Maak 7

Adiini kali kura wuhibu

(Matiu 15.1-9)

1Di saha ka Farisiinim’ mini Naawuni zaligubaŋdi’ shɛb’ daa yi Jɛrusalɛm na nti laɣim tab’ chaŋ Yisa sani 2nti nya ka o nyaandol’ shɛb’ bi doli bɛ kali soli paɣiri bɛ nuhi ka diri bindirigu.

3Dama Farisiinim’ mini Yɛhudianim’ zaa daa bi saɣiri diri bindirigu ka pa ni bɛ dol’ bɛ yaannim’ kali ni nyɛ shɛm paɣi bɛ nuhi pɔi. 4Bɛ daa yi yila daa na bɛ bi diri bindirigu faashee bɛ paɣila bɛ ni pɔi. Ka bɛ daa lan paai bɛ yaannim’ kal’ shɛŋa dol’ li pahi. Dina n-nyɛ: Pipihi mini duɣiri ni taha ni teebuya paɣibu.

5Di saha ka Farisiinim’ mini Naawuni zaligubaŋdib’ maa daa bɔhi Yisa, “Bɔ n-niŋ ka a nyaandoliba bi doli ti yaannim’ kali? Dama bɛ bi doli bɛ ni paɣibu kal’ la paɣiri bɛ nuhi ka diri bindirigu.”

6 # Aiz 29.13 Ka o garigi yɛli ba, “Anabi Aizaia ni daa pun yɛli yinim’ bilikɔɣinim’ ŋɔ yɛla shɛm la shiri nyɛla yɛlimaŋli kaman di ni daa sab’ shɛm ni Naawuni yɛliya:

‘Niriba ŋɔ tiri ma la jilima bɛ nyina zuɣu,

amaa ka bɛ suhuri lee be katiŋ’ ni mani.

7 Bɛ jɛmdi ma la yoli,

dama bɛ malila salinim’

zaligunima wuhiri niriba

kaman Naawuni zaligunima n-nyɛ li la.’

8 “Yi chɛ Naawuni zaligunima, ka dolila salinim’ kaya.”

9O daa yɛli ba, “Yi mali so’ shɛŋa din ni doli zaɣisi Naawuni zaligunima, ka doli yimaŋmaŋ’ kaya! 10#Yibu 20.12; 21.17; Lɛv 20.9; Zal 5.16 Dama Anabi Musa daa yɛliya, ‘Tim’ a ba min’ a ma jilima.’ O daa lan yɛli, ‘Ka ŋunkam tur’ o ba bee o ma, bɛn’ kum’ o.’ 11Amaa yinim’ yɛliya ni so yi yɛl’ o ba bee o ma ni o ni di naan nya shɛli o sani nyɛla ‘Kɔɔban’ (Di gbinni nyɛla, “Di pun leei Naawuni dini”), 12ka yi bi lan chɛ ka o gbib’ o ba min’ o ma maa gba. 13Lala ka yi niŋ chɛ ka Naawuni yɛligu bi tumdi di tuma yi ni, yi yaannim’ kal’ shɛŋa yi ni mali wuhiri niriba la zuɣu. Ka yi lan tumdi tuun’ shɛŋa din ŋmani dimbɔŋɔnim’ pam.”

Binshɛŋa din tari sal’ suhu daɣiri

(Matiu 15.10-20)

14Ka Yisa daa ti lan boli niriba pam na ti yɛli ba, “Yi zaa luɣimiya yi tiba wum ka baŋ dimbɔŋɔ gbinni. 15Binshɛɣukam din yiri kpaŋ’ na nti kpɛri ninsal’ ni ku tooi ta o daɣiri; amaa din yiri ninsal’ ni na n-naɣ’ tar’ o daɣiri.” [ 16Ka o daa lan yɛli, “Ŋun mali tibili, ŋun’ wumma!”]

17Niriba maa ni daa ti wurim naai ka o chaŋ ti kpe yili shɛli, ka o nyaandoliba bɔh’ o ŋahili maa gbinni.

