Mateo 5

Jesús orqopi yachachin

1Uj p'unchay Jesús ashkha runata jamushajta rikuspa, uj orqoman wicharerqa. Chaypi tiyakushajtintaj, yachachisqankuna payman qayllaykorqanku. 2Chantá Jesús kay jinata yachachiyta qallarerqa:

Kusikuyniyojkuna

(Lc 6.20-23)

3Kusikuyniyojmin kanku wajcha sonqoyoj kasqankuta reparakojkunaqa,

imaraykuchus janaj pachamanta Diospa kamachiyninpi kanqanku.

4Kusikuyniyojmin kanku kunan waqajkunaqa,

imaraykuchus Diosmin paykunata sonqochanqa.

5Kusikuyniyojmin kanku llamp'u sonqoyojkunaqa,

imaraykuchus Dios kay pachata chayaqeta jina paykunaman qonqa.

6Kusikuyniyojmin kanku cheqan kawsaymanta yarqhachikojkunaqa, ch'akichikojkunapis,

imaraykuchus Dios paykunata sajsachenqa.

7Kusikuyniyojmin kanku khuyakojkunapis,

imaraykuchus Dios paykunamanta khuyakullanqataj.

8Kusikuyniyojmin kanku llimphu sonqoyojkunaqa,

imaraykuchus paykuna Diosta rikonqanku.

9Kusikuyniyojmin kanku pikunachus tukuypaj allinpi kawsakuyta mask'ajkunaqa,#Sal 34.14-15; Pr 12.20.

imaraykuchus paykunaqa Diospa churinkuna sutichasqa kanqanku.

10Kusikuyniyojmin kanku pikunachus cheqan kajta ruwasqankurayku,

qhatiykachasqa kajkunaqa,

imaraykuchus janaj pachamanta Diospa kamachiyninman yaykonqanku.

11Qankunapis kusikuyniyojmin kankichej, runakuna noqarayku qankunapaj rimajtinku, chejnispa ñak'arichisojtiykichej, llullakuspa contraykichejpi imaymanata nejtinku ima. 12Chaypacha kusikuychej, jinallataj sonqo junt'asqa kaychej, imaraykuchus janaj pachapi t'inkaykichejqa ashkhamin. Ajinallatataj runakunaqa Diosmanta ñawpa sut'inchajkunata chejnispa qhatiykacharqanku.#2 Cr 36.16; Hch 7.52.

Kachi jina, k'anchay jina kanamanta

(Mc 9.50; Lc 14.34-35)

13Runakuna ukhupi qankunaqa kachi jina kankichej. Chaywanpis, sichus kachi q'aymayanman chayqa, imaynatataj k'araman watej kutinmanri? Mana imapaj walejñachu, manachayqa jawaman wijch'unallapajña, runa sarunanpaj.

14Jinallataj qankunaqa runakunapaj k'anchay jina kankichej. Orqo patapi llajtaqa mana pakasqa kayta atinchu, icharí? 15Nillataj pipis lamparata jap'ichispa wich'iwan k'umpuykunchu. Manachayqa lamparata jap'ichispa, pataman churan, wasipi tukuy kajkunata k'anchananpaj.#Mc 4.21; Lc 8.16; 11.33. 16Ajinallatataj, k'anchayniykichejqa runakunaj ñawpaqenpi k'anchachun. Ajinamanta paykuna allin ruwasqaykichejta rikuspa, janaj pachapi kashaj Tata Diosniykichejta jatunchanqanku.

