Ukusōka 13

Ukunnīnga Kyala abāna ba kipānda

1Po papo UNTWA alinkummbūla Mose alinkuti: 2Mụmbepo abāna ba kipānda bosa; gwesa uju atalịle ukupāpịgwa, fyosa ifị fyali fya kwanda ukupāpịgwa fyangu une.

Ikyaka kya kisyesye ikisịta nkese

3Po papo Mose alinkubabūla abāndu alinkuti: Mụlikumbukege ilịsịku lya mwịsyugu, lyo ịsịku ili mwasōkịle ukufụma mw'Egịpịtị, lyo ili mwasōkịle ukufụma nkati mbutumwa; mmaka ga kiboko kyake UNTWA ābasōsịsye ukufụma nkị̄su kila kila; lelo mụngalyaga ikisyesye nakimo iki kili nunkese. 4Umwịsyugu mụkusōka mw'Egịpịtị mmwesị gwa kwanda, ugu ingamụ jāke jo Abịbu. 5Lelo UNTWA ịkubatwala nkị̄su kya Bakanānị na Bahịtị, na Bamolị, na Bahịfị na Bajebusị, iki āfị̄ngịle na bị̄sēmwe ukubapa umwe, ikị̄su iki kịswịle ulukama nu lukị; umwesị gugugu ugwakwanda gukujaga go gwa kwimbila ikyaka kikiki mfyinja fyosa. 6Mmasịku mahāno na mabili mwịsakulyaga ikisyesye ikisịta nkese, po lelo pịsịku lya buhāno na bubili po samwikwimbaga ikyaka kya NTWA kikiki. 7Ikisyesye ikisịta nkese mwịsakulyaga mmasịku mahāno na mabili gagaga; nkị̄su kyosa mụngịsakubonekaga ni kisyesye na kimo iki kili nunkese. 8Kangi mwis'amụbabūlege abānīnụ abālumyāna ukuti: Sịkubōmbịgwa sịsịsị, papo syo isị UNTWA ātubōmbị̄le bo tukusōka mw'Egịpịtị. 9Kikiki kumyinụ kịsakujaga kyo kimanyịlo ukufwana kāndu aka kapịnyị̄gwe nkiboko kyinụ pamo pafyenị fyinụ, kokuti ululagilo lwa NTWA mụjege nalo nkanwa mmyinụ; namanga UNTWA ābasōsị̄sye mw'Egịpịtị nikiboko kyake kya maka. 10Po lelo kukuti kyinja mwịsakulwimikaga ululagilo ulo.

11Lelo bo UNTWA ịkubatwala nkị̄su kya BaKanānị, ukukōngana nulufị̄ngo ulu āfị̄ngịle nanụmwe kangi na bị̄sēmwe, ịkubapaga bo mụmo afị̄ngị̄le. 12Mwịsakunsokesyaga UNTWA abāna bākipānda na kāndu kosa aka kisakujaga ka kwanda ukupāpịgwa kunna. Syosa ingambaku isị sịsakujaga sya kwanda ukupāpịgwa kunnabo syo sya NTWA. 13Lolị utupūnda utwakwanda ukupāpịgwa mwisemūsanịege nutung'ōsị utupōngo. Linga mukīgana ukūsanịa imbụ̄nda ni ng'ōsị po mwịsemụjikonyolege amakosị imbụ̄nda. Abānīnụ abālumyāna abākipānda mwịsemụbabāngilege utung'ōsị utupōngo utwakwanda nkupāpịgwa kunnabo. 14Lelo ntubalilo utu tụkwịsaga linga abāndu bịkubalālūsya bịkuti: Ko kuti fịkị apa sịkubōmbịgwa sịsịsị? Mwịse mụbāmụlege mụtigi: UNTWA ātusōsị̄sye mw'Egịpịtị, mbutumwa. 15Papo bo Falao ịkukāna matị̄ngo matupu ukutusōsya, UNTWA ābagogịle: Abāna bākipānda ni ng'ōmbe indasị ukupāpịgwa kunnabo. Uketege tukwịkemēsya ku NTWA abāna abālumyāna abākipānda kubannabo; lolị abāna bākipānda bosa tukubabangaga nutung'ōsị utupōngo utu kunnabo twakwanda ukupāpịgwa. 16Sịsịsị sịsakujaga kimanyịlo kya kukumbukilamo ukufwana kāndu aka kapịnyị̄gwe nkiboko kyinụ na pakati na pakati pamāso gīnụ. Sịsịsị sịsakutukumbusyaga ukuti UNTWA ātusōsị̄sye mw'Egịpịtị kumaka ga kiboko kyake.

Imbānda ja ịbīngu ni mbānda ja mōto

17Bo Falao ābị̄tikị̄sye abany'Ịsịlaelị ukubābula; Kyala bo ịkubalōngolela akābēndị̄sye nkị̄su kya Bafịlịsịtị, napapo jo jāli njila mbịpị; papo Kyala ātigi Abany'Ịsịlaelị bangịsakububonaga ubwịte nukwakwandula inyịnogono syabo ukwakugomokela mw'Egịpịtị. 18Lolị Kyala abalōngwịsye ukwenda injila ja nndungalāngala, ukusyungutila ukubūka ku Nyanja Ifụbīfu. Bo abany'Ịsịlaelị bịkusọ̄ka mw'Egịpịtị bālị̄jālị̄le ngānị ingwego sya bwịte. 19Po papo Mose alinkwega nifịfụpa fya Josefụ alinkusụmụka nafyo. Papo Josefụ āfị̄ngịle nabo abany'Ịsịlaelị ātịle: Kyala ịsakubịsila umwe lelo mụlape ukuti bo mụkusụmụka mwịsakupīmbaga ifịfụpa fyangu ukufụma nafyo nkị̄su iki. 20Po papo balinkwenda ukufụma pa Sụkotị, balinkwakukoma amatēmbe pa Etamụ, pambali pa lūngalāngala. 21UNTWA alinkwenda nkyenị mmyabo, pamụsị imbānda ja ịbīngu jabalōngolelaga ukubatalusya injila, pakilo po jajaga mbānda ja mōto ukubamụlikila injila, kokuti bēndege injila jạbo pamụsị na pakilo. 22Imbānda ja ịbingu pamụsị ni mbānda ja mōto pakilo, fyendaga nabo akabalilo kosa, fịkasōkangamo nkyenị mmyabo.

Currently Selected:

Ukusōka 13: NYB96

Highlight

Copy