Mateo 6

Jesús wajchakunata yanapanamanta yachachin

1Jesús yachachillarqataj: Ima allinta ruwaspaqa, ama runakunaj rikunantachu ruwaychej, paykuna jatunchasunaykichejpaj. Ajinata ruwajtiykichejqa, janaj pachapi kashaj Tata Diosniykichejqa mana ima t'inkatapis qosonqachejchu. 2Chayrayku qolqeta wajchakunaman qospaqa, ama tukuyman willaychejchu, imaynatachus puraj uya runakuna ruwanku tantakuna wasikunapi, callekunapi ima, ajinata. Paykunaqa runakunawan allinpaj qhawasqa kanallankupaj chayta ruwanku. Noqatajrí kayta sut'ita niykichej: Paykuna ajinata ruwaspa, chayllata t'inkata jina jap'enqanku. 3Chayrayku wajchakunaman imatapis qonkichej chayqa, aswan munasqa kawsaqeykichejpis ama yachachunchu imatachus ruwasqaykichejta. 4Ajinaqa mana pejpa yachasqanta wajchakunata khuyaychej. Chantá, pakaypi khuyasqaykichejta rikoj Tata Diosniykichej tukuypa ñawpaqenpi t'inkachisonqachej.

Jesús imaynatachus Dioswan parlarikunamanta yachachin

(Lc 11.2-4)

5Dioswan parlarikuspaqa, ama puraj uya jina kaychejchu. Paykunaqa sayaykukuspa, Dioswan parlarikunku tantakuna wasikunapi, plazaj esquinankunapi ima, runakunawan rikuchikunankupaj.#Mt 23.5; Lc 18.10-14. Noqarí kayta sut'ita niykichej: Ajinata ruwaspa, paykuna chayllata t'inkata jina jap'enqanku. 6Qankunarí Tata Diosniykichejwan parlarikunaykichejpajqa, cuartoykichejman yaykuspa punkuta wisq'aychej, chaypitaj pakaypi Tata Diosniykichejwan parlarikuychej. Chantá pakaypi parlarikusqaykichejta uyarej Tata Diosniykichejqa tukuypa ñawpaqenpi t'inkachisonqachej.

7Dioswan parlarikuspaqa, ama kutipakuspa ashkhata parlaychejchu, Diosta mana rejsejkuna jinaqa. Paykunaqa ashkhata parlasqankurayku Dioswan uyarichikunankuta yuyanku. 8Qankunarí ama paykuna jina kaychejchu, imaraykuchus Tataykichejqa yachanña imatachus pisichikushasqaykichejta, manaraj paymanta mañakushajtiykichej. 9Chayrayku qankuna kay jinata Dioswan parlarikunkichej:

Janaj pachapi kaj Tatayku, sutiyki jatunchasqa kachun.

10Jamuspa noqaykuta kamachiyta qallariy,

munayniykitaj kay pachapi ruwasqa kachun,

imaynachus janaj pachapi ruwakun, ajinallatataj.

11Sapa p'unchay imatachus mikhunaykuta qowayku, ari.

12Juchaykutapis pampachapuwayku,

imaynatachus pipis mana allinta ruwawajtiyku,

noqaykupis juchankuta pampachayku, ajinata.

13Chantá juchallinaman tanqasqa kashajtiyku, ama kasojta saqewaykuchu,

manachayqa jark'awayku Supayta kasunaykumanta.

Kayta mañarikuyku, imaraykuchus qanmin Tukuyta Kamachej kanki,

tukuy atiyniyojtaj, tukuypaj jatunchasqataj wiñay wiñaynintinpaj.

Ajina kachun, nispa.

14Sichus qankuna contraykichejpi mana allin ruwasqankuta pampachankichej chayqa, janaj pachapi kaj Tataykichejpis juchallisqaykichejta pampachallanqataj. 15Chaywanpis sichus runakuna contraykichejpi mana allin ruwasqankutapis mana pampachankichej chayqa, Tata Diosniykichejpis manallataj juchallisqaykichejta pampachanqachu.#Mt 18.35; Mc 11.25; Ef 4.32; Col 3.13; Eclo 28.2-5.

Jesús ayunomanta yachachin

16Ayunaspaqa, ama llakiy uyalla kaychejchu, puraj uya runakuna jina. Paykuna uyankuta uj jinayachinku, runakuna ayunasqankumanta mayta parlanankupaj. Noqatajrí sut'ita niykichej: Ajinata ruwaspa, paykuna chayllata t'inkata jina jap'enqanku. 17Qankunarí, ayunaspaqa umaykichejta ñajch'akuychej, uyaykichejtapis mayllakuspa sumajta allinchakuychej. 18Ama runakuna ayunasqaykichejta yachachunkuchu, manachayqa pakaypi kaj Tata Diosnillaykichej yachachun. Jinapitaj pakaypi rikoj Tata Diosniykichejqa runaj ñawpaqenpi t'inkachisonqachej.

