SAN LUCAS 13

Kéméxchek agyakmagkasek egwáxok

1Apkelmeyákxeyk axta aphakxa Jesús nápakha énxet, cham'a ektaha axta xa, kéltennáseyha axta anhan Jesús apkeltémo Pilato etekyók nápakha énxet'ák apkeleñama Galilea neyseksók apkennapma aksok nawha'ák apméso Dios, keñe ekyepetchákxo aksok nawha'ák éma agkok kélméso Dios éma apagkok xa énxet'ák nak.

2Aptahak axta apkeláneya Jesús se'e: “¿Kélaneykeya kéxegke mexnawok pók énxet'ák ekyawe melya'asáxma xa énxet'ák apkeleñama nak Galilea apkeletsapa nak? 3Eltennásek ko'o megkañama xa; agkok kéxegkáxa kólyakmagkásak kélwáxók, kóletsapok sat nahan kéxegkáxa. 4¿Kélanagkamcheya anhan kéxegkáxa mexnawok pók énxet'ák apheykha Jerusalén ekyawe apkelsexnánémap ma'a dieciocho énxet'ák apkeletsapa axta, cham'a apchahapwakto axta tegma apwennakte ekpayho axta Siloé? 5Eltennásek ko'o megkañama xa; agkok kólyakmagkásak kéxegkáxa kélwáxok, kóletsapok sat.”

Jesús apyetcháseykekxoho yámet ekwesey higo meyke ekyexna

6Apkeltennáseyha axta anhan Jesús énxet'ák apyetcháseykekxoho, aptahak axta s'e: “Yetneyk axta higo yámet kélcheneykekxa neyseksa apkeneykekxexa anmen yámet xama énxet. Apteyanegwákxok axta apkeltamho étak ekyexna higo. Axta eyke ét'ak ekyexna xama enxoho.#Is 5.1-7; Jer 2.21; 8.13. 7Keñe axta aptaha apcháneya énxet ektaha axta aptakmelcheso kélcheneykekxexa anmen yámet se'e: ‘Elano, apkántanxo apyeyam entemék sekteyánegweyktamho ko'o s'e higo yámet nak, seltémo eykhe ótak ekyexna, akke ateyk ekyexna xama enxoho. Eyakten sat; Chakhók katnamok namyep.’ 8Wánxa agkok, aptahak axta apchátegmowágko énxet ektaha axta aptakmelcheso namyep se'e: ‘Wese', yoho aksa sekxo' makham katnamok se'e apyeyam nak; ko'o sat ayelpagkasesek xóp, aksok áwa' apák sat nahan anegkenek awhak. 9Lapmaxchek sat keyxek sektemésesa enxoho xa, sat agkok keyxnak, keñe sat eyaktének.’ ”

Jesús aptakmelcheseyam xama kelán'a ékhé, ekhem apkellókasamakxa apkelyampé énxet'ák judíos

10Apkelxekmósek axta Jesús énxet'ák kañe' apchakneykekxexa énxet'ák judíos ekhem sábado apkellókasamakxa axta apkelyampé énxet'ák judíos; 11xama kelán'a axta anhan eghak ma'a ekweykmo axta dieciocho apyeyam ekháxamáxche. Espíritu ekmaso axta ekteméseso ékhé, yawanchek axta kapewhok katnamha xama enxoho. 12Xama axta apwet'a Jesús xa kelán'a nak, apwóneyha axta, aptahak axta apcháneya s'e:

—Kelán'a, yenyókek kaxwo' ma'a ektémakxa axta ekháxamáxche.

13Appaknegwokmók axta Jesús xa kelán'a nak. Yetlókók axta anhan ekmowána kapewhok katnamha, keltemésesek axta anhan apcheymákpoho Dios. 14Wánxa agkok, aplókek axta eyke m'a énxet aptaha axta apkemha apmonye apchakneykekxexa énxet'ák judíos, hakte ekhem apkellókasamakxa apkelyampé énxet'ák judíos axta m'a aptakmelchesekmo axta Jesús xa kelán'a nak. Aptahak axta apkemha apmonye judíos apkeláneya énxet'ák se'e:

—Wánxa aksa seis ekhem negmowána antemeykha; kélwanchek kólxegmak xa ekhem nak, yakwayam enxoho kóltakmelchesók ektémakxa kélháxamáxche, háwe eyke m'a ekhem sábado nak, nellókasamakxa nelyampé.#Ex 20.9-10; Dt 5.13-14.

15Aptahak axta apcháneya Wese' egegkok se'e:

—Kéxegke kélmeyókásamáxkoho nak kéltémakxa, ¿Megkóllekkeseya kéxegke táma weyke kéltóso, yámelyeheykok esenhan, cham'a ekhem nellókasamakxa nak nelyampé, yakwayam enxoho kólágwakxak yegmen? 16Hakte Abraham aptáwen neptámen se'e kelán'a nak, dieciocho apyeyam nahan weykmok ekteméseso Satanás xa ektémakxa nak ekháxamáxche. Payhawók agmasésesek ektémakxa ekháxamáxche ekhem nellókasamakxa nelyampé xa kelán'a nak.

17Xama axta aptaha appeywa Jesús xa, apkelmegkágweykxók axta apkelleg'a ektaha axta apkenmexeykha; kelpayheykxeyk axta eyke apwáxók apyókxoho énxet apkelwet'a m'a aksok sempelakkaso nak agwetak apkelana axta Jesús.

