Ukusōka 18

Jetịlo ịkwịsa kukumponịa Mose

1Jetịlo umpụ̄tị gwa Mịtanị, unko gwa Mose āpilị̄ke syosa isị Kyala ālimmbōmbị̄le Mose na bāndu bāke abany'Ịsịlaelị, na mụno UNTWA ābasōkị̄sye abany'Ịsịlaelị ukufụma mw'Egịpịtị. 2Jetịlo unko gwa Mose ālintwele Sịpola, unkasị gwa Mose uju ālinkagịle, 3na banāke babili abālumyāna, mụli aba jumo ingamụ jāke ali jo Gelịsomụ papo atigi, ndi mwendanjila nkị̄su kya buhēsya 4ingamụ ja jūngi unnịne, āli jo Elịjeselị papo atigi Kyala gwa tāta bwali butuli bwangu, kangi ālimbokịle ku ngwego ja Falao. 5Po papo Jetịlo unko gwa Mose alinkwịsa kwa Mose na nka Mose na bānāke abālumyāna, bālịsịle kwa Mose nndūngalāngala kuno ājēngịle ilịtēmbe nkyamba kya Kyala. 6Lelo bo umụ̄ndu jumo ammbūlịle Mose ukuti unkogo Jetịlo ịkwịsa kumyako, ịsịle nunkasịgo na bāna abālumyāna babili, 7Mose alinkusōka kukwaganịla nunko, alinkumponịa nulwimịko alinkumfịpa; po papo balinkwenda nukulālūsanịa isya būmị, uju alinkulōnda ukumanya ubumi bwannịne uju ubwa nnịne, po balinkulōngosanịa ukubūka mụhēma. 8Po papo Mose alinkumpāngila unko syosa isị UNTWA ālimmbōmbị̄le Falao na Begịpịtị kunōngwa ja bany'Ịsịlaelị, alinkumpāngila nubutolwe bosa ubu bwabāgịle mụnjila, na mụno UNTWA ābapokị̄le kubutolwe. 9Po papo Jetịlo alinkusekela kunụnụ syosa isị UNTWA ābabōmbị̄le abany'Ịsịlaelị, ukubapoka nkiboko kya Begịpịtị.

10Kangi Jetịlo ātịle: Atụfịgwege UNTWA, uju ābapokịle kukiboko kya Begịpịtị na kukiboko kya Falao; atụfịgwege UNTWA uju ābābwịle mbutumwa abāndu bāke. 11Lilino po mmēnye ukuti UNTWA jo nkulūmba kwa bakyala bōsa pāpo abapokịle ukufụma pāsi pa kiboko kya Begịpịtị, aba babangalilaga. 12Po papo Jetịlo unko gwa Mose alinkusōsya ilịkemo ilyokye na makemo agāngi kwa Kyala; Alonị alinkwịsa na mafụmụ gōsa ga Ịsịlaelị kukulya ifị̄ndu nunko gwa Mose nkyenị mwa Kyala.

Ukubabīka abalōngị bakutumula inōngwa

13Kilābo kyake ikīngi ukufụma nulubunju Mose ātūgēle pakubalōngania inōngwa abāndu balinsyungutile Mose ilịsịku lyosa ukufụma nulubūnju ukufịka namajolo. 14Lelo bo unko ajobịle atịle: Ko kuti fịkị ukuti utamịgwege buno buno ukubabōmbela abāndu aba? Fịkị kwịtugala gwịmwene bo abāndu bīmịle bakusyungūtị̄le ukufụma nulubūnju mpaka namajolo? 15Mose alimmwamwịle unko ātịle: Nōngwa jakuti abāndu bababa bịkwịsa kumyangu kukamanyila isị Kyala ịkulōnda ukuti abāndu bakōngege. 16Bo baligēne bịkwịsa kumyangu, po lelo ngubalōnganịa umụ̄ndu nu mpalamanị gwake, po ngwenda nukubamanyịsya indagilo sya Kyala ni ndụmụlilo syake. 17Unko gwa Mose ālyamwịle ātịle: Isị kubōmba sịkaja nụnụ. 18Ugwe pamopēne na bāndu aba kubōmba nabo mụkwịkonyola mwịbēne ni mbōmbo ijo, papo mbōmbo sịto fị̄jo ijo kumyako; ukabagila ukuti ujibōmbege gwịmwene. 19Lilino umbilikisye isị ngujoba; ngukumanyịsya isyakuti syo ubōmbege lelo Kyala ajege nanụngwe! Ugwe kubīmilaga abāndu nkyenị mwa Kyala, inōngwa syabo kuntwalilaga Kyala; 20ugwe kubamanyịsyaga indagilo sya Kyala ni ndụmụlilo syake, kangi ubalīngānịege isya lwendo ulu lukulōndịgwa ukuti bajege nalo naisị fịkuti babōmbege. 21Isị̄ngị kangi ubasale bamo abāndu abāmahala, aba bịkuntị̄la Kyala, abāndu abasūbilịgwa aba bafịbēngịle ifịhōmbịgwa fya mbutịṭ̄u ifyakuti umụ̄ndu atobesye inōngwa napapo mbị̄bị isyake; bo ubabīke bababa pamwanya pa bāndu, bajege balōngosị ba bāndu aba bali mwa baelufụ, aba bali mwa bamịa, aba bali mmalōngo mahāno mahāno, naba bali mmalōngo mụlōngo mụlōngo. 22Bababo bo babalōngege abāndu utubalilo tōsa; inōngwa jōsa ingafụ jo bịsege najo kumyako, lolị īnōngwa syosa īnāndi syo batụmụlege bābo; po lelo kumyako unsịgo gwịsakupepuka, po akutūlanaga nabo ukupīmba unsịgo. 23Linga kwịsakubōmba sịsịsị, ukukōnga mụno Kyala ịkukulagililaga, po kwịsakwendelelaga ni mbōmbo kisịta kukatala kangi abāndu bosa ābịkugomokelaga ntwaja twabo nulutēngāno, bo bịkwịte ni ndụmụlilo sya nōngwa.

24Po papo Mose alinkusyambilila isị Jetịlo alimmbūlịle isya kuntūla mụ mbōmbo jāke, alinkusịbōmba syosa bo mụmo ālinsokị̄le. 25Po papo Mose alinkubasala abāndu abāmaka nkilūndilo kya Ịsịlaelị bo balinkuja balōngosị babāndu, balinkuja balōngosị ba bāndu aba bāli mwa baelufụ, nāba mwa bamịa, naba mmalōngo mahāno mahāno, naba mmalōngo mụlōngo mụlōngo. 26Balinkubalōngania abāndu utubalilo tōsa; inōngwa isị syajaga mbalapala syo balinkuntwalila Mose, lolị inōngwa syosa ināndi syo balinkutụmụla bābo. 27Po papo lelo Mose alinkunsụmụsya unko; unko alinkubūka ku kị̄su kyake.

Currently Selected:

Ukusōka 18: NYB96

Highlight

Copy