Mateo 8

Jesús llejti onqoyniyojta qhaliyachin

(Mc 1.40-45; Lc 5.12-16)

1Jesús orqomanta urayk'amusqantawan, ashkha runakuna payta qhaterqanku. 2Chantá llejti onqoyniyoj uj runaqa Jesusman qayllaykorqa, ñawpaqenman pampakama k'umuykukuspataj, nerqa: Wiraqochíy, munankichus chayqa, onqoyniymanta qhaliyachiwayta atinki, Diospa ñawpaqenpi llimphu kanaypaj, nispa.

3Jesustaj makinta aysarispa, payta llankhaykorqa, nerqataj: Arí munani, llimphuchasqa kay, nispa. Chayta Jesús nejtinkamataj, chay runaqa llejti onqoymanta qhaliyachisqa karqa. 4Jesús nillarqataj: Uyariway: Ama kayta pimanpis willankichu. Manachayqa rispa, sacerdotellaman rikuchikamuy. Jinataj Moisespa kamachisqanman jina jaywanaykita qomuy, runakuna yachanankupaj onqoyniykimanta llimphuchasqa kasqaykita, nispa.

Jesusqa capitanpa uywasqanta qhaliyachin

(Lc 7.1-10; Jn 4.43-54)

5Jesusqa Cafarnaún llajtaman yaykusqantawankama, romano soldadokunata kamachej uj capitán payman qayllaykuspa, mañakorqa: 6Wiraqochi, uywasqayqa wasiypi onqosqa, suchu. Paytaj nanaywan anchatapuni ñak'arishan, nispa. 7Jinapitaj Jesús nerqa: Noqa rispa, payta qhaliyachimusaj, nispa.

8Capitantajrí kuticherqa: Wiraqochi, noqaqa mana wasiyman yaykunaykipaj jinachu kani. Manachayqa uj simita nillay, uywasqaytaj qhaliyaponqa. 9Noqaqa kurajkunaj kamachisqallantaj kani, jinallataj noqapis soldadokunata kamachini. Ujninta kamachini: Riy, nispa, rintaj. Ujnintapis nillanitaj: Jamuy, nispa, jamuntaj. Jinallataj, kamachiytapis nini: Kayta ruway, nispa, paytaj chayta ruwan, nispa.

10Jesús chayta uyarispa, t'ukorqa. Paywan rejkunatataj nerqa: Kayta sut'ita niykichej: Kay runa noqapi atinikusqanta jinaqa, Israel ayllupi mana ujtapis tarinichu. 11Nillaykichejtaj: Ashkha runa inti llojsimuynejmanta jamonqanku, inti yaykuynejmanta ima. Chantá Diospa janaj pacha kamachiyninpi paykuna Abrahamwan mikhonqanku, Isaacwan, Jacobwan ima. 12Pikunachus Diospa janaj pacha kamachiyninpi kananku karqa chaykunarí, jawa laqhaman wijch'usqa kanqanku, maypichus manchay waqay, kiru k'arukuytaj kanqa, chayman, nispa.

13Chaymanta Jesusqa chay capitanta nerqa: Wasiykiman ripuy, noqapi atinikusqaykirayku munasqayki ruwasqa kachun, nispa. Chayta Jesús nisqantawantaj, capitanpa uywasqan qhaliyaporqa.

Jesusqa Pedroj suegranta qhaliyachin

(Mc 1.29-31; Lc 4.38-39)

14Chaymanta Jesusqa Pedroj wasinman rerqa, chaypitaj Pedroj suegranta rikorqa, k'aja onqoywan puñunanpi sirisqata. 15Chantá, Jesús onqosqaj makinta llankharejtinkama, k'aja onqoyninmanta qhaliyaporqa. Jatarimuspataj, payqa mikhunata paykunaman jaywarqa.

Jesús ashkha onqosqakunata qhaliyachin

(Mc 1.32-34; Lc 4.40-41)

16Ch'isiyaytaña, chay llajtayojkunaqa Jesusman supayniyoj ashkha runata pusamorqanku. Paytaj uj simita nispalla, chay runakunamanta supaykunata qharqorqa. Ajinallatataj tukuy onqosqakunatapis qhaliyacherqa. 17Chay ajina karqa Diosmanta ñawpa sut'inchaj Isaiaspa willasqan junt'akunanpaj: Paymin onqoyninchejmanta qhaliyachiwarqanchej, nanayninchejtapis thañichiwarqanchej,#Is 53.4. nispa.

