Mateo 20

Uvata pallajkunamanta rijch'anachina

1Diospa janaj pacha kamachiynenqa chajrayoj uj runaman rijch'akun, pichus tutamanta uva pallanankupaj peonkunata mink'aj llojsisqa, chayman. 2Paykunata mink'ashaspataj, uj jornalta pagananta nisqa. Chaymantataj uva huertanman paykunata kachasqa.

3Chantá yunta watay chay chayta, huertayojqa plazapi mana ima ruwanayoj runakunata rikusqa. 4Qayllaykuspataj, nisqa: Qankunapis uva huertayman ruwaj riychej, chantá maychus kajta pagasqaykichej, nispa. Paykunataj risqanku. 5Chajrayoj runaqa chawpi p'unchayta ujtawan llojsisqa, jinallataj chawpi p'unchay pasaytapis, chaypachallataj pallajkunata mink'asqa.

6Yunta kachariy chay chayta ujtawan plazaman llojsispa, chajrayojqa wajkunatapis tarisqa mana ima ruwanayojta. Chantá paykunata nisqa: Imaraykutaj kaypi tukuy p'unchaynintinta mana imata ruwaspa kashankichejri? nispa. 7Paykunataj kutichisqanku: Mana pipis mink'akuwaykuchu, nispa. Paytaj nisqa: Qankunapis huertayman uva pallaj rillaychejtaj, nispa. Paykunataj risqanku.

8Ch'isiyaykuyta, uva huertayojqa mayordomonta nisqa: Peonkunata wajyaspa, pagapuy,#Lv 19.13; Dt 24.15. qhepata yaykojkunamanta qallarispa, ñawpaj yaykojkunapi tukuychaspa, nispa. 9Jinataj, mayordomoqa inti yaykuyllataña jamojkunaman uj jornaltapuni sapa ujman pagapusqa. 10Tutamantapacha ruwaj peonkunatajrí chayta rikuspa, aswan ashkha qolqeta jap'iyta yuyashasqanku. Chaywanpis mana jinachu kasqa, manachayqa mayordomoqa sapa ujninkuman uj jornaltakamalla pagapusqa.

11Pagonkuta jap'ispataj, chay peonkuna chajrayojpaj kay jinata thutuyta qallarisqanku: 12Kay qhepa jamojkunaqa uj phanillataña pallarqanku. Qantaj noqaykuman jinallataj paykunaman pagapunki. Noqaykurí p'unchay junt'ata ruphaypi tuntispa ruwarqayku, nispa.

13Chajrayoj runatajrí ujninman kutichisqa: Kawsaqéy, noqaqa mana ch'awkiyashaykichu. Manachu uj jornalta pagasunayta nispa mink'arqayki? 14Kunantaj pagoykita jap'ikapuspa, ripullay. Noqaqa kay qhepa jamojkunaman, qanman jinallataj pagapuyta munani. 15Manachu qolqeywan munasqayta ruwayta atini? Chayrí, k'acha kasqayraykuchu sajra ñawiwan qhawashawanki? nispa.

16Chantá parlayta tukunanpaj Jesús nerqa: Ajinallataj kunan qhepapi kajkunaqa chaypacha ñawpajpi rikhurenqanku, ñawpajpi kajkunataj qhepapi kanqanku, nispa.

Wañunanmanta Jesús ujtawan willan

(Mc 10.32-34; Lc 18.31-34)

17Jesús Jerusalenman rishaspa, chunka iskayniyoj yachachisqankunata wajnejman wajyarqa, kay jinatataj nerqa: 18Kunanqa Jerusalén llajtaman rishanchej, chaypitaj noqa, pichus Runaj Churin kajta kuraj sacerdotekunaj makinkuman, Diospa kamachisqanmanta yachachejkunaman ima jaywaykuwanqanku. Paykunataj wañuchinawankupaj juchachawanqanku. 19Chantá paykuna mana judío kajkunaman jaywaykuwanqanku. Mana judío kajkunataj alqochakuspa jasut'iwanqanku, cruzmantaj chakataykuwanqanku. Chaywanpis kinsa p'unchayninman wañusqamanta kawsarimpusaj,#Mt 16.21; 17.22-23. nispa.

