Ubwandilo 47

1Po papo Josefụ alinkwakwịngila mụno ālịmo Falao alinkunndīngānịa, alinkuti: Tāta na bamyitu bị̄sịle ukufụma nkị̄su kya Kanānị pamopēne ni mịtị̄mo gyabo, igya ng'ōmbe ni ng'ōsị kangi fyosa na ifị bāli nafyo, lilino bali mụ Gosyenị. 2Po papo alinkubēgapo abāmyabo bahāno bo alinkwakubanāngisya kwa Falao. 3Umwene Falao alinkubalālūsya alinkuti: Mụkubōmba mbōmbo nngị? Abēne balinkummwamụla Falao balinkuti: Twe bāndu bāko tuli batị̄mị ba mịtị̄mo bo mụmo bājīlị̄le na ba bātāta. Balinkummbūla kangi Falao balinkuti: 4Twe bāndu bāko twịsịle ukuti tujege baponị nkị̄su iki; namanga ilị̄su lya kulya imịtị̄mo gyitu likajamo nkị̄su kya Kanānị, kangi jōpe ni njala jigwịle fị̄jo, lilino lelo tukukusūma ukuti utwịtikisye twe bāndu bāko tukītugalege nkāja ka mụ Gosyenị. 5Falao alinkummbūla Josefụ alinkuti: Ugūso na bamyinu bị̄sịle kumyako. 6Ikị̄su kya Egịpịtị kili pa bwelụ nkyenị mmyako ubabīkege pa bujo ubunụnụ po bị̄tūgalege ugūso na bamyinu, bị̄tūgalege nkāja ka Gosyenị. Kangi linga gwagịle ukuti balịmo abāndu aba babagị̄le nkilūndilo kyabo ubabīkege bajege bakulūmba ba mịtị̄mo gyangu.

7Po papo Josefụ alinkuntwala ugwịse Jakobụ nkyenị mwa Falao. 8Umwene Falao alinkunndālūsya Jakobụ alinkuti: Uli nifyinja fịlīnga? 9Jakobụ alinkummwamụla alinkuti: Ifyinja fya būmị bwangu ifị ngonịle bo nịkwembēla nkị̄su iki, fịli īmịa jimo ni fyinja amalōngo matatu (130), fyinja fịnāndi ịtolo, kangi fya butolwe fịkafwana bo ifyinja fya bātāta ifị bāgonịle mbūmị bwabo bo bịkwembēla nkị̄su kikiki. 10Po papo Jakobụ alinkunsaja Falao, alinkusōkamo nkyenị mwa Falao. 11Buno buno Josefụ alinkunsalila ugwịse na bāmyabo ubujo ubunụnụ nkị̄su kya Egịpịtị, alinkubapa ukuja kyabo ikị̄su kya Lamasesị bo mụmo ālagilị̄le Falao. 12Josefụ alinkumpa ifyakulya ugwịse na bāmyabo, kangi bōsa aba bālịmo nnyụ̄mba ja gwịse, ukwakufịka na kutukeke tōsa.

Ubulongosị bwa Josefụ mfyinja fya njala

13Fikālịmo ifyakulya nkị̄su kyosa injala jāli ngulūmba fị̄jo, buno buno lelo abāndu ba nkị̄su kya Egịpịtị na ba nkị̄su kya Kanānị balinkuja mbutolwe fị̄jo panōngwa ja njala. 14Umwene Josefụ jo alinkusịbūngānịa īndalama syosa isị āsyagaga pakūlisya ifyakulya nkị̄su kya Egịpịtị ni kya Kanānị; īndalama sịsịsị syo alinkusịtwala kunyụ̄mba ja Falao. 15Bo abāndu bamalịle syosa īndalama nkị̄su kya Egịpịtị, na nkị̄su kya Kanānị, ab'Egịpịtị bōsa balinkwịsa kwa Josefụ balinkuti: Tupepo uswe ifyakulya, nōngwa jā fịkị ijakuti tufwege ni njala bo nanụngwe kukēta? Īndalama syitu sịmalị̄ke. 16Umwene Josefụ alinkubabūla alinkuti: Linga indalama syinụ sịmalị̄ke, mụtwalege ing'ōmbe syinụ, po nịkubapaga ifyakulya ukūsanịa ning'ōmbe syinụ. 17Buno buno abāndu balinkutwala īng'ōmbe syabo kwa Josefụ: po papo Josefụ alinkubapa ifyakulya ukūsanịa ni falāsị, ni ng'ōsị, ni ng'ōmbe kangi ni mbụ̄nda. Ikyinja kyosa kila kila alinkubapa ifyakulya ifị būsanịaga ni fya mmịtị̄mo gyabo. 18Lelo bo ikyinja kila kimalị̄ke, abāndu balinkwịsa kangi nkyinja ikinịne balinkuti: Gwe malafyale, gwitu, tukabagila ukufịnda kumyako, indalama syitu syosa sịmalị̄ke, gyope na gi mịtị̄mo, ugwe gwe malafyale gwitu. Bo mụmo nanụngwe usịkētịle, kakasyalako nakamo akāndu lolị gyene gi mịbili gyitu ni mịgūnda po papo. 19Ngīmba nōngwa jā fịkị tufwege, tumalikege nkị̄su kyitu, bo kukēta na māso gako? Po kunụnụ utūle uswe na fịfị̄su fyitu fyope, ukuti tukabe ifyakulya, po lelo uswe pamopēne ni fị̄su fyitu tukujaga batumwa ba Falao; utupepo ji mbejụ jēne ko kuti tungafwaga, kangi nukuti ikị̄su kyitu kingafụjụkaga.

