Mateo 18

Pitaj aswan kurajpaj qhawasqa kanman?

(Mc 9.33-37; Lc 9.46-48)

1Chaypacha yachachisqankunaqa Jesusman qayllaykuspa, taporqanku: Pitaj aswan kurajpaj qhawasqa kanqa Diospa janaj pacha kamachiyninpiri? nispa.

2Chantá Jesús uj wawata wajyaspa, paykunaj chawpinkuman sayaykucherqa, 3nerqataj: Kayta sut'ita niykichej: Diosman kutirikunaykichej tiyan kay wawaman jina tukuspa. Manachayqa, Diospa janaj pacha kamachiyninman ni yaykullankichejpischu. 4Ajina, sichus pipis kay wawa jina k'umuykukoj sonqoyoj kanman chayqa, Diospa janaj pacha kamachiyninpeqa tukuymanta nisqa aswan kurajpaj qhawasqa kanqa. 5Jinallataj pichus sutiypi kay wawa jina kajta jap'ikojqa noqata jap'ikushawan.

Juchaman urmachejkunamanta

(Mc 9.42-48; Lc 17.1-2)

6Sichus pipis noqamanta jap'ikoj wawakunamanta ujllatapis juchaman urmachinman chayqa, pay sinch'i jasut'isqa kanqa. Chay juchallichejpajqa aswan allin kanman kunkanman molino rumita wataykuspa, mama qochaman choqaykunankoqa. 7Ay, kay pachapi juchallinaman tanqajkunamanta. Juchallinaman tanqajkunaqa kallanqankupuni. Chaywanpis ay, imapichus tukukonqa, pichus ujkunata juchallinaman tanqajqa.

8Chayrayku sichus makiyki, chayrí chakiyki juchallichisunkiman chayqa, khuchuytawan karuman wijch'uy. Aswan allin kanman ch'ulla makilla, chayrí ch'ulla chakilla kaspa wiñay kawsayman yaykunaykeqa iskay makiyoj, chayrí iskay chakiyoj wiñay nina lawray ukhu pachaman wijch'uykusqa kanaykimanta nisqaqa. 9Jinallataj sichus ñawiyki juchallichisunkiman chayqa, orqhorparikuytawan karuman wijch'uy. Aswan allin kanman ch'ulla ñawilla wiñay kawsayman yaykunaykeqa, iskaynin ñawiyoj lawrashaj nina qochaman wijch'uykusqa kanaykimanta nisqaqa.

10Qankunaqa kay juch'uykunamanta ama mayqentapis pisipaj qhawankichejchu, imaraykuchus noqa niykichej: Paykunaj angelninkoqa janaj pachapi Tata Diosniypa uyanta qhawashankupuni. 11Runaj Churintaj chinkasqa kajkunata qhespichej jamun, nispa.

Chinkasqa ovejamanta rijch'anachina

(Lc 15.1-7)

12Jesús nillarqataj: Qankuna ima ninkichejtaj? Qankunamanta mayqenpis pachaj ovejayoj kaspa, ujnin chinkajtin, manachu chay jisq'on chunka jisq'onniyojta ch'innejpi saqespa, chinkasqa kajta tarinaykichejkama mask'aj riwajchej? 13Kayta niykichej: Chinkasqa ovejanta tarikapuytawan, michejqa chay ovejanmanta astawan kusikonqa, jisq'on chunka jisq'onniyoj mana chinkajkunamanta nisqaqa. 14Ajinallatataj, janaj pachapi kashaj Tata Diosniykichej mana munanchu ujllapis kay juch'uykunamanta chinkananta.

Juchallikoj wawqeta juchanmanta reparachina

(Lc 17.3-4)

15Sichus wawqeyki contraykita mana allinta ruwaspa juchallikun chayqa, qan sapallanpi payta k'amiy. Paytaj reparachisqaykita kasusonqa chayqa, qan wawqeykiwan ujtawan k'achata kawsakapunki. 16Mana uyarisojtinrí, ujta, chayrí iskay runakunata pusariykukuspa, paywan ujtawan parlamuy. Ajina chay iskay, chayrí kinsa testigokunaj uyarisqankuwan tukuy parlasqaykichej sut'i kanqa.#Dt 19.15. 17Chaymanta chay juchallej mana uyarisojtenqa, iglesiamanñataj willay. Iglesiatapis manallataj uyarejtinrí,#18.17 Jesús kayta nishajtin, manaraj Iglesia nisqa karqachu. Chaywanpis Mateo kay p'anqata qhelqashajtenqa, Iglesia karqaña. Iglesiaqa Jesucristopi atinikoj wawqe panakuna. qankunaqa payta Diosman mana kutirikoj runata jina, chayrí impuestota cobrajta jinallaña qhawaychej.

