Génesis 27

Isaacqa churinkunata saminchan

1Isaac allin machuña karqa, ñawinpis manaña rikorqachu. Uj kuti kuraj kaj churin Esauta nerqa: Wawáy, nispa. Esautaj kuticherqa: Imata ninki, tatáy? nispa.

2Chantá Isaac nerqa: Wawáy, noqaqa allin machuña kani, jinaqa mayk'ajllapis wañupuyman. 3Chayrayku arcoykita, flechatawan oqharikuspa, monteman riy, imallatapis jap'ispa apampunawaykipaj. 4Chantá munasqayman jina sumaj mikhunata wayk'uspa, mikhunaypaj apamuway. Noqataj manaraj wañupushaspa, qanta saminchasqayki, nispa.#27.4 Uj tata wañupunan qayllata kuraj kaj churita saminchananqa manchay suyana kasqa, jinataj maypaj qhawana kasqa, imajtinchus tataj saminchasqan niyta munasqa imachus churinwan qhepanejman kananta. Gn 48.8-22; 49.1-28; Dt 33. Chayrayku Isaacqa kuraj kaj churin Esauta saminchayta munarqa, jinataj Esaú tatanpa saminchasqanta jap'iyta munallarqataj. Gn 25.28.

5Rebecarí uyarisharqa Isaac imatachus Esauman nishasqanta. Chayrayku Esaú tatanpaj imallatapis jap'impunanpaj monteman risqantawankama, 6Rebecaqa churin Jacobta nerqa: Uyarini tataykita Esauman ajinata nishajta: 7Rispa, imallatapis jap'impuway, chantá sumaj mikhuyta wayk'orqapuway. Chantá manaraj wañupushaspa, noqaqa Tata Diospa uyarinanta saminchasqayki, nispa. 8Chayrayku wawáy, imatachus nisqayta sumajta uyariway: 9Kanchaman rispa, chivitukunamanta iskayta sumajnin kajta apamuy. Noqataj chay chivitukunata ñak'aspa, tataykej munasqanman jina sumaj mikhuyta wayk'orqapusaj. 10Chantá qan tataykiman chay mikhunata mikhunanpaj jaywamunki, manaraj wañupushaspa qantapuni saminchasunanpaj, nispa.

11Jacobtajrí maman Rebecata nerqa: Wawqey Esauqa thapulli, noqataj mana. 12Sichus tatay llankhariwanqa chayqa, rejsirpariwanqa, yuyanqataj paymanta alqochakushasqayta. Chayraykutaj saminchanawantaqa, maldiciwanman, nispa.

13Mamantaj nerqa: Wawáy, maldicisusqanqa noqaman chayamuwachun. Qanqa nisqayta ruwallay. Usqhayta rispa, iskay chivitukunata apamuy, nispa.

14Chantá Jacob usqhay usqhayta kachaykukuspa, iskay chivitukunata aparqamorqa. Rebecataj Isaac munasqanman jina, sumaj mikhuyta wayk'uporqa. 15Chaymantataj Rebecaqa Esaúj p'achanmanta sumajnin kajta orqhomuspa, chayta Jacobman churaykorqa. 16Chantá Jacobpa makinta, kunkantawan ima cabra qarawan mayt'uykullarqataj, maynejchus q'ara karqa, chaynejta. 17Jinaytawantaj, sumaj mikhuy wayk'usqanta, t'antatawan Jacobman jaywarqa.

18Chantá Jacobqa, maypichus tatan kasharqa, chayman yaykuspa, nerqa: Tatáy, nispa. Isaactaj nerqa: Jay. Pitaj kanki, wawáy? nispa.

19Jacobtaj nerqa: Kuraj kaj churiyki Esaú kani. Imatachus munasqaykita ruwapuykiña. Jatarikuy ari, tiyarikuspataj jap'isqay animalta wayk'usqayta mikhurikuy. Chantá saminchawanki, nispa.

20Isaactajrí taporqa: Imaynapitaj usqhayllata animalta jap'erqanki, wawáy? nispa. Jacobtaj nerqa: Tata Diosniyki yanapawasqanrayku askamalla animalta jap'erqoni, nispa.

21Isaactaj Jacobta nerqa: Qayllamuway wawáy, cheqapunichus churiy Esaú kasqaykita yachayta munani, nispa. 22Jacobtaj tatanman qayllaykorqa, tatantaj makinta llankharerqa. Chantá Isaac nerqa: Parlasqanqa Jacobpata, makintajrí Esaujpata, nispa.

23Ajinata Isaacqa payta mana rejserqachu, imaraykuchus Jacobpa makenqa kurajnin Esaujta jina thapulli karqa. 24Chaywanpis Jacobta saminchananpajña kashaspa, Isaac ujtawan tapullarqataj: Cheqapunichu qanqa Esaú waway kanki? nispa. Jacobtaj nerqa: Arí tatáy, Esaupuni kani, nispa.

25Chaymanta tatanqa Jacobta nerqa: Wawáy, jap'isqaykimanta wayk'usqaykita mikhunaypaj jaywariway, chantá saminchasqayki, nispa. Jacobtaj mikhunata tatanman jaywarqa, vinotapis jaywallarqataj. Isaactaj mikhorqa, ujyarqa ima. 26Chantá Isaac nerqa: Wawáy qayllaykamuwaspa, much'aykuriway, nispa.

