Ukusōka 20

Ingomelesyo mulōngo

1Po papo Kyala alinkujoba amasyu gōsa aga alinkuti: 2Joune ne NTWA Kyala gwako ne nakusōsịsye nkị̄su kya Egịpịtị, muno gwali mbutumwa. 3Ungajaga na bakyala abāngi, lolị jujune nịmwene.

4Ungịtendekekesyaga ikifwanị kya kāndu aka kali kumwanya, pamo aka kalị pāsi pakị̄su, pamo aka kali mmịsị pāsị pakị̄su. 5Ungịpụtaga kuli fịfị̄fyo nukufịbōmbela. Namanga une ne NTWA ne Kyala gwa būfị. Ngutwala ulūfundo kulị aba bā mbengịle: Kubịsabo, kubānābo, kubịsukulu bābo, kubanyēnya bābo na kubanyēnya ba banyēnya. 6Loli ngubagana abāndu abāfịkolo baelufụ aba bānganịle une aba bịkukōnga indagilo syangu. 7Ungajijobaga mwalo ingamụ ja NTWA Kyala gwako, namanga UNTWA Kyala atịsakunndekaga ukumfụ̄nda uju ikujijoba mwalo ingamụ jāke.

8Ulikumbukege ilịsịku lya sabati ukuti lya kutūsya, ulyimikege ukuja lịkemo. 9Mmasịku ntandatu ubombege imbōmbo syako syosa. 10Lolị pị̄sịku lya buhāno na bubili jo Sabati gwa NTWA Kyala gwako. Utịsakūbōmbaga imbōmbo najimo pị̄sịku lililyo, ugwe numwanako unndumyana, numwanako unndindwana, nababōmbị bako abanyambala nabakị̄kulu, ni ng'ōmbe syako, nunhēsya gwako. 11Namanga mmasịku ntandatu UNTWA āpelịle kumwanya ni kị̄su, ni nyanja, na fyosa ifị fịlịmo mụli fịfịfyo; lolị pị̄sịku lya buhāno na bubili ātusị̄sye; jo nōngwa iji UNTWA alīsajịle ilịsịku lya sabati, ālibīkịle ukuja lịkemo. 12Ummwimịkege ugūso nu nyoko, po kwịsakujaga nubūmị ubutalị nkị̄su iki UNTWA Kyala gwako ākupēle. 13Ungagogaga. 14Ungalogwaga. 15Ungahījaga.

16Ungantungulupilaga umpalamanị gwako. 17Unganyonywaga inyụ̄mba ja mpalamanị gwako. Unganyonywaga unkasị gwa nnịno, nu mmbōmbị gwake unnyāmbala pamo unkị̄kulu, ni ng'ōmbe syake, ni mbunda na kāndu kōsa akāngi aka alinako.

Ulutēnde ulu lwabāgile abāndu

18Abāndu bōsa lwabakomịle ulutēnde bo injasị sịkutajanịka, imụlị sya fụla sịkumụlika, ingangabwịte jịkung'ēka, ikyamba kịkufụ̄ka ilyosị; balinkutị̄la balinkwima balinkutandamala pabutalị. 19Balinkujoba kwa Mose balinkuti: Ujobege kumyitu jujugwe, tukupilikisyaga; lolị Kyala jo angajobaga nanụswe twịsakufwa. 20Mose alinkubāmụla alinkuti: Mụngatetemaga; Kyala ịsịle kukubagela kokuti ukuntila kujēngege mụndụ̄mbụla syinụ ko kuti mungabombaga imbị̄bị.

21Bo buno buno abāndu balinkwima pabutalị apa bālịpo, bo Mose ịkusegelela kwịbīngu ilịtị̄tu mụno ālịmo Kyala.

Indagilo sya fịgemo fya kwịkemēkesyapo

22UNTWA alinkummbūla Mose alinkuti: Ujobege na bany'Ịsịlaelị ukuti: Mụsịbwene jujumwe na māso gīnụ ukuti njobịle nanụmwe ukufụma kumwanya. 23Mụngitendekekesyaga baKyala ba fesa nabamo. 24Mụnjēngelege ikigemo kya mfụ ikya kwịkemēkesyapo amakemo amōkye na makemo ga lutengāno, ing'ōsi syinụ ni ng'ōmbe syinụ; mbujo bosa mụno ngumụpēlaga ukuti ingamụ jāngu jikumbukịgwege, ngubị̄silaga ngwịsakubasajaga. 25Linga mụkunjengela ikigemo kya kwịkemēkesyapo ikya mabwe, mụngịsakujēngelaga amabwe amasōngole, papo linga mukugasōngola, ifịbōmbelo ifị mụkusōngolela fịsakuganyasyaga gatisakubagila ku mbōmbo jāngu. 26Ikigemo kyangu kikiki mungịsakukijengelaga untandalilo gwa mabwe, ugwakufyukilapo; linga mụbōmbịle sịsịsị āmụkwagaga imyenda gyinụ gifụ̄lwị̄ke mụli ịtolo bo mụkukwela mụ ntandalilo.

Currently Selected:

Ukusōka 20: NYB96

Highlight

Copy