Ukusōka 21

Īmbōmbo sya kubabōmbela abatumwa

1Isị syo ndagilo isị kusịbīkaga nkyenị mbany'Ịsịlaelị: 2Linga ummūlịle untumwa Unhịbụlị ịsakukubōmbelaga ifyinja ntandatu, nkyinja kya buhāno na bubili ịkwịsakwabulịgwaga mbutumwa kisịta kuhōmba nafịmo. 3Linga ālị̄ṣ̄ịle nkēnja ịsakusōkaga bo nkēnja; linga ịsịle mwegị, bo ịkwabuka ịsakubūkaga nu nkasị. 4Linga umalafyale gwake ankwelịle, unkịḳulu ampapị̄lemo abāna abanyambala pamo abakị̄kulu, unkasị nabāna bịsakujaga bā malafyale, bo ịkusōka isakubūkaga mwene kisịta nkasị nabābāna. 5Lolị linga untumwa ịkujoba jūjo ịkuti: Nunnganịle umalafyale gwangu nunkasị gwangu nabānangu, ndịkusōkapo; 6po untwa gwake ịsakuntwalaga kwa Kyala ịkwịsakuntalusyaga ukubūka kukifịgo pamo kulwigi; po lelo umalafyale gwake ịsakuntụbụlilaga īmbulukutu na kusụlo ku nndụ̄nda, po ịsakujaga mmbōmbị gwake gwa bwịla bwịla.

7Linga umụ̄ndu ịkummūlisya umwanake unndīndwana ukuja ntumwa, atịsakwabulịgwaga mbutumwa bo mụno abatumwa abanyambala bịkwabulilịgwa. 8Linga ūlisị̄gwe ku mụ̄ndu uju ịkulōnda ukummwega ukuti ajege nkasị, lelo linga umalafyale gwake akankola pa ndụ̄mbụla, akanngana, bo akāli ukummanya, po fịkuti agomosịgwege ku gwịse, po ugwịse antabulilege ikyuma uju ālimmūlịle; umalafyale gwake uju ālimmūlịle akabagila ukummūlisya ku bahēsya bankị̄su ikīngi papo ammbōmbị̄le isị sịkafwana. 9Linga umụ̄ndu ịkummūlila umwanake unndumyana unkị̄kulu untumwa po fịkuti ammbōmbelege bo mụno ịkummbōmbela umwanake unndīndwana uju āpāpịle jūjo. 10Linga umụ̄ndu ịkwega unkị̄kulu ugwabubili, isị ammbōmbelaga unkasị untasị sịjege pala pala, ampege ifị̄ndu ikipimo kikya bwịla, amfwikege bo mụmo ịkumfwikila bwịla, syosa imbōmbo sya bwegị nnyụ̄mba sịnganaganịkangapo, sịjege bo mụmo syajīlị̄le bo akāli ukwega ujūngi. 11Linga atịkummbōmbela utūndu to tutātu, unkị̄kulu abagị̄le ukusōka kisịta kutabulako ikyuma unndume.

Indagilo sya nōngwa sya bugogi

12Uju linga ịkunngoga unnịne, jope ịsakugogịgwaga. 13Loli linga anngogịle ku lusako ulubịbị kisita kummbingilila (kisita kunsigila), loli jo Kyala antwele nkiboko kyake, abagị̄le ukubopela kubujo ubu nisakunnangisyaga ne Kyala kuno, ịsakwakuponelaga. 14Lolị uju linga ịkunngoga unnịne kumatīngo, mbukomụ bwake, ịsakugogịgwaga na papo linga abopị̄le kukigemo kyangu ikya kwịkemēkesyapo ukuti ko akaponele.

15Uju linga ịkunkoma ugwịse pamo unna jo ịsakugogịgwaga. 16Uju linga ịkummwịba umụ̄ndu, linga ịkummūlisya pamo ali nagwe pakāja kāke, jo ịsakugogịgwaga. 17Uju linga ịkunhēlụla ugwịse pamo unna jo ịsakugogịgwaga.

18Linga abāndu bịkulwa, lelo jumo uju antụ̄nyịle unnịne nị̄bwe, pamo ammbụlị̄ke nikibụlị, kisịta kunngoga, lolị alambalikị̄gwe nkitala, jula antụ̄nyịle unnịne atịkupēgịgwaga inōngwa, 19lolị panyụma bo uju atụ̄nyị̄gwe abumbulwịke asụmwịke ịkwendela mụngịlị, uju ālinkomịle kummbagị̄le ukunhōmba ummbịne kuntēngo gwakufwana ubulwasị bosa mpaka ukupona lōsa, bukujaga bwa jula ālinkomịle unnịne.