Uj mama wawankunapaj mañapun

(Mc 10.35-45)

20Chaypacha Zebedeoj warminwan, churinkunawan ima Jesusman qayllaykorqanku. Warmitaj Jesuspa ñawpaqenpi qonqoriykukuspa, uj imata mañakorqa. 21Jesustaj nerqa: Imatataj munankiri? nispa. Chay warmitaj kuticherqa: Niy ari, qan kamachishajtiyki, kay iskay churiykuna tiyaykukunankuta ujnin pañaykipi, ujnintaj lloq'eykipi, nispa.

22Jesustaj nerqa: Mana yachankichejchu imatachus mañakusqaykichejta. Noqa imaynatachus ñak'arisaj, ajinata ñak'ariyta atiwajchejchu? nispa. Paykunataj nerqanku: Arí, atisqayku, nispa.

23Chantá Jesús kuticherqa: Arí, qankunaqa noqa jina ñak'arinkichej. Chaywanpis pañaypi, lloq'eypitaj qankunata tiyachinayqa mana noqamantachu. Chaytaqa Tata Diosniylla wakichin, pikunatachus pay ajllarqa, chaykunapaj, nispa.

24Jinallapi chay chunka yachachisqakuna chayta uyarispa, chay iskaynin wawqekunapaj mayta phiñakorqanku. 25Jesustajrí tukuyninkuta wajyaspa, nerqa: Qankuna yachankichej, sapa llajtapi kamachejkunaqa atiyniyoj kasqankuta rikuchispa, munayninkuman jina runakunata apaykachanku. Ajinallatataj kurajkunapis atiyninkuwan munajta mana munajta runankunata kamachillankupuni. 26Qankuna ukhupirí mana jinachu kanan tiyan. Manachayqa pichus qankunamanta kurajpaj qhawasqa kayta munajqa kamachiykichej jina kanan tiyan. 27Jinallataj, mayqellanpis qankunamanta ñawpajpi kayta munajqa tukuyniykichejpa wata runan kanan tiyan.#Mt 23.11; Mc 9.35; Lc 22.25-27; Eclo 3.18. 28Noqa Runaj Churenqa mana runawan sirvichikunaypajchu jamorqani. Aswanpis runakunaj kamachin jina kanaypaj jamorqani, kawsayniytataj qoj, ashkha runakuna qhespichisqa kanankupaj, nispa.

Jesús iskay ñawsakunata qhawarichin

(Mc 10.46-52; Lc 18.35-43)

29Jesús yachachisqankunawan Jericó llajtamanta llojsishajtin, ashkha runakuna payta qhatisharqanku. 30Chantá iskay ñawsakuna chay ñan patapi tiyasharqanku. Jesús chaynejta rishasqanta uyarispataj, paykuna qhapariyta qallarerqanku: Wiraqochi, Davidpa Churin, khuyarikuwayku ari, nispa.

31Runatajrí paykunata ch'inyachiyta munaspa, paykunata k'amerqanku. Chay ñawsa runakunatajrí astawanraj qhaparerqanku: Wiraqochi, Davidpa Churin, khuyarikuwayku ari, nispa.

32Chantá Jesusqa sayaspa, ñawsakunata wajyarqa, jamojtinkutaj taporqa: Imatataj ruwapusunayta munankichejri? nispa. 33Paykunataj kuticherqanku: Wiraqochi, qhawarichinawaykuta munayku, nispa.

34Chantá Jesús paykunamanta khuyakuspa, ñawinkuta llankhaykorqa. Chayta ruwasqantawankamataj, paykuna rikuyta aterqanku. Chaymantataj Jesuswan khuska rerqanku.

Currently Selected:

Mateo 20: DQPC

Highlight

Copy