LUCAS 9
9
Jesusan tunka payan yatiqiripar khithatapa
(Mt 10.5-15; Mc 6.7-13)
1Jesusax tunka payan yatiqiriparuw tantacht'äna, ukat kunayman ñanqha ajayunakar alissuñataki, usutanakar qullañatakiw ch'amampi munañanïñamp churäna.#9.1 Mc 3.14-15. 2Jupanakarux Diosan qhapaq markapat parlapxañapataki, usutanak qullapxañapatakiw khithäna. 3Jupasti sarakïnwa:
—Thakhitakix janiw thujrsa, wayaqsa, t'ant'sa, qullqsa, isinaksa apasipxätati. 4Kawkïr utantix qurpachasipkäta, uka utanak sarxañamkam qhiparapxäta. 5Mä markantix jan katuqañ munapkätamxa, uka markat mistxapxam, kayunakaman laq'anakapsa thalarasiniwayapxam, jupanakatak jan wali arsuta uñacht'ayañataki —sasa.#9.5 Mt 10.14; Hch 13.51.
6Jupanakasti mistusinxa, taqi markanakaruw sarapxäna qhispiyasiñ arunak yatiyasa, usutanakar k'umaraptayasa.
Horodes reyix, janiw Jesusan khitïtapsa yatkiti
(Mt 14.1-12; Mc 6.14-29)
7Marka apnaqir Herodesax kunanakatix luraskän ukanak yatïna; ukatsti ukanakat wal pächasïna, yaqhipanakax “Bautisir Juanaw jiwatanak taypit jaktanxatayna” sapxänwa, 8mayninakasti: “Elías profetaw uñstanpacha” sapxänwa, yaqhipanakasti: “Nayra profetanakat mayniw jaktanpacha” sapxarakïnwa. 9Herodes reyisti sänwa:
—Naya kipkaw Juanan p'iqip apaqayta. Ukhamasti ¿khitïxarakpach jupasti, jupxat taqi kunarakis ist'asixä? —sasa.
Ukat Herodesax Jesusar wal uñjañ munäna.
Jesusax walja jaqiruw manq'ayi#9.9 Mt 15.32-39 y Mc 8.1-10
(Mt 14.13-21; Mc 6.30-44; Jn 6.1-14)
10Apostolunakax kuttanxasin kuntix lurapkatayna uk Jesusarux yatiyapxäna. Jesusasti jupanakarux Betsaida markaruw irpäna. 11Jaqinakasti uk yatisin Jesusaruw arkapxäna; Jesusasti jupanakarux katuqarakïnwa, Diosan qhapaq markapat yatichäna, usutanakarus k'umaraptayarakïna.
12Niya jayp'üxipansti tunka payan yatiqiripax Jesusar jak'achasisin sapxäna:
—Jaqinakarux khithanukxam, uka jisk'a markanakan manq'añ thaqhasipxañapataki, ukan qurpachasiñapatakiraki, aka chiqan janiw kunas utjkiti —sasa.
13Jesusasti jupanakarux sänwa:
—Jumanakay manq'añ churapxamxa —sasa.
Jupanakasti sapxarakïnwa:
—Phisqa t'ant'ampi pä chawllampikiw utjapxitu, alir sarapxirista ukkhax inas taqitak utjchispa —sasa.
14Jaqisti niy phisqa waranqjamänwa. Jesusasti yatiqirinakaparux sarakïnwa:
—Phisqa tunkatkam qunurayapxam —sasa.
15Jupanakasti ukham lurapxäna, taqinirakiw qunt'asipxäna. 16Ukatsti Jesusax phisqa t'ant'ampi pä chawllampi aptasina, alaxpach uñtasin Diosar yuspagaräna, jalanuqasasti yatiqirinakaparuw churi jaqinakar lakintapxañapataki. 17Taqiniw sist'asiñkam manq'apxäna, ukatsti jilt'anak tunka payan walaya apthapipxäna.#9.17 2 R 4.43-44.
Pedrox Jesusan Cristötap qhanañchi
(Mt 16.13-19; Mc 8.27-29)
18Mä urux, sapakiw Jesusax Diosat mayisiskäna; ukaruw yatiqirinakapax jutapxäna, ukat Jesusax jupanakar jiskt'äna:
—Jaqix ¿khitiw sapxitus nayatxa? —sasa.
19Jupanakax sapxänwa:
—Yaqhipanakax: “Bautisir Juanaw” sapxtamwa; yaqhipanakasti: “Eliasaw” sapxtamwa. Mayninakasti: “Nayra profetanakat mayniw jaktanpacha” sapxaraktamwa —sasa.
20Ukxarusti jupanakaruw jiskt'arakïna:
—Jumanakasti, ¿khitiw sapxistasa? —sasa.
Pedrosti juparux sänwa:
—Jumax Diosan khithanit Cristo Tatitütawa —sasa.
