Mateo 21

Jesús kuraj kamachej jina Jerusalenman yaykun

(Mc 11.1-11; Lc 19.28-40; Jn 12.12-19)

1Jesuswan, yachachisqankunawan ima Jerusalenman qayllashaspa, Olivos orqoj chimpanpi Betfagué llajtaman chayarqanku. Chaymantataj Jesús iskay yachachisqankunata kachaspa, 2nerqa: Qankuna jaqay chimpapi ranchoman riychej. Chaypitaj china burrota tarinkichej, uñanwan khuska watasqata. Phaskaraspataj, kayman aysamuychej. 3Sichus pipis imata nisunkichejman chayqa, ninkichej: Wiraqochiyku Jesús kay burrokunata apanaykuta munashan. Chaymantataj kutichimpusonqapacha, nispa.

4Ajinamanta Diosmanta ñawpa sut'inchajpa nisqan junt'akorqa:

5Jerusalén llajtaman niychej:

Kuraj kamachejniyki jamushasunki,

paytaj llamp'u sonqoyoj kaspa,

china burroj uñanpi lloq'asqa jamushan,

maltón burritopi,#Is 62.11; Zac 9.9. nispa.

6Chantá chay iskay yachachisqankuna rispa, Jesuspa kamachisqanman jina ruwarqanku. 7China burrota uñantinta aysamuspa, qhatanankunawan caronaykorqanku. Jesustaj chayman lloq'aykorqa Jerusalenman rinanpaj. 8Chantá ashkha runakuna qhatakunanku p'achakunata ñanman mast'arqanku. Wajkunataj sach'akunamanta thansakunata k'uturaspa, mast'allata ñanman churallarqankutaj. 9Chantá Jesuspa ñawpaqenta rejkuna, qhepanta jamojkuna ima qhaparisharqanku:

Davidpa Churin jatunchasqa kachun.

Tukuyta Kamachej Diospa sutinpi jamojta jatunchaychej.

Qhespichej Dios janaj pachapipis jatunchasqa kachun,#Sal 118.26. nispa.

10Jesús Jerusalenman yaykusqantawan, tukuy llajtantin maytapuni aywirispa, ch'ajwasharqanku, taporqankutaj: Pitaj kayri? nispa. 11Jesuswan jamoj runakunataj kuticherqanku: Kayqa Diosmanta sut'inchaj Jesús. Payqa Galileamanta, Nazaret llajtayoj, nispa.

Jesús qhatojkunata Templomanta qharqon

(Mc 11.15-19; Lc 19.45-48; Jn 2.13-22)

12Chantá Jesús Temploj pationman yaykuspa, chaypi tukuy vendejkunata, rantejkunata ima jawaman qharqorqa. Jinallataj qolqe chhalajkunaj mesankuta, urpikunata vendejkunaj tiyanankutapis tijrararqa. 13Paytaj nerqa: Diospa Qhelqachisqanpi nin: Waseyqa noqawan parlarikuna wasimin. Chaywanpis qankunaqa suwa thapaman tukuchisqankichej,#Is 56.7. nispa.

14Ajinaqa Jesús Temploj pationpi kashajtin, ñawsakuna, suchukuna ima payman jamorqanku, Jesustaj paykunata qhaliyacherqa. 15Jinapi kuraj sacerdotekuna, Diospa kamachisqanmanta yachachejkuna ima Jesuspa t'ukuna imakunata ruwasqanta rikorqanku. Chantá wawakunapis Temploj pationpi qhaparisharqanku: Jatunchasqa kachun Davidpa Churin, nispa. Chayta uyarispa, chay kurajkunaqa maytapuni phiñakorqanku. 16Chayrayku Jesusta nerqanku: Uyarishankichu kaykuna imatachus nishasqankuta? nispa.

Jesustaj kuticherqa: Arí, uyarishani. Qankunarí, manachu jayk'ajpis Diospa Qhelqachisqanpi kay jinata ñawirerqankichej? Chaypi nin:

Qanqa juch'uy wawakunata,

ñuñojkunatawan ima sumajta yupaychasunankuta yachacherqanki,#Sal 8.2. nispa.