Jesusqa Diospa kamachisqanmanta yachachin

17Ama yuyaychejchu noqaqa Diospa kamachisqanta, chayrí, Diosmanta sut'inchajkunaj yachachisqankuta ima chinkachej jamusqayta. Mana chaykunata chinkachejchu jamuni, aswanpis junt'aj jamuni. 18Chayrayku sut'ita niykichej: Janajpis, kay pachapis kanankamaqa, Diospa kamachisqanmanta mana uj simillapis chinkachisqachu kanqa, aswanpis tukuynin junt'akonqa. 19Sichus pipis kay kamachisqakunamanta aswan juch'uy kajllatapis p'akinman, jinallataj wajkunamanpis p'akiyta yachachinman chayqa, janaj pachamanta Dios kay pachapi kamachishajtin chay runaqa pisipaj qhawasqa kanqa. Ajinallatataj sichus pipis Diospa kamachisqanta junt'anqa, jinallataj wajkunamanpis junt'ayta yachachenqa chayqa, chaymá sumaj jatunpaj qhawasqa kanqa janaj pachamanta Dios kay pachapi kamachishajtin.

20Chayrayku qankunata niykichej: Qankuna yuyankichej Diospa kamachisqanmanta yachachejkuna, fariseokunawan ima, cheqan runa kasqankuta. Manachus qankuna paykunamanta aswan cheqan kawsayniyoj kankichej chayrí, janaj pachamanta Diospa kay pachapi kamachiyninman mana yaykunkichejchu.

Jesús mana phiñakunamanta yachachin

(Lc 12.57-59)

21Qankuna uyarerqankichej ñawpa tataykichejkunaman imachus kamachisqa kasqanta: Ama runa masiykita wañuchinkichu. Pillapis runata wañuchejqa juiciopi juchachasqa kanqa, nispa. 22Noqatajrí niykichej: Sichus pipis wawqenpaj phiñakun chayqa, juiciopi juchachasqa kanqa. Pichus wawqenta wampu nejpis Jatun Juntapi juchachasqallataj kanqa. Chantá, sichus pipis wawqenta maldicinman chayqa, lawrashaj nina qochaman wijch'uykusqa kananpaj jina kanqa.

23Chayrayku, Diosman jaywanaykita apashaspaqa, sichus wawqeyki qanpaj phiñasqa kasqanta yuyarikuwaj chayqa, 24altarpa ñawpaqenpi jaywanaykita saqey. Chantá wawqeykiwanraj ñawpajta allinyakamuy. Chaymantaraj kutimuspa, apamusqaykita Diosman jaywayta atinki.

25Sichus piwanpis phiñanakuytawan quejaman rishanki chayqa, paywan allinyakapuy. Manachayqa awqayki juezman apasonqa, jueztaj carcelta qhawajwan jap'ichisonqa, carcelman wisq'achisunanpaj. 26Kayta sut'itapuni niyki: Mana carcelmanta llojsinkichu, tukuy manuykita paganaykikama, nispa.

Jesús mana khuchichakunamanta yachachin

27Qankuna uyarerqankichej imachus kamachisqa kasqanta: Ama qhenchachakunkichu khuchichakuspa,#Ex 20.14; Dt 5.18. nispa. 28Noqatajrí niykichej: Sichus pipis uj warmita qhawaspa paywan puñuykunanpaj munapayan chayqa, ñapis paywan sonqonpi khuchichakunña, nispa.

29Chayrayku paña ñawiyki juchallichisojtenqa, orqhorparispa karunejman wijch'uy, imaraykuchus aswan allin kanman uj ñawillayki chinkanan, tukuy ukhuyki lawrashaj nina qochaman wijch'uykusqa kananmantaqa. 30Ajinallatataj paña makiyki juchallichisojtenqa, khuchuspa karunejman wijch'uy. Aswan allin kanman uj makillayki chinkanan, tukuy ukhuyki lawrashaj nina qochaman wijch'uykusqa kananmantaqa.

Qhari warmi mana t'aqanakunamanta

(Mt 19.9; Mc 10.11-12; Lc 16.18)

31Ajinallatataj ñawpajta kamachisqa karqa: Pillapis warminmanta t'aqakojqa t'aqanakuy papelta qopuchun,#Dt 24.1-3; Jer 3.1. nispa. 32Noqatajrí niykichej: Sichus pipis warminmanta t'aqakun, warmin mana wajwan wasanchaspa khuchichakojtillan chayqa, warminta khuchichakuspa juchallinanpaj tanqaykun. Jinallataj chay warmiwan casarakojpis khuchichakullantaj.