Jesusax jiwañapat yatiyi
(Mt 16.20-28; Mc 8.30—9.1)
21Jesusasti walpun iwxt'äna jan khitirus uk yatiyapxañapataki. 22Ukat sarakïna:
—Jaqin Yuqapax wali t'aqhisiñapäniwa; jilïr jaqinakana, sacerdotenakan jilïrinakapana, kamachi yatichirinakan jisk'achatäniwa. Juparux jiwayapxaniwa, ukampis kimsürut jaktani —sasa.#9.22 Mc 9.31; 10.32-34; Lc 9.44; 18.31-33.
23Ukxarusti taqiniruw sarakïna:
—Maynitix nayar arkañ munchituxa, jupa kipkat armt'aspan, cruzap apt'at sapür arkitpan. 24Jakañap qhispiyasiñ munirix apt'asiniwa, ukampis naya layku jakañap apt'asiristi qhispiyasiniwa.#9.24 Mt 10.38-39; Lc 14.27; 17.33; Jn 12.24-25. 25Jaqitakix ¿kuna askirakïspa aka uraqpachax jupankxaspa, ukat jakañap apt'asispa ukasti? 26Ukampis maynitix nayata, arunakaxatsa p'inqaskani ukaxa, Jaqin Yuqapax jupat p'inqasirakiniwa kunapachatix jupax qhapaq kankañampi, Awkipan jach'a kankañapampi, qullan angelanakamp jutkani ukkhaxa.#9.26 Mt 10.33; Lc 12.9; 2 Ti 2.12. 27Qhanak sapxsma, akankapki ukanakat yaqhipanakax janiw jiwapkaniti Diosan qhapaq markap janïr uñjkasaxa —sasa.#9.27 2 P 1.16-18.
Jesusax k'ajkiriw tukuwayi
(Mt 17.1-8; Mc 9.2-8)
28Ukanak satapatsti niya kimsaqallqu uruw saraqxäna, ukapachaw Jesusax Diosar mayisir mä qullur makhatäna#9.28 Mt 14.23; Lc 6.12. Pedrompi, Santiagompi, Juanampi kuna. 29Diosar mayiskipansti, Jesusan ajanupax mayjaw tukuwayäna,#9.29 Jesusan ajanupax mayjaw tukuwayäna: Ex 34.29-35. isipas wali janq'u lliphipkiriw tukuwayarakïna; 30ukapachaw pani chachanakax uñstanisin jupamp parlapxäna. Jupanakasti Moisesampi Eliasampïnwa,#9.30 Moisesampi, Eliasampi: Dt 18.15; Mal 4.5-6 (3.23-24); 31mä jach'a qhanan muyuntataw uñjasipxäna, jupanakasti Jerusalén markan Jesusan jiwañapxata, jaktañapxata, alaxpachar sarxañapat parlapxäna. 32Pedrompi masinakapampisti, ikimpi atipjatäpkchïn ukasa, uñnaqasipkakïnwa, ukat jupanakax Jesusan jach'a qhanap uñjapxäna, ukhamarak Jesusampi chikäkän uka pani jaqirusa. 33Kunapachatix uka jaqinakax Jesusat jithiqtawayapkän ukkhaw Pedrox säna:
—Yatichiri, sumaw akankatasaxa. Kimsa chhujlla lurapxä; mayax jumataki, mayax Moisesataki, mayasti Eliasataki —sasa.
Ukampis Pedrox janiw kun satapsa amuyaskänti. 34Ukham parlkipan mä qinayax jupanakar imantxäna, ukham qinay taypin jikxatasisasti wal axsarapxäna. 35Ukapachaw qinay taypit mä arux ist'asïna, akham sasa: “Akaw munat Wawaxaxa, jupar ist'apxam” sasa.
36Uka aru ist'atatsti Jesús saparukiw uñjxapxäna. Ukampis kuntix jupanakax uñjapkatayna ukanakat janiw khitirus yatiyapkänti.
Jesusax ñanqha ajayun mantat waynaruw k'umaraptayi
(Mt 17.14-21; Mc 9.14-29)
37Qullut qhipür saraqanxapxän ukkhasti, walja jaqiw Jesusar jikxatir jutapxäna. 38Ukat jaqinak taypit mä chachax jach'at jupar art'äna:
—Yatichiri, janiy ukhamämti, wawaxaruy uñxatt'arapita, jupa sapakiw wawaxaxa; 39juparusti mä ñanqha ajayuw katunti ukaw akatjamat warariyi, wal thalayi, lakapatsti jupuq jutayi. Walpun t'aqhisiyi, janirakiw antutañ munkiti. 40Yatiqirinakamaruw uka ñanqha ajay alissuñapatak achikt'asta, jupanakasti alissuñatakix janiw ch'amanïpkiti —sasa.
41Jesusasti sarakiwa:
—¡Ay, jan iyawsañan jan wali jaqinaka!#9.41 Dt 32.5. ¿Kunapachkamas taqi akanak uñjasax jumanakampikïskäxa? Akar uka wawam irptanim —sasa.
