EXODO 1
1
Egipto nacionpi Israelpa mirayninkuna ñakarisqanmanta
1Israelpa churinkunam Egipto nacionman yaykurqaku, paykunawanmi yaykurqa taytanku Israelpas, sapakamam yaykurqaku familiantin. Israelpa chay churinkunam karqa: 2Ruben, Simeon, Leviy, Juda, 3Isacar, Zabulon, Benjamin, 4Dan, Neftaliy, Gad hinaspa Aser. 5Israelpa otaq Jacobpa mirayninkunam qanchis chunka karqa. Joseyqa Egipto nacionpiñam kachkarqa.
6Wañukurqañam Joseywan llapallan wawqenkunapas hinaspa llapallan chay wiñaymasinkunapas. 7Ichaqa Israelpa mirayninkunam sisi hinaña mancharikuypaqta mirarurqaku hinaspam sinchi atiyniyoq karqaku chaymi Egipto nacionpas paykunawan huntarurqa.
8Chaymantam Egipto nacionpi munaychakurqa Joseyta mana reqsiq huk mosoq reyña. 9Paymi runankunata nirqa:
—Kay Israelpa miraynin runakunaqa llumpayllatañam achkayarunku hinaspapas aswan atiyniyoqmi ñoqanchikmantaqa kachkanku. 10Chaynaqa yachaywanyá imatapas rurasunchik paykunapa contranpi chaynapi ama miranankupaq. Yanqañataqmi ima guerrapas karuptin enemigonchikkunaman hukllawakuykuspa peleanman contranchikpi hinaspa ripukunmanku nacionninchikmanta —nispa.
11Chayraykum Egipto runakuna churarqaku capatazkunata debaldella sasa llamkaykunawan Israelpa mirayninkunata ñakarichinankupaq. Paykunawanmi rurachirqaku kawsaykuna churana Piton llaqtatawan Ramses llaqtata, chay llaqtakunapim Rey Faraon waqaychaq kawsaykunata. 12Aswanqa maynata ñakarichiptinkupas aswanraqmi mirarqaku chaynapim Egipto runakuna karqaku mancharisqallaña Israelpa mirayninkunawan.
13Egipto runakunamá maqa-maqarispa servichikurqaku Israelpa mirayninkunawan. 14Ñakarichirqakumá mana aguantay atina sasallaña llamkaykunapi, mitu ruraypi, adobe chutaypi hinaspa campopi tukuy llamkaypi. Tukuy chay ruraypim Israelpa mirayninkunawan maqa-maqarispa servichikurqaku. 15Egipto nacionpi reyqa kamachirqataqmi Hebreo casta iskay parterakunatapas. Hukninmi karqa Sifra, hukninñataqmi karqa Fua, paykunatam nirqa:
16—Hebreo casta warmikunata atiendespaykichikqa qawankichikmi imam kasqanta, qari kaptinqa wañuchinkichikmi, warmi kaptinñataqmi ama imanankichikpaschu —nispa.
17Ichaqa parterakunam Diosta respetaspanku Egipto nacionpi reypa kamachisqantaqa mana kasukurqakuchu, qari wawakunataqa manamá wañuchirqakuchu. 18Chaymi parterakunata rey qayachispan nirqa:
—¿Imanasqataq qari wawakunataqa kawsachirqankichik? —nispa.
19Hinaptinmi Egipto nacionpi Rey Faraonta parterakuna nirqaku:
—Hebreo casta warmikunaqa manam Egipto warmikuna hinachu. Paykunaqa kallpasapa kaspankum partera manaraqpas chayachkaptin wachakurunkuña —nispa.
20Parterakunatam Dios favorecerqa chaymi Israel runakuna mirarurqaku ancha munayniyoq karunankukama. 21Parterakuna Diosta respetasqanraykum Diospas familiankunata achkayachirqa. 22Chaymi Faraon kamachirqa lliw runankunata:
—Llapallan Hebreo casta qari wawa naceqtaqa mayumanyá wischuychik, llapallan warmi wawakunatam ichaqa ama imanankichikchu —nispa.
Currently Selected:
EXODO 1: QUEAYA87
Highlight
Share
Copy
Want to have your highlights saved across all your devices? Sign up or sign in
