Mateo 19

Qhari warmi mana t'aqanakunamanta

(Mc 10.1-12; Lc 16.18)

1Jesús chay tukuy imata niytawan, Galilea suyumanta riporqa, jinataj Jordán mayoj inti llojsimuy chimpanpi Judea cheqanejman chayarqa. 2Chantá ashkha runakuna Jesuspa qhepanta chayman rerqanku, chaypitaj pay onqosqakunata qhaliyacherqa.

3Chaypacha wakin fariseokuna Jesusman chimpaykorqanku, payta pantachiyta munaspataj, taporqanku: Qhareqa warminmanta imallamantapis t'aqakuyta atillanmanchu? nispa.

4Jesustaj kuticherqa: Manachu Diospa Qhelqachisqanpi ñawirerqankichej, imaynatachus kay pachata ruwaj Diosqa qallariypi qharitawan, warmitawan ruwasqanta?#Gn 1.27; 5.2. 5Chayrayku qhareqa tatanta, mamanta ima saqespa, warminwan khuskachakapun. Iskayninkutaj uj runa jinallaña kanku. 6Ajinapeqa manaña iskaychu kanku, manachayrí ujllaña. Chayrayku, Diospa ujchasqantaqa ama pipis t'aqachunchu, nispa.

7Chantá fariseokuna ujtawan tapullarqankutaj: Jinachus chayqa, imaraykutaj Moisés kamacherqa qhareqa t'aqanaku papelta warminman jaywaspa, payta kachapunantari?#Dt 24.1-4. nispa.

8Jesustaj kuticherqa: Qankuna rumi sonqo kasqaykichejraykumá Moisesqa warmiykichejmanta t'aqakunaykichejta saqesorqachej. Chaywanpis qallariypeqa mana jinachu karqa. 9Chayrayku niykichej: Sichus pipis warminmanta t'aqakun mana pay wajwan wasanchaspa khuchichakojtillan, sitajchus waj warmiwan casarakun chayqa, chay runaqa khuchichakuspa qhenchachakun, nispa.

10Chantá Jesuspa yachachisqankuna nerqanku: Sichus ajinata qhareqa warminwan kawsanan kashan chayqa, mana allinchu casarakunaqa, nispa. 11Jesustaj kuticherqa: Mana tukuychu kay yachachisqayta entiendeyta atinku. Manachayqa pikunamanchá Dios kayta entiendenankupaj yachayta qon, chaykunalla. 12Wakin qharikunaqa paqarikusqankumantapacha mana casarakunankupaj jinachu kanku, wakintataj runakuna capanku ama casarakunankupaj. Wakinkunatajrí munasqankuraykulla mana casarakunkuchu, Diospa janaj pacha kamachiyninrayku ruwanankuta junt'anankupaj. Pichus kay nisqayman jina kayta atejqa tukuy sonqo jap'ikuchun, nispa.

Jesús wawakunata saminchan

(Mc 10.13-16; Lc 18.15-17)

13Uj kuti wakin tata mamakuna wawankukunata Jesusman pusamorqanku, paykunata makinwan llankhaykuspa Diosmanta mañapunanpaj. Yachachisqankunatajrí chay pusamojkunata k'amerqanku. 14Jesustajrí yachachisqankunata nerqa: Wawakuna noqaman jamojta saqellaychej, amataj jark'aychejchu, imaraykuchus kay wawakuna jina kajkunalla Diospa janaj pacha kamachiyninman yaykonqanku, nispa.

15Chantá Jesús wawakunata Diospa sutinpi saminchaytawan, chaynejmanta riporqa.

Qhapaj runa Jesuswan parlarikun

(Mc 10.17-31; Lc 18.18-30)

16Chaypacha uj runa Jesusman qayllaykuspa, nerqa: Yachachej Wiraqochíy, ima allin kajtataj ruwasaj wiñay kawsayniyoj kanaypajri? nispa.

17Jesustaj kuticherqa: Imaraykutaj allin kajmanta tapuwankiri? Mana pipis allin kanchu, manachayqa Dioslla. Sichus paypa kamachiyninman yaykuyta munanki chayrí, Diospa tukuy kamachisqankunata junt'ay,#Lv 18.5. nispa.

18Chantá chay runa taporqa: Mayqen kamachisqakunatataj junt'anay tiyanri? nispa. Jesustaj kuticherqa: Ama runata wañuchinkichu, ama khuchichakuspa qhenchachakunkichu, ama suwankichu, ama llulla testigomantapis sayankichu.#Ex 20.13-16; Dt 5.17-20. 19Chantá tataykita, mamaykitapis jatunpaj qhaway, jinallataj runa masiykitapis qan kikiykita jina munakuy,#Ex 20.12; Dt 5.16; Lv 19.18. nispa.

20Chay runataj nerqa: Noqa chaykunata junt'aniña. Imatawanraj ruwanay tiyanri? nispa.

21Chantá Jesús payta nerqa: Sichus maychus kajta Diospa munayninta junt'ayta munanki chayqa, tukuy kapuyniykita vendemuspa, wajchakunaman chay qolqeta rak'iray. Ajinamanta janaj pachapi tukuy imayoj kanki. Chaymantataj kutimuspa, yachachisqay kanaykipaj noqata qhatiway, nispa.

22Chay runarí Jesuspa nisqanta uyarispa, may llakisqa riporqa, imaraykuchus pay may jina qhapaj karqa.

23Chantá Jesús yachachisqankunata nerqa: Kayta sut'ita niykichej: Qhapaj runaqa ñak'ayllata Diospa janaj pacha kamachiyninman yaykonqa. 24Ujtawan niykichej: Astawanqa camelloraj yarwej ninrinta yaykuyta atinman, Diospa kamachiyninman qhapaj runa yaykunanmantaqa, nispa.

25Chayta uyarispa, Jesuspa yachachisqankuna maytapuni t'ukorqanku, nerqankutaj: Jina chayqa, pitaj qhespichisqa kayta atinmanri? nispa.

26Jesustaj paykunata qhawarispa, nerqa: Runapajqa chay mana atikunchu, Diostajrí tukuy imata ruwayta atin, nispa.

27Jinapi Pedroqa Jesusta nerqa: Noqaykoqa qanwan purinaykupaj tukuy kapuyniykuta saqerparerqayku. Chayta ruwasqaykurayku imatataj noqayku jap'isqaykuri? nispa.

28Chantá Jesús paykunata nerqa: Kayta sut'ita niykichej: Tukuy ima mosojman tukojtin, noqa Runaj Churin kamachinay jatun tiyanapi tiyaykukusaj. Chaypachataj noqawan purisqaykichejrayku, qankunapis chunka iskayniyoj kamachina tiyanapi tiyaykukullankichejtaj, Israelpa chunka iskayniyoj jatun ayllukunata juzganaykichejpaj.#Mt 25.31; Lc 22.30; Dn 7.9-14. 29Pillapis noqata qhatinawanrayku wasinta saqerparin, wawqenkunata, panankunata, chayrí tatanta, mamanta, warminta, jinallataj wawankunata, jallp'ankunata ima, chay runamanqa Dios pachaj kutita qoponqa, chay runataj wiñay kawsayniyoj kanqa. 30Chaywanpis pikunachus kunan jatunpaj qhawasqa kanku, chaykunaqa qhepaman pisipaj qhawasqa kanqanku. Pikunachus kunan pisipaj qhawasqa kajkunarí, chay p'unchaypi jatunpaj qhawasqa kanqanku, nispa.#Mt 20.16; Lc 13.30.

Currently Selected:

Mateo 19: DQPC

Highlight

Copy