Génesis 29

Jacob Aramman chayan

1Chaymanta Jacobqa inti llojsimuynejpi tiyakojkunaj jallp'ankuman rillarqapuni. 2Chaynejman chayaspataj, uj pujyuta rikorqa. Chay qayllapitaj kinsa tropa ovejata puñurashajta rikullarqataj, imaraykuchus chaymanta tukuy uywakunata yakuta ujyachej karqanku. Chay pujyoj siminrí jatun rumiwan kirpasqa kasharqa. 3Tukuy uywakunata tantaspa, michejkunaqa pujyupi rumita kirparaj kanku, uywaman yakuta ujyachinankupaj. Ujyachiytawantaj, kirpaykapullajtaj kanku.

4Chantá Jacob pujyuman qayllaykuspa, michejkunata taporqa: Wawqeykuna, maymantataj kankichejri? nispa. Paykunataj kuticherqanku: Jaranmanta kayku, nispa. 5Chantá Jacob tapullarqataj: Rejsinkichejchu Najorpa churin Labanta? nispa. Paykunataj nerqanku: Arí, rejsiyku, nispa.

6Chantá ujtawan Jacob tapullarqataj: Walejllachu kakushan? nispa. Paykunataj kuticherqanku: Arí, walejlla kashan. Qhaway má, ususin Raquel ovejankunata qhatimushan, nispa.

7Chantá Jacob nerqa: Inteqa patapiraj kashan, manaraj uywa wisq'ana phanirajchu. Manachu yakuta ujyachiytawan, ovejakunata michimuwajchejraj? nispa.

8Paykunatajrí nerqanku: Mana atiykumanchu. Noqaykoqa tukuynejmanta uywata tantamunankuta suyanayku tiyan. Chaymantaraj tukuyniyku pujyuta kicharispa, ovejakunaman yakuta ujyachiyku, nispa.

9Jacob paykunawan parlanankama, Raquel chayamorqa tatanpa ovejankunata qhatispa, imaraykuchus paymin ovejata michej karqa. 10Chantá Jacobqa tion Labanpa ovejankunawan Raquel jamusqanta yachaspa, pujyuman qayllaykorqa. Jinaspataj, pujyoj siminmanta rumita tanqaspa, ovejakunaman yakuta ujyaracherqa. 11Chaymanta Jacobqa Raquelta uyanpi much'aykuspa napaykorqa, chantá mayta waqayta qallarerqa. 12Chaymantataj Jacobqa Raquelman willarqa pay Rebecaj wawan kasqanta, jinataj Labanpa sobrinon kasqanta. Raqueltaj chayta uyariytawan, phawarispa tatanman willaj rerqa.

13Jinataj Labanqa pananpa churin jamusqanta yachaspa, usqhay usqhayta Jacobta taripaj rerqa. Chantá Labán Jacobta taripaytawan, ojllaykuspa much'aykorqa, chaymantataj wasinman pusarqa. Chaypitaj Jacob paywan imachus kasqanta Labanman willarqa. 14Labantaj nerqa: Cheqapuni qanqa aylluy kanki, nispa.

Jacob Leawan Raquelwan ima warmichakun

Jacob uj killata Labanwan tiyakorqa. 15Chantá Labán Jacobta nerqa: Qan aylluy kasqaykirayku mana qhasillamanta imatapis ruwapuwankimanchu. Niway mashkhatachus pagasunayta, nispa.

16Labán iskay ususiyoj karqa. Kuraj kajpata Lea sutin karqa, sullk'ajtataj Raquel karqa. 17Leaqa ch'aska ñawisituyoj karqa, Raqueltajrí manchay k'achita karqa. 18Jacobrí Raquelta munakorqa, chayrayku Labanta nerqa: Noqa sullk'a kaj ususiyki Raquelwan casaranayrayku qanchis watata llank'apusqayki, nispa.#29.18 Chaypachapi usuman jina pichus warmichakuyta munajqa ususiyojpa nisqanta paganan karqa. Gn 34.12; Ex 22.16-17. Jacob mana qolqeyoj kasqanrayku qanchis watata llank'ananta nerqa, Raquelwan casarananpaj. 19Labantaj kuticherqa: Walej kanman payta qanwan casarachinayqa waj qhariwan casarachinaymanta nisqaqa. Ajinaqa, noqawan qhepakuy ari, nispa.

