Ukusōka 12
12
Ukukīnda
1UNTWA alinkujoba na ba Mose na Alonị mw'Egịpịtị alinkuti: 2Umwesị ugu kumyinụ gukujaga go mwesị gwa kwanda pakyinja. 3Babūle abany'Ịsịlaelị bōsa ukuti pịsịku lya kalōngo ilya mwesị ugu umūndu gwesa ịsēegege akang'ōsị pamo akapene akatụbwa nnyụ̄mba nnyụ̄mba syabị̄sabo; kukuti nyụ̄mba jikusōsyaga akang'ōsị kamo, 4linga inyụ̄mba jikaja na bāndu bakumala ukulya akang'ōsị, po abāndu bịse-bōngānege na bapalamanị ukutūlana ukulya akang'ōsị kamokēne, ukukōngana nubwịngị bwa aba bịsakulyaga kangi ukukōngana namụmo umụ̄ndu jumo jumo ịkulīla. 5Akang'ōsị aka kịsakwegịgwaga katịsakujaga ni kilema nakimo, kịsekajege kapōngo aka kamalịle ikyinja kimokyene, kēgịgwege ukufụma mụntīmo gwa ng'ōsị pamo mụntị̄mo gwa mbene. 6Kịsekagụ̄lilege mpaka pịsịku ilya kalōngo nabuna umwesị ugu abany'Ịsịlaelị bōsa bịkwịsakutubōlelaga utung'ōsị twabo namajolo. 7Po lelo bisakwambaga ilịlopa ilịlopa bisakupakaga pa fịfịgo fyo fịbīli na mmasịkị ga nyụmba isị bisakulīlāngamo utung'ōsị, 8bịsakulyaga inyama inyōkye mmōto ikilo kila kila; bịsakulīlaga ikisyesye ikisịta nkese nịsēke ilị̄kali bo nsụsa. 9Mụngịsakulyaga najimo inyama imbisi pamo imbīje, lolị iji jōkị̄gwe mmōto pamopēne nuntu gwake, namalūndi gāke ni fya nkati nkang'ōsị fyosa. 10Kangi mungịsakusyasyaga ija kulya kilābo, jōsa iji jisakusyalaga ukufịka kilābo ikīngi mwisemujikosyege mmōto. 11Mwisakulyaga bo mwịpịnyịle ingwambā mụnsana, bo mụfwele ni fịlato mmalūndi kangi bo mụkolị̄le ningịlị nkiboko; kangi mwisemụkūjege ukulya. Jo pasa gwa NTWA. 12Namanga nịsakupụlụnganịaga nkị̄su kya Egịpịtị kyosa ikilo kila, nịsakubagogaga abāna abākipānda abanyambala bosa nkị̄su kya Egịpịtị, fyosa ịtolo abāndu ning'ōmbe na gyabakyala gya mw'Egịpịtị nịsakugifụ̄ndaga. Une joune ne NTWA. 13Ilịlopa lyo lịsakujaga kyo kimanyịlo kyinụ pa nyụ̄mba isị mụlịmo; lelo bo ngulibona ilịlopa, nịsakubakindaga, ubutolwe bwakubagoga butịsakubāgaga nabumo, bo nndi pakukikoma ikị̄su kya Egịpịtị.
14Ilịsịku lilili kumyinụ mwisakulisungula, lịsakujaga lya kukumbukịgwa, kangi mwisakulibīkaga ukuja ịsịku lya kyaka kya kummwimikila UNTWA, mụngulilo syinụ syosa mwisakulibīkaga ukuja kyaka, ukuja lulagilo lwa fyinja fyosa.
