Maak 6

Yisa ya Nazarɛtnim’ zaɣis’ o

(Matiu 13.53-58; Luk 4.16-30)

1Ka Yisa daa yiɣisi nimaani kul’ o ya, ka o nyaandoliba daa dol’ o. 2Ka Vuhim Dabisili dali daa ti paai ka o chaŋ Yɛhudianim’ jɛmbu duu nti piligi wuhiri niriba, ka di daa gari bɛn wum o wuhibu maa ka bɛ bɔhiri taba, “Ya polo ka doo ŋɔ lee bɔhim yɛla ŋɔ zaa? Ka ya ka o lee nya baŋsim ŋɔ tatabo? Ka ŋuni n-lee niŋ o yiko ka o tumdi tuun’ kara ŋɔ? 3Pa kapinta ŋun nyɛ Mariama bia la m-bala? Pa o tizɔbihi n-nyɛ Jeemsi mini Joses ni Judas ni Saimɔn la? Pa ti min’ o tizɔpaɣiba n-laɣim be ya ŋɔ ŋɔ?” Dinzuɣu ka bɛ daa bi deeg’ o.

4 # Jɔn 4.44 Ka Yisa yɛli ba, “Anabi nyari jilima luɣ’ shɛlikam zaa naɣila omaŋmaŋ’ ya min’ o dɔɣiriba ni o yiŋnim’ sani ka o bi nyari jilima.”

5O daa bi tooi tum tuun’ kar’ shɛli nimaani n-naɣ’ pahila o daa kul zaŋla o nuhi pa barinim’ biɛla zuɣu chɛ ka bɛ kpaŋ zaa. 6Ka di daa gar’ o pam bɛ biɛhiŋ maa zuɣu.

Yisa tuumba pinaayi timbu yɛla

(Matiu 10.5-15; Luk 9.1-6)

Di nyaaŋa ka Yisa daa yi nimaani chani gindi tiŋkpansi wuhiri niriba. 7Ka o daa ti bol’ o nyaandoliba pinaayi la na nti tim ba niriba ayiyi; ka niŋ ba yiko ni bɛ kariti alizin’ biɛri bahira 8#Luk 10.4-11 ka yɛli ba, “Di ʒin ya binshɛli chaŋ yi chandi maa naɣila jaaŋgbɛhi kɔŋko; di ʒin ya bindira bee adiikunima; yi mi di zaŋya liɣiri niŋ yi liɣiri kolibihi ni, 9amaa pirimiya namda, ka di yɛn ya daliyanima ayiyi.” 10Ka lan yɛli ba pahi, “Yi yi ti kpe yil’ shɛli, yin’ di lan taɣiya yilikpɛrili hal nti yi tiŋ’ maa ni. 11#Tuma 13.51 Ka yi yi ti paai tin’ shɛli ka bɛ bi deei ya, ka zaɣisi yi yɛligu maa wumbu pahi, yi yi ti yɛn yi di tiŋ’ maa ni, yin’ pihimiya yi napɔna taŋkpaɣu bahi tiŋ’ maa nim’ zuɣu, ka di niŋ shɛhira biɛɣu jɛndi ba. Yɛlimaŋli ka n yɛri ya, zaadali Sɔdomnim’ mini Gomɔranim’ azaaba nyabu ni ti so tiŋ’ maa nim’ dini.”

12Ka tuumba maa daa chaŋ ti yihiri waazu yɛri niriba ni bɛ niŋmi tuuba. 13#Jeem 5.14 Ka daa kari alizin’ biɛri pam niriba zuɣu bahi, ka zaŋ kpam ʒe barinim’ pam gbiɛri n-chɛ ka bɛ kpaŋ.

Jɔn Baptaizira kubu yɛla

(Matiu 14.1-12; Luk 9.7-9)

14Naa Hɛrɔd#6.14 NAA HƐRƆD: Di nyɛla Naa Hɛrɔd Antipas ŋun daa nyɛ Galili naa la. daa wum Yisa yɛla, dama o yuli daa duya pam. Ka ninvuɣ’ shɛb’ daa yɛli, “Jɔn Baptaizira la n-lan neei kum ni na, dinzuɣu ka o mali yiko tumdi tuun’ kara ŋɔ.”

15 # Mat 16.14; Maak 8.28; Luk 9.19 Ka shɛb’ yɛli, “Anabi Ilaija m-bala.” Ka shɛb’ mi yɛli, “O ŋmanila anab’ kura la ni yino.”

16Ka Naa Hɛrɔd daa wum lala maa ka yɛli, “N ni daa ŋma Jɔn Baptaizira so zuɣu la n-lan neei kum ni na maa.” 17#Luk 3.19-20 Naa Hɛrɔd daa tim ti gbaai Jɔn na ti kpɛhi duu, ŋun’ Hɛrɔd ni daa fa omaŋmaŋ’ tizo Filip paɣ’ Hɛrɔdias niŋ o paɣa la zuɣu, 18dama Jɔn daa yɛl’ o ni di chihiri ni o fa o tizo Filip paɣa.

