Ukusōka 16

Mana ni mbesya (Imbesị)

1Abany'Ịsịlaelị bosa balinkusụmụka kangi ukufụma ku Elịmu balinkubūka nndungalāngala ulu bịkuti Sịnị, ulu luli pakati pa Elịmu na Sịnai, bāfịkịle mụla pịsịku lya kalōngo na mahāno ilya mwesị gwabubili ukufụma ulu basụmụkilege mw'Egịpịtị. 2Po papo lelo ikilūndilo kyosa kyabany'Ịsịlaelị kilinkwịbụ̄nēsya kwa Mose na kwa Alonị nndungalangala, 3kilinkuti: Pākị linga UNTWA ātugogelaga mụ mw'Egịpịtị mụno twatugalaga kifụkị ni ndeko sya nyama kangi mụno twalyaga ifị̄ndu twịkutaga, lilino umwe mụtutwele kulungalāngala kuno papo mụtịle ikilūndilo kyosa kikafwega ịnjala.

4Lelo po papo UNTWA alinkujoba kwa Mose alinkuti: Ukēte, lilino ngubalagakisyaga ifị̄ndu ukufụma kumwanya; po lelo abāndu kukuti ịsịku bịkusōkaga pa kusala ifya kubafwana mwịsịku, ukuti mo mbamanyịlege ukuti bịkukōnga isị ngubalagila pamo mma. 5Pịsịku lya ntandatu, pō bịsakubūngāniaga ifị̄ndu fya masịku mabili. 6Po papo Mose na Alonị balinkubabula abany'Ịsịlaelị bōsa balinkuti: Namajolo po āmụkumanyaga ukuti jo NTWA uju abasōsị̄sye nkị̄su kya Egịpịtị. 7Kangi nulubūnju āmụkububonaga ubukulūmba bwa NTWA, namanga apilị̄ke ukwịbụnēsya kwinụ kumyake. Lelo uswe twe bānị apa mụkwịbụnēsya kumyitu? 8Po papo Mose alinkubabūla alinkuti: Namajolo UNTWA ịkubapaga inyama ja kulya, nulubūnju ikubapaga ifị̄ndu fya kulya ukubafwana, nukubapima, papo UNTWA āpilị̄ke ulwịbụnēsyo lwinụ kumyake; mụtịkwịbụnēsya kumyitu, lolị mụkwịbụ̄nesya kumyake, twe bānị nụswe ukuti mwịbụnēsyege kumyitu?

9Mose alinkujoba kwa Alonị alinkuti: Ubabūle abany'Ịsịlaelị bōsa mụno najīlị̄le uti: Mụsegelele nkyenị mụ NTWA, namanga apilị̄ke ukwịbụnēsya kwinụ. 10Lelo bo Alonị ịkujoba kukilūndilo kya bany'Ịsịlaelị, balinkukēta amāso kulūngalāngala, balinkwenda nukububona ubukulūmba bwa NTWA mwịbīngu. 11UNTWA alinkujoba na Mose alinkuti: 12Mbilịke ukwịbụnēsya kwa bany'Ịsịlaelị; ubabūle ukuti: Pị̄tasị po mwịsakulyaga ịnyama, lolị Nulubunju po mụkwịsakwịkutaga ifị̄ndu; po lelo mwịsakūmanyaga ukuti une joune ne NTWA, Kyala gwinụ.

13Bo sịlinkuja buno buno namajolo syalịsịle īmbesị syakụpikị̄le ubujo bosa ubu bālịpo; kangi nulubūnju īndūngwa jilinkugwa mosa mụno ifịlūndilo fyabo fyatelēngēne. 14Lelo bo īndūngwa jisōkịlemo, balinkwaga nndūngalāngala mosa tulịmo utūndu utubụlụ̄nge utu tufwene mabwegafula amapepe. 15Bo abany'Ịsịlaelị batubwene, balinkulālūsanịa balinkuti: Fị̄ndu fịkị fịfịfị? Papo bakātumēnye. Mose alinkubabūla alinkuti: Fyo fị̄ndu ifị UNTWA abapēle ukuti mụlyege. 16Isị alagị̄le UNTWA syo isị: Mụbūngānịege utwakubafwana ukulya pamopēne na bannyụ̄mba syinụ mụno mujīlị̄le ubwịngị mụkōngege ikipimo iki kibīkị̄gwe, ikigelelo kya kita ibili kumụ̄ndu jumo. 17Po papo abany'Ịsịlaelị balinkubōmba bo mụmo balagilị̄gwe, balinkubūngānịa, bamo tulinkuja twịngịpo abāngi tulinkuja tunāndipo, pakipimo iki bāpēgịgwe. 18Lolị bo bịkupima pakipimo iki bāpēgị̄gwe igalonị ịna, uju āsalịle fị̄ngịpo alinkwaga fịgelịle kikipimo fikakīndako, uju āsalịle fịnāndipo jope alinkwaga fịfwene ikipimo bo mụno fịkulōndeligwa, fịkāgilwako, umụ̄ndu gwesa asalịle ifyakumfwana ukulya. 19Kangi Mose ābabūlịle ātịle: Najumo angasyasyaga ifyakulya kilābo. 20Lolị balinkusịta ukumpilika Mose; bamo balinkusyasyako fịmo ukuti ịsebalyege nulubūnju, lelo po papo fịlinkwịngila ifwịngịlị fịlinkunụ̄nga; sịsịsị syalimpelịle Mose ukukalala fị̄jo. 21Kukuti ịsịku bāsalaga nulubūnju pēne, umụ̄ndu gwesa ukukōngana nubwịngị bwa fị̄ndu mụno ịkulīlaga; lolị bo ulumụ lukomịle ifị fyasyele pāpāsi fyengukaga fyajongaga.