18Ka o bɔhi ba, “Yi gba na kuli ka fahim? Yi bi mi ni binshɛɣukam din kpɛri ninsal’ pul’ ni bi tar’ o daɣiri? 19Dama bindirigu bi kpɛrila ninsal’ suhu ni, amaa o pul’ ni ka di kpɛra, ka gariti yira.” (O ni daa yɛli shɛm maa wuhiri ni bindirigu kam dibu bi chihira.)

20Ka o daa lan yɛli ba, “Din yiri ninsal’ suhu ni na, dina n-tar’ o daɣiri. 21Dama ninsal’ suhu ni ka dimbɔŋɔnim’ zaa ha yirina. Dina n-nyɛ: Tɛhi’ biɛri mini zina niŋbu balibu kam ni tayiɣisigu ni ninvuɣ’ kubo 22ni bina ni kɔre kpɛbu ni ninvuɣ’ biɛtali ni yɔhiŋ ni biɛr’ yoli ni nyuli zabbu ni nyaanzubo ni karimbaani ni jɛrilim. 23Bin’ biɛri balibu kam ŋɔ zaa yirila ninsal’ suhu ni na, ka nyɛ din tar’ o daɣiri.”

Paɣ’ so yɛda niŋbu

(Matiu 15.21-28)

24Ka Yisa daa yiɣisi chaŋ Taai mini Sidɔn tiŋgbɔŋ ni nti kpe yil’ shɛli, ka bi bɔri ni so baŋ o yɛla, amaa ka daa bi tooi sɔɣ’ omaŋa. 25O daa na bi ʒini tiŋ’ gba ka paɣ’ so pun wum o yɛla ka kana nti gban’ o tooni, dama alizin’ biɛɣu n-daa ʒi o bipuɣim’ bil’ zuɣu. 26Ka paɣ’ maa suh’ o ni o kari alizin’ biɛɣu maa o bia maa zuɣu bahi. Bɛ daa dɔɣ’ paɣ’ maa la Siria tiŋgbɔŋ ni. Ka o lee nyɛ Fɔnisia tiŋbia, ka nyɛ ŋun wumdi Giriikili. 27Ka Yisa daa yɛl’ o, “Di bi simdi ni nir’ zaŋ bihi bindirigu ti bahi, shee bihi dimi tiɣi pɔi.”

28Ka paɣ’ maa garigi yɛl’ o, “Yɛlimaŋli, n Duuma, amaa ba’ shɛb’ bɛn do laa gbini diri bihi bindir’ burisa din luri tiŋa.”

29Ka o yɛli paɣ’ maa, “Kulima! A ni yɛli shɛm ŋɔ zuɣu, alizin’ biɛɣu maa zoya ka chɛ a bia maa.”

30Ka paɣ’ maa daa kuli yiŋa nti nya ka alizin’ biɛɣu maa shiri zo ka chɛ o bia maa, ka o dola o bindoo zuɣu.

Yisa tibi Tikpiralana

31Ka Yisa daa yiɣisi Taai doli yi Sidɔn mini tin’ shɛli din yuli booni Tinsi Pia la ni mali ti paai Galili Teeku ni. 32Ka bɛ daa zaŋ tikpiralan’ so ŋun tɔri birilim ka o sanna nti suh’ o ni o zaŋ o nuu shih’ o. 33Ka Yisa daa zaŋ o salo maa ni yi kpaŋa nti zaŋ o nubihi tim o tiba ni, ka tuhi nintɔri zaŋ shihi tikpiralan’ maa zilinli; 34ka lihi zuɣusaa, ka siɣim ka yɛli tikpiralan’ maa, “Efata!” Di gbinni nyɛla, “Yooma!”

35Ka o tiba maa dii yooi, ka o zilinli lɛbigi ka o dii gbaai yɛtɔɣa tɔɣisibu. 36Ka Yisa daa kpahi niriba maa zuɣu ni ni bɛ di yɛli so di yɛla, amaa o ni daa kpahi bɛ zuɣu ni maa zaa yoli, bɛ daa bahi mol’ li gili. 37Di daa niŋ ba alahiziba pam nti yaɣi ka bɛ yɛra, “O niŋdi binshɛɣukam zaa viɛnyɛliŋga, hal o chɛ ka tikpiranim’ wumda, ka chɛ ka biriti gba tɔɣisiri yɛtɔɣa.”

Currently Selected:

Maak 7: DBwDB

Highlight

Copy