SAN LUCAS 15

Jesús apyetcháseykekxoho énxet apkeláneykha nekkések apweteykekxa aptóso apxegányam

(Mt 18.10-14)

1Apyókxoho énxet'ák apkelmomo selyakye yakwayam kólmések wese' Roma axta apkelmahágkok aphakxa Jesús, yakwayam yeyxwomhok apkeltenneykha, tén han ma'a énxet'ák elmasagcha'a axta apkeltémakxa. 2Apkelpakmeteyha axta énxet'ák fariseos, tén han ma'a énxet'ák apkelxekmóso axta apnámokkok ektémakxa segánamakxa. Aptahak axta apkelpakmeta s'e:

—Apkelápeyha nak énxet'ák melya'asáxma xa énxet nak, aptókok nahan xamo' aptéyak.#Lc 5.29-30.

3Keñe axta aptaha apkeltenneykha Jesús aksok apyetcháseykekxoho s'e: 4“Apyetneyk agkok kéxegke kélnaktóso cien nekkések, keñe exyenmok xama, kólchexak aksa yókxexma m'a noventa y nueve nekkések nak, keñe kólchetmok ma'a nekkések apxegányam ekwokmoho kélwetákxo. 5Kélwetákxeyk agkok, kapayhekxak nahan kélwáxok, keñe kólpatmekxa'.#Is 40.11; Ez 34.11-12; Jn 10.1-16; He 13.20. 6Kélwákxeyk agkok kélxagkok, keñe kólánchásekxak kélnámokkok, tén han ma'a kélhóxo nak, keñe kóltehek kólának se'e: ‘kalpayhekxak sat egwáxok negyókxoho nak, hakte ekwetákxeyk ko'o nekkések sektóso apxeganakmo axta.’ 7Eltennásek ko'o kéxegke m'a apyakmagkasa enxoho apwáxok xama énxet ekmaso nak aptémakxa, awanhek katnehek elpayheykekxa apwáxók énxet'ák apheykha nak néten, megkaxók ma'a ekweykenxal'a apkelpeykesáseykekxa apwáxók noventa y nueve énxet'ák eltakmela nak apkeltémakxa, cham'a megkeyméxko nak elyakmagkasek apwáxók.

Jesús apyetcháseykekxoho xama kelán'a ekweteykekxa xama sawo selyakye ekxegányam

8“Yetneyk agkok nahan xama kelán'a diez sawo selyakye, xeganakmek agkok xama m'a sawo selyakye nak, megkatnehek megkálewaso chálewaso, káxñeksek nahan kañe' tegma, katakmelcheshok nahan étamso ekwokmoho ekwetákxo. 9Wetákxeyk agkok, kánchásekxak námokkok, tén han ma'a ekhóxo nak, katnehek nahan kalának se'e: ‘Kalpayhekxak sat egwáxok negyókxoho nak, hakte ekwetákxeyk ko'o sawo selyakye ekxegányam axta.’ 10Eltennásek ko'o kéxegke m'a apyakmagkasa enxoho apwáxok xama énxet ekmaso nak aptémakxa, kalpayhekxak apwáxók Dios apkelásenneykha m'a néten.”

Jesús apyetcháseykekxoho énxet meyakmagkáseykekxa axta aptémakxa apketche

11Aptahak axta anhan apkeltenneykha Jesús apyetcháseykekxoho s'e: “Yetneyk axta apkánet apketchek xama énxet. 12Aptahak axta apcháneya apyap apketche apsexyok se'e: ‘Táta, hegkes heykxa ko'o m'a aksok sephewayam apxéna axta hegkeyásekxa'.’ Keñe axta apkelmeyásegko apyap aksok ekpehewayam yakwayam egkések xa apkánet nak. 13Axta kanéwók apxawé aksok xa apsexyo nak, ñohok axta apsawhawo apkexeykxo aptegyákxo selyakye, makhawók axta anhan apmahágkok eñama xa selyakye nak, cham'a mók apkelókxa nak. Axta apsawhegweykmok selyakye apagkok ma'a eñama meláneykegkoho axta aptémakxa. 14Xama axta apsawhoma selyakye apagkok, meyke nento axta entahak ma'a yókxexma nak, keñe axta eyakhama meyk xa wokma'ák nak. 15Aptegyágwokmek axta aptamheykha apxagkok ma'a énxet apha axta m'a yókxexma nak, kéláphásek axta yókxexma yakwayam eltakmelchesek yátapomap. 16Apmáheyok axta eykhe etwok tewes ekyexna kéléyak axta yátapomap, méko axta eyke ekmésama. 17Nano' axta entemék ektemegweykmo elchetamso apwáxok se'e: ‘¡Apxámok táta apkeláneykha m'a apxagkok, yeykhágweykmók nahan aptéyak, keñe ko'o seyakhama meyk se'e! 18Amyekxak sat makham táta apxagkok, sat atnehek wának se'e: Táta, asagko' ko'o sektahakxa nápakto' Dios tén han nápakto' xép; 19Megkapayhawok heltehek kaxwo' xép apketche; hetnéses ko'o xa m'a aptemésesamakxa nak apkeláneykha.’ 20Keñe axta aptakháwo xa wokma'ák nak, apyap apxagkok axta apmeyákxak.

