwa māfị̄lu,

Moịkusụkaga imyenda gyake.

Ị̄kusukaga imyenda gyake

Mbwalwa bwa Māfị̄lu,

Ubu bufwene ịlopa;

12Amāso gāke gịsakukesēlaga, kunōngwa ja bwalwa bwa māfị̄lu ubu ịkunwa;

Kangi amị̄no gāke gogị̄sakujaga mēlụ swe ukufwana lukama ulu ịkunwa.

13Sebulonị jo ịsakwịtūgalaga

Pa mbali pa nyanja, ịsakujaga bujo bwa kwimapo ị̄sịtịma; ikị̄su kyake

kịkwakufịkaga kulubafụ lwa kị̄su kya Sịtonị.

14Isakalị ali bo īmbụ̄nda ija maka,

Īji jilāmbalēle mmatēmbe ga ng'ōsị.

15Alinkukēta ubutūsyo alinkwaga bunụnụ;

Kangi ni kị̄su alinkwaga kinụnụ,

Po alinkwenda nukwịnamịsya ikibeja kyake

Ukupīmba imịtwalo;

Po papo alinkufwana bo untumwa gwa mbōmbo īngafụ.

16Ndanị jo ịsakubalagilaga abāndu abankikolo kyake, kifwene bo ikikolo ikīngi kyosa mwa Ịsịlaelị.

17Ndanị ịsakujaga bo injoka iji jili pa njila,

Bo ju kị̄ko unkali uju ali pāmbali pa nsebo:

Uju ịkusịluma ifalāsị amalūndi,

Uju ịtogịle pa falāsị ịkugwila kūnyụma.

18Gwe NTWA nịkubugụ̄lila nulusubilo

Ubupokị bwako.

19Gandi jo fịsakummwịsilaga ifịlūndilo fya mịnyāmbụta

Lolị umwene jo ịsakufịtolaga nukufịkaga.

20Ifyakulya ifịnyāfụ fyo fịsakufụmaga nkị̄su kya Aselị

Jo ịsakusōsyaga ifya kulya ifị fibabagị̄le abanyafyale.

21Nafụtalị ali bo īmbabala īnyābule, Īji jịkupāpa ibāna inụnụ.

22Josefụ jo ali bo gu mpịkị unkeke ugu gụkupa;

Ugu gwabyalị̄gwe pị̄pị ni nyị̄buko ja mīsi;

Syope ni sāmba syake

Syalēme pamwanya pị̄mato.

23Abalugu bāke balinkunsyungūtila nu bupīndo.

Balinkunndasa nukuntamịa fị̄jo.

24Lolị ubupīndo bwake bulinkuja būmike, amaboko gāke gāli na maka;

Mmaka go Kyala ugwamaka gwa Jakobụ.

Mụngamụ ja ntị̄mị, jūjo ju lwalabwe lwa Ịsịlaelị.

25Kyala gwa gūso jo ịsakukutulaga,

Kangi Kyala umwene maka gōsa jo isakukusajaga ni sajo ị̄fụma kumwanya,

Kangi ni sajo īfụma mbusolofụ isị sịli pāsi,

Kangi nisajo sya

Mmabēle na nkifụba.

26Ịsajo sya gūso ngulūmba ukukīnda

Isajo isị sịkufụma mfyamba ifya bwịla,

Iseke sya mfyamba fya bwịla bwịla

Syo sịjege pantu gwa Josefụ,

Pa lundōsị lwa pantu

Pamyake unkulūmba uju asōsịgwemo

Mbāmyabo.

27Benjamịnị jo ali bo kamutu uju ịkutātulania, tātulanịa,

Nulubūnju po ịkulyaga ifị afwimịle,

Namajolo po ịkujabanịaga ifị afwimịle.

Ukufwa kwa Jakobụ nu kusyilịgwa kwake

28Bōsa bababa fyo fịkolo kalōngo na fịbili (12) ifya Ịsịlaelị, Kangi gagaga go masyu aga Ugwịsabo ābabūlịle bo ịkubasaja alinkumpa umụ̄ndu gwesa ulusajo ulu lummbagị̄le. 29Po papo Jakobụ alinkubalagila alinkuti: Une nsụmwịke pakubūngāna pamopēne na bākikolo kyangu mmbusyuka. Mwịse mụkasyilege na bātāta mụ mbako iji jili mu nngūnda gwa Efụloni Ugwakikolo kya ba Hịtị. 30Mụnngūnda ugu guli pa Makipela, kulubafụ lwa kubusōkelo ilịsuba ku Mamule nkị̄su kya Kanānị, jo mbako iji Abụlahamụ ālyulịle kwa Efụloni ugwakikolo kya ba Hịtị ukuja bujo bwitu bwa kusyilịgwapo. 31Kokuno jōpe na ju Abụlahamụ āsyilị̄gwe, kangi na ju Sāla unkasị; Ịsịhaka na Lebeka unkasị; kangi ko kuno nalinsyilịle na Lēja. 32Unngūnda na jīmbako iji jilịmo mụmo. Fyalyulị̄gwe kubakikolo kya ba Hịtị. 33Bo Jakobụ abalagị̄le abānāke, alinkupị̄ndanịa amalūndi gake pa kitala kyake, Po papo alinkusịlīlika, alinkwakōngāna nabākikolo kyake.

Currently Selected:

Ubwandilo 49: NYB96

Highlight

Copy