19Dina n-daa chɛ ka Hɛrɔdias lo Jɔn zaɣ’ biɛɣu m-bɔri ni o ku o; amaa ka daa bi tooi, 20dama Naa Hɛrɔd daa zɔri Jɔn pam ka gul’ o viɛnyɛliŋga, o ni daa mi ni o nyɛla ninvuɣ’ maŋli ni wuntizɔra la zuɣu. Jɔn Baptaizira yɛligu daa yi chihiri Naa Hɛrɔd suhu pam, amaa di zaa yoli, o daa yi wumdi li ni suhupiɛlli.

21Ka di daa ti lu Naa Hɛrɔd dɔɣim dabisili dali, ka o laɣis’ o kpamba min’ o sapashinnima ni Galili ninvuɣ’ zuɣuri zaa na ni bɛ ti puhi di chuɣu. Ka di daa niŋ Hɛrɔdias katari. 22Ka Hɛrɔdias bipuɣiŋga daa yi salo maa ni na nti wa waa, ka di niŋ Naa Hɛrɔd mini bɛn daa ʒi o sani maa zaa nyaɣisim pam. Ka Naa Hɛrɔd daa yɛli bipuɣiŋga maa, “Yɛlim’ ma a suhu ni kul bɔri shɛlikam zaa, ka n ti a li.” 23Ka o daa lan po pɔri yɛl’ o, “A yi kul yɛli ma a ni bɔri shɛlikam zaa hal di yi nyɛ n nam ŋɔ pirigili gba, n ni ti a li.”

24Ka bipuɣiŋga maa daa yi nti bɔh’ o ma, “Bɔ ka n lee yɛn suhi Naa?”

Ka o garigi yɛl’ o, “Yɛlim’ o ni a bɔrila Jɔn Baptaizira zuɣu.”

25Ka o dii ŋmaligi zo n-lab’ Naa maa sani ti yɛl’ o, “M bɔri ni a zaŋla Jɔn Baptaizira zuɣu niŋ pɔŋ ni ti ma pumpɔŋɔ.”

26Ka di daa niŋ Naa maa yoli nti yaɣi, amaa ka o pɔri la mini saamba la zuɣu chɛ ka o daa bi bɔri ni o yi o pɔri maa nyaaŋa m-mɔŋ bipuɣiŋga maa o ni suh’ o shɛli maa. 27Ka Naa Hɛrɔd daa dii tim zuɣuŋmara ni o cham’ ti ŋma Jɔn Baptaizira zuɣu na. Ka o daa chaŋ sarika duu nti ŋma o zuɣu 28n-zaŋ niŋ pɔŋ ni na ti ti bipuɣiŋga maa; ka bipuɣiŋga maa mi daa zaŋ li ti ti o ma. 29Ka Jɔn Baptaizira nyaandoliba daa wum o kum maa yɛla, ka chaŋ ti zaŋ o ti sɔɣi.

Niriba tusaanu dihibu

(Matiu 14.13-21; Luk 9.10-17; Jɔn 6.1-14)

30Ka tuumba maa daa ti labina nti yɛli Yisa bɛ ni daa niŋ shɛlikam zaa ka wuhi shɛm zaa. 31Di saha ka o yɛli ba, “Chɛliya ka ti yi kpaŋa chaŋ luɣ’ shɛli ti vuhi biɛla.” Dama niriba daa kul kanila o sanna ka chana, hal ka o min’ o nyaandoliba ti kɔŋ dahima diri bindirigu. 32Ka bɛ daa kpe ŋariŋ ni yiri kpaŋa.

33Ka niriba pam daa nya bɛ ni chani maa m-baŋ ba, ka yi tinsi ni zo bɛ naba zuɣu daŋ ba bɛ ni daa chani luɣ’ shɛli maa paabu. 34#Kal 27.17; 1 Nan 22.17; 2 Yɛl 18.16; Ɛzɛk 34.5; Mat 9.36 Yisa ni daa ti yi ŋariŋ maa ni na nya salo maa ka bɛ yɛla niŋ o nambɔɣu pam, dama bɛ daa ŋmanila piɛri bɛn ka gula; ka o daa piligi wuhiri ba yɛla pam. 35Ka di daa ti niŋ zaawun’ yuŋ ka o nyaandoliba chaŋ o sani ti yɛl’ o, “Kpe nyɛla mɔɣu ni, ka wuntaŋ’ mi yɛn lu; 36dinzuɣu bahim’ niriba maa ka bɛ chaŋ pukpariba bɛn puri miri ti ŋɔ na sani mini tiŋkpansi din baɣ’ ti ŋɔ ni nti da bindira di.”