“Makhawók axta apwet'ak apkexyekmo apyap xa wokma'ák nak. Apyósek axta apkelanawo. Apketchágkók axta apkelanyexágko, appathetchek axta anhan appetsesa. 21Aptahak axta appakhetchesa apyap wokma'ák se'e: ‘Táta, asagko' ko'o sektahakxa nápakto' Dios tén han nápakto' xép; megkapayhawok kaxwo' heltehek apketche.’ 22Wánxa agkok aptahak axta apcháneya apyap apkeláneykha s'e: ‘Kólhexyawásekxa heykxa apáwa apkeltakmela nak, kólántaxneyásekxa' sat se'e; kólatcheses sat nahan apophék nétcheso egaphék nak, kólatchesásekxa sat nahan apkeltéto apmagkok. 23Kólyentementa' sat weyke kennawók étkok ekmelé, kólakha sat. ¡Anlának sat ektámáxche yakwayam kalpayhekxak egwáxok! 24Hakte apketsepmeyk axta s'e hatte nak, apxátekhágwokmek eyke kaxwo'; apxegáneykmek axta anhan, negwetákxeyk eyke kaxwo'.’ Apkeláneygkek axta anhan ektámáxche elpayhekxo apwáxók.

25“Yókxexma axta aptamháha apketche metnaha apketkok. Xama axta aptakháwo, apchágketchesakxeyk axta apxagkok, keñe axta apleg'a apkelpáwaso énxet, tén han ma'a eknéwomáxche. 26Keñe axta apwónencha'a xama apkeláneykha, apkelmaxneyáha axta ektahakxa. 27Aptahak axta apcháneya apkeláneykha s'e: ‘Apyáxeg apwakta'; keñe exchek apyap apkeltamho kamátog weyke kennawók étkok ekmelé, hakte tásek apweykta m'a apketche, méko nahan ektémakxa.’ 28Aplókok apagko' axta eyke m'a apepma', axta emokók etxek kañe'; keñe axta apyap aptepa yókxexma yakwayam enxoho yának etxek kañe'. 29Aptahak axta apcháneya apyap wokma'ák metnaha apketkok se'e: ‘Apya'ásegkok xép selánesama cha'a aksok ekyókxoho apyeyam yetlo selyaheykekxoho, akke hegkésók xép xama yát'ay apketkok enxoho yakwayam kapayhekxak ewáxok xamo' enámokkok. 30Keñe nak apwakto xa apketche nak, aptawáseykencha'a axta selyakye apagkok, apyanmagkasama axta cha'a appathetéyak ma'a kelán'ák ekyakmagkáseyak nak pók énxet ekpathetéyak ektegye selyakye, keñe exchep apchakhásesa weyke kennawók étkok ekmelé.’

31“Aptahak axta apchátegmowágko apyap se'e: ‘Hatte, sekxegexma cha'a exchep, xép nahan apagkok ma'a ekyókxoho aksok ahagkok nak. 32Payhawók eyke anlának ektámáxche, tén han kalpayhekxak egwáxok, hakte apxátekhágwokmek kaxwo' apyáxeg apketsapma axta; apxegáneykmek axta, negwetákxeyk eyke kaxwo'.’ ”

Currently Selected:

SAN LUCAS 15: LEGN

Highlight

Copy