SAN LUCAS 17
17
Sẽleso anlanaksek egmók mey'asáxma
(Mt 18.6-7,21-22; Mr 9.42)
1Aptahak axta apkeláneya Jesús apkeltámeséyak se'e: “Keytek sat cha'a aksok elánésamo nak mey'asáxma énxet; ¡kéxegke sat laye ektahakxa enxoho kélláneso mey'asáxma kélmók! 2Tásek kólyenyók kañe' wátsam ekwányam yetlo kéltetcheso apyespok meteymog, kaxnawok kólhok aksa elanaksek mey'asáxma xama xa sakcha'a létkók nak. 3¡Kólawho kéxegkáxa!
“Apkelanak agkok mey'asáxma kélyáxeg, kólpakhetches; apyakmagkasekmek agkok apwáxok, nágkólyakmagkásekxa aksa aptahakxa.#Mt 18.15. 4Wokmek sat agkok siete apkenmexeykha kéxegke kélyáxeg xama ekhem, wokmek agkok siete apteme apkenagko kéxegke s'e: ‘Matnekxék sat cha'a kaxwo'’, kéméxchek megkólyakmagkásekxék aptahakxa.
Magya'áseyam ekha ekmowána
5Aptahak axta apkeltámeséyak apcháneya Wese' egegkok Jesús se'e:
—Hegyánchesesagkoho negko'o nenteme magya'áseyam.
6Aptahak axta apchátegmowágko Wese' egegkok se'e:
—Hawók agkok kéxegke megkólya'áseyam ekwánxal'a mostaza aktek, kélwanchek kóltehek kólának yámet se'e: ‘Kapatyep xa, katnegwom kañe' wátsam ekwányam’, kalyahakxohok nahan yámet kéltahakxa enxoho kéláneya.’
Apchánémakpexa etnehek énxet apteme nak Dios apkeláneykha
7“Yetneyk agkok kélxama kéxegke, apyetna enxoho apchásenneykha apkenyekto enxoho namyep kélagkok natámen appeyncheyam xóp, esenhan ma'a natámen apkeláneseykha enxoho kélnaktóso weyke, megkóltehek kólának se'e: ‘Exnata'e, etwok sat apto’. 8Megkóltehek kólának xa, wánxa aksa kóltehek kólának se'e: ‘Helanés sat sekto, elánekxa aptahakxa yakwayam hesantegkesek cha'a aksok neyseksa sekto sekto tén han neyseksa sekya s'e sekya nak. Keñe sat etwok xép axayo'.’ 9Megkólxének nahan ektakmela aptemésesakxa m'a kélláneykha eñama apkelané m'a kéltamhókxa enxoho elána'. 10Ekhawo nak han kéltémakxa kéxegkáxa, cham'a kélpenchesa enxoho kéllané m'a ekyókxoho apkeltémókxa nak kóltehek Dios, kéméxchek kóltehek kélpeywa s'e: ‘negko'o nenteme kélásenneykha mékoho, hakte wánxa aksa nenláneya negko'o m'a negánémaxko axta anlána'.’
Jesús apkeltakmelcheseyam diez negmasé ektepelchamáxche egyempehek ektamhéyak
11Axta appéwók Jesús apmeyákxo Jerusalén ma'a yókxexma Samaria, tén han ma'a yókxexma Galilea. 12Apwokmek axta nátegma, axta apkeltahanyohok diez énxet negmasé ektepelchamáxche egyempehek ektamhéyak ma'a. Makhawók axta apchaknáha xa. 13Aptahak axta apkelyennaktésawo apkelpeywa s'e:
—¡Jesús, sẽlxekmóso, yepyósho henlanok negko'o!
14Xama axta apkelwet'a Jesús xa énxet'ák nak, aptahak axta apkeláneya s'e:
—Kólyo'ókxa énxet'ák appasmo nak apkelmaxnéseso Dios énxet'ák apagkok.#Lv 14.1-32.
Neyseksa apkelxega axta massak ektémakxa apkelháxamap. 15Xama axta apwet'a ekmassa ektémakxa apháxamap xama xa énxet'ák nak, aptakháwok axta yetlo apyennaktésamo appeywa apkeltemésesa apcheymákpoho Dios. 16Apkeltekxekwákxeyk axta aptapnák apkenmágkaxa Jesús, apkelpólentek axta anhan náxop yakwayam egkések ekpayheykekxa apwáxok Jesús. Samaria axta apkeñamak xa énxet nak. 17Aptahak axta Jesús apcháneya s'e:
—¿Háweya exchek diez kélyókxoho kéltakmelwokmo ektémakxa kélháxamáxche? ¿Háxko apkelmahágkaxa m'a nueve exchek apyókxoho? 18¿Wánxaya aksa apkexyekmo s'e énxet apkeñama nak mók nekha yakwayam egkések ekpayheykekxa apwáxok Dios?