18Kayta sut'ita niykichej: Imatachus kay pachapi mana ruwanachu, nispa ninkichej chayqa, janaj pachapipis chay nisqaykichej jinallataj kanqa. Imatachus kay pachapi ruwana walejlla, nispa ninkichej chayqa, janaj pachapipis nisqaykichejman jinallataj kanqa, nispa.

19Kaytapis nillaykichejtaj: Sichus qankunamanta iskay ukhu kay pachapi uj sonqolla kawajchej Diosmanta imatapis mañakunaykichejpaj chayqa, janaj pachapi kashaj Tata Diosneyqa imatachus mañakusqaykichejta qosonqachej.#Mt 7.7; Mc 11.24; Jn 14.13-14; 16.23; 1 Jn 3.22. 20Maypichá iskay, chayrí kinsa, noqaj sutiypi tantakunkichej chaypi noqa qankunawan kasaj, nispa. Ajinata Jesús nerqa.

Mana khuyakuyniyoj kamachimanta rijch'anachina

21Chantá Pedroqa Jesusman qayllaykuspa, nerqa: Wiraqochíy, wawqey contrayta juchallikojtenqa, mashkha kutitataj juchanta pampachasajri? Qanchis kutikamachu? nispa. 22Jesustajrí payman kuticherqa: Noqa niyki: Mana qanchis kutikamallachu, manachayqa, qanchis chunka kuti qanchiskamaraj juchanta pampachanki.

23Chayrayku Diospa janaj pacha kamachiynenqa kay jinaman rijch'akonqa: Uj kuraj kamachej kamachinkunamanta cuentata mañasqa. 24Cuentata mañayta qallarispataj, kuraj kamachejqa ujnin kamachinta pusachimusqa, pichus waranqa waranqa qolqemanta manuyoj kasqa, chayta. 25Chay kamachi mana imaynapi manunta junt'ayta atejtin, kuraj kamachejqa kamachisqa paywan, warminwan, wawankunawan, tukuy kapuyninwan ima vendesqa kananta, ajinamanta, manunta junt'ananpaj.

26Chay kamachirí kuraj kamachejpa ñawpaqenman qonqoriykukuspa, maytapuni mañakusqa: Kuraj kamachejníy, suyarillawayraj ari, chantá tukuyninta qopullasqayki, nispa. 27Kuraj kamachejtaj khuyakoj sonqoyoj kaspa, kamachinpa manunta qonqayman churasqa, chantá kacharipusqa.

28Chantá chay kamacheqa chaymanta ripuspa, uj kamachi masinwan tinkukusqa, pichus uj chhika qolqe manulla kasqa, chaywan. Kunkanmanta q'apispataj, yaqha sipirparisqa: Qolqeyta kutichipuway, nispa.

29Jinapi kamachi masintajrí ñawpaqenman qonqoriykukuspa, mañakusqa: Suyarillaway ari, noqataj tukuyninta kutichipusqayki, nispa. 30Paytajrí mana uyarillaytapis munasqachu, manachayqa kamachi masinta carcelman wisq'aykuchisqa chay manunta junt'anankama.

31Wakin kamachi masikuna chay tukuyta rikuspa, maytapuni llakikusqanku, rispataj, kuraj kamachejninkuman maychus kasqanta willaykamusqanku. 32Chantá kuraj kamachejqa, pejpa manuntachus qonqayman churasqa, chay kamachita wajyachispa, nisqa: Millay runa, noqaqa tukuy manuykita qonqayman churarqani, khuyay khuyayta mañakuwasqaykirayku. 33Manachu qanpis kamachi masiykita khuyanayki karqa, imaynatachus noqapis qanta khuyarqayki, ajinata? nispa. 34Chaymantataj kuraj kamachej phiñakuspa, chay kamachita carcelman apachisqa, chaypi payta ñak'arichinankupaj, tukuy manunta junt'anankama, nispa.

35Chantá Jesús uyarejkunata nerqa: Kikillantataj qankunatapis janaj pachapi kashaj Tata Diosneyqa ruwasonqachej, manachus wawqeykichejpa juchallisqanta tukuy sonqo pampachankichej chayqa, nispa.

Currently Selected:

Mateo 18: DQPC

Highlight

Copy