Jesús apyetcháseykekxoho yámet ekweseyl'a mostaza aktek

(Mt 13.31-32; Mr 4.30-32)

18Aptahak axta anhan Jesús apkeltenneykha s'e: “¿Yaksak aksok egwanchek agyetchásekxohok ma'a aptémakxa nak Wese' apwányam Dios? ¿Yaksak nahan egwanchek aghésho'? 19Cha'a hawók ma'a yámet ekweseyl'a mostaza aktek apkeneykekxal'a xama énxet yókxexma apagkok, kawanák nahan ekwokmoho ektaha yámet ekyawe, kalánegwók nahan nátétkók axanák ma'a aktegák.”

Jesús apyetcháseykekxoho kempáseyak

(Mt 13.33)

20Aptahak axta anhan apkeltenneykha Jesús se'e: “¿Yaksak aksok egwanchek aghésho' aptémakxa nak Wese' apwányam Dios? 21Máxa m'a kempáseyak ekmeykencha'awol'a kelán'a kanchahak hótahap apxámokma yakwayam kampasagkok apyókxoho hótahap ekyelakteso.”

Ektahakxa nak ketsék átog

(Mt 7.13-14,21-23)

22Apkelxekmósek axta Jesús énxet'ák nátegma apwánxa axta cha'a, tén han ma'a apheykegkaxa nak énxet, cham'a apmeyákxo axta Jerusalén. 23Xama énxet axta aptahak apkelmaxneyeykha s'e:

—Wese', ¿apkántawoya énxet yakwayam elwagkasakpok teyp?

Aptahak axta apchátegmowágko Jesús se'e:

24Kóllenxánem kólántexek ma'a ektahakxa nak ketsék átog; hakte eltennásek ko'o kéxegke apxáma eykhe énxet apmáheyo elántexek, mopwancha'ak sat eyke elántexek. 25Apkempákxeyk sat agkok néten ma'a ektaha nak apxagkok tegma, tén han ma'a apchápeykxo enxoho átog, sat kóltehek kélpeywa kéxegke kélchakneykha yókxexma s'e: ‘Wese', henlekkes negko'o átog.’ Wánxa agkok, sat etnehek yátegmowagkok Wese' s'e: ‘May'ásegkok ko'o kéleñamakxa kéxegke.’ 26Keñe sat kóltehek kélpeywa kéxegke s'e: ‘Nenteykegkek axta nentéyak xamo' xép, negyeneykegkek axta anhan negyenéyak xamo', elxekmóshok axta anhan cha'a exchep énxet'ák ámay egagkok nepyeseksa tegma.’ 27Sat eyke etnehek makham yátegmowagkok se'e: ‘Eltennásek xeyk may'ásegkok kéleñamakxa kéxegke. ¡Náhelyepetkoho kéxegke elmasagcha'a nak kéltémakxa!’#Sal 6.8. 28Sat kóllekxagwaha kéxegke m'a, kóltakxek sat nahan kélma'ák eñama kéllegeykegkoho ekmáske,#Mt 22.13; 25.30. cham'a kélwet'a sat Abraham, Isaac, Jacob, tén han ma'a apyókxoho énxet'ák apkellegaso axta Dios appeywa apheyncha'a enxoho m'a aptémakxa nak Wese' apwányam Dios, cham'a kélántekkesa sat yókxexma kéxegke. 29Hakte elwak sat énxet'ák apkeleñama nexcheyha, nepyeyam, teyapmakxa ekhem, tén han ma'a taxnegwánxa ekhem, yakwayam exmakha etawagkok aptéyak ma'a aptémakxa nak Wese' apwányam Dios.#Mt 8.11-12. 30Wánxa agkok, meyke kéláyo sat kóltemesásekxak nápakha énxet'ák ekha nak kéláyo keso negwánxa nak, keñe sat kóltemesásekxak ekha kéláyo m'a nápakha énxet'ák meyke nak kéláyo keso negwánxa nak.#Mt 19.30; 20.16; Mr 10.31.

Jesús apkelekxagweykha apkelanyo tegma apwányam Jerusalén

(Mt 23.37-39)

31Apkelwokmek axta anhan nápakha énxet'ák fariseos. Aptahak axta apcháneya Jesús se'e:

—Emhok sat mók nekha, Herodes apmokók yakhek xép.

32Aptahak axta apchátegmowágko Jesús se'e:

—Kóltakhoho, kólteme kóltennásekxak yemmáleg se'e: ‘Elano, sakhem selántekkesa ko'o kelyekhama', saka sat nahan, eltakmelchesekmek nahan elháxamáxche, mók ekhem sat apenaksek xa.’ 33Alenxanmohok sat eyke ko'o sekxega sakhem, saka, tén han mók ekhem, hakte megkapayhawok yetsapok énxet Dios appeywa aplegaso megkatnahakxa nak tegma apwányam Jerusalén.

34“¡Jerusalén, Jerusalén! Kélnapmakxa nak cha'a Dios appeywa apkellegaso nak, kélyetneykxa nak han cha'a meteymog ma'a seykha amya'a Dios apkeláphaso nak! ¡Hágkaxwe amawhok wánchásekxak énxet'ák apheykha xa Jerusalén, ektémol'a kánchásekxak étkók tat'a kóneg axampagkok, axta eyke kólmáheyók kéxegke! 35Kóllano hana tegma appagkanamap kélagkok, méko sat katnehek eyásekha'a; eltennásek ko'o kéxegke peya mehelwetekxók cha'a ekwokmoho ekhem kéltaha kélpeywa s'e: ‘¡Tásek sat katnehek apxénamap xa apwa'a nak yetlo apsáyam Wese' egegkok apwesey!’#Sal 118.26.

Currently Selected:

SAN LUCAS 13: LEGN

Highlight

Copy