19Aptahak axta apcháneya Jesús énxet se'e:
—Etnamha, etakhekxa; mey'áseyam keñamak aptakmelwokmo exchep.
Yakwánxa sat katnehek kawak aptémakxa nak Wese' apwányam Dios
(Mt 24.23-28,36-41)
20Apkelmaxneyáha axta énxet'ák fariseos ekwánxa ekhem kawak ma'a aptémakxa nak Wese' apwányam Dios. Aptahak axta apchátegmowágko Jesús se'e:
—Megkataxchek sat kawak ma'a aptémakxa nak Wese' apwányam Dios. 21Megkatnehek sat amya'a kólánéxchek se'e: ‘Keso ekyetna s'e’, esenhan katnehek amya'a, ‘Cha'a ekyetna á’; hakte wayak kélnepyeseksa kéxegke aptémakxa nak Wese' apwányam Dios.
22Aptahak axta Jesús apkeláneya apkeltámeséyak se'e:
—Kammok sat ekhem kélmokókxa kólwetak kéxegke ekhem apagkok ma'a aptaha nak Apketche énxet, megkólwetyehek sat eyke. 23Nápakha énxet sat etnehek apkelpeywa s'e: ‘Keso apha s'e’, esenhan katnehek amya'a s'e, ‘cha'a apha á’; nágkólya'am aksa, nágkólyetlakxa anhan. 24Máxa sat katnehek takha' apkelyenma eksawheykekxohol'a elsáseykmohoxma néten, cham'a ekwokmo sat ekhem yakwánxa ewatak ma'a aptaha nak Apketche énxet. 25Awanhek sat eyke sekxo' katnehek aplegeykegkoho, etaknawékpok sat nahan nepyeseksa énxet'ák keso negwánxa nak. 26Sat nahan katnehek ekwokmo sat ekhem yakwánxa ewatak aptaha nak Apketche énxet ma'a aptamheykegkaxa axta énxet'ák aphamakxa axta Noé.#Gn 6.5-8. 27Apteykegkek axta aptéyak énxet, apyeneykegkek axta apyenéyak ekwokmoho m'a aptaxna axta Noé kañe' yántakpayhe, wa'ak axta mámeye ekyawe agko', apsawhekpok axta anhan apkeletsapa xa énxet'ák nak.#Gn 7.6-24. 28Hawók axta anhan ektémakxa m'a aphamakxa axta Lot;#Gn 18.20—19.25. apteykegkek axta aptéyak énxet, apyeneykegkek axta anhan apyenéyak, apkelyanmagkásamákpek axta, apkeneykekxék axta nahan cha'a aksok aktek, apkeláneykegkek axta anhan tegma; 29xama axta aptepa Lot ma'a nepyeseksa tegma apwányam Sodoma, palleynteyk axta táxa eñama néten, axta anhan yetlo m'a aksok ánek ekyátekto eyálewomol'a, apsawhomákpók axta anhan apkeletsapma énxet. 30Sat nahan katnehek apkexyekmo sat ma'a aptaha nak Apketche énxet.
31“Enxet'ák ektahakxa enxoho apheykha néten apxanák, keñe kaxnagkok aksok apagkok kañe' tegma, tásek metyapok yakwayam elhexyawásekxak aksok apagkok; keñe m'a énxet aptamheykha nak yókxexma, tásek memyekxak apxagkok, cham'a ekhem sat.#Mt 24.17-18; Mr 13.15-16. 32Kaxénwakxoho kélwáxok ektémakxa axta Lot aptáwa.#Gn 19.26. 33Kéxegke ektahakxa enxoho kélmasma ektémakxa nak kélyennakte, kamassegwók sat, wánxa agkok, kéxegke ektahakxa enxoho ekmassegwayam ektémakxa kélyennakte, kólwetekxak sat makham kélyennakte.#Mt 10.39; 16.25; Mr 8.35; Lc 9.24; Jn 12.25.
34“Eltennásek ko'o kéxegke m'a ekhem sat, apkánet sat exnagkok énxet xama taháno axta'a: xama sat kólyentemekxak, keñe sat pók etakmopagkok. 35Anet kelán'a sat nahan katekxók aksok: xama sat kólyentemekxak, keñe sat mók katakmopagkok. 36Apkánet énxet sat nahan eltemeykha yókxexma: xama sat kólyentemekxa', keñe sat pók etakmopagkok.
37Keñe axta ektaha amya'a kélmaxneyeyncha'a Jesús se'e:
—Wese', ¿háxko ekpayho yakwánxa katnehek xa?
Aptahak axta apchátegmowágko Jesús se'e:
—Sat yaknekxak máma m'a ekyetnakxa enxoho kélhápak.
Currently Selected:
SAN LUCAS 17: LEGN
Highlight
Share
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
