Ukusōka 17

Amīsi amafụma nndwalabwe

1Po papo lelo ikilūndilo kya bany'Ịsịlaelị kyosa kilinkwenda mbutūsyo ukufụma nndungalāngala lwa Sịnai ukukōngana nululagilo lwa NTWA; balinkujēnga amakāmbi pa Lefịtịmụ; lolị lelo pala pala gakālịpo nagamo amīsi gākunwa. 2Bo buno buno abany'Ịsịlaelị balinkwịbụnēsya kwa Mose balinkuti: Tupepo amīsi gākunwa. Mose ābamwịle ātịle: Fịkị mụkūmba inōngwa une? Fịkị mụkunngela UNTWA? 3Lolị abāndu bababa ikyumilwa kyamīsi kyabakolịle fị̄jo, balinkwịbụnēsya kangi kwa Mose balinkuti: Nōngwa ja fịkị gwatusōsịsye mw'Egịpịtị? Gwatusōsyaga ukuti utugoge uswe nabānītu ni ng'ōmbe syitu ni kyumilwa? 4Po papo Mose alinkukụ̄ta ku NTWA alinkuti: Kali mbōmbe fịkị na bāndu aba? Pasyele panāndi abēne ukūngoga une na mabwe. 5UNTWA ālimmwamwịle Mose ātịle: Ukīnde nkyenị mbāndu, ugēge gamo amafụmụ ga Ịsịlaelị; kangi nkiboko ukolele īngịlị iji gwalukomị̄le ulwisi Naịlị, po mụsụmụkege ukubūka. 6Ukēte ngwakwima nkyenị mmyinụ pa lwalabwe lwa pa Holebụ pakyamba Sịnai; po papo lelo ugwe kwakukoma ulwalabwe, po amīsi gịkwakusōkaga ukufụma nndwalabwe ukuti abāndu banwege. Po lelo Mose alinkubōmba bo sịsịsị bo amafụmụ ga Ịsịlaelị gịkukēta. 7Po papo alinkwenda nukubupa ingamụ ubujo bula bula alinkuti jo Masa na Melịba kunōngwa ja kwịbụnēsya kwa bany'Ịsịlaelị, kangi kunōngwa ja kunngela UNTWA apa batigi: UNTWA ali na nūswe pamo mma?

Ubwịte na Bamaleki

8Po papo lelo alinkwịsa Amalekị alinkulwa na Ịsịlaelị pa Lefịtịmụ. 9Po lelo Mose alinkujoba na Joswa alinkuti: Utusalile abāndu ubūke nabo kukulwa na Amalekị; kilābo une ngwakwima pa mwanya pa kyamba ningịlị ja Kyala nkiboko kyangu. 10Bo buno buno Joswa alinkubōmba bo mụmo Mose alimmbūlị̄le, alinkulwa na Amalekị; po Mose, na Alonị na Huli balinkukwela pamwanya pa kyamba. 11Akabalilo kosa aka linga Mose ịnwịle ikiboko kyake abany'Ịsịlaelị bābatolaga Abāmalekị; kangi akabalilo kosa akalinga Mose asụlwịsye ikiboko kyake Abāmalekị bābatolaga abany'Ịsịlaelị. 12Lelo amaboko ga Mose gākatele; po papo balinkwega ilị̄bwe bantugasyapo, ba Alonị na Huli bammwịnulila mmwanya amaboko gāke, uju ulubafụ ulu uju ulubafụ ulu; po papo amaboko gake galinkuja bula bula mpaka ukwịngila ilịsuba. 13Po papo Joswa alinkubasengela pāsi nulūbo Amalekị na bāndu bāke.

14UNTWA alinkummbūla Mose alinkuti: Sịsịsị usịsịmbe mwa kalata ukuja syakukumbukilamo, po ukammbūlege Joswa mụ mbulukutu syake, ukuti ngōmolaga lōsa ingamụ ja Amalekị pakị̄su apa. 15Po papo Mose alinkujenga ikigemo kya kwịkemēkesyapo alinkukipa ingamụ ja kuti: UNTWA jo Ndēmbēla jāngu, 16alinkuti: Ịnulaga indēmbēla ja NTWA, UNTWA ịsakulwaga ubwịte na Amalekị mụngulilo syosa.

Currently Selected:

Ukusōka 17: NYB96

Highlight

Copy