17Chayta niytawantaj, Jesús paykunata saqespa, Betania llajtaman rerqa. Chay tutataj chaypi qhepakorqa.

Jesús higo sach'ata maldicin

(Mc 11.12-14,20-26)

18Q'ayantin paqarin, Jerusalenman kutishaspa, Jesús yarqhachikorqa. 19Ñan kantupitaj higo sach'ata rikorqa, poqoyninta pallarikuyta munaspataj qayllaykorqa. Chaywanpis laqhellata tarerqa. Chantá chay sach'ata nerqa: Kunanmantapacha amaña jayk'aj poqonkichu, nispa. Sach'ataj chaypacha ch'akiporqa.

20Jesuspa yachachisqankuna chayta rikuytawan, t'ukuspa nerqanku: Imaynatataj higo sach'a chaypachalla ch'akipunri? nispa.

21Jesustaj kuticherqa: Noqaqa kayta sut'ita niykichej: Sichus mana iskayrayaspa, Diospi atinikuwajchej chayqa, higo sach'awan imatachus ruwarqani, chaymanta astawanraj ruwawajchej. Kay orqotapis niwajchej: Ithiriy kaymanta, qochamantaj wijch'uykukuy, nispa, ajinataj kanman. 22Kikillantaj sichus qankuna Diospi atinikuspa imatapis paymanta mañakunkichej chayqa, mañakusqaykichejta jap'inkichej, nispa.#Mt 7.7-11; 18.19; Jn 14.13-14; 15.7.

Jesusta atiyninmanta tapunku

(Mc 11.27-33; Lc 20.1-8)

23Chantá Jesusqa Temploj pationman yaykorqa. Chaypi yachachishajtintaj, kuraj sacerdotekuna, llajtaj kurajninkuna ima payman qayllaykuspa, taporqanku: Ima atiywantaj kay imakunata ruwankiri? Pitaj kay atiyta qosorqari? nispa.

24Jesustaj paykunaman kuticherqa: Noqapis ujta tapullasqaykichejtaj. Chantá sichus chayman kutichiwankichej chayqa, noqapis nisqaykichej ima atiywanchus kay imakunata ruwasqayta. 25Niwaychej: Pitaj Juanman bautizananpaj atiyta qorqa, janaj pachapi kaj Dioschu, chayrí runallachu? nispa.

Chantá chay tapojkunaqa ninakorqanku: Dios churarqa, nispa nisun chayqa, pay niwasun: Imaraykutaj chantá mana paypa nisqanta jap'ikorqankichejchuri? nispa. 26Manallataj niyta atinchejchu: Runalla Juanta churanku, nispa, imaraykuchus runakunata manchachikunchej. Paykuna yuyanku Juanqa Diosmanta sut'inchajpuni kasqanta, nispa. 27Ajinamanta Jesusman kuticherqanku: Mana yachaykuchu, nispa.

Chaymantataj Jesús kuticherqa: Noqapis manallataj nisqaykichejchu pichus atiyta qowasqanta kay imakunata ruwanaypaj, nispa.

Iskay churikunamanta rijch'anachina

28Jesús chay kurajkunata tapullarqataj: Ima ninkichejtaj qankuna? Uj runa iskay churiyoj kasqa, paytaj ujninta nisqa: Wawáy, kunan p'unchay uva huertayman ruwaj riy, nispa. 29Churintaj nisqa: Mana riymanchu, nispa. Jinapis yuyayninman kutirispa, uva huertaman risqa. 30Chantá tataqa ujnin churinta kikillantataj nisqa: Qanpis llank'aj riy, nispa. Chay churintaj nisqa: Arí, tatáy risaj, nispa. Chaywanpis mana risqachu. 31Kunan niwaychej: Chay iskayninkumanta mayqentaj tatanpa munasqanta ruwarqari? nispa. Paykunataj kuticherqanku: Ñawpaj kaj, nispa.