22Pịsịku lya ntandatu po balinkusalila ngānịla ifị̄ndu fya busịku bubili kukuti mụ̄ndu ilita ina; lelo abalōngosị ba kilūndilo balinkubūka kwa Mose kukummbūla sịsịsị. 23Ābabūlịle ātịle: Isị alagị̄le UNTWA syo sya kuti kilābo ịsịku lịkemo lyakutūsya ịsịku lya NTWA, po pa nndūngu; umwịsyugu ifya kōkya muk̄egele ngānị ni fyakilābo ifya kupīja mụpījilege ngānị ni fya kilābo; fyosa ifị fikusyalangako fyo mụbīkege fịjege fya kilābo. 24Po papo balinkusyasya fịmo ukukōnga bo mụmo Mose abalagị̄le; ifị̄ndu ifị bāsyesye fịfịfị fịkāgagịle fyali fịnunu ịtolo fịkālịngị̄le īfwịngịlị. 25Mose alinkubabūla alinkuti: Mụlyege umwịsyugu ifị mwasyesye namanga umwịsyugu jo sabati gwa NTWA; umwịsyugu mụkabagila ukufyaga fịmo ifị̄ndu ndukubo. 26Mmasịku ntandatu mụkusalaga ifị̄ndu; lolị pị̄sịku lya buhāno na bubili, fịtịkujangamo nafịmo. 27Pị̄sịku lya buhāno na bubili, bamo balinkusōka ukubūka kukusala ifị̄ndu, lolị balinkusịta ukufyaga nafịmo. 28Po Papo UNTWA alinkunndālūsya Mose alinkuti: Mụkusịkanaga ingomēlesyo syangu ni ndagilo syangu mpaka ndilị? 29Ukēte lilino UNTWA abapēle ilịsịku lya kutūsya, fyobene pa mpyagilo ịkubapa ifị̄ndu fyakufwana amasịku mabili; ukuti pị̄sịku lya buhāno na bubili umụ̄ndu gwesa āngalege papamyake, najumo angasōkangapo pakāja kake. 30Bo buno buno abany'Ịsịlaelị balinkutūsya pị̄sịku lya buhāno na bubili, balinkusịta ukubōmba imbōmbo najimo.

31Lelo ifị̄ndu fịla abany'Ịsịlaelị bāfịpēle ingamụ ija mana. Fyafwene tuseke twelụ tunị̄nị̄, twanogaga ukufwana tusyuesye utupepe utu bapakilemo ulūkị. 32Lelo Mose alinkujoba alinkuti: UNTWA alagị̄le; atịle: Mụbị̄kege mana jumo, pisị jumo kokuti mụngulilo syitu syosa abāfịkolo fyitu aba bịkwisaga bịsebafịbone ifị̄ndu ifị UNTWA ātupēle ifị twalyaga nndungalāngala bo atusōsịsye mw'Egịpịtị. 33Po papo Mose alinkummbūla Alonị alinkuti: Gwege indeko umatilemo mana lita mbili po ukabike nkyenị mụ NTWA kokuti ifị̄ndu ifị fịbagụ̄lege abāfịkolo fyinụ fyosa. 34Bo mụmo UNTWA ālindagị̄le Mose mo mụmo jope Alonị alinkufịbīka nkyenị Mwịbokosị lya lufịngo, mana gwa galonị ịna ukuti po fịgụ̄lilege pala pala. 35Abany'Ịsịlaelị balinkulya mana ifyinja amalōngo mana, mpaka ukwakufịka nkị̄su iki bajēngịlemo abāndu, bālyaga ju mana mpaka ukwakufịka mụ mpaka ni kị̄su kya Kanānị. 36Ifịpimo ifị fyabombelịgwaga, Omeli na Efa fyafwene ni lịta amalōngo mabili.

Currently Selected:

Ukusōka 16: NYB96

Highlight

Copy