GENESIS 49
49
Wañukunallanpaqña churinkunapa imaynam kananmanta Jacobpa rimarisqan
1Jacobmi churinkunata qayaykuspan nirqa:
—Huñunakamuychik hinaptin willasqaykichik qepa punchawkunapi imam pasasunaykichikmanta.
2Jacobpa churinkuna,
huñunakuspayá uyariychik.
Israelpa churinkuna,
kay taytaykichiktayá uyariychik.
3Ruben, qamqa piwi churiymi kanki.
Qamqa atiyniy hinam kanki.
Kallpaypa qallariyninmi kanki.
Sinchi honrasqam kanki qamqa.
sinchi atiyniyoqmi kanki qamqa.
4Lloqlla hina mana harkay atinam kanki.
chayraykum mana piwi churiy hinañachu kanki.
Chaynaqa kanki ñoqa taytaykipa
compañeraywan puñusqaykimantam.
Chaynaqa kanki casado vidayta
qanrachasqaykimantam.
5Simeonwan Leviyqa wawqentinmi kanku.
Armankuwanmi mana amachay atina kanku.
6Tanteanakusqankumanqa manam yaykuymanchu.
Rimanakuptinkuqa manam hukllawakuymanchu.
Paykunaqa piñakuyninpim runata wañuchirqaku.
Paykunaqa caprichakuspam toropa ankunta kuchurqaku.
7Ñakasqayá kachunku
piñakuynin nisyu kasqanrayku.
Ñakasqayá kachunku
mana llakipayarikuspa rabiasqankurayku.
Jacobpa miraynin ukupim mirayninkunataqa rakinasaq.
Israel nacionpipas mirayninkunatam cheqechisaq.
8Juda, qamtam wawqekikuna alabasunki.
Enemigoykikunatam kunkanmanta hapinki.
Wawqekikunam ñawpaqnikipi kumuykusunki.
9Malta leon hinam kanki, churiy Juda.
Leonpa uñan hinam qamqa kanki, churiy Juda.
Hapimusqaykiwan saksaspam waqtapanki.
Hatun leon kaqllam kurkuykachaspayki waqtapanki.
Wawayoq leon hina kachkaptikiqa
Âżpitaqsi rikchachisunkimanqa?
10Judapa mirayninkunamantam reykuna kanqa.
Dueño hamunankamam manataq pipas
qechunqachu rey kaynintaqa.
Payllatañam kasukunqaku runakunaqa.
11Uvas sachamanmi
malta asnonta wataykunqa.
Sumaqllaña uvas sachamanmi
uña asnochanta wataykunqa.
Vinowanmi payqariki pachanta taqsanqa.
Uvaspa yakunwanmi saconninta taqsanqa.
12Vinomantapas
aswan mas pukam ñawinkunapas.
Lechemantapas
aswan mas yuraqmi kirunkunapas.
13Zabulonpa mirayninkunam
lamar qochapa patanpi *f**yachanqa.
Chaypitaqmi buquekunapa
sayananpas kanqa.
Linderonñataqmi Sidon llaqtakama kanqa.
14Isacarqa poqosqa asno hinam.
Payqa corralninpi waqtapaq asno hinam.
15Rikurqam samakuyqa allin kasqanta.
Rikurqataqmi sumaqllaña kasqanta.
Wasanta kurkuykachispam cargaykachikurqa.
Sirviente hinam hukpaq llamkarqa.
16Danqa castankunatam allinta arreglanqa.
Israelpa huknin ayllun hinam allinta arreglanqa.
17Payqa ñanpa patanpi culebra hinam.
Pasaq caballokunapa chakinta kachuq hinam.
Payqa sillakuqtapas wichiykachinqa culebra hinam.
18Tayta Dioslláy salvaykuwanaykitam suyachkani.
19Gadqa salteasqam kallanqapas.
Ichaqa salteanqam paykunatapas.
20Aserpa tantanqa kanqa miskillañam.
Payqa qonqa reypaq hina miskillaña mikuykunatañam.
21Neftaliyqa munasqanpi purikuq luwichu hinam.
Payqa kuyayllapaq uñachayoq luwichu hinam.
22Ruruq kallma hinam Joseyqa.
Pukyupa hichpanpi ruruq sachapa kallman hinam payqa.
Perqapa hawanman mastarikuq kallma hinam payqa.
23Paytaqa cheqnispankum flechanku.
Flechaqkunaqa siemprepunim wateqanku.
24Joseyqa flechanantam takyachin allinta.
Kallpanchanmi brazonkunatapas allinneqta.
Chaynataqa ruranqa
Jacobpa atiyniyoq Diosninraykum.
Chaynataqa ruranqa
Israelpa Michiqnin Diosraykum.
Chaynataqa ruranqa
Israelpa harkaqnin Diosraykum.
25Taytaykipa Diosninmi yanapasunki.
Tukuy Atiyniyoq Diosmi bendecisunki.
Payqa bendecisunki cielokunapi kaqkunawanmi.
Payqa bendecisunki lamar qochapi kaqkunawanmi.
Warmikiqa achka wawakunatayá ñuñuchun.
Warmikiqa achka wawakunatayá wachakuchun.
26Ă‘oqa taytaykim bendicionta rimaripuchkayki.
Wiñaypaq kaq orqokunamantapas mastaraqmi bendecichkayki.
Wiñaypaq kaq moqokunamantapas mastaraqmi bendecichkayki.
Qam Joseypa umayki hawanpim
kanqa kay bendicionkunaqa.
Wawqekikunamanta sapaqchasqam
karqanki qamqa.
27Benjaminqa tisaparuq atoq hinam.
Achikyaruptin hapimusqanta mikuq hinam.
Tardekuqtañataq qechumusqankunata rakinakuq runa hinam.
28Kay llapallankum karqa Israelpa mirayninmanta chunka iskayniyoq ayllukuna. Chaykunatam taytanku rimarirqa paykunapaq bendicionta mañakuspan.
Jacob wañukuptin pampakusqanmanta
29Churinkunatam Jacob kamachispan nirqa:
—Wañukuptiymi pampawankichik abueloykunapa pampakusqan sitiopi. Paykunaqa pampakurqa Het casta Efronpa chakranpi kaq machaypim. 30Chay machayqa kachkan Canaan law Mamrepa chimpan Macpela chakrapim. Chay machaytam Abraham rantirqa Het casta runa Efronmanta chaypi mirayninkuna pampakunanpaq. 31Chaypim Abrahamtawan warmin Sarata pamparqaku, chaypitaqmi pamparqaku Isaactapas hinaspa warmin Rebecatapas. Chaypitaqmi pamparqani Leatapas. 32Chakrapiwan machayqa Hetpa mirayninkunamanta rantisqam karqa —nispa.
33Jacobmi churinkunaman kamachiyta tukuykuspa waqtapaykuspa wañukurqa hinaspam abuelonkunapa kasqanman rirqa.
Currently Selected:
GENESIS 49: QUEAYA87
Highlight
Share
Copy
Want to have your highlights saved across all your devices? Sign up or sign in