Ikyaka kya kisyesye ikisịta nkese
15Mmasịku mahāno na mabili mwịsakulyaga ikisyesye ikisịta nkese; pịsịku lya kwanda mụkwịsakusōsyangamo unkese gōsa nnyụ̄mba syinụ, namanga uju linga ịkulya ikisyesye kya nkese ukufụma pịsịku lya kwanda ukwịsakufịka pị̄sịku lya buhāno na bubili, ịsakusōsịgwangamo nkilūndilo kya Ịsịlaelị, bo ịjēpwịsye. 16Pịsịku ilyakwanda mwịsakujaga nulubūngāno ulwịkemo lwa lwịpụ̄to kangi pịsịku lya buhāno na bubili lwisakujaga lubūngāno lwịkemo; mmasịku gagago jitisakujangapo imbōmbo najimo ijakubōmba; lolị fyene ifyakulya fyo mwisakutendekesyaga. 17Mụkwịsakukumbukaga ikyaka kya kisyesye ikisịta nkese, papo ilịsịku lililyo lyo ili nafịsōsịsyemo ifịlūndilo fyinụ nkị̄su kya mw'Egịpịtị ntubalilo tōsa utu tukwịsaga mwịsemụlikumbukege ilịsịku ili ukuja kyaka, ukuja lulagilo lwa fyinja fyosa. 18Mmwesị gwa kwanda, pịsịku lya kalōngo na buna lya mwesị gugugu, namajolo mụkwịsakwandaga ukulya ikisyesye ikisịta nkese ukwịsakufịka pịsịku lya malōngo mabili nalimo, lya mwesị gugugu namajolo. 19Mmasịku mahāno na mabili gungịsakwagịgwangamo unkese nagumo nnyụ̄mba syinụ; pāpo uju linga nkabalilo kala kala ịkulya ikisyesye iki kilungị̄gwe unkese ịkwịsakwepusịgwangamo nkilūndilo kya bāndu bāngu abany'Ịsịlaelị, pōpe linga nhēsya pamo mwenekị̄su. 20Mụtịsakulyaga nafịmo ifị gulịmo unkese; mosa ntwaja twinụ mwịsakulyaga ikisyesye ikisịta nkese.
Ukukīnda ulwa kwanda
21Lelo po papo Mose alinkubakōlela pamopēne abakulūmba ba mwa Ịsịlaelị bōsa alinkubabūla alinkuti: Mụsalege utung'ōsị twinụ nnyụ̄mba nnyụ̄mba, po mụbōlege akang'ōsị ka Pasa. 22Mwegege utusāmba twa ịsopụ mụjụbikege mwịlopa ili lili mụ bakụlị, po mụkalipakege nị̄lopa ilịsịkị ni fịfịgo fyo fịbīli; kangi najumo angajakusōkaga pānja mpaka bo bukị̄le nulubūnju. 23Namanga UNTWA ịkupụlụnganịaga ikị̄su nkubagoga ab'Egịpịtị lelo bo ịkulibona ilịlopa mwịsịkị na pa fịfịgo fyo fịbīli, UNTWA ịsakujikīndaga inyụ̄mba jila jila, atịsakummwịtikisya ugwandumị ugwakupyụta ukwịngila nnyụ̄mba syinụ nkubagoga. 24Umwe pamopēne na banīnụ bwịla mụngịsakusụlwa sịku ukulukilanịa ululagilo ulu. 25Bo mụkwịngila nkị̄su iki UNTWA āfị̄ngịle nanụmwe ukubapa mụngajakulekaga ukubōmba sịsịsị isya lwịho ulu lubātikị̄gwe, 26lelo linga abānīnụ bịkubalālūsya bịkuti: Ko kuti fịkị apa mụkubōmba buno buno? 27Mwịse mụbāmụlege mụtigi: Lo lwịkemēsyo lwa kukīnda kwa NTWA, namanga ākīndịle inyuṃ̄ba sya bany'Ịsịlaelị mw'Egịpịtị; bo ịkubagoga ab'Egịpịtị; uswe ātulekịle. Po papo abany'Ịsịlaelị balinkufụgama balinkwịnama ifịkosị pāsi balinkwịpụ̄ta. 28Po papo lelo abany'Ịsịlaelị balinkusụmụka balinkwakubōmba bo sị̄syo UNTWA ābalagị̄le ba Mose na Alonị.
Ubufwe bwa bāna ba kipānda
29Pakilo pakati ābagogịle abāna bākipānda bosa nkị̄su kya Egịpịtị, ukufụma ku mwana unndumyana gwa kipānda gwa kummwịngilapo Falao uju ātūgalaga pakikota kya butwa mpaka kumwana, unndumyana gwa kipanda gwa mụ̄ndu umpịnyịgwa, ni bāna sya ng'ōmbe isya kwanda kukupāpịgwa syosa. 30Po papo Falao alinkusụmụka pa pakilo na babōmbi bāke bōsa, na Begịpịtị bosa; jilinkuja ngụ̄to ngulūmba mw'Egịpịtị bosa; jilinkuja ngụ̄to ngulūmba mw'Egịpịtị, namanga jikālịmo najimo inyụ̄mba iji jikāli numfwe. 31Po papo Falao alinkubabilikila bā Mose na Alonị pa pakilo papo alinkuti: Amụsụmụkege mụsōkemo mmbāndu bāngu umwe pamopēne na bany'Ịsịlaelị; mụbūkege mụkammbōmbelege UNTWA bo mụno mụjobị̄le. 32Mwegege na sịng'ōsị syinụ na sịng'ōmbe syinụ mụbūkege nasyo; nịne mụsūmilege ulusajo.
