Ukusōka 15

Ulwimbo lwa Mose

1Lelo po papo Mose na bany'Ịsịlaelị balinkwenda nukummwimbila UNTWA ulwimbo ulu: Nikummwimbilaga UNTWA papo atolịle ubutolị. Ifalāsị na bịtoga pa falāsị abatāgịle mụnyanja. 2UNTWA jo maka gangu jo lwimbo lwangu uju Ịpelịle bupokị bwangu; Jo Kyala gwangu jujuju, jo ngumpālaga jo Kyala gwa tāta, jo nguntụ̄fyaga. 3UNTWA nndwabwịte; ingamụ jāke jo NTWA. 4Amagali ni fịlūndilo fya Falao āfịtāgịle mu nyanja; abasịkali bāke abāmaka balịbisị̄gwe mụnyanja ja Kigugu. 5Amīsi amị̄ngị gābakụpikị̄le, balinkwịbila pāsi fị̄jo ukufwana ịbwe. 6Ikiboko kyako ikị̄līlo, gwe NTWA, kyamaka amakulūmba, ikiboko kyako ikị̄līlo gwe NTWA, kịkuntakanịa unndugu. 7Mbwịngị bwa bukulūmba bwako, kubanyāmbanịa abalugu bako, kutuma ingalalisị syako, isị sikubụkụka bịkupya ukufwana lị̄su lyumụ. 8Bo upụ̄tịle umūjị panyanja amīsi gālyumịle, galịnukị̄le kumwanya, gālịkịtị̄ke ukufwana ịmato, mụnyanja īsolofụ mụlinkuja po pabūmụ. 9Unndugu ātigi ngubakōngaga, mụnyụma ngwakubakola; ikyuma kyabo ngwakujabanịaga, nukwegapo iki nkiganịle. Nịsakubagogaga nulūbo lwangu nukwega fyosa ifị balinafyo. 10Lolị bo gwe NTWA upūtịle umūji gwako kamokene, ab'Egịpịtị balinkwịbila; balị̄bị̄le ukufwana kyela kya ntofyo mmīsi amasịsya. 11Gwe NTWA, nkilūndilo kya bakyala jwanị uju afwene nanụngwe? Jwani uju afwene bo ugwe, gwe nkulūmba mbwịkemo? Jwani amēnye ukubōmba ifịswịgu nimbōmbo īngulūmba bo isyako. 12Gwagolwịsye ikiboko kyako ikị̄līlo ikị̄su kilinkwenda nukubamịla abalugu bītu. 13Gwe nsūbilị gwa mụli isị linga ufị̄ngịle, gwabalongolịle abāndu aba gwabapokịle; mmaka gāko gwabatalwịsye ku kāja kāko akị̄kemo. 14Ifịkolo fịpilị̄ke kangi fịkutetema fịli nulutēnde; Abafịlịsịtị lubakolịle ulutēnde. 15Abalōngosị ba mwa Etomụ ulutēnde lubakomịle; Abamwabu abāmaka bịkutetema; abāndu bosa ba mụ Kanānị, bābwịke amaka sịsobịle isyakubōmba. 16Ulutēnde nuboga fyabagwilị̄le. Bo bịkugakēta amaka gạko gwe NTWA, po lelo bākolị̄gwe nuboga syasobịle nisyakubōmba mpaka bo abāndu bako aba gwabābwịle mbutumwa bakīndịle. 17Ugwe kwịsakubịngisyaga nukubabyala pa kyamba kyāko jujugwe, ubujo ubu gwe NTWA utēndekị̄sye ukuja kāja kāko, pabwịkemo, apa amaboko gāko gwe NTWA gāpajēngịle. 18Gwe NTWA gwe kulagilaga kisịta kuleka sịku.

Ulwimbo lwa Mịlịamu

19Namanga bo ifalāsị sya Falao, na magali gāke na bịtoga falāsị bāke bịngị̄le mwasūmbi, UNTWA agagomolị̄le mbujo bwake amīsi gēnda nukubakụpikila; lolị abany'Ịsịlaelị bo bālyendịle pabūmụ nkati mụnyanja. 20Lelo po papo Mịlịamu, unkụngụlụka, ulịlūmbu gwa Alonị, alinkwega akambị̄mbị nkiboko kyake; po papo abakịkulu bosa balinkusōka balinkunkōnga nutumbị̄mbị balinkumoga. 21Po papo Mịlịamu alinkubīmbila alinkuti: Mwimbilege UNTWA, namanga atolịle ubwịte mbwimikịgwa bwake; Ifalāsị na bịtoga falāsị abatāgịle mwa sūmbi.

Amīsi aga gatịkunoga ukunwa

22Lelo po papo Mose alinkusōkako na bāndu ku Nyanja ja Kigugu alinkubūka nabo nndungalāngala lwa Sụlị; bālyendịle amasịku matatu nndungalāngala kisịta kugāga amīsi nagamo. 23Bo bafịkịle pabujo ubu bịkuti Mala, bātolị̄gwe ukunwa amīsi aga bāgāgịle pa Mala papo gāli makali gakānogaga ukunwa; jo nōngwa iji ubujo bula bwapegīgwe ingamu ja Mala. 24Po papo abāndu balinkwịbụnēsya kwa Mose balinkuti: Tukunwaga fịkị? 25Mose alinkukụ̄ta ku NTWA; po papo UNTWA alinkunnangisya ikipịkị kimo bo akisopịle mmīsī, amīsi galinkwanduka galinkuja manụnụ ịtolo ukunwa. Pala pala UNTWA alinkubapa indagilo isyakuti basịkōngege mbūmị bwabo, kangi alinkwenda nukubagela; 26ātịle: Linga mụkwịjūla ukumpilika UNTWA Kyala gwinụ, kangi linga mụkubōmba isị sịnkyelịle nukusịkōnga indagilo ningomelesyo syake ndịsakubafụndaga ni mbūngo nasịmo bo isị nabatumị̄le ab'Egịpịtị. Namanga une ne NTWA ne ngubagangula. 27Po Papo balinkufịka pabujo ubu bịkuti Elịmu apa syalịpo inyị̄buko sya mīsi kalōngo na ịbili, nimịnasị amalōngo mahāno na mabili; po papo balinkujēnga amatēmbe pala pala, pabupịpị na mīsi.

Currently Selected:

Ukusōka 15: NYB96

Highlight

Copy