Maak 5

Yisa kari alizin’ biɛri

(Matiu 8.28-34; Luk 8.26-39)

1Yisa min’ o nyaandoliba ni daa du Galili Teeku maa duli m-paai Gɛrasa tiŋgbɔŋ ni, 2ka o ti yi ŋariŋ maa ni na, ka alizin’ biɛɣu ni daa ʒi do’ so zuɣu yi gbala polo na tuhir’ o soli. 3O daa kul bela gbala maa shee, ka so daa naan ku tooi zaŋ hal bandi m-ba o ʒili luɣ’ yini gba. 4Bɛ daa pun bar’ o la bandi ka lɔr’ o zoligɔnima, ka o chihiri li ka kabiri bandi maa; ka so ku tooi maag’ o nini. 5Yuŋ ni wuntaŋ’ ni zaa o daa kul bela gbala maa shee mini zoya zuɣu kuhiri ka mali kuɣa jɛr’ omaŋa.

6O ni daa ti nya Yisa ka o be katiŋa, ka o guui ti damd’ o tooni 7kuhi pam yɛli, “M min’ a bɔ ni, nyin’ Yisa Zallakudura Naa Bia? N suhir’ a Naawuni yuli zuɣu, di nahim ma!” 8Dama Yisa daa pun yɛl’ o mi, “Nyin’ alizin’ biɛɣu ŋɔ, yim’ doo maa ni!”

9Ka Yisa bɔh’ o, “A yuli?”

Ka o garigi yɛl’ o, “N yuli m-booni Bɔbigu, dama ti galisiya.” 10Ka o daa balim Yisa pam ni o di kari ba yihi tiŋgbɔŋ maa ni.

11Kuruchu bɔbigu daa ʒe zol’ luɣili ni gbiri binyara ŋubira; 12ka alizin’ biɛri maa daa balim o yɛli, “Chɛ ka ti chaŋ ti kpe kuruchunim’ ŋɔ ni.” 13Ka o daa bahi ba noli. Ka alizin’ biɛri maa daa yi doo maa ni chaŋ ti kpe kuruchunim’ maa ni; ka bɛ daa dii zo wuriwuri nti sirigi kuligbiriŋ ni ha faai lu teeku ni, ka kom di ba. Kuruchunim’ maa daa nyɛla kaman tusaayi laasabu.

14Ka bɛn daa guli kuruchunim’ maa zo n-chaŋ ti yɛli fɔnnim’ mini tiŋkpannim’ dinkam daa niŋ maa zaa. Ka bɛ daa kana ni bɛ ti nya din niŋ maa. 15Ka bɛ daa paai Yisa sani nti nya alizin’ biɛri ni daa ʒi do’ so zuɣu maa, ka o leela ninvuɣ’ maŋli ye situra ʒiya; ka dabiɛm daa kpe ba pam. 16Ka ninvuɣ’ shɛb’ bɛn daa nya din niŋ maa yɛli sokam din daa niŋ alizin’ biɛri ni daa ʒi do’ so zuɣu maa mini kuruchunim’ maa. 17Ka bɛ daa balim Yisa ni o yim’ bɛ tiŋgbɔŋ maa ni.

18Ka o daa kpe ŋariŋ ni ni o chaŋ, ka alizin’ biɛri ni daa zo ka chɛ do’ so maa balim o ni o chɛ ka o dol’ o chaŋ.

19Amaa ka Yisa daa bi saɣi ka yɛl’ o, “Lab’ kuli nti yɛl’ a yiŋnim’ a Duuma ni zo a nambɔɣu ka tum tuun’ kar’ shɛli ti a ŋɔ yɛla.”

20Ka o daa kuli n-daa ti chaŋ tin’ shɛli din yuli booni Tinsi Pia #5.20 TINSI PIA: Di yuli n-lan nyɛ Dikapolis tiŋgbɔŋ ni la nti moli Yisa ni daa tum o tuun’ kar’ shɛli maa yɛla zaa gili; ka di daa niŋ sokam zaa alahiziba.

