Ukusōka 14
14
Ukuloboka inyanja jā kigugu (inyanja Ifụbīfu)
1Lelo po papo UNTWA alinkummbūla Mose alinkuti: 2Ubabūle abany'Ịsịlaelị ukuti bagomoke bajēnge amatēmbe nkyenị mwa Pịhahịlotị, pakati pa Mịgịtolị ni Nyanja jā kigugu, pabubị̄pị na Balịsefonị; mwịsakujēnga nkāja kala kala kifụkị ninyanja. 3Falao ịsakutigi abany'Ịsịlaelị batụmụkị̄lwe nkị̄su, ulūngalāngala lubasyungutilịle mụnkati. 4Une nịsakujipelelaga ubukafụ indụ̄mbụla ja Falao, kịsakubakongaga mụ nyụ̄mba, lelo une nịsakubalambikaga, umwene Falao na bābwịte bāke, po bịsakūmbaga ulwimịko. Po lelo ab'Egịpịtị bịsakumanya ākuti une joune ne NTWA. Po papo abany'Ịsịlaelị balinkubōmba mụmo babulilị̄gwe.
5Bo umalafyale gwa Egịpịtị abūlị̄gwe ukuti abany'Ịsịlaelị babopịle, umalafyale na babōmbị bāke balinkwilālūsya mụndụ̄mbụla syabo balinkuti: Kali tubōmbịle sya fịkị? Tubasōsị̄sye abany'Ịsịlaelị, po tupēsị̄sye abatumwa ba kutubōmbela. 6Po papo umalafyale alinkutendekesya amagali gāke, ga bwịte alinkubēga nababwịte bāke, 7alinkugasalapo amageletị bamịa ntandatu namagali ga bwịte, Agāngi aga gālịmo mw'Egịpịtị, gōsa galinkuja nabakulūmba ba kugakētelela. 8UNTWA alinkujipa ubukafụ indụ̄mbụla ja Falao umalafyale gwa mw'Egịpịtị, alinkubakōnga abany'Ịsịlaelị, aba basōkịlemo nkị̄su kisịta kupāsya. 9Abalwabwịte ba Mw'Egịpịtị, ni fwalasị syosa, na magali, na bị̄togafalasị balinkubakōnga balinkwakubaga apa bājengị̄le amatēmbe pabupị̄pi ni Nyanja jā Kigugu kifụkị na Pịhalịlotị na Balịsefonị.
10Bo Falao ni fịlūndilo fyake basegelịle bịkubị̄sila abany'Ịsịlaelị, bo abany'Ịsịlaelị bịkwịnula amāso balinkunyomoka alība ab'Egịpịtị babakōngịle po papo lulinkubakoma ulutēnde ulukulūmba. Balinkukūta ku NTWA ākuti abapoke. 11Balinkujoba kwa Mose balinkuti: Nōngwa jakuti mw'Egịpịtị gakajamo amapūmba po mụtịle tubatwale ndūngalāngala ukuti mo bakāfwịle? Ko kuti fịkị apa mụtusōsị̄sye mw'Egịpịtị? 12Sịkaja syo isị twababūlaga mw'Egịpịtị apa twatigi: Mụtuleke tubabōmbelege ab'Egịpịtị? Pāpo syo syali nụnụ kumyitu ukuti tubabōmbelege ab'Egịpịtị ukukīnda isyakuti tufwilege nndūngalāngala. 13Po papo Mose alinkubabūla abany'Ịsịlaelị alinkuti: Mụngatetemaga, muje mye papapo, mụkukētaga isị UNTWA ịkubōmbaga isya kubapoka umwe umwịsyugu; namanga ab'Egịpịtị aba mụkubakēta umwịsyugu, utịsakwandisya kangi ukubabona. 14UNTWA ịkubalwilaga, umwe mụje jōnjolo ịtolo. 15UNTWA alinkunndālūsya Mose alinkuti; fịkị kukụta kumyangu? Babūle abany'Ịsịlaelị bēndege babūkege. 16Gwịnule īngịlị jāko, po ugolosye ikiboko kyako pa nyanja, ujijabanịe, ukuti abany'Ịsịlaelị balobokege inyanja pabūmụ. 17Ngusịpelelaga ubukafụ indụ̄mbụla sya Begịpịtị ukuti babakōngege, po ngukabaga ulwimịko kwa Falao na kufịlūndilo fyake na ku magali gāke ga bwịte na kubāndu bāke aba bịkwịtoga pa fwalasị. 18Po ab'Egịpịtị bịsakumanya ukuti une joune NTWA, bo nuntolịle Falao, na magali gake na bịtogafalasị bāke. 19Po papo ugwandumị gwa Kyala uju ēndaga nkyenị nkilūndilo kya bany'Ịsịlaelị alinkukīnda kunyụma kumyabo, jōpe imbānda ja ịbīngu jāsāmịle, jajakwima ku nyụma. 20Pakati na pakati, na pakati pa Begịpịtị na bany'Ịsịlaelị. Ilịbīngu lilili lilinkuja ngị̄si ku Begịpịtị, lolị lilinkuja lumụlị ku bany'Ịsịlaelị, po papo ikilo kyosa balinkusịta kwaganịla.
