Mateo 7

Jesús wajkunata mana juchachanamanta yachachin

(Lc 6.37-38,41-42)

1Ama pitapis juchachaychejchu, ama juchachasqa kanaykichejpaj. 2Imaynatachus wajkunata juchachankichej, ajinallatataj Diospis qankunata juchachasonqachej. Imayna sonqowanchus wajkunata qhawankichej, chay jinallatataj Dios qankunata qhawasonqachej.#Mc 4.24.

3Imaraykutaj wawqeykej ñawinpi q'opata qhawanki, qanpa ñawiykipitaj kurkuta mana reparankichuri? 4Qanpa ñawiykipi chhikan kurku kashajtin, imaynatataj wawqeykita niwaj: Wawqey, ñawiykimanta chay q'opata orqhojta saqeway, nispa, qanpa ñawiykipi kurku kashajtinri? 5Puraj uya, ñawiykimantaraj ñawpajta chay kurkuta orqhokuy. Chantá allinta qhawaspa, wawqeykej ñawinmanta q'opata orqhoyta atinki.

6Diospaj t'aqasqa kajtaqa ama alqokunaman qaraykuychejchu. Pajtataj kutirimuspa qhanisunkichejman. Nillataj khuchikunamanpis perla walqaykichejkunata wijch'uychejchu, imaraykuchus khuchikunaqa walqakunata sarurallankuman.

Jesusqa Diosmanta mañakunamanta yachachin

(Lc 11.9-13; 6.31)

7Diosmanta mañakuychej, qosonqachejtaj. Dios kutichisunanta mask'aychej, tarinkichejtaj. Punkutapis takallaychejpuni, Diostaj kicharimusonqachej. 8Pichus Diosmanta mañakojqa jap'in, mask'ajtaj tarin,#Dt 4.29; 2 Cr 15.1-15; Jer 29.13. punkuta takajpajpis Dios punkuta kicharin.

9Qankunamanta mayqentaj, wawaykichej t'antata mañakojtin, rumita jaywawajchej? 10Chayrí wawaykichej challwata mañakojtin, kataritachu qowajchej? Mana, icharí? 11Qankunachus mana allin runakuna kashaspa, allin kajta wawaykichejkunaman qoyta yachankichej chayqa, astawanraj janaj pachapi kaj Tataykichejqa mañakojkunaman allin kajta qonqa.#Jn 14.13-14; 15.7,16; 16.23-24; 1 Jn 3.21-22; 5.14-15.

12Chayrayku, imaynatachus runakuna qankunapaj ruwanankuta munankichej, ajinallatataj qankunapis paykunapaj ruwaychej. Chayta ruwaspa, junt'ashankichej imatachus Diospa kamachisqanpi, Diosmanta sut'inchajkunaj qhelqasqankupi ima kamachishan, chayta.

K'ullku punkumanta rijch'anachina

(Lc 13.24)

13Diospa kamachiyninman k'ullku punkunejta yaykuychej, imaraykuchus chinkayman pusaj ñan jatunmin, chayman yaykuna punkupis jatunllataj. Chaynejta yaykojkunapis may ashkhallataj kanku. 14Chaywanpis wiñay kawsayman pusaj ñanqa k'ullkumin, chayman yaykuna punkupis k'ullkullataj. Chayta tarejkunataj pisilla kanku.#Sal 1.6; Pr 4.18-19; Jer 21.8; Jn 10.1-2,7; 14.6.

Mana cheqan yachachejkunata ruwasqankunejta rejsinchej

(Lc 6.43-44)

15Qankunaqa allinta qhawakuychej pikunachus llullakuspa: Diosmanta sut'inchaj kani, nispa nejkunamanta. Paykunaqa oveja jina jamusunkichej, sonqonkupitajrí suwa atoj jina kanku.#Ez 22.27; Jn 10.8. 16Qankunaqa ruwasqankunejta imaynachus kasqankuta rejsinkichej. Uvataqa mana khishkamantachu pallanchej, nillataj higotapis ithapallumantachu, icharí? 17Ajina, sumaj sach'aqa sumajta poqon, mana allin sach'aj poqosqanrí mana allinchu. 18Sumaj sach'aqa mana allin poqoyta mana poqonmanchu. Nillataj mana allin sach'apis allin poqoyta mana poqonmanchu. 19Ima sach'apis mana allinta poqospa, k'utusqa kanqa, ninamantaj enqhaykusqa.#Mt 3.10; Lc 3.9; 13.6-9; Jn 15.6. 20Ajinamanta, qankunapis ruwasqankunejta yachankichej pikunachus Diosmanta sut'inchajkuna kasqankuta nispa, llullakushanku, chayta.#Mt 12.33,35; Eclo 27.6.

Diospa kamachiyninman mana tukuychu yaykonqanku

(Lc 13.25-27)

21Mana tukuy pikunachus: Tukuyta Kamachejniyku kanki, nispa niwajkunachu Diospa kamachiyninman yaykonqanku. Manachayqa, janaj pachapi kaj Tata Diosniypa munayninta ruwajkunalla yaykonqanku. 22Chay p'unchaypeqa ashkha niwanqanku: Tukuyta Kamachej, manachu sutiykipi sut'incharqayku, sutiykipitaj runakunamanta supaykunata qharqorqayku? Manachu sutillaykipitaj ashkha t'ukuna imakunata ruwarqayku? nispa. 23Noqatajrí uyankupi nipusaj: Ni jayk'aj qankunata rejserqaykichejchu. Ñawpaqeymanta chinkaychej, millayta ruwajkuna, nispa.

Iskay wasikunamanta rijch'anachina

(Mc 1.22; Lc 6.47-49)

24Pichus kay yachachisqayta uyarispa ruwajqa sumaj yuyayniyoj, paytaj chhanka patapi wasichakoj runaman rijch'akun. 25Chantá sinch'i para jich'akamusqa, mayukunapis wasaykuspa, wasikama chayasqa, sinch'i wayrataj wasita wajtasqa. Chaywanpis chay waseqa mana urmasqachu, chhanka patapi ruwasqa kasqanrayku.

26Sichus pipis yachachisqayta uyarispa mana kasun chayrí, payqa mana yuyayniyoj runaman rijch'akun, pichus t'iyu patapi wasichakojman. 27Jinapi sinch'i para jich'akamusqa, mayukunapis wasaykuspa wasikama chayasqanku. Sinch'i wayrapis wasita wajtasqa. Chantá t'iyu patapi ruwasqa kasqanrayku waseqa urmasqa, urmaspataj raqayllaman tukusqa, nispa.

28Jesús chay imakunata parlayta tukojtin, runakunaqa yachachisqanmanta mayta t'ukorqanku. 29Astawan t'ukorqanku, imaraykuchus Jesusqa kasuchikunapaj jina yachacherqa, manataj Diospa kamachisqanmanta yachachejkuna jinachu.

Currently Selected:

Mateo 7: DQPC

Highlight

Copy