20Linga umundu ịkunkoma untumwa gwake unnyambala pamo unkị̄kulu mpaka ukufwa, ịsakwambililaga ulufụ̄ndo. 21Lolị linga untumwa aponịle akafwa mwịsiku limo pamo mabili, po umụ̄ndu jula atịsakwambililaga ulufundo nalumo; papo untumwa jula kyuma kyake.

22Linga abāndu bịkulwa, lelo bantịkịle unkị̄kulu gwa lwanda, lelo ku nōngwa ja butịke bula ulwanda lusōkịle, lolị unkīkulu akafulalapo napamo pabūngi, po jula antịkịle ịsakusōsyaga ifya kuhōmba bo mụno unndume gwa nkị̄kulu ịsakulōndelaga; po lelo ịsakuhombelaga bo mụno abalōngị bịsakutụmụlilaga. 23Lolị linga ubufụlafụ bumo bwagịgwe, po ulufụ̄ndo lwake lo ulu: Pabūmị abukuhōmbịgwaga bubūmi, 24ikisịge pakisịge, ilị̄no pa lị̄no, ikiboko pa kiboko, ikilūndi pa kilūndi; 25ifịhōmbịgwa fya kōkịgwa numōto āfịkujaga fya kōkịgwa numōto, ikifụlalo pa kifụlalo, ikibụlị pa kibụlị.

26Linga umụ̄ndu ankomịle ikisịge untumwa gwake unnyāmbala pamo unkị̄kulu, linga kitujwịke po ịsakummwabulaga untumwa kunōngwa ja kisịge. 27Linga ankomịle ilị̄no untumwa gwake unnyāmbala pamo unkị̄kulu, po ịsakummwabulaga mbutumwa kunōngwa ja lị̄no.

Isị sịkulōndịgwa ku bakabị ba tūndu

28Linga ing'ōmbe jinndasịle ni mbēmbe umụ̄ndu, unnyambala pamo unkị̄kulu, afwịle, ing'ōmbe ijo jịsakutịkịgwaga na mabwe, bo jifwịle najumo atịsakulyaga inyama jāke; lolị jitịsakupēlịgwaga inōngwa. 29Lolị linga ing'ōmbe lo lwịho lwake, jigogịlemo jumo nulutasị, lelo umwenenajo asokị̄gwemo loli atịkujikūnga po jēndịle nu kugoga umụ̄ndu, ing'ōmbe jịsakugogịgwaga na mabwe, umwenenajo jōpe ịsakugogịgwaga. 30Lelo linga umwenenajo ịtikisị̄gwe ukuhōmba kunōngwa ja kubupoka ubūmị bwake, po kummbagị̄le ukuti ahōmbege fyosa ifị apimilị̄gwe ukuhōmba. 31Linga ing'ōmbe jinngogịle umwana unndumyana pamo unndīndwana jumo, umwenenajo ịsakubōmbelịgwaga ukukōngana nululagilo lululu. 32Linga ing'ōmbe jinngogịle untumwa unnyāmbala pamo unkị̄kulu, umwenenajo ịsakunnhōmbaga umwenentumwa indalama amalōngo mahāno na mana, ing'ōmbe iji jingogịle jịsakugogịgwaga na mabwe.

33Linga umụ̄ndu akilekịle bwasị ikị̄na, pamo akūmbịle ikisịba lelo akakụpikilapo nafịmo, linga ing'ōmbe pamo imbụ̄nda jị̄bụlụkụtị̄le mbwịna bububu, 34umwenebwịna isakunhōmbaga indalama umwene ng'ōmbe ing'ōmbe ifwe jịsakujaga ja mwenebwịna.

35Linga ing'ōmbe ja mụ̄ndu jumo jijifụlēsye ing'ōmbe ja mụ̄ndu ujūngi, jifwịle, po bịsakujūlisya īnyūmị jila nukujabana īndalama; jōpe ing'ōmbe īfwe jila jila bịsakujabanaga. 36Pamo linga sịmanyị̄gwe ukuti iji jijigogịle inịne lo lwịho lwake, jibōmbịlemo nulutasị bo sịsịsị, lelo umwenenajo asōkị̄gwe, mo lolị atịkujị̄galila, umweneng'ōmbe ingogị ịsakunhōmbaga jing'ōmbe uju ijāke jifwịle; ifwe jikujaga ja uju ahōmbịle ijīngi.

Currently Selected:

Ukusōka 21: NYB96

Highlight

Copy