Jesustaj nerqa: Kayta sut'ita niykichej: Impuestota cobrajkuna, phisu warmikuna ima Diospa kamachiyninman qankunamanta aswan ñawpajta yaykonqanku. 32Chayta niykichej, imaraykuchus Bautizaj Juan cheqan kajta yachachej jamojtin, qankunaqa paypa nisqanta mana jap'ikorqankichejchu. Impuestota cobrajkuna, phisu warmikuna imatajrí nisqanta jap'ikorqanku. Qankunataj chay tukuyta rikushaspapis, manapuni Juanpa nisqanta jap'ikorqankichejchu, Diosman kutirikunaykichejpaj.

Millay sonqoyoj llank'ajkunamanta rijch'anachina

(Mc 12.1-12; Lc 20.9-19)

33Uyariwaychej, uj rijch'anachinatawan nisqaykichej: Uj patrón jallp'anpi uvakunata mallkisqa, chay huertatataj perqawan muyuykuchisqa. Chaymanta chajra chawpipi uva ch'irwanata ruwachisqa, qhawana torretapis sayachisqa. Chantá huertanta llank'ajkunaman partidopi qospa, karuman ripusqa. 34Uva pallana p'unchay chayamojtintaj, huertayojqa wakin kamachinkunata kachasqa, chay llank'ajkunamanta paypa partenta jap'inankupaj. 35Chay llank'ajkunarí, kamachikunata jap'iytawan, ujninta maqaykusqanku, ujnintataj wañuchisqanku, ujnintataj rumiwan ch'anqaykusqanku. 36Jinapi huertayojqa waj kamachikunatawan kachasqa. Llank'ajkunataj chaykunatapis kikillantataj ruwasqanku.

37Qhepatarí, huertayojqa churintañataj kachaspa kay jinata yuyasqa: Churiytaqa respetanqankupuni, nispa. 38Chaywanpis, chay llank'ajkunaqa huertayojpa churinta jamojta rikuspa, paykunapura ninakusqanku: Payqa kay jallp'ata chayaqeta jina jap'enqa. Jamuychej, payta wañuchinachej, jallp'ataj noqanchejpaj kanqa, nispa. 39Payta jap'iytawantaj, uva huertamanta jawaman orqhospa, wañurparichisqanku, nispa.

40Chantá Jesús taporqa: Uva huertayoj kutimuspaqa, chay llank'ajkunawan imatataj ruwanqari? nispa.

41Kurajkunataj kuticherqanku: Chay millayta ruwaj llank'ajkunata mana khuyaspa wañurachenqa, jallp'antataj waj llank'ajkunaman qonqa, pikunachus poqoymanta partenta qoponqanku, chaykunaman, nispa.

42Chantá Jesús nerqa: Manachu jayk'ajpis Diospa Qhelqachisqanpi kayta ñawirerqankichej? Ajinata nin:

Wasi ruwajkunaj qhesachasqanku rumeqa

cimiento esquinapaj sumaj rumiman tukupun.

Chayqa Tukuyta Kamachej Diospa ruwasqanmin,

noqanchejtaj t'ukuspa qhawanchej,#Sal 118.22-23. nispa.

43Chayrayku niykichej: Diosqa kamachiyninman yaykunata qankunamanta qhechonqa, jinataj paypa munayninta ruwajkunaman qonqa. 44Chay esquina rumimanta parlaspataj, niykichej: Pillapis chay rumi pataman urmajqa t'unasqa kanqa. Chantá, pejpa patanmanchá chay rumi urmaykonqa, chayqa phirisqa kanqa, nispa.

45Chayta uyarispa, kuraj sacerdotekuna, fariseokuna ima repararqanku Jesús chay rijch'anachinawan paykunamanta parlashasqanta. 46Chayrayku payta presochayta munarqanku. Chaywanpis runakunata manchachikuspa, Jesusta mana imanayta aterqankuchu, imaraykuchus runakunaqa Diosmanta sut'inchaj kasqanta yuyarqanku.

Currently Selected:

Mateo 21: DQPC

Highlight

Copy