SAN LUCAS 14

Jesús aptakmelcheseyam xama énxet elyepháheyak axta apyempehek

1Aptaswokmek axta apto Jesús xama apkemha apmonye fariseo apxagkok, cham'a ekhem apkellókasamakxa axta apkelyampé, apháha axta anhan nápakha énxet'ák fariseos apmoko elanha aptahakxa Jesús ma'a. 2Apheyk axta anhan xama énxet elyepháheyak axta apyempehek ma'a, ekpayhókxa axta aphakxa Jesús. 3Apkelmaxneyáha axta Jesús énxet'ák apkelxekmóso nak apnámokkok ektémakxa segánamakxa, tén han ma'a énxet'ák fariseos, aptahak axta apkeláneya s'e:

—¿Hẽlhoya antakmelchesók xama énxet apháxamap ekhem sábado nellókasamakxa nak nelyampé, mehẽlho' enxeykel'a?

4Apkelwanmeyágkek axta eyke aksa xa énxet'ák nak. Keñe axta appaknegwokmoho Jesús énxet apháxamap, aptakmelchesekmek axta, keñe axta apcháphasa. 5Aptahak axta anhan Jesús apkeláneya énxet'ák fariseos s'e:

—Apteyekmek agkok kéxegke kélketche kañe' yámelchet esenhan ma'a weyke kéltóso nak, ¿Megkólleyheya heykxa eyakhawo enxoho m'a ekhem nellókasamakxa nak nelyampé?#Mt 12.11.

6Mopwancha'ak axta apmoko elátegmowagkok xama enxoho.

Enxet'ák kéláneyeykha epásegwók elyamhopma

7Xama axta apwet'a Jesús apkelyéseyncha'a nentaháno eltakmela nekha mésa m'a énxet'ák ektaha axta kéláneyeykha, aptahak axta apkelpakhetchesa s'e:

8—Kéláneyaxchek agkok kéxegke kóltáswók nento elánamáxchel'a sẽlyamhopma, nágkólhem aksa m'a nentaháno ektakmela nak, hakte ewak katnehek xama énxet kéláneyeykha megkólhawo nak kéxegke, 9keñe ey'áwak kéxegke énxet ektaha axta apkeláneyeykha, etnehek nahan yának se'e: ‘Egkes aptaháno s'e pók nak.’ Keñe kólhamok kéxegke mók taháno yetlo kélmegkakto. 10Kéláneyaxchek agkok kéxegke, kólhem sat ma'a taháno ekyetno nak axayo' agko', apkexyekmek agkok ektaha nak apkeláneyeykha kéxegke, etnehek yának se'e: ‘Emók, exnem nentaháno ektakmela nak.’ Keñe sat kólahapmakha kéxegke nápakta'awo' énxet'ák apheykha nak nekha mésa, kéltaha enxoho xa.#Pr 25.6-7. 11Hakte kéxegke ektahakxa enxoho kéltémo kólawho nepyeseksa kélnámokkok, mékoho sat kóltemesásekxa', keñe sat kéxegke kéltemesásamáxche nak mékoho, ekha kéláyo sat kóltemesásekxa'.#Pr 29.23; Mt 23.12; Lc 18.14.

12Aptahak axta anhan apcháneya Jesús énxet ektaha axta apcháneyeykha s'e:

—Kéllanak agkok kéxegke ektámáxche, esenhan ma'a nento ektámáxche taxnamla'a, nágkóláneyha aksa kélnámokkok kélásekhayókxa nak, tén han ma'a kélyáxeg, tén han ma'a kélteme kélnámokkok nak, tén han ma'a kelwese'e kélhóxo nak, hakte yáneyha sat nahan kéxegkáxa xa énxet'ák nak, cháxa kélxaka kéxegke ekyakmageykekxa eñama kélteme xa. 13Kéllanak agkok kéxegke ektámáxche, Kóláneyha sat ma'a énxet meyke aksok apagkok nak, tén han ma'a énxet'ák apkelyelkamap nak, tén han ma'a meyke aptapnák nak, tén han ma'a meyke apakta'ák nak; 14kapayhekxak sat nahan kélwáxók, hakte mopwancha'ak eyanmagkasesek kéxegke xa énxet'ák nak, keytek sat eyke kéxegke ekyakmageykekxa kéltahakxa m'a ekhem apnakxétekhágwokmo sat énxet'ák apkelpéwomo nak.

Jesús apyetcháseykekxoho ekyawe ektámáxche nento taxnamla'a

(Mt 22.1-10)

15Xama axta apleg'a xama énxet apheykha axta nekha mésa xa, aptahak axta apcháneya Jesús se'e:

—¡Apkeleñémo agko' énxet appásegwayam nak elánéxchexa nento aptémakxa nak Wese' apwányam Dios!