Jesús mana tilunamanta yachachin

33Uyarillarqankichejtaj ñawpa tatakunaman nisqa kasqanta: Ama qhasita tilunkichu, manachayqa imatachus Diospa ñawpaqenpi tilusqaykita junt'anki,#Lv 19.12; Nm 30.2; Dt 23.21-23. nispa. 34Noqatajrí niykichej: Amapuni tilunkichejchu janaj pacharayku, imaraykuchus chayqa Diospa kamachinan tiyana. 35Nitaj kay pacharaykupis tilunkichejchu, imaraykuchus kay pachaqa Diospa chakinpa sarunanmin. Nillataj Jerusalenraykupis tilunkichejchu, imaraykuchus chayqa may jatunchasqa Kuraj Kamachejpa llajtanmin. 36Amallataj umaykichejrayku tilunkichejchu, imaraykuchus mana uj chujchallatapis yurajyachiyta nitaj yanayachiyta atinkichejchu. 37Chayrayku qankuna kay jinallata parlankichej: Maypachachus arí, nispa ninkichej chaypachaqa, ajina kachun. Maypachachus mana, nispa ninkichej chaypacharí, ajinallataj kachun. Chaymanta astawan parlanaqa sajraj yuyaychasqanmin.

Jesús mana kutichikunamanta yachachin

(Lc 6.29-30)

38Kay ñawpa kamachisqatapis uyarillarqankichejtaj: Pichus runa masinpa ñawinta suruchejqa, paypa ñawintapis suruchillanqankutaj. Jinallataj pichus wajpa kirunta p'akejpis, paypa kiruntapis p'akillanqankutaj, nispa. 39Noqatajrí niykichej: Sichus pipis mana allinta ruwasunkichej chayqa, ama pagachikuychejchu. Pillapis uyaykipi laq'asojtenqa, uj lado uyaykitawan rikuchiy. 40Chayrí sichus pipis quejaspa camisaykita qhechusuyta munan chayqa, qhatakunaykitapis jaywallaytaj.

41Chantá, sichus uj soldado q'epinta uj kilometrota qanwan q'epichiyta munan chayqa, uj jinatawan apapuy. 42Pipis imata mañakusojtenqa, qoriy. Jinallataj: Manuriway, nispa nisunkiman chayqa, manuriy.

Jesús awqakunata munakunamanta yachachin

(Lc 6.27-28,32-36)

43Uyarerqankichej kamachisqa kasqanta: Runa masiykita munakunki,#Lv 19.18. awqaykitataj chejninki, nispa. 44Noqatajrí niykichej: Awqaykichejkunata munakuychej, jinallataj qankunata qhatiykachasojkunapaj Diosmanta mañapuychej. 45Ajinamanta, janaj pachapi kashaj Tata Diosniykichejpa wawankuna kasqaykichejmanta yachayta qoshankichej. Payqa millayta ruwaj runakunapaj, k'acha runakunapajpis intinta llojsichimun. Jinallataj tukuypaj parachimun, cheqanta ruwajkunapaj, mana cheqanta ruwajkunapajpis.

46Sichus qankunata munakojkunallata munakunkichej chayqa, pitaj chaymanta t'inkata qosonqachejri? Manachu juchasapapaj qhawasqa impuesto cobrajkunapis kikillantataj ruwanku? 47Sitajchus qankuna wawqeykichejkunallata napaykunkichej chayqa, ujkunamanta imatataj aswan allinta ruwashankichejri? Manachu Diosman mana kutirikojkuna kikillantataj ruwanku? 48Janaj pachapi kashaj Tata Diosniykichejqa cheqan munakuyniyoj. Chayrayku qankunapis ajinallataj kaychej. Ajinata nispa Jesús yachacherqa.

Currently Selected:

Mateo 5: DQPC

Highlight

Copy