Ukusōka 22

Indagilo sya nōngwa sya kuhōmbana

1Linga umụ̄ndu ịbịle ing'ōmbe pamo īng'ōsị ja jūngi, ajibōlịle pamo ūlị̄sye pa ng'ōmbe jimo ịsakuhōmbaga ing'ōmbe ịhāno, pa ng'ōsị jimo ịsakuhōmbaga īng'ōsị ịna. 2Linga unndēbị akolị̄gwe bo ịkupāngula inyụ̄mba lelo akomịgwe afwịle, pị̄lopa lyake litisakuhōmbelịgwangapo ilịlopa nalimo. 3Lolị kulịpo ukuhōmba pị̄lopa lyake linga agogị̄gwe bo ilịsuba lisōkịle. Lelo unhị̄ji mpaka ahōmbe kuli fyosa ifị ị̄bịle; linga akaja na ndalama sya kuhōmba, po ūlisịgwege kunōngwa ja buhījị bwake. 4Linga ing'ōmbe pamo imbụ̄nda pamo īng'ōsị iji ị̄bịle āgị̄gwe najo bo nyūmị, po ịsakuhōmbaga ịbili pa ng'ōmbe jimo pamo pa mbụ̄nda jimo pamo pa ng'ōsị jimo iji ịbịle.

5Linga umụ̄ndu ịkutị̄ma ifịnyamāna fyake mụ nngūnda gwa nnịne, po kummbagị̄le uju alīsị̄sye ifya nnịne ukunhōmba umwenefịndu, ikibafụ kimo kya nngūnda gwake iki kinogịle fị̄jo, ukufwana nikipimo kya mwene nngūnda mụno ngali kịsakujīlaga pabujo apa ịsakufụ̄njilaga unngūnda gwake gwa māfịlu.

6Linga jumo akosị̄sye ulupya umōto gukolị̄le mmịsyanju, sịjịlekupya imbuga (ifịlūndiko, imbụ̄so) sya fị̄ndu ifị fịtondolị̄gwe pamo ifị fikāli ukutondolịgwa, pamo unngūnda gōsa, uju akosị̄sye ulupya abagị̄le ukuhōmba bo mụno untēngo gwa fị̄ndu ifị fịpị̄le ngali gwịsakujīla.

7Linga umụ̄ndu jumo ampēle umpalamanị gwake indalama pamo akāndu akāngi ukuti ammbīkịle, lelo sībị̄gwe nnyụ̄mba ja mpalamanị jula jula, lelo linga unnhị̄jị āgị̄gwe, ịsakuhōmbaga kabili mụndalama isị ālị̄bịle. 8Linga unnhījị akāgịgwa po umwenenyụ̄mba mụno sị̄bilị̄gwe indalama pamo akāndu akāngi, ịsakutwalịgwaga nkyeni mwa Kyala ukuti alape ukuti akaja jo mwene uju ēgịle indalama syannịne.

9Mụnōngwa ja kulwilanịla akāndu aka kasobịle, linga ng'ōmbe pamo mbụ̄nda pamo ng'ōsị pamo mwenda pamo akāndu kōsa aka uju ịkuti kāngu uju ịkuti kāngu, ulukānị lululu lụkutwalịgwaga nkyenị mwa Kyala. Umụ̄ndu uju ịkwịsakwagịgwaga ukusịta kuja kāke jo ịsakunhōmbaga unnịne utūndu tubili mụli kamokēne aka bālwilanịlaga.

10Linga umụ̄ndu ansūmịle umpalamanị ukummbīkila imbụ̄nda pamo ing'ōmbe pamo ing'ōsị pamo ikinyamāna kimo ikīngi, lelo kifwịle, pamo kifụlasị̄gwe pamo kị̄bị̄gwe kisịta kujapo ubukētị, 11po umpalamani ịsakulapaga mụ ngamụ ja NTWA ukuti akaja jo mwene uju ēgịle ikyuma kya mụ̄ndu jula. Po lelo umwene kyuma atịsakupelaga inōngwa, umpalamani atịsakuhōmbaga nafịmo. 12Lolị linga kikinyamāna kikiki kị̄bị̄gwe po umpalamanị ịsakunhōmbaga umwenekyuma. 13Linga fịnyamāna fya nndị̄su fịlị̄le ing'ōmbe pamo ing'ōsị jijiji, po umpalamanị ēgege utunyamana utu tusyele pamo ing'ōsị īfwe linga fịkalya, akannangisyege umweneng'ōmbe ukuja bukētị; po ukuhōmbana kutịsakujapo, kunōngwa jakuti ing'ōmbe jigogị̄gwe ni fịnyamāna.