Jairus bipuɣiŋga mini paɣ’ so tibbu

(Matiu 9.18-26; Luk 8.40-56)

21Yisa ni daa kpe ŋariŋ maa ni lan baai du duli ha nti ʒe teeku noli ka salo pam daa lan laɣim o sanna. 22Ka Yɛhudianim’ jɛmbu duu zuɣulan’ so ŋun yuli daa booni Jairus daa ka o sanna nti damd’ o tooni 23m-balind’ o yɛra, “M bipuɣiŋga n-tarigi yɛn kpi. Kamina nti zaŋ a nuhi pa o zuɣu ka o kpaŋ n-lan niŋ nyɛvililana yaha.”

24Ka Yisa daa dol’ o chana. Ka salo daa muɣ’ o sani kabiri dol’ o.

25Ka paɣital’ dɔro ni daa mali paɣ’ so yuun’ pinaayi daa be bɛ ni. 26O daa di wahala pam timanim’ sani n-saɣim o ni daa mali shɛlikam zaa ha, ka di bi niŋd’ o soochi ka kul maan pahirimi. 27O daa pun wum Yisa yɛla, ka daa gil’ o nyaaŋa nti ŋaɣisi kpe salo maa ni nti shihi o binyɛrigu, 28dama o daa yɛli o suhu ni, “Hal n yi kul shihi o binyɛrigu gba, n ni nya alaafee.”

29Ka o dɔro maa daa dii naai, ka o baŋ o niŋgbuŋ ni ni o nya alaafee. 30Di saha maa ka Yisa daa dii baŋ ni yiko shɛli yi o ni, ka ŋmaligi salo maa ni bɔhi, “Ŋuni n-lee shihi m binyɛrigu ŋɔ?”

31Ka o nyaandoliba bɔh’ o, “A ni nya ka salo daar’ a ŋ-ŋɔ, ka a ti bɔhi ni ŋuni n-lee shih’ a?”

32Ka o daa yuuni salo maa gindi ni o nya ŋun niŋ lala maa. 33Paɣ’ maa ni daa baŋ din niŋ o maa, ka dabiɛm kpe o pam ka o ni dii sɔhira, ka o chaŋ ti gbani Yisa tooni yɛl’ o din niŋ o maa zaa. 34Ka Yisa yɛl’ o, “M bia, a yɛda niŋbu n-chɛ ka a kpaŋ; kulimi ni suhudoo, a yipa kpaŋya zaa.”

35O noli daa na bi lu tiŋa, ka ninvuɣ’ shɛb’ daa yi Yɛhudianim’ jɛmbu duu zuɣulan’ maa yiŋ na nti yɛl’ o, “A bipuɣiŋga maa bahiya. Ka wula ka a na kul doli suhiri karimba maa?”

36Yisa daa bi be kaman o wum bɛ ni yɛli shɛm maa, ka naɣ’ yɛlila Yɛhudianim’ jɛmbu duu zuɣulan’ maa, “Di chɛ ka a suhu zɔhira; kul niŋmila yɛda.” 37O daa bi saɣi ka so dol’ o pahila Pita mini Jeemsi ni Jeemsi tizo Jɔn. 38Ka bɛ daa mali nti paai jɛmbu duu zuɣulan’ maa yiŋa, ka o nya ka salo be nimaani yarindi ka mɔhiri vuri, ka kumdi ka fabinda. 39O ni daa kpe yili maa ni ka o bɔhi ba, “Bɔ n-niŋ ka yi kumdi ka fabindi lala? Bipuɣiŋga maa bi kpi, amaa o gbihirimi.”

40Ka bɛ daa lar’ o. Amaa ka o daa kari bɛ zaa yihi, ka zaŋ bipuɣiŋga maa ba min’ o ma pahi bɛn daa be o san’ la zuɣu kpe bipuɣiŋga maa ni daa do’ du’ shɛli ni maa 41nti gbaag’ o nuu ka yɛl’ o, “Talita kumi!” Di gbinni nyɛla, “Bipuɣiŋga, n yɛr’ a mi, yiɣisima!”

42Ka o daa dii yiɣisi zani chana, dama o daa nyɛla yuun’ pinaayi bia, ka di daa niŋ ba alahiziba pam ti yaɣi. 43Ka Yisa daa saɣisi ba yɛli ni bɛ di chɛ ka so wum li; ka yɛli bipuɣiŋga maa ba min’ o ma ni bɛ tim’ bia maa bindirigu ka o di.

Currently Selected:

Maak 5: DBwDB

Highlight

Copy