SAN LUCAS 16

Jesús apyetcháseykekxoho énxet apkemha apmonye aptamheykha aptawáseykha ektémakxa ekha kéláyo

1Apkeltennáseyha axta anhan Jesús apkeltámeséyak se'e apyetcháseykekxoho nak: “Aphegkek axta xama wese' ekxákma axta selyakye apagkok, yetneyk axta anhan xama apkeláneykha apkemha apmonye m'a; kéltennásekxeyk axta wese' apagkok aptawasáseykencha'a aksok apagkok ma'a apkemha apmonye apkeláneykha. 2Apwóneyha axta wese' apagkok xa apkemha apmonye apkeláneykha nak. Aptahak axta apcháneya s'e: ‘¿Yaksak aksok apkeláneya sekleg'a axta amya'a apxénákpo exchep? Hexekmos ko'o weykcha'áhak ektémakxa axta aptamheykha, hakte kamaskok sat aptaha apkemha apmonye ahagkok xép. 3Entahak axta elchetamso apwáxok apkemha apmonye wese' apkeláneykha s'e: ‘¿Háxko sat atnehek kaxwo' setekkesa nak wese' ahagkok? Momóhagkók nahan atneykha sektamheykha ekyentaxno nak, amegkeyk nahan aleyxek axkak aksa aksok. 4Ekya'ásegkok kaxwo' yakwánxa atnehek yakwayam enxoho hemok takha' awók apxagkok énxet, cham'a setnaha enxoho meyke sektamheykha.’ 5Apyókxoho axta apkeláneyáha énxet'ák ektaha axta apméyak aksok wese' apagkok. Aptahak axta sekxo' apkelmaxneyeyncha'a apmonye appakhetcheso s'e: ‘¿Háxko axta ekwánxa apméyak wese' ahagkok?’ 6Aptahak axta apcháneya apchátegmowágko s'e. ‘Cien axanák aceite axta ko'o sekméyak.’ Aptahak axta apcháneya wese' apkemha apmonye apkeláneykha s'e: ‘Keso weykcha'áhak eknaktáxésamaxche axta apméyak se'e. Exa, elánekxa sat heykxa mók, cincuenta sat epekkenek kaxwo' apméyak.’ 7Keñe axta aptaha apkelmaxneyeyncha'a pók se'e: ‘Xép han, ¿háxko ekwánxa apméyak?’ Aptahak axta apchátegmowágko s'e: ‘Cien kélyetsáteyak hótahap axta ko'o sekméyak.’ Aptahak axta apcháneya wese' apkemha apmonye apchásenneykha s'e: ‘Keso weykcha'áhak eknaktáxésamaxche axta apméyak se'e; elánekxa mók, ochenta sat epekkenek xa.’ 8Apyekpelchágwokmek axta wese' apkepwagko elának aksok ma'a apkemha apmonye apkeláneykha ekmaso axta aptémakxa. Hakte apkelya'ásegkok ektémakxa apkelyanmagkásamap ma'a énxet'ák apheykha nak keso náxop, kaxnók ma'a énxet'ák apkeleñama nak neyseksa elseyexma.

9“Eltennásek ko'o kéxegke seltamho kólmaha ekyókxoho aksok kélagkok ekyetna nak keso náxop ekyetnamakxa nak mólya'asáxma, yakwayam enxoho kólxamásekxak kélnámokkok, yakwayam enxoho anhan kólmaxchek takha' kéxegke m'a yakwánxa sat kólhamok meyke néxa, cham'a eksawhéxko enxoho ekyókxoho aksok kélagkok.

10“Kéxegke ektahakxa enxoho kéltakmelcheso aksok kélxawé antawo' nak, kóltakmelchesek nahan ma'a kélxaka enxoho ekxámokma; keñe kéxegke megkóltakmelcheso nak aksok kélxawé nak antawo', megkóltakmelchesek nahan ma'a kélxaka enxoho ekxámokma.#Mt 25.21; Lc 19.17. 11Ekhawo ektémakxa nak han ma'a megkóltakmelchesa enxoho kélmeykha kéxegke ekxákma aksok kélagkok nak keso náxop, ekyetnakxa nak mólya'asáxma, méko kának kóltakmelchesek ma'a ektaha nak ekmámnaksoho ekxákma aksok egagkok eñama néten. 12Agkok nahan kóltakmelchásak kélmeykha aksok megkatnaha nak kélagkok, méko kagkések kéxegke aksok ektaha neykhe kélagkok.

13“Méko kawának kalanha apkánet kelwese'e; hakte kóltaknók ma'a pók, keñe kalkohok kélwáxok ma'a pók, esenhan kóltehek megkólyenyaweykha m'a pók, keñe kólwanyohok ma'a pók. Megkólwanchek kéxegke kólhéshok mók kélmámenyého xa ánet nak, Dios tén han selyakye.”#Mt 6.24. 14Xama axta apkelleg'a énxet'ák fariseos ektaha axta apkelyekhásamákpoho apkelmopmenyého selyakye xa, apya'ásekmek axta apkelleg'a ektahakxa apkeltenneykha Jesús. 15Aptahak axta apkeláneya Jesús se'e: “Máxa cha'a kéltemék kéxegke ektakmela kéltémakxa nápakta'awo' énxet'ák, apya'ásegkok eyke Dios ektémakxa elchetamso kélwáxok kéxegke. Aksok apkenagkama nak katnahak ektakmela agko' énxet'ák, cháxa megkaleklama nak apwáxok Dios xa.

