Ukusōka 11

Mose ịkufụmụsya ubufwe bwa bāna ba kipānda

1Po papo UNTWA alinkummbūla Mose alinkuti: Lilino busyele ubutolwe bumobwene ubu nguntwalilaga Falao na Egịpịtị; panyụma aịkubasōsyaga; bo ịkubasōsya, ịsakubasōsyamo lōsa nkị̄su kyake. 2Lilino mụbabūlege abany'Ịsịlaelị bapilikege ukuti, kukuti nnyāmbala kangi kukuti nkịkulu asūmege kumpalamanị gwake utubwe utupala twakumogela, fesa na sahabu. 3Po papo UNTWA alinkubapelela abany'Ịsịlaelị ukuganịgwa ku Begịpịtị. Kangi Mose alinkuja mụ̄ndu nkulūmba fị̄jo umwimịkịgwa nkị̄su kya mw'Egịpịtị, nkyenị mmbabōmbị ba Falao na nkyeni mmbāndu.

4Po papo Mose alinkuti: UNTWA ịkuti: Nkabalilo ka pakilo pakati, une nịsakwịsa mw'Egịpịtị. 5Po bōsa abāna abālumyāna bākipānda nkị̄su kya Egịpịtị bịsakufwaga, ukufụma kumwana gwa kipānda gwa Falao, uju ali pakikota kyake kya butwa ukwakufịka ku mwana gwa kipānda gwa nkịkulu ummbōmbị uju ịkusya palwala; ni mwana sya bulama isya ng'ōmbe. 6Po lelo Jịsakujaga ngụ̄to ndupu īngulūmba mosa nkāja ka mw'Egịpịtị, jịsakujaga ngụ̄to iji jikabonekamo sịku, kangi iji jitịsakubonekamo sịku. 7Lolị mmbāndu ba Ịsịlaelị, abāndu nifịnyamāna fịsakujaga jōnjolo ịtolo, nīmbwa najimo jitịsakubakemelaga; ukuti mụsịmanyege ukuti UNTWA abatapulenie ab'Egịpịtị na bany'Ịsịlaelị. 8Po lelo ababōmbị bīnụ bōsa aba, bịsakusụlụkaga ukwịsa kumyangu, bịsakūfụgamilaga batigi: Sōkamo pamopēne na bāndu aba bịkukukōnga ugwe. Panyụma pali sịsịsị po nịsakusōkaga. Po papo alinkusōkapo pa Falao bo nkalale fị̄jo. 9Po papo UNTWA alinkummbūla Mose alinkuti: Falao atịsakukupilika ugwe kokuti nongelelege ukubomba ifịka fyangu nkị̄su kya mw'Egịpịtị.

10Mose na Alonị bābōmbịle ifị̄ka fyosa fịfịfị nkyenị mwa Falao; lolị UNTWA ājipelị̄le ubukafụ indụ̄mbụla ja Falao, ākānịle ukubābula abany'Ịsịlaelị nkị̄su kyake.

Currently Selected:

Ukusōka 11: NYB96

Highlight

Copy