33Lelo ab'Egịpịtị balinkubakujisya abany'Ịsịlaelị ukusōkamo nkị̄su balinkuti: Linga mụtịkusōkamo ātụkumalika ukufwa! 34Po papo abany'Ịsịlaelị balinkupịnya mmyenda ịbakụli syakwengela isị kyalịmo ikisyesye ịkibisi, ikisitakulūnga balinkubegala pa fibeja. 35Abany'Ịsịlaelị bābōmbịle bo mụmo Mose ābabūlị̄le, bāsụ̄m̄ịle ku Begịpịtị utubwe utupala twa kumogela utwa fesa nu twa sahabu ni myenda. 36Kangi UNTWA abapelị̄le abany'Ịsịlaelị ukuganịgwa na Begịpịtị balinkubapa abany'Ịsịlaelị akāndu kōsa aka bāsum̄aga. Mụnjila jijiji abany'Ịsịlaelị balinkwenda nukupupa ifyuma fya Begịpịtị.
Abany'Ịsịlaelị bikusōkamo mw'Egịpịtị
37Po papo abany'Ịsịlaelị balinkusụmụka balinkwenda ukufụma mụ Lamesesị ukubūka ku Sụkotị. Ubwịngị tutigi bāli baelufụ bamịa ntandatu (600,000) abanyambala batupu, aba bēndaga pāsi kisịta kubalilako abakị̄kulu na bakeke. 38Ifịlundilo fịngị ifya bāndu nnduko nnduko balinkubūka nabo, ni mịtị̄mo gya ng'ōmbe ni ng'ōsị ni mbene inyịngị fị̄jo. 39Balinkokya ifịsyesye ifịsịta nkese ifị bātwele ifịbisi ifịsitakulūnga ukufụma mw'Egịpịtị, panōngwa ja kusụmụsịgwa nakalinga ukusōk̄amo mw'Egịpịtị bakapinyile imbopo najimo ijīngi.
40Abany'Ịsịlaelị bāgonịle mw'Egịpịtị ifyinja bamịa bana na malōngo matatu (430). 41Pịsịku lya kumalila ifyinja bamịa bana na malōngo matatu (430) ifịkolo fya banya Ịsịlaelị fyosa fyasokịlemo mw'Egịpịtị. 42Ikilo kila kila kyali kilo iki UNTWA āgụ̄lilaga ukubasōsya mw'Egịpịtị abany'Ịsịlaelị; ikilo kikiki kibīkị̄gwe pasịma ukuja kya NTWA ntubalilo tōsa utu tukwịsaga kịsāgulị̄gwe ukuja kilo kikulūmba kya lugụ̄lilo.
Indagilo sya Pasa
43UNTWA ababūlịle ba Mose na Alonị ātịle: Isị syo ndagilo sya Pasa: Unhēsya najumo atịsakujangapo pakulya Pasa; 44lolị untumwa umūlịgwa ni ndalama jo abagị̄le ukulya bo mụmmbụ̄tịle kukyenị. 45Najumo umwendanjila, nummbōmbị gwa mfwalo atịsakujangapo pa lusekelo lululu. 46Pasa gwesa fịkuti alīlịgwege nnyụ̄mba mụno atendekekesị̄gwe pomma pānja; kangi kingịsakukonyolịgwaga nakimo ikifụpa kya nyama. 47Abany'Ịsịlaelị bosa mụno bajīlị̄lẹ fịkuti bīmbege ikyaka kikiki. 48Lolị najumo unsịtakubụtịgwa atịsakujangapo. Lolị unhēsya uju mụjēngịle nagwe linga ịkulōnda ukwimba ikyaka kya Pasa, ukuti ammwimikege UNTWA, fịkuti tāsị mụmmbụ̄te kukyenị nabannyụ̄mba jāke abanyambala bosa. Po ịsakujaga mw'Ịsịlaelị gwịlīma, po ịsakujangapo pa kusekela ikyaka kya lukīndo. 49Indagilo sịmosyene, sisyo, sisakubōmbaga ku bany'Ịsịlaelị na kubahēsya aba mụjēngịlo nabo.
50Po papo abany'Ịsịlaelị bōsa balinkwịtika balinkubōmba isị UNTWA ābalagị̄le ba Mose na Alonị. 51Po lelo pịsịku lila lila UNTWA alinkubasōsya abany'Ịsịlaelị bosa mfịlūndilo fyabo ukufụma mw'Egịp̄ịtị.
Currently Selected:
Ukusōka 12: NYB96
Highlight
Share
Copy
Want to have your highlights saved across all your devices? Sign up or sign in
Nyakyusa Bible © Bible Society of Tanzania, 1996.
