Ukusōka 23

Imbōmbo sya bugolofụ

1Ungajobaga inōngwa sya butūngulu; ungantūlaga untulanōngwa, ungammbīkilaga ubukētị bwa butūngulu. 2Ungakikōngaga ikilūndilo kya bāndu aba basụmwịke kukubōmba imbị̄bị; ungakibikilaga ubukēti bwa kukitūla linga kịkunịongasya ubwanalolị pa bulōngị, ungabāmbaga nakyo. 3Kangi unndondo linga ali pabulōngị unganndwilaga ukuti apone papo nndōndo.

4Linga ujāgịle ing'ōmbe pamo īmbụ̄nda ja nndugu gwako iji jisobịle, ujēgege untwalilege umwenenajo. 5Linga ujāgịle īmbụ̄nda ja mụ̄ndu uju akubēngịle jigwịle nikitwalo ujisụmụsyege ujị̄nulege, komma ukukīnda ịtolo ukujileka jịkutāmịgwa.

6Pabulōngị unganịongasyaga ubwanaloli bwa nōngwa ja mụ̄ndu gwako unndōndo. 7Gwịjēpusyege fị̄jo kunōngwa sya butūngulu; unganngogaga najumo umụ̄ndu uju akatula najimo. Papo uju linga ịkubōmba bo sịsịsị nisakunndōngaga ukuja mụ̄ndu mmbị̄bị. 8Ungāmbililaga ifịhōmbịgwa fya mbutị̄tu ifya kunịongakisya inōngwa isị sịgolwịke, papo ifịhōmbịgwa fya mbutị̄tu fịkubasofya abāndu ku syanalolị, kangi fikōnānga inōngwa sya bajoba syanalolị.

9Mụngammbonelaga unhēsya najumo, mụmenye mụno unnhēsya ịkujīla, papo nụmwe mwali bahēsya mw'Egịpịtị.

Ikyinja kya buhāno na bubili nị̄sịku lya buhāno na bubili

10Mfyinja ntandatu gwịsakubyalaga nukufụ̄nja, 11loli nkyinja kya buhāno na bubili gwịsugulekege unngūnda gutūsyege ungịsakugulimaga; fyosa ifị fịsakukulangamo ungịsakufụ̄njaga. Abalōndo bo babagị̄le ukulya ifị fisakukulangamo; ifịnyamāna fyo fisakulyaga ifị basyesyemo. Syo mwịsemụbōmbege sịsịsị na mmịgūnda gya māfị̄lu ni gya mịsyunguti.

12Mwịsakubōmbaga īmbōmbo amasịku ntandatu mụ nndūngu gumo, lolị pị̄sịku lya buhāno na bubili po mụngisakubōmbaga imbōmbo najimo, kokuti abatumwa bīnụ na bahēsya bīnụ nifịnyamāna fyinụ fịtūsyege fịkabege amaka. 13Mụsịbīkege syosa isị mbabūlịle une ne NTWA. Mụngịsakwịpụ̄taga kwa gyabakyala igīngi; mụngagijobaga ningamụ syabo nkanwa mmyinụ.

Ifyaka ifịkulumba fịtatu

14Mwịsakukịnaga ifyaka fịtatu nkyinja kimo; fịsakujaga fya kūnyimikila une. 15Mwịsakukịnaga, mwịsakusekelaga ikyaka kya Kisyesye ikisitankese; bo mụmo nābalagilị̄le mmasịku mahāno na mababili ga Kyaka kikiki mụngịsakulyaga ikisyesye ikisịta nkese pakabalilo aka kasalīgwe akā mwesị gwa Abịbu, papo go ugu mwasōkị̄le mw'Egịpịtị. Mụngị̄sakwịsaga sịku kumyangu kukwịpụ̄ta kisịta kutwala ilịkemo. 16Mwịsemụsekelege ikyaka kya Ntondolo, bo mwandịle ukufụ̄nja ifị̄ndu fyinụ ifị mụkubyala mmịgūnda. Kangi mụkwịsakusekelaga ikyaka kya kubūngānịa pabumalikilo bwa kyinja bo mukusōnda ifị fịfụmịle mụ mbōmbo syinụ sya migūnda. 17Katatu nkyinja abāndu bīnụ abanyambala bosa bisakusegelelaga nkyenị mụ NTWA Kyala.