Jesús kapuyniyoj kanamanta yachachin

(Lc 12.33-34)

19Ama kay pachapi qhapajyayta munaspa, ashkha imata tantaychejchu. Kaypeqa thuta k'utun, tukuy imapis ismurparin, jinallataj suwakunapis wasiman yaykuykuspa, suwakapullankutaj. 20Aswanpis, qankunaqa kapuyniykichejta janaj pachapi tantaychej. Chaypeqa mana thutapis k'utunchu, nitaj ismuypis tukuchinchu. Nillataj suwakunapis suwakapunankupaj yaykuyta atinkuchu. 21Maypichá kapuyniykichej kashan, chayllapitaj sonqoykichejpis kanqa.

Ñaweqa runaj ukhunpa k'anchaynin

(Lc 11.34-36)

22Ñawiykeqa ukhuykipaj k'anchay jina. Ñawiyki allin kajtenqa, tukuy ukhuykipis k'anchayniyoj kanqa. 23Ñawiyki mana allin kajtinrí, tukuy ukhuyki laqhapi kanqa. Qanpi kashaj k'anchaytajchus laqhayapunman chayqa, imayna laqhapunichus kanman chay laqhaqa.

Dioschu, chayrí qhapaj kaychu aswan?

(Lc 16.13)

24Mana pipis iskay patronkunaj kamachiyninpi ujllapi kayta atinchu, imaraykuchus ujninta chejnenqa, ujnintataj munakonqa. Chayrí, ujnin patronman k'askakonqa, ujnintataj qhesachanqa. Manallataj qankunapis ujllapi qolqetawan, Diostawan aswanpaj qhawayta atinkichejchu.

Diosqa wawankunata qhawarin

(Lc 12.22-31)

25Chayrayku niykichej: Ama phutikuychejchu kawsayniykichejmanta, imatachus mikhunaykichejmanta, ujyanaykichejmanta ima. Amallataj phutikuychejchu imawanchus p'achallikunaykichejmantapis. Kawsashaspa imaynatachus purinanchejta aswanpaj qhawana tiyan, imatachus mikhunanchejmanta, imawanchus p'achallikunanchejmanta nisqaqa. 26Qhawariychej phawaj p'isqokunata. Paykuna mana tarpunkuchu, nitaj ruthunkuchu, nillataj mikhuna jallch'ananku kanchu. Chaywanpis janaj pachapi kaj Tata Diosniykichejqa paykunata mikhuchin. Manachu qankuna p'isqokunamanta nisqa Tataykichejpaj aswan munasqa kankichej?#Mt 10.31; Lc 12.7. 27Mayqentaj qankunamanta anchata phutikuspa, khuskan metrota jina sayayninman yapanmanri?

28Imaraykutaj p'achamanta llakikunkichejri? Qhawariychej campopi imaynatachus t'ika wiñasqankuta. Chaykuna mana llank'ankuchu, nitaj phushkankuchu. 29Chaywanpis, ñawpa kuraj kamachej Salomonqa may qhapaj kaspapis, manapuni chay t'ika jinallapis munayta p'achallikorqachu. 30Dios campopi qhorata chay jina munayta p'achallichin, mayqenchus kunan wiñan, q'ayataj ninapi ruphachisqa kanqa, chayta. Jina chayqa, manachu pay qankunatapis aswan sumajta p'achallichisonqachej? Qankunarí imaraykutaj mana tukuy sonqochu Diospi atinikunkichej?

31Chayrayku, ama phutikuychejchu: Imatataj mikhusun? Imatataj ujyasun? Chayrí imawantaj p'achallikusunri? nispa. 32Diosman mana kutirikoj runakunamin chaymanta phutikunku. Qankunarí janaj pachapi kaj Tata Diosniyoj kankichej, paytaj yachanña imamantachus pisichikushasqaykichejta. 33Aswanpis qankunaqa Dios kuraj kamachejniykichej kananta tukuy sonqo munaychej, chayman jina cheqan kawsaytapis ñawpajta mask'aychej, jinapitaj Diosqa chay waj imakunata yapata jina qosonqachej. 34Chayrayku q'aya imachus kananmanta ama phutikuychejchu, imaraykuchus q'aya p'unchay chayamojtenqa, chaypachalla chaymanta phutikuyta atinki. Sapa p'unchaypa llakiynenqa chay p'unchayllapaj kachun.

Currently Selected:

Mateo 6: DQPC

Highlight

Copy