20Ajinata Jacobqa Raquelrayku qanchis watata Labanpaj llank'arqa. Chaywanpis Raquelta maytapuni munakusqanrayku, Jacob qanchis wata mana unaychu kasqanta qhawarqa. 21Qanchis wata junt'akojtintaj, Jacobqa Labanta nerqa: Ususiykita qopuway paywan warmichakunaypaj, imajtinchus parlasqanchejta junt'aniña, nispa.

22Chantá Labanqa tukuy llajta masinkunata casarakuman wajyarqa. 23Ch'isintaj Labán Raquelta Jacobman pusanantaqa kuraj kaj ususin Leallata pusaykorqa. Jacobtaj paywan puñorqa.#29.23 Jacobqa Labán waj warmillata payman pusaykusqanta mana reparayta aterqachu, imajtinchus casaraku raymipi warmeqa p'antawan sumaj suk'umpasqa karqa. 24Chay jawa Labanqa Zilpa sutiyoj kamachita Leaman qorqa, paypa kamachin kananpaj.

25Chantá q'ayantin paqarin Jacobqa Leallawan puñusqanta yacharqa. Chayrayku Labanta nerqa: Imatataj kayta ruwawankiri? Manachu Raquelwan casaranayrayku qanchis watata llank'aporqayki? Imaraykutaj kay jinata q'otiyawankiri? nispa.

26Labantajrí kuticherqa: Llajtaykupi usoqa kurajtaraj ñawpajta casarachinayku, chaymantaraj sullk'ataqa. 27Leawan casarasqayki raymi tukukunantaraj suyay, chaymanta Raquelwanpis casarachillasqaykitaj. Chaywanpis payrayku uj qanchis watatawan llank'apunawayki tiyan, nispa.

28Jacobtaj ajinata ruwarqa. Casaraku raymi junt'akojtin, Labanqa Jacobta Raquelwanñataj casaracherqa. 29Chantá Labanqa Bilá sutiyoj kamachita Raquelman qollarqataj, paypa kamachin kananpaj. 30Ajinamanta Jacobqa Raquelwanpis puñuykullarqataj, paytataj Leamanta nisqa astawan munakorqa. Chaywanpis qanchis watatawanraj Labanpaj llank'aporqa.

Jacobpa churinkuna

31Tata Dios rikorqa Lea pisipaj qhawasqa kasqanta. Chayrayku pay nerqa Lea wawayoj kananta. Raquel wawata rejsinantarí Tata Dios mana munarqachu.

32Ajinaqa Lea Jacobpaj onqoj rikhurerqa, paqarichikuspataj, wawanta “Rubén” sutiwan suticharqa. Pay nerqa: Tata Dios llakisqa kasqayta rikuwan. Chayrayku qosay munakuwanqa paypaj wawata rejsisqayrayku, nispa.

33Chaymanta qhepata Leaqa ujtawan wawayoj kallarqataj. Chay wawata “Simeón” sutiwan sutichaspataj, nerqa: Tata Dios chejnisqa kasqayta yachasqanrayku, uj wawatawan qowan, nispa.

34Chay qhepata Leaqa ujtawan wawayoj kallarqataj, chay wawatataj “Leví” sutiwan suticharqa. Pay nerqa: Kunan qosayqa noqaman astawan k'askamuwanqa, paypaj kinsa wawataña rejsisqayrayku, nispa.

35Aswan qhepamantaj Leaqa ujtawan onqoj rikhurispa, wawayoj kallarqataj. Chantá chay wawata “Judá” sutiwan sutichaspa, nerqa: Kunanqa Tata Diosta yupaychasaj, nispa. Chaymantataj Lea manaña wawayojchu karqa.

Currently Selected:

Génesis 29: DQDC

Highlight

Copy