16Aptahak axta apchátegmowágko Jesús se'e:

—Apkelanak axta ektámáxche ekwányam xama énxet, apkeláneyáha axta énxet apxámokma. 17Xama axta ekpenchásexko ekhánamáxche nento, apcháphásek axta xama apchásenneykha yakwayam etnehek apkeltennáseykekxa énxet'ák ektaha axta kéláneyeykha s'e: ‘Kólxegma exnek kaxwo', penchásexchek ekhánamáxche nento.’ 18Apyókxoho axta eyke apkelxénak ekyetna elya'asakxaxma. Aptahak axta apmonye kélpakhetcheso s'e: ‘Kaxwo' xeyk ko'o ekmak yókxexma ahagkok, atyánegwomhok sat. Eltennés sat háwe eykhe mapekheykha. 19Keñe axta pók aptaha s'e: ‘Kaxwo' xeyke ektegya'ak ko'o diez weyke yakwayam altemésesha, ekmokók eykhe eykkónek. Eltennés sat háwe eykhe mapekheykha.’ 20Keñe axta pók aptaha s'e: ‘Kaxwo' xeyk elyamhápak ko'o, mowanchek axog.’ 21Aptakháwok axta m'a wese' apchásenneykha nak, apkeltennásekxeyk axta wese' apagkok ekyókxoho xa ektahakxa axta apkelpakmeyesma énxet'ák. Keñe axta aplawa m'a wese'. Aptahak axta apcháneya apchásenneykha s'e: ‘Emhok heykxa m'a ámay nepyeseksa tegma nak, tén han ma'a ámay étkók apkelmaheykegkaxal'a énxet. Enaklanta sat énxet meyke aksok apagkok se'e, tén han ma'a énxet'ák apkelyelkamap nak, tén han ma'a énxet'ák meyke apakta'ák nak, tén han ma'a meyke aptapnák nak.’ 22Nano' axta entahak aptaha apcháneya wese' apagkok apchásenneykha s'e: ‘Wese', elanak xeyk ko'o m'a apkeltamhókxa exchek alának xép, awanhek eyke makháxma s'e.’ 23Keñe axta aptaha wese' apcháneya apchásenneykha s'e: ‘Emhok kaxwo' ámay tén han ma'a ámay étkók ekmaheyak nak neyáwa apheykegkaxa énxet, elyáteyagkoho sat yának elántexek pók énxet'ák yakwayam enxoho elánhok ma'a exagkok. 24Eltennásek ko'o peya metawagkok ektámáxche selané xa apmonye'e exchek seláneyeykha.’

Ektémakxa negyetlo Cristo

(Mt 10.37-38)

25Apxámok axta énxet apyetlo Jesús, appeynchakpok axta neptámen Jesús, keñe axta aptaha apkeláneya énxet'ák se'e: 26“Elya'aweyktek agkok kéxegke eyesextoho enxoho selásekhayo, keñe kólásekhohok kélagko' ma'a kélyap, tén han ma'a kélchána, tén han ma'a kélnakteyegka'a, tén han ma'a kélketchek nak, tén han ma'a kélyáxeg nak, tén han ma'a kélyáxeg kelwán'ák nak, tén han ma'a kélásekhamáxkoho kélagko' nak, megkólwanchek kóltehek seltámeséyak.#Mt 10.37. 27Agkok kólpatmak aksok ektegyéso kélagkok, tén han mehelyetlokmo enxoho, megkólwanchek kóltehek seltámeséyak.#Mt 10.38; 16.24; Mr 8.34; Lc 9.23; Jn 12.24. 28Kélmokók agkok kéxegke kóllának tegma netno', megkatnehek megkólheykha yakwayam kalchetmok sekxo' kélwáxok yakwánxa kammok ekyanmaga, yakwayam enxoho kólya'asagkohok ekyetna selyakye yakwayam kólpenchesek apyókxoho tegma. 29Agkok kalchetámak kélwáxok, kélpekkena enxoho aksa m'a tegma apowhak ekyennaktéso nak, keñe megkólwanchek kólpenaksek xa tegma nak, apyókxoho énxet sat nahan yesmaksek ektaha apweté xa. 30Etnehek nahan apkelpeywa s'e: ‘Apkelanak axta apxagkok xa énxet nak, keñe megkapwagko apmoko epencheshok apyókxoho.’ 31Peyk agkok nahan emhagkok kempakhakma xama wese' yakwayam yenmexek ma'a pók wese' nak, exek sekxo' yakwayam kalchetmok apwáxok, apwanchek kexaha yenmexchesek diez mil sẽlpextétamo m'a veinte mil sẽlpextétamo apkeláphaso m'a pók wese' ektaha nak apkenmexma. 32Xénchek agkok apwáxok megkapwagko yenmexek pók, keñe eláphaksek apkeltennágwayam yakwayam elwátesagkok apkello, cham'a apha enxoho makham makhawo' ma'a pók wese' nak. 33Sat agkok kólchexeyk kéxegke ekyókxoho aksok kélagkok ekyetnakxa enxoho, megkólwanchek kóltehek seltámeséyak.

Yásek meyke nak ekmáske

(Mt 5.13; Mr 9.50)

34“Tásek ma'a yásek nak; wánxa agkok, massék agkok ma'a ektémakxal'a ekmáske yásek, ¿háxko katnehek kólmaha makham? 35Yawanchek nahan katakmelchesek xóp, megkapasmek nahan pa'at apák nékheso nak. Kólchexak aksa. Kéxegke ekha nak kélheyk'ák, kóleyxho xa.”

Currently Selected:

SAN LUCAS 14: LEGN

Highlight

Copy