20Buno buno Josefụ alinkummūlila Falao ifị̄su fyosa fya nkị̄su kya Egịpịtị namanga ab'Egịpịtị bōsa balyulị̄sye imịgūnda gyabo, papo injala jakīndilị̄le. Ikị̄su kyosa kilinkuja kya Falao. 21Po papo lelo abāndu bōpe balinkuja batumwa. 22Kyene kikị̄su kya bapụ̄tị kyo alinkusịtakūla; papo abapụ̄tị bāli nimịgūnda igi ābajabị̄le Falao, ukuja fyo fị̄ndu fyabo, fyo balinkulya; fyobēne balinkusịta nukūlisya ifị̄su fyabo. 23Po papo Josefụ alinkubabūla abāndu alinkuti: Kēta umụsyugu mbūlịle umwe na kikị̄su kyinụ ukuja kyuma kya Falao. Amwege īmbejụ iji, mụbyalege mmịgūnda. 24Lolị pa mfụ̄njo po mwịsakumpaga Falao ikijabo kimo mfị̄jabo fịhāno; ifị fịsyele fyo fịkujaga fyinụ umwe; fya mbejụ jā kubyala kangi fyakulya jujumwe na bankikolo kyinụ, na banīnụ. 25Abēne balinkwamụla balinkuti: Gwe malafyale, utupokịle, ubōmbịle fị̄jo, uswe tujege batumwa ba Falao. 26Buno buno Josefụ alinkulupela ukuja lulagilo nkị̄su kya Egịpịtị ulu lukwendelela ukufịka na ku lilino kuno, ulwakuti, Falao ikwambililaga ikijabo kimo mfịjabo fịhāno; mụli ifị bafụ̄njịle, lolị ki kị̄su kya bapụ̄tị kyene kyo kilinkusịta nukuja mmaboko ga Falao.

Jakobụ ịkunsūma Josefụ ulwakubumalikisyo

27Buno buno Ịsịlaelị alinkwịtūgala nkị̄su kya Egịpịtị, nkāja kā Gosyenị. Balinkuja ni fyuma ifị̄ngị kangi balinkōloka fị̄jo. 28Jakobụ āgonịle Mwegịpịtị ifyinja kalōngo na fịhāno na fịbili (17). Buno buno ifyinja fyake fyosa pamopēne fịlinkuja īmịa jimo na malōngo mana ni fyinja fịhāno na fịbili (147).

29Bo Ịsịlaelị amēnye ukuti akabalilo kāke kākufwila kasegelị̄le, alinkummbilikila umwanāke Josefụ. Alinkummbūla alinkuti: Linga nalolị gwịkyelịle nanịne po ungole indapatapa, ufị̄nge ukuti: Utịsakūsyīla une nkị̄su iki kya Mwegịpịtị. 30Ngulōnda ukuti linga mfwịle gwịse ūmbīmbege une ukufụma nkị̄su iki ikya Egịpịtị nukwakusyila apa bāsyilị̄gwe bātāta. 31Umwene alinkuti syo unjīgilege sịsịsị. Po papo umwene alinkwenda nukulapa kugwịse. Po papo Ịsịlaelị alinkwịnamịla kuntu kukitala, alinkwịpụ̄ta.

Currently Selected:

Ubwandilo 47: NYB96

Highlight

Copy