GENESIS 50
50
1Joseymi taytanta abrazaykuspa waqastin muchaykurqa. 2Joseymi kamachirqa serviqnin medicokunata hampikunawan taytanpa cuerponta chakichinankupaq chaymi medicokuna chakirachirqaku Israelpa cuerponta. 3Tawa chunka punchawmi chakichinapaq ruranankuman hina chakichirqaku. Egipto runakunañataqmi qanchis chunka punchaw Jacobmanta waqarqaku. 4Waqasqanku punchawkuna pasaruptinmi Josey rimapayarqa Rey Faraonpa wasinpi kaqkunata:
—Ama hina kaspaykichikyá Faraonta rimapayaykapuwaychik. 5Taytaymi juramentachiwarqa kaynata: “Wañukuptiymi Canaan lawpi sepulturay toqosqaypi pampawankichik” nispa. Chaynaqa ama hina kaspaykiyá kachaykuway taytay pampaq rinaypaq, chaypunillam kutimusaq.
6Hinaptinmi Faraon nirqa:
—Rispaykiyá pampamuy taytaykita juramento rurasqaykiman hina —nispa.
7Joseymi taytan pampaq rirqa, paywantaqmi rirqaku Faraonpa gobiernonpi llapallan yanapaqninkunapas, wasinpi ancianokunapas chaynataq Egipto nacionniyoq llapallan ancianokunapas. 8Rirqakutaqmi Joseypa wasinmanta llapallan wawqenkunapas, Gosen allpapiqa qeparqaku warmakunallañam ovejakunawan hinaspa vacakunawan. 9Joseywanmi rirqaku tropakunapas carretakunapi hinaspa caballokunapi achkallaña. 10Jordan Mayupa chimpan Atad eraman chayaruspankum waqarqaku llumpa-llumpayta. Joseymi qanchis punchawpuni waqasqallanpi karqa taytanmanta. 11Chay llaqtapi *f**yachaq Canaan casta runakunam Atad erapi waqasqankuta qawaspanku nirqaku: “Egipto casta runakunapa hatun llakinmi kayqa” nispanku. Chayraykum #Hebreo simipi Abel-mizraim ninanqa: “Egipto runakunapa allpan” ninanmi.Abel-mizraim sutiwan chay erata suticharqaku, chay eraqa kachkan Jordan Mayupa chimpanpim. 12Israelpa churinkunam rurarqaku taytanpa kamachisqanman hina. 13Canaan lawmanmi churinkuna aparqaku hinaspam pamparqaku Macpela chakrapi kaq machaypi, chay chakratam Abraham rantirqa Het casta Efronmanta chaypi mirayninkuna pampakunanpaq, chay chakraqariki karqa Mamre llaqtapa chimpanpim. 14Joseymi wawqenkunawan hinaspa pampaysiqninkunawan Jacobta pamparuspanku Egipto nacionman kutirqaku.
Wawqenkunata Josey kallpanchasqanmanta
15Taytanku wañukuptinmi Joseypa wawqenkuna rimanakurqaku:
—Joseyqa ichapas cheqniwachkanchik hinaspaqa tukuy mana allin rurasqanchikmantachá vengakuruwasunchik —nispa.
16Chaymi Joseyta nichimurqaku:
—Taytanchikmi manaraq wañukuchkaspa kamachikurqa 17qanman kaynata ninaykupaq: “Ruegakuykim wawqekikunapa mana allin rurasusqaykita hinaspa huchallikususqaykita pampachaykunaykipaq” nispa. Chaynaqa wawqellayku Josey, kunanmi ruegakuykiku mana allin rurasqaykumanta pampachaykuwanaykikupaq, ñoqaykupas papanchikpa Diosnin adoraqmi kaniku.
Joseymi chaynata rimaptinku waqarqa. 18Hinaptinmi wawqenkuna hamuspa paypa qayllanpi pakchakuykuspa nirqaku:
—Kunanqa sirvientekikunañam kaniku —nispa.
19Chaymi Joseyñataq nirqa:
—Ama manchakuychikchu, ñoqaqa manam Dioschu kani. 20Qamkunam mana allinta piensarqankichik ñoqapa contraypi aswanqa Diosmi allinpaq cambiarurqa kay qawasqaykichikpi hina rurananpaq chaynapi achka runakunata kawsachinanpaq. 21Chaynaqa amayá manchakuychikchu. Ñoqam qamkunatapas churikichikkunatapas mantienesaq —nispa.
Chaynatam Josey consuelarqa paykunata hinaspam rimapayarqa kuyakuywan.
Joseypa wañukusqanmanta
22Joseymi *f**yacharqa Egipto nacionpi taytanpa familiankunapiwan. Joseyqa kawsarqa pachak chunkan watatam. 23Joseymi rikurqa Efrainpa churinkunata, rikurqataqmi willkankunapa willkantapas. Joseyqa uywarqaraqmi Manesespa churin Maquirpa churinkunatapas.
24Huk punchawmi wawqenkunata Josey nirqa:
—Wañukusaqñam ñoqaqa ichaqa Diosmi cheqaptapuni watukamusunkichik hinaspam kay nacionmanta pusasunkichik Abrahanman, Isaacman hinaspa Jacobman prometekusqan allpaman —nispa.
25Chaymantam Josey Israelpa mirayninkunata juramentachispan nirqa:
—Diosmi cheqaptapuni watukamusunkichik, chayna kaptinmi tulluykunata kaymanta apankichik —nispan.
26Joseymi wañukurqa pachak chunkan watayoq chaymi hampikunawan chakichispanku cajonpi churarqaku Egipto nacionpi.
Currently Selected:
GENESIS 50: QUEAYA87
Highlight
Share
Copy
Want to have your highlights saved across all your devices? Sign up or sign in
