Ukusōka 19

Abany'Ịsịlaelị pa kyamba Sịnai

1Pị̄sịku lya kwanda ilya mwesị ugwa butatu bo gukusomoka abany'Ịsịlaelị bāfụmịle pa kusōka nkị̄su kya Egịpịtị, po apa abany'Ịsịlaelị bāfịkilaga nndūngalāngala lwa Sịnai. 2Lelo bo bafịkịlepo pa Lefịtịmụ bịngị̄le nndūngalāngala lwa Sịnai balinkujēnga amatēmbe nndungalāngala nkikolo nkyamba kya Sịnai. 3Po pāpo Mose alinkufyuka ukubūka kwa Kyala, po papo UNTWA alinkukolela ukufụma pa kyamba alinkuti: Oko babūlege abannyụ̄mba ja Jakobụ, ukajobege ku bany'Ịsịlaelị ukatigi: 4Mụsịbwene isị mbabōmbị̄le ab'Egịpịtị, na muno nabapīmbị̄le umwe bo apa Ilīpūla lịkupīmba abānāke mmapiko gāke ukubatwala kumyangu jujune. 5Bo buno buno lelo linga mụkwịsakukōnga isị ngujoba nukulubīka ulufị̄ngo lwangu, mwịsakuja bāndu bāngu kangi kyuma kyangu mmbāndu bosa pakị̄su; pāpo ikị̄su kyosa kyangu une. 6Kumyangu mwịsakujaga kịtāngālala kya bapụ̄tị kangi āmụkujaga kikolo ikị̄kemo. Aga go masyu aga mụkwakujobaga ku bana ba Ịsịlaelị.

7Po papo Mose alinkubūka alinkwakubakōlela abakulūmba kubīnābo, alinkubategelekesya nkyeni mmyabo amasyu gōsa gagaga aga UNTWA ālinndagị̄le. 8Po pāpo abāndu balinkōmolanịla pamopēne bosa ukwamụla balinkuti: Syosa isị UNTWA ajobịle uswe ātụkusịbōmbaga. Po lelo Mose alinkummbūla UNTWA amasyu ga bāndu gagaga. 9UNTWA ālimmwamwịle Mose ātịle: Une ngwịsa kumyako mwịbīngu ilịnywamụ, kukuti abāndu bịse bambilikege bo ndi pakujoba nanụngwe, kangi ukuti bakusūbilege bwịla ịtolo.

Po papo Mose alinkummbūla UNTWA isị abāndu bālyamwịle. 10Kangi UNTWA alimmbūlịle Mose ātịle: Ubūke kubāndu ukubabūle ukuti bị̄jēlusyege umwịsyugu na kilābo kunōngwa ja lwịpụ̄to. Bangajakusụlwa ukusịta kusụka imyenda gyābo. 11Nukwitendekesya pị̄sịku lyabutatu. Ilịsịku lila lila nịsakusuḷụka ukwịsa pa kyamba Sịnai, apa abāndu bosa bịsakūmbonaga. 12Po akubasyungukisyaga nkyamba abāndu ikimanyịlo kya mpaka nukubabūla ukuti: Mụje māso, najumo angakịlanịaga ikimanyịlo kikiki ukufyuka nkyamba pamo ukupalamāsya umpaka gwake mụno kipelịle; uju linga ịkukipalamāsya ikyamba ịsakugogịgwaga; 13na kimo ikiboko kitịsakunkolangapo, uju linga ankolịlepo ịsakugogịgwa. Lolị linga ingangabwịte jịkulila jịkūmīlisya po abāndu bịsakukwelaga pakyamba. 14Po papo Mose alinkusụlụka ukufụma pakyamba alinkubabūla abāndu ukuti bị̄tendekesyege isya lwịpụ̄to. Balinkwenda nukusụka imyenda gyabo, 15Mose alinkubabūla kangi alinkuti: Mwịtendekesyege isya pị̄sịku lya palubūnju, ukufụma ulu mụngasegelelaga kunkị̄kulu najumo.

16Pị̄sịku lya butatu nulubūnju kulinkujako ukutajanịka nukumụlika kwa fụla, lyabonịke ilịbīngu ilịnywamụ pakyamba, kangi ukulila kwa ngangabwịte iji jālātaga kulinkupilikịgwa, abāndu bosa mwịkāmbi balinkutetema. 17Po papo Mose alinkubasōsya mwịtēmbe alinkubūka nabo kukwaganịla na Kyala, balinkwakwima nkikolo nkyamba. 18Ikyamba Sịnai kyosa kyakupikilịgwe Nilyosị namanga UNTWA ālyendịle mmōto bo ịkusụlụka. Ilyosị lilinkufyuka kumwanya ukufwana lyosị lya ịtēnde lya mōto, abāndu bosa balinkutetema fị̄jo. 19Īngangabwịte jilinkongelela ukulāta ukulila. Mose bo ịkujoba, Kyala alinkummwamụlila mụ njosị. 20Po papo UNTWA alinkusụlụka ukwịsa pa kyamba Sịnai alinkunkōlela Mose ukuti afyuke pakyamba. Mose alinkwenda nukufyuka. 21UNTWA alinkummbūla Mose alinkuti: Sụlụka ukabasoke abāndu ukuti bangalobokaga umpaka ukwịsa kukūngēta; linga balobwịke bị̄ngị bịsakufwa. 22Bōpe abapụ̄tị aba bịkwịsa kumyangu fịkuti bị̄jēlusyege tāsị, linga batịkubōmba sịsịsị nịsakubafụ̄ndaga. 23Mose alinkujoba ku NTWA alinkuti: Abāndu bakabagila ukuti bafyuke ukwịsa, papo gwatulagị̄le ukuti ikyamba tukibīkị̄le umpaka nukukipela kị̄kemo.

24UNTWA ālyamwịle ātịle: Sụlụka ukammwege Alonị ukị̄sege nagwe. Lolị abapụ̄tị nabāndu bo bangajakusụlwa ukukilanịa umpaka ukukwela ukwịsa kumyangu, linga babōmbịle sịsịsị nịsakubafụ̄ndaga. 25Po papo lelo Mose alinkusụlụka ukubūka kubāndu alinkubabūla isị UNTWA ājobịle.

Currently Selected:

Ukusōka 19: NYB96

Highlight

Copy