18Mụngịsakundwalilaga ilịlopa lya ịkemo lyangu pamopēne nikisyesye iki kilūngị̄gwe nu nkese, kangi amafụta ga nyama ja kwịkemekesya kumyangu mụngịsakugabīkaga mpaka kilābo ikīngi.

19Kubagịle umụ̄ndu ukutwala ku nyụ̄mba ja NTWA Kyala gwake ifịlubukilwa fya mụnngūnda gwake ifịnụnụ fị̄jo. Komma ukwịsakupīja akamwana ka ng'ōsị nndukama lwa nna.

Ifị̄ngo ni ndagilo sya kwịngilila mụ Kanānị

20Ukēte, une ngubatumilaga ugwandumi ugwa kubatị̄ma bo mụkwenda ukubūka, ugwakubatwala kubujo ubu mmbatendekekị̄sye. 21Mwịsemụmpege ulwimịko nukusịpilika isị ịkujoba mụngịsakummbōmbelaga isya kunkalalisya; ingị̄lanịo sya luko lululo akabagila ukusịswa, namanga ingamụ jāngu jili mmyake.

22Linga mụkupilikisya bunụnụ ilịsyu lyake, nukubōmba syosa isị ngujoba, po nịsakujaga nndugu gwa balugu binu, bosa naba bịkupīngana nanụmwe.

23Ugwandumị gwangu ịkubalongolelaga nkyenị nukubatalusya kuno balịko Abāmolị, na Bahịtị, Abapelịsị Abakananị, Abahịfị na Bajebusị; une nịsakubapyụtaga bosa bababa. 24Mụngị̄sakwịpụ̄taga kwa gyabakyala gyapo, mụngị̄sakugibōmbelaga; mụngisa kubōmbaga bo mụno bīkubōmbela abēne; lolị mwịsemụbagogege bakyala bābo kisịta kubasyasya, kangi mwịsemụgatakanịege na mabwe aga bịkwimapo. 25Umwe isya kubōmba syo sya kwịpụ̄ta ku NTWA Kyala gwinụ, une nịkufịsajaga ifị̄ndu fyinụ namīsi gīnụ, kangi nịsakujepusyangamo imbūngo mmyinụ. 26Nkị̄su kyinụ atịsakujangamo unkị̄kulu najumo ugwakōnāngika ikifụba, atịsakujangamo unngūmba najumo. Nịsakubapaga ubūmị ubutalị. 27Nịsakulongosyangapo ulutị̄syo lwangu, ukuti aba bịkulwana nanụmwe bịsebāndị̄lege une; nịsakubasofanịaga inyịnogono aba bịkwakulwaga nanụmwe, abalugu bīnụ bosa nịsakubapelelaga ukubabopa umwe. 28Nịsakutumaga amakōnda amanywamụ gisakutalangapo ukubasosyamo Abahịfị na Bahịtị ukuti bakabēpukilengemo umwe. 29Ndisakubasōsyangamo nkyenị mmyinụ nkabalilo ka kyinja kimokyene, ukuti ikị̄su kingịsakwịpela lūngalāngala, kangi nukuti mụngịsakutamịgwaga ni fịnyamāna fya nndị̄su bo fịbēle. 30Nịsakubasokesyangamo umwe abāndu bababa banāndi banāndi, ukwịsakufịka papo umwe mwịsakubālilaga nukukịkaba ikị̄su. 31Imịpaka gyinụ nịsakugibīkaga ukufụma ku Nyanja ja Kigugu mpaka ku nyanja ja Bafịlịsịtị, kangi ukufụma nndūngalāngala mpaka ku lwisi Fụlatị; abāndu ba kị̄su kila nịsakubapaga mmaboko gīnụ, mwịsakubakagaga. 32Mungịsakufịngaga nabo pamo na gyabakyala gyako ulufị̄ngo nalumo. 33Batisakugonaga nkị̄su kyinụ, ko kuti bangịsakubapelelaga ukutula inōngwa kumyangu; papo linga mụkwịsakwịpụ̄ta kwa gyabakyala gyabo, kisịta sūnga bo mwịkolile mụntego.

Currently Selected:

Ukusōka 23: NYB96

Highlight

Copy