27Jacob qayllaykuspa much'aykojtin, Isaacqa p'achanpa ima munay q'apayninta muskhirerqa. Jinaspataj, ajinata nispa samincharqa:

Arí, kay q'apayqa churiypatamin,

Tata Diospa saminchasqan campoj q'apaynin jina.

28Diosqa janajmanta parachimpusuchun,

sumajta poqoj jallp'atataj qosuchun, ashkha trigota, ashkha vinotawan.

29Tukuy imaymana rijch'aj runakuna kamachiykikuna kachunku.

Waj suyukunamanta runakunataj ñawpaqeykipi qonqorikuchunku.

Wawqeykikunatapis kamachillankitaj,

mamaykej wawankunataj k'umuykamusuchunku.

Maldicisojkuna maldicisqa kachunku,

saminchasojkunatajrí saminchasqa kachunku, nispa.

30Jinapi Isaac churin Jacobta saminchayta tukojtinkama, Jacob tatanpa ñawpaqenmanta llojserqa. Jacob llojsejtinkamataj, Esaú jap'ej risqanmanta chayaykamorqa. 31Chantá sumaj mikhuyta wayk'orqoytawan tatanman apaspa, nerqa: Tiyarikuy, tatáy. Animal jap'isqaymanta wayk'usqayta mikhurikuy, saminchanawaykipaj, nispa.

32Isaactajrí taporqa: Pitaj kankiri? nispa. Esautaj nerqa: Kuraj kaj churiyki Esaú kani, nispa.

33Jinata nejta uyarispa, Isaac mayta mancharikorqa, kharkatitispataj, nerqa: Chantá pitaj jap'isqanmanta wayk'uspa apamuwarqari? Manaraj qan apamushawajtiyki, mikhorqaniña. Chayrayku payta saminchaniña, paytaj saminchasqapuni kanqa, nispa.

34Chantá Esauqa tatanpa nisqanta uyariytawan, jatunmanta qhaparispa, mayta waqarqa: Tatáy, noqatapis saminchallawaytaj ari, nispa. 35Isaactajrí nerqa: Sullk'ayki jamuspa, q'otiyaykuwan. Qanta saminchasunay karqa, chayta pay jap'inña, nispa.

36Esautaj nerqa: Chayraykuchá payta: “Jacob”, nispa suticharqankichej. Kaytawanqa iskay kutitaña q'otiyawan. Ñawpajtaqa kuraj kaj churi jina imatachus jap'inayta qhechuwan, kunantaj saminchayniytapis qhechullawantaj. Tatáy, manachu noqatapis saminchariwankiman? nispa.

37Isaactaj Esauta kuticherqa: Pay qanta kamachisunanta niniña, chantá tukuy aylluyki paypa kamachinkuna kanqanku. Nillanitaj paypaj ashkha trigo, vino ima kananta. Jina chayqa, imatañataj qanman qoykiman, wawáy? nispa.

38Esaurí tatanta nillarqapuni: Tatáy, ujllachu saminchayniyki karqa? Noqatapis saminchallawaytaj ari, nispa. Esautaj jatunmanta qhaparispa, mayta waqarikorqa.

39Chantá tatan Isaac nerqa:

Qanqa sumajta poqoj jallp'amanta karupi tiyakunki,

janajmanta urmamoj paramantapis.

40Chantá espadaykiwan jark'akunki.

Wawqeykej kamachin kanki.

Chaywanpis aswan qhepanejman allinta kallpacharikuspa,

wawqeykej makinmanta kacharichikunki, nispa.

Jacobqa Esaumanta ayqekun

41Chaymantapacha Esauqa Jacobta manchayta chejnikorqa, tatan payta saminchasqanmanta, nerqataj: Tatayqa ñapis wañuponqaña. Chaymanta qhepaman sullk'ay Jacobta wañurpachisaj, nispa.

42Rebecarí wawan Esaú imatachus nishasqanta yachaytawan, Jacobta wajyachimuspa, nerqa: Kurajniyki Esaú qanta wañuchisuyta yuyashasqa. 43Chayrayku wawáy, allinta uyariway: Ayqekuy turay Labanpaman. Payqa Jaranpi tiyakun.#Gn 24.28-29; 28.1-2. 44Chaypi kurajniykej sonqon tiyaykunankama tiyakamuy. 45Imatachus ruwasqaykita qonqasqantaña reparasaj chayqa, kutimpunaykipaj willachimusqayki. Chejninakusqaykichejrayku uj p'unchaylla iskayniykichej wañunaykichejtaqa mana munanichu, nispa.

46Chaymanta Rebecaqa Isaacta nerqa: Esaú kay llajtayoj warmikunawan casarasqanrayku umayta nanachispa sayk'uchiwankuña. Sichus Jacobpis kay llajtayoj warmillawantaj casaranman chayqa, wañupuyllataña munayman. Imapajñataj kawsaymanri? nispa.

Currently Selected:

Génesis 27: DQDC

Highlight

Copy