14Linga umụ̄ndu āsị̄me ikinyamāna ku nnịne, lelo kifụlēle pamo kifwịle bo kikāli ukugomoka ku mwenenakyo, uju ālyasị̄me ịkwịsakunhōmbaga umwenenakyo kuntēngo gwa kinyamāna kila gōsa mụno gujīlị̄le. 15Lolị linga kyonāngị̄gwe bo kigomwịke, po uju ālyasị̄me akabagila ukuhōmba, lolị ịkuhōmbaga gwene guntēngo gwa bwasịme; linga kyalyasịmịgwe kunjila ja bwasịme bwakuhōmbela.

Indagilo sya tujilo twakutapulanịa imbị̄bị ni nụnụ pamopēne ni sya kuntị̄la Kyala

16Uju linga ammōnāngịle unndindwana uju ākāli akusịngilịgwa, ịsakusōsyaga ifyakunkwa ukuja nkasị lōsa. 17Linga ugwịse gwa nndīndwana akānịle ukuti atịkummwega ajege nkasị, po umụ̄ndu jula ịsakuhōmbaga indalama isị sịfwene pantēngo gwa kusị̄ngila unndīndwana unsūngu.

18Mụngammwịtikisyaga najumo unkị̄kulu unndosị ukujako kubūmị. 19Umụ̄ndu gwesa uju linga āgị̄gwe bo ịkulogwa nikinyamāna jo fikuti agogịgwege. 20Umụ̄ndu gwesa uju ịkutwala amakemo kwa lyakyala, alekịle kuli ne NTWA nịmwene, jo gwakupyụtịgwa.

21Unhēsya najumo mụngammbōmbelaga imbị̄bị, pamo ukummbonela, mukūmbukege apa umwe mwali bahēsya mw'Egịpịtị. 22Mụngantamyaga najumo unkị̄kulu umfwile uju asyilịle unndume, pamo umwana umpīna uju abapāpị bāke bafwịle. 23Linga mụkubatamya bababo, lelo bikukụ̄ta kumyangu ukusūma ubutụ̄li, po une ne NTWA nịsakubapilikaga, 24ingalalisị syangu sịsakwakaga, nịsakubagogaga nulūbo, abakasị bīnụ bịsakujaga bafwile aba basyilịle abalume bābo, abānīnụ bịsakujaga bapīna bo abị̄sabo bafwịle.

25Linga kunkopesya indalama jumo unndōndo mmbāndu bāngu aba mụli nabo, mụngịsakummbōmbelaga bo mụno bịkubombela abakopesyandalama aba bịkulōnda ukuti uku akopịle bo ịkugomosya ōngelengepo isị̄ngị pamwanya pali isị ākopịle. 26Linga ukopīle umwenda gwa mụ̄ndu jumo ukuja kipīngikilwa kya fịmo ifị akopịle kumyako, unngomolelege umwenda gwake bo nị̄suba likāli ukujōnga. 27Papo umwenda gugugu go ugu alinago gwene ugwakwịkị̄nga, go ugu ịkwịnịembetelelamo ukuti imbepo jingammwagaga; po lelo linga ukolịle po ịkugonelaga fịkị? Lelo umụ̄ndu jujuju linga ịkukụ̄ta kumyangu nịsakumpilikaga, papo une ndi nulupākisyo. 28Mụngantukaga amahēlụ Kyala, kangi mụngabagụnaga abalagilị ba bāndu ba kikolo kyinụ.

29Mungakābisyaga ukūsōkesya ifịlubukilwa fya fị̄ndu ifị̄ngị ifị mụpūlịle na ifị mụfụgwịte. Abānīnụ abālumyāna abafịpānda mụkūmbaga une. 30Bo mụtendekege buno buno na ku ng'ōmbe syinụ na ku ng'ōsị syinụ syongege kunnabo amasịku mahāno na mabili, ilya lwele lyo mụsịtwalege kumyangu, mụmbege isya kwanda ukupāpịgwa kunnabo. 31Umwe mwịsakujaga bāndu abị̄kemo kumyangu, mụngalyaga īnyama ja ng'ōmbe pamo ija ng'ōsị iji jigogị̄gwe nikinyamāna, inyama ja luko bo lululo mụsịsopelege imbwa.

Currently Selected:

Ukusōka 22: NYB96

Highlight

Copy