Génesis 28

1Chaymanta Isaacqa Jacobta wajyacherqa. Chantá saminchaykuspataj, payta kamacherqa: Qanqa amapuni Canaán llajtayoj warmiwan warmichakunkichu. 2Manachayqa Padán Aramman riy jatun tatayki Betuelpa wasinman, chaypitaj tioyki Labanpa ujnin kaj ususinwan casaranki. 3Tukuy Atiyniyoj Dios saminchaspa may chhikatapuni mirachisuchun. Munallanitaj qanqa may jina ashkha runayoj jatun suyuman tukunaykita. 4Tata Dios Abrahamta saminchasqanta#Gn 17.4-8. qanman, chantá mirayniykiman ima qosuchun. Ajinamanta maypichus waj llajtayoj jina tiyakushanchej, kay jallp'amanta dueño kanki, mayqentachus Dios Abrahamman qonanta nerqa, chaymanta nispa.

5Ajinata Isaacqa churin Jacobta Padán Aramman kacharpayarqa Betuelpa churin Labanpa wasinman rinanpaj. Betuelqa Rebecaj tatan karqa, Rebecataj Esaujta, Jacobpatawan mamanku karqa.

Esaú warmichakun

6Esaú yacharqa tatan Isaacqa Jacobta saminchaspa, Padán Aramman kachasqanta, chaypi warmita mask'akuspa casarananpaj. Chantá Esaú yachallarqataj tatanqa Jacobta saminchashaspa, nisqanta Canaán llajtayoj warmita amapuni oqharikunanta. 7Yachallarqataj Jacobqa tatanpa, chantá mamanpa nisqanta kasuspa, Padán Aramman risqanta. 8Chayta yachaspa, Esaú repararqa tatan Isaac Canaán llajtayoj warmikunata mana allin ñawiwanchu qhawasqanta. 9Chayrayku Esauqa Abrahampa churin Ismaelpaman rispa, ususin Majalatwan warmichakorqa. Majalatqa Nebayotpa panan karqa. Esaú Canaán llajtamanta iskay warmiyoj kashaspapis, Majalatta warminpaj oqharikullarqataj.#Gn 26.34-35.

Diosqa Betelpi Jacobman rikhurin

10Jacobqa Bersebamanta puririspa, Jaranman rej ñanta rerqa. 11Tutayaykushajtinña, uj cheqaman chayaspa, chaypi uj rumita sawnaykukuspa, puñorqa. 12Chantá puñushaspa, mosqokorqa, mosqokusqanpitaj uj escalerata rikorqa pampamanta janaj pachakama chayashajta. Pay rikullarqataj chay escaleranejta Diospa angelninkuna urayk'amushajta, wicharishajta ima.

13Jinallataj Jacob rikorqa paypa ñawpaqenpi Tata Dios sayaspa, nishajta: Noqa Tata Dios kani, jatun tatayki Abrahampata chantá tatayki Isaacpatawan Diosnin. Maypichus puñushanki, chay jallp'ata qanman qosqayki, jinallataj mirayniykimanpis. 14Mirayniykeqa t'iyu jina mana yupay atina kanqa, paykunataj wichaynejman, uranejman, inti llojsimuynejman, inti yaykuynejman ima junt'aykonqanku. Qannejta, jinallataj mirayniykinejtapis kay pachapi tukuy runakuna saminchasqa kanqanku.#Gn 12.1-3; 13.14-15; 15.18-21; 22.16-18; 26.3-5; 46.3. 15Noqa qanwan kashani. Maymanpis rejtiyki, noqa waqaychasqayki, kutichimusqaykitaj kay jallp'aman. Mana saqerparisqaykichu, qanman imatachus nisqayta junt'anaykama, nispa.

16Chantá Jacob puñusqanmanta rijch'arispa, nerqa: Cheqapuni Tata Dios kaypi kashan, noqataj mana yacharqanichu, nispa. 17Anchatataj manchachikuspa, nillarqataj: Kay cheqaqa mancharina. Kayqa Diospa wasin, janaj pacha punkutaj, nispa.

18Q'ayantin Jacob tutamanta jatarispa, maypichus sawnakorqa, chay rumita cheqanta sayaykucherqa.#28.18 Rumita sayachina, chayrí rumita qolluna chaypacha usu karqa. Rumita sayachispa, chayrí qolluspa, atipasqankuta, chayrí uj tratota ruwasqankuta, chayrí Dios paykunaman rikhurisqanta yuyarikoj kanku. Gn 31.45-54; Ex 23.24; 24.4. Chaymanta qhepanejman israelitakunata Moisés kamacherqa yuyarikunapaj sayachisqa rumikunata chinkachinankuta Canaán llajtayojkuna rumimanta ruwasqa lantikunata yupaychasqankurayku. Dt 7.5; 12.3; 16.22. Chantá rumiman aceiteta jich'aspa, Diospaj t'aqarqa. 19Unay chay cheqaqa Luz sutiyoj karqa. Jacobtaj chay cheqata suticharqa: “Betel”, nispa. 20Chantá Jacob tiluspa, ajinata Tata Diosta nerqa: Tata Dios, sichus noqawan kaspa, tukuy riyniypi waqaychawanki, jinallataj mikhunata, p'achatawan ima qowanki chayqa, 21sitajchus tataypa wasinman allillanta kutipusaj chayqa, Tata Dios, qanqa noqaj Diosniy kanki. 22Diosníy, kay sayachisqay rumeqa qanta yupaychana cheqa kanqa. Chantá tukuy ima qowasqaykimanta sapa chunkamanta ujta qanman qosqayki, nispa.#28.22 Sapa chunkamanta ujta qoy: Israelitakuna Canaanman manaraj chayashajtinku, chay llajtayojkuna sapa chunkamanta ujta diosninkuman pagayta yachasqankuña. Gn 14.20. Chaymanta aswan qhepanejman Moisés israelitakunata kamacherqa sapa chunkamanta ujta Diosman qonankuta. Dt 12.6,17-18; 26.12.

Currently Selected:

Génesis 28: DQDC

Highlight

Copy