Ubwandilo 48

Jakobụ ịkubasaja ba Efulaịmụ na Manasị

1Pānyụma pali sịsịsị po balinkummbūla Josefụ balinkuti: Kēta: Ugūso mmbịne, po papo alinkubūka na bānāke bo babīli, Manasị na Efulaịmụ. 2Balinkummbūla Jakobụ balinkuti: Umwanāko Josefụ ịsịle, po papo Ịsịlaelị alinkwịkasya alinkwịtūgala pa kitala. 3Jakobụ alinkummbūla Josefụ alinkuti: Kyala umwene maka gōsa ālisetukị̄le une pakāja aka bịkuti Lụsu nkị̄su kya mụ Kanānị alinkwenda nu kūsaja. 4Alinkujoba nanịne alinkuti: Kēta nisakukōlosyaga fị̄jo, abānāko bịsakubālaga fị̄jo bịsakujaga kilūndilo kya bāndu, kangi ikị̄su nịsakubapaga aba nndujụ̄ngụ lwako aba bịkwịsaga pānyụma, ukuti kijege kilīngo kyabo bwịla bwịla. 5Abānāko bo babīli aba upāpịle nkị̄su iki kya Egịpịtị mụno bo ngāli nukufịka, nịne bānāngu. Efulaịmụ na Manasị bōpe bịkujaga banāngu, bo mụmo bājīlị̄le Lubenị na Sịmyonị. 6Lolị aba kwịsakupāpaga pānyụma bo bāko, lolị bịsakukyagilaga ikilīngo mụngamụ sya bāmyabo. 7Ulu mfụmege nkị̄su kya Pandani, Lahelị, alinkufwila panjila bo tukwenda nkị̄su kya Kanānị bo ngāli nukufịka nkāja kā Fụlatị, ndinkunsyila pala pala pa njila iji jikulabila ku kāja ka Fụlatị aka jo Betelehemụ.

8Bo Ịsịlaelịababwene abāna ba Josefụ, alinkunndālūsya alinkuti: Bo bānị aba? 9Josefụ alinkummwamụla alinkuti: Bo banāngu aba Kyala āmbēle nkị̄su iki. Ịsịlaelị alinkujoba alinkuti: Segelela nabo kuno mbasaje. 10Umwene Ịsịlaelị amāso gāke gāpūpēle, panōngwa ja bukāngale, buno buno alinkusịta nukukēta bunụnụ. Umwene alinkubatwala kumyake po papo umwene alinkubakūmbatila nukubafịpa. 11Ịsịlaelị alinkujoba kwa Josefụ alinkuti: Ngāsūbilaga napanāndi ukuti nịsakukubonamo kangi; lolị lilino Kyala ānyịtikị̄sye ukuti mbabone na banāko bōpe. 12Josefụ alinkubēpusyapo pamafụ̄ndo ga gwịse, alinkugụ̄ndama pāsi. 13Buno buno Josefụ alinkubēga bo babīli; Efulaịmụ alinkuja ku kiboko kyake ikị̄lilo, alinkunị̄ngana nikiboko ikị̄mama ikya Ịsịlaelị, Manasị jo alinkuja kukiboko kyake ikị̄mama, buno buno alinkunị̄ngana ni kiboko ikị̄līlo ikya Ịsịlaelị; alinkubasegelesya kumyake. 14Po papo Ịsịlaelị alinkugolosya ikiboko kyake ikị̄līlo alinkubīka pa ntu gwa Efulaịmụ uju āli jo nnāndi, ikiboko kyake ikị̄mama alinkubīka pantu gwa Manasị uju ali jo nkulūmba. 15Alinkunsaja Josefụ alinkuti: Kyala uju bātāta Abụlahamụ na Ịsịhaka bantị̄laga, Kyala uju āndōngosyaga mbūmị bwangu bōsa ukwịsa kufịka ku lilino kuno. 16Ugwandumị gwa Kyala uju āmbokịle une kububị̄bị bōsa, jo abasajege abālumyāna aba; ukuti mmyabo mo bajikumbukilengemo bwịla īngamụ jāngu ni ngamụ sya bātāta Abụlahamụ na Ịsịhaka. Babālege bajege kikolo kinywamụ, bị̄sulege nkị̄su.

17Josefụ āsụlụmēnịe bo āgịle ukuti ugwịse abīkịle ikiboko kyake ikị̄lilo pantu gwa Efulaịmụ po papo alinkusōsyapo ikiboko kya gwịse pantu gwa Efulaịmụ ukukibīka pantu gwa Manasị. 18Alinkummbūla ugwịse alinkuti: Gwe tāta, bo sịngajagạ buno buno, unkulūmba jo uju; jo lolị jo ummbīkengepo pantu ikiboko kyako ikị̄līlo. 19Umwene ugwịse alinkukāna alinkuti: Ena mwanāngu nsịmēnye, bōpe na bāna ba Manasị bịsakujaga kikolo kya bāndu ikikulūmba, lolị unnụgụna jo ịsakunkīndaga unkulu ubukulūmba; abanndujụ̄ngụ lwake bịsakwịpelaga ukuja kilūndilo kya fịkolo fya bāndu ba nkị̄su. 20Po papo alinkwenda nukubasaja mwịsịku līlyo alinkuti: Mmyinụ umwe mo abany'Ịsịlaelị bịsakujobelaga isya lusajo apa linga bịkuti, Kyala akupelege ugwe ukuja bo ju Efulaịmụ na Manasị. Buno buno alinkwenda nukummbīka Efulaịmụ nkyenị mwa Manasị.

21Po papo Ịsịlaelị alinkummbūla Josefụ alinkuti: Ukēte, une lilimo ndipị̄pị ukufwa; lolị Kyala ịsakujaga nanụmwe, kangi ịsakubagomokesyaga umwe ku kị̄su kya bị̄sēmwe. 22Une ngupēle ugwe akāja kamo aka mboto, Syekemụ, ukukīnda abāmyinụ aka une nāpokịle mmaboko ga baamolị nu lūbo lwangu kangi nu bupīndo bwangu.

Currently Selected:

Ubwandilo 48: NYB96

Highlight

Copy