21Po lelo Mose alinkugolosya ikiboko kyake pa nyanja; UNTWA alinkugīmịka amīsi, ikilo kyosa, nu mmbelo ugwamaka ugu gwakụlịle bukye ugu gwafụmịle kubusōkelo; alinkugatapulanịa, amīsi galinkwima, pāsi pa nyanja bulinkuja būmụ, 22Po papo abany'Ịsịlaelị balinkwịngila mụnyanja nkati balinkwenda pabūmụ ịtolo, kukị̄līlo na kukị̄mama amīsi galyimịle ukufwana mamato. 23Ab'Egịpịtị balinkubakaga balinkwịngila nkati mụnyanja ukubakōnga; nasị̄ fwalasị sya Falao syōsa, namageleti gāke, na bāndu bāke abị̄togafalāsị. 24Lelo bo kwịnwịke ukujenjeluka nulubūnju bo UNTWA ịkufiketa ifịlundilo fya Begịpịtị mụ mbānda ja ịbīngu na mụmbānda ja mōto alinkwenda nukubalānganịa ab'Egịpịtị. 25Ingōmbelo sya magali sịlinkwịkola, galinkunịengeluka ịtolo ukwenda. Po pāpo ab'Egịpịtị balinkuti oko tubope, namanga jo UNTWA uju ikubalwila abany'Ịsịlaelị.
26Po papo UNTWA alinkumbūla Mose alinkuti: Golosya ikiboko kyako pa nyanja, ukuti amīsi gagomokele mụno gāli gabakụpikīle Ab'Egịpịtị na magali gābo na bịtogafalasị. 27Po pāpo lelo Mose alinkugolosya ikiboko kyake pa nyanja, inyanja jilinkwenda nukugomokela mmbujo bwake bo bukukya nulubūnju; ab'Egịpịtị bagelịle ukugabopa bātolị̄gwe, po papo UNTWA alinkubapyuta ab'Egịpịtị pakati panyanja. 28Po papo amīsi galinkugomoka galinkugakupikila amagali na bāndu aba balitogile pa fwalasị nifịlūndilo fya Falao fyosa ifị fyabakōngịle mụ nyanja; alinkusịta nukupona najumo. 29Lolị abany'Ịsịlaelị bo balyendịle pabūmụ nkati munyanja, amīsi galyimịle kukị̄līlo na kukị̄mama ukufwana mamato.
30Bo ātēndị̄ke buno buno ilịsịku lila UNTWA ukubapoka abany'Ịsịlaelị kub'Egịpịtị, abany'Ịsịlaelị balinkubāga kumbali ku nyanja bafwịle. 31Kangi abany'Ịsịlaelị balinkugabona amaka amakulūmba aga UNTWA abatolịle ab'Egịpịtị, po papo abany'Ịsịlaelị balinkuntị̄la UNTWA: balinkummwịtika UNTWA nu mmbōmbị gwake Mose.
Currently Selected:
Ukusōka 14: NYB96
Highlight
Share
Copy
Want to have your highlights saved across all your devices? Sign up or sign in
Nyakyusa Bible © Bible Society of Tanzania, 1996.