Segánamakxa tén han ma'a aptémakxa nak Wese' apwányam Dios

16“Axta chénamok kélmeykha segánamakxa m'a apheykegkaxa axta énxet'ák apkellegaso axta Dios appeywa, ekwokmoho m'a apwa'a axta Juan, keñe axta anhan eyeynawo kéllegaso amya'a aptémakxa nak Wese' apwányam Dios, apkelwaskápeykxók nahan apyókxoho énxet yakwayam elántexek ma'a.#Mt 11.12-13.

17“Awanchek kamaskok néten tén han keso náxop, yawanchek eyke kamaskok xama ektáxésamaxche m'a segánamakxa nak.#Mt 5.18.

Jesús apkeltenneykha ektémakxa negyamasma entáwa

(Mt 19.1-12; Mr 10.1-12)

18“Kélyenyókek agkok kéxegke kéltáwa, keñe kólmekxak mók, kéltawáseyha elyamhopma kéltaha enxoho xa; kélmákxeyk agkok nahan kéxegke m'a kelán'a ekyamasma atáwa nak, kéltawáseyha nahan elyamhopma.#Mt 5.32; 1 Co 7.10-11.

Enxet ekxákma selyakye apagkok tén han Lázaro

19“Aphegkek axta xama énxet ekxákma selyakye apagkok aptaxneykekxoho axta cha'a apáwa apmomnáwa nak, cham'a aptakmalma axta anhan cha'a kóllano', yókxoho ekhem axta anhan cha'a apkelané ektámáxche ektakmela. 20Aphegkek axta anhan xama énxet meyke aksok apagkok apwesey axta Lázaro, sawhomakyek axta apyempehek elánteyapma taskapma, exnakxohok axta anhan cha'a náxop nekha wese' átog apagkok. 21Axta cha'a apmáheyok etwok ma'a wese' appalcháseykha apto nak kóneg mésa; weykmók axta anhan semheg ekya'áyam elyakmelchesama cha'a m'a taskapma ekteyapma axta apyempehek. 22Xama ekhem axta apketsapak xa énxet meyke aksok apagkok nak, apyentamákxeyk axta anhan Dios apkelásenneykha yakwayam exnésekxak ma'a aphakxa nak Abraham, cham'a yókxexma ektakmelakxa nak. Apketsekkek axta anhan ma'a énxet ekxákma axta selyakye apagkok. Kélatawanyek axta anhan.

23“Apsekhákxok axta néten neyseksa aplegeykegkoho elmaheykegkaxa eghagák ma'a énxet ekxámokma axta aksok apagkok. Makhawók axta apwet'ak apha xamo' Lázaro Abraham. 24Keñe axta aptaha apyennaktésawo appeywa s'e: ‘¡Táta Abraham, yepyósho helano ko'o! Yáphés Lázaro yakwayam eyásesek naw'a apophék yegmen yakwayam enxoho emaxakteyásekxak ahaxkok, awanhek ko'o seklegeykegkoho s'e neyseksa táxa nak.’ 25Aptahak axta apchátegmowágko Abraham se'e: ‘Hatte, kaxénwakxoho apwáxok ektakmelmo axta apha exchep apyennaktamakxa axta, keñe axta Lázaro aplegeykegkoho ekmaso agko'. Apxakak kaxwo' Lázaro ekpayheykekxa apwáxok, keñe exchep aplegágkoho xa. 26Yetneyk nahan máxek ekmatawóneg negyeseksa negko'o ekhawo nahan kéxegkáxa; ékeso eñamakxa megkapwagko nak elyeykhekxak énxet'ák apheyncha'a nak se'e yakwayam elwók xa kélhágkaxa nak kéxegke, mopwanchek nahan elxegmak énxet'ák apheyncha'a nak xa.’

27“Aptahak axta wese' ekxákma selyakye apagkok se'e: ‘Táta Abraham, awanhok agko' ko'o seltémo yáphaksek Lázaro táta apxagkok, 28cham'a aphágkaxa nak cinco elyáxeg ko'o, yakwayam enxoho eltennásekxa', yakwayam enxoho anhan melxegmék se'e ekyetnakxa nak nenlegeykegkoho ekmaso agko'.’ 29Aptahak axta apcháneya Abraham se'e: ‘Yetneyk eyke apkelyáxeg xép ma'a weykcha'áhak aptáxéso axta Moisés, cham'a apnaktáxeséyak axta anhan Dios appeywa apkellegaso axta: ¡Tásek elyahakxohok ektémakxa ekpeywa xa!’ 30Aptahak axta apchátegmowágko énxet ekxákma selyakye apagkok se'e: ‘Táta Abraham, nakso' xa, apxátekhágwokmek agkok énxet apketsapma axta, tén han apxekmowáseykpekxoho enxoho m'a elyáxeg, elyakmagkasek sat apwáxók.’ 31Wánxa agkok, aptahak axta apchátegmowágko Abraham se'e: ‘Agkok emokók elyahakxohok Moisés apnaktáxeséyak nak, tén han ma'a apnaktáxeséyak axta énxet'ák apkellegaso axta Dios appeywa, étak sat eykhe exátekhágwók ektaha axta apketsapma, elya'asók sat eyke.’ ”

Currently Selected:

SAN LUCAS 16: LEGN

Highlight

Copy