Jesuswan riyta munajkuna

(Lc 9.57-62)

18Chantá Jesusqa muyuyninpi ashkha runata rikuspa, yachachisqankunata kamacherqa qochaj chimpanman rinankuta. 19Chayllapi Diospa kamachisqanmanta uj yachachej Jesusman qayllaykuspa, nerqa: Yachachej Wiraqochi, mayman rejtiykipis, noqaqa qanwan khuska riyta munani, nispa.

20Jesustajrí kuticherqa: Atojkunajtaqa qaqapi jusk'unku tiyan, p'isqokunapis thapayojllataj kanku. Runaj Churinpajtarí, mana maypichus samarinallanpajpis kanchu, nispa.

21Yachachisqankunamanta ujnin kajtaj nerqa: Wiraqochíy, tatay wañupunankama suyariway ari, chaymantaraj qhatisqayki, nispa. 22Jesustajrí kuticherqa: Yachachisqay kanaykipaj noqawan jamuy, wañusqa kajkunataj, wañusqankukunata p'ampachunku, nispa.

Jesús sinch'i wayrata, phiñarikoj qochatawan thañichin

(Mc 4.35-41; Lc 8.22-25)

23Chantá Jesusqa boteman yaykuspa, yachachisqankunawan khuska chaymanta riporqa. 24Rishajtinku, qochapi sinch'i wayra oqharikorqa, yakutaj manchayta qhollchoqeyaspa, boteta chinkaykuchisharqaña. Jesustajrí puñusharqa. 25Chantá yachachisqankuna Jesusman qayllaykuytawan rijch'arichispa, nerqanku: Wiraqochi, yanapawayku ari, yakuman chinkaykushanchejña, nispa.

26Chantá Jesús paykunata nerqa: Imaraykutaj manchachikunkichejri? Qankunamá kasqankichej, manachu noqapi atinikunkichej? nispa. Sayariytawantaj, qochata, wayratawan k'amerqa. Wayra thañejtintaj, qochapis tiyaykorqa. 27Yachachisqankunatajrí t'ukuspa, nerqanku: Pitaj kay runa kanmanri, wayrapis, mama qochapis payta kasunankupajri?#Sal 107.29. nispa.

Gadaramanta supayniyoj iskay runakuna

(Mc 5.1-20; Lc 8.26-39)

28Ajinaqa Jesús qocha chimpapi Gadara jap'iyman chayarqa. Chantá supayniyoj iskay runakuna panteonmanta llojsimuspa, payman chimpaykorqanku. Manchay phiña kasqankurayku, chay ñannejta ni pi purejchu. 29Paykunataj kay jinata qhapariyta qallarerqanku: Diospa Churin, ima ruwanayki tiyan noqaykuwanri? Manaraj ñak'arinayku kashajtin, noqaykuta ñak'arichejchu jamunki? nispa.

30Paykunamanta karunejpi ashkha khuchi mikhusharqanku. 31Chantá chay supaykunaqa Jesusmanta mañarikorqanku: Sichus kay runakunamanta qharqowasqayku chayqa, jaqay khuchikunaman kachawayku, nispa. 32Jesustaj nerqa: Riychej, nispa.

Chantá supaykunaqa chay iskay runakunamanta llojsispa, khuchikunamanñataj yaykorqanku. Tukuynin khuchikunataj imata jina phawaspa, qaqanta mama qochaman wijch'uykukorqanku, jeq'eqaspataj wañurarqanku.

33Chayta rikuspa, khuchikunata michejkuna ayqerqanku. Llajtaman chayaspataj, supayniyoj runakunata imachus qhatirisqanta willarqanku. 34Jinapi chay llajtamanta tukuy runakuna Jesusta taripaj llojserqanku. Chaywanpis paywan tinkukuspa, chay cheqamanta ripunanta mañarikorqanku.

Currently Selected:

Mateo 8: DQPC

Highlight

Copy