37Ka Yisa garigi yɛli ba, “Timiya ba bindirigu ka bɛ di.”

Ka bɛ bɔh’ o, “Ti zaŋm’ tumtumda chira anii yɔri chaŋ ti da bindirigu na ti ti ba?”

38Ka o bɔhi ba, “Bɔrɔbɔro kpila ala m-be yi sani? Chamiya ti nya.”

Ka bɛ daa chaŋ ti lihi ka labina ti yɛl’ o, “Bɔrɔbɔro kpila anu mini zahim ayi ko m-beni.”

39Ka Yisa daa yɛli ba ni bɛ yɛlim’ salo maa zaa ni bɛ laɣimmi gbilligbilli ʒini momaha zuɣu. 40Ka bɛ zaa daa ʒini gbilligbilli: Shɛb’ kɔbigakɔbiga, shɛb’ mi pihinunu. 41Ka o daa zaŋ bɔrɔbɔro kpila anu mini zahim ayi maa, ka kpuɣ’ o zuɣu lihi zuɣusaa ka niŋ alibarika niŋ di ni, ka ŋmahiŋmahi bɔrɔbɔro maa ti o nyaandoliba ni bɛ tari niriba maa; di nyaaŋa ka o naanyi ŋmahi zahim ayi la mi pahi zaŋ tari bɛ zaa. 42Ka bɛ zaa ha daa di li tiɣi. 43Ka Yisa nyaandoliba maa daa laɣisi bɔrɔbɔro chɛhi mini zimburisa din guui pali piɛri pinaayi. 44Bɛn zaa daa di li maa puuni, dɔbba kɔŋko kalinli daa nyɛla tusaanu laasabu.

Yisa tam kom zuɣu chana

(Matiu 14.22-23; Jɔn 6.16-21)

45Dimbɔŋɔ nyaaŋa ka Yisa daa chɛ ka o nyaandoliba kpe ŋariŋ daŋ o tooni baari duri Bɛtisaida polo, ka ŋun’ kpalim ni o chɛbisi salo maa. 46O ni daa chɛbisi ba naai ka o chaŋ ti du zo’ shɛli zuɣu ni o suhi Naawuni. 47Ka di daa ti niŋ zaawun’ yuŋ ka bɛ ŋariŋ maa na kul kpalim bela teeku maa sunsuuni, ka Yisa kɔŋko mi kpalim be duli. 48Ka o daa nya ka ŋariŋ maa duhibu muɣisiri ba, dama bɛ daa tuhila pɔhim. Ka di daa ti niŋ kaman nolɔɣu kukol’ saha ka Yisa tam kom zuɣu chani bɛ sani nti niŋ ka o yɛn garila bɛ zuɣu la. 49Amaa bɛ ni daa nya ka o tam kom zuɣu chani maa, ka bɛ tɛhi ni alizini m-bala ka kuhi pam, 50dama bɛ zaa daa nya o ka dabiɛm gbahi ba pam.

Ka o dii yɛli ba, “Di zɔriya dabiɛm! Chɛliya ka yi suhuri kpɛma! Mani m-bala.” 51Ka o daa kpe ŋariŋ maa ni pahi bɛ zuɣu; ka pɔhim maa dii chɛ ʒiɛbu, ka di daa niŋ ba alahiziba pam ti yaɣi, 52dama bɛ suhutuntali zuɣu daa chɛ ka bɛ bi tooi baŋ bɔrɔbɔro la alahiziba tuuni la gbinni ni nyɛ shɛm.

Yisa tibi barinim’ Gɛnɛsarɛt

(Matiu 14.34-36)

53Ka Yisa min’ o nyaandoliba daa mali ti du Gɛnɛsarɛt tiŋgbɔŋ ni teeku duli nti zaŋ bɛ ŋariŋ lo n-zali teeku noli. 54Bɛ ni daa yi ŋariŋ maa ni na ka tiŋ’ maa nim’ dii baŋ o, 55ka zo n-chaŋ tin’ shɛŋa din baɣibaɣi nimaani zaa ni nti zaŋ barinim’ niŋ amaŋkanim’ ni ʒiri chani bɛ ni daa wum ni o be luɣ’ shɛlikam polo. 56O daa yi kul paai luɣ’ shɛlikam zaa, di yi nyɛla puri ni bee tiŋkpansi ni bee fɔntinsi ni, bɛ ʒirila barinim’ na nti sɔŋdi di dahi ni, ka suhir’ o ni o kul chɛ ka bɛ shihi o binyɛrigu naŋgbambili, ka bɛnkam daa shihi li shiri kpaŋ zaa.

Currently Selected:

Maak 6: DBwDB

Highlight

Copy