42Kunapachatix uka waynax Jesusan ukar niya jak'achasinkän ukapachaw ñanqha ajayux pampar liwinuküna; ukampis Jesusax uka ñanqha ajayuruw tuqinuqäna, uka waynarusti k'umaraptayxänwa, ukat awkipar katuyxarakïna. 43Uk uñjasasti taqiniw Diosan jach'a kankañapat muspharapxäna.
Jesusax wasitat jiwañapat yatiyi
(Mt 17.22-23; Mc 9.30-32)
Jesusan luratanakapat taqin muspharatäsipkipansti, jupax yatiqirinakaparuw säna:
44—Ak sum ist'apxam, janirak armasipxamti: Jaqin Yuqapax jaqinakan amparapar katuyatäniwa —sasa.#9.44 Lc 9.22; 18.31-33.
45Ukampis yatiqirinakapax janiw kamsatapsa amuyt'apkänti, jupanakan amuyt'añapan jan qhanätap layku; ukhamarus uka arunakxat jiskt'añsa axsarapxänwa.
¿Khitis taqinit sipan jilïrixa?
(Mt 18.1-5; Mc 9.33-37)
46Ukhamasti yatiqirinakapax: ¿Khitis jiwasanak taypin jilïrïni?, sasaw ch'axwapxäna. 47Jesusasti jupanakan lup'itanakap amuyäna, ukat mä wawar jupa jak'ar sayt'ayäna, 48jupanakarusti sarakïnwa:
—Khititix aka wawar sutixar katuqki ukax nayaruw katuqitu; khititix nayar katuqkitu ukasti khithankitu ukaruw katuqaraki.#9.48 Mt 10.40; Lc 10.16; Jn 13.20. Ukhamasti khititix jumanak taypin juk'amp jisk'äki ukaw jach'ar tukuyatäni —sasa.
¿Khitinakas jiwasampixa?
(Mc 9.38-40)
49Ukat Juan yatiqiripax jupar sarakïna:
—Yatichiri, mayni jaqiruw sutiman ñanqha ajayunak jaqsur uñjapxta; juparusti nanakax jark'apxtwa, jan jiwasamp chik sarnaqatap layku.
50Jesusasti jupanakarux sänwa:
—Jan jark'apxamti, khititix jiwasatak jan achuski ukax jiwasampïskiwa —sasa.#9.50 Mt 12.30; Lc 11.23.
IV. JESUSAN JERUSALÉN MARKAR SARATAPA
(9.51—19.27)
Jesusax Santiagompiru, Juanampiruw tuqinuqi
51Kunapachatix Jesusan alaxpachar makhatxañapax jak'ankxän ukkhasti, jupax jan axsarasaw Jerusalén markarux saräna. 52Jesusasti, Samaria jak'an mä jisk'a markaruw khithanak nayraqat khithäna, uka chiqan qurpachasiñ jikxatapxañapataki, 53samaritanonakasti janiw katuqañ munapkänti Jerusalenar saraskatap yatisina.#9.53 Samaria: uka markax Galileampi, Judeampi uka taypinkiwa, ukhamarus samariankirinakax judionakampix janiw sumankapkänti, ukat Jerusalén markar sarir judionakarux jan yanapt'apkänti. 54Santiagompi Juanampix uk uñjasin Jesusarux sapxänwa:
—Tatay, ¿alaxpachat nina saraqayaniñanakaxti munta, ukat jupanakar nakhantañapataki, kunjämtix Elías profetax lurkän ukhama? —sasa.
55Jesusasti jupanakar uñkatasin tuqitatäna. 56Ukatsti yaqha jisk'a markaruw sarxapxäna.
Jesusar arkañ munirinaka
(Mt 8.19-22)
57Jupanak thakhi sarkipan mä jaqix Jesusar säna:
—Tatay, kawkikamas jumaruw arkañ munsma —sasa.
58Jesusax juparux sarakïnwa:
—Qamaqinakax putunakaniwa, jamach'inakas tapanirakiwa; ukampis jaqin Yuqapan janiw kawkhar p'iqip waynuqt'añapas utjkiti —sasa.
59Jesusax mayniruw saraki:
—Arkita —sasa.
Jupasti sänwa:
—Tatay, awkixar nayraqat imt'asinï ukat arkäma —sasa.
60Jesusax juparux saskakïnwa:
—Jiwatanakax jiwat masipar imaskpan sama; jumasti saram, ukatsti Diosan qhapaq markapat yatiyanim —sasa.
61Ukat maynix sarakïna:
—Tatay, arkañ munsma, ukampis nayraqatax utankirinakat khitharpayasinim sita —sasa.
62Jesusasti juparux sänwa:
—Khititix qhulliñ arma katxarusin qhipäx uñch'ukiskaki ukax, janiw Diosan qhapaq markapatak askïkiti —sasa.
Currently Selected:
LUCAS 9: AYOPD
Highlight
Share
Copy
Want to have your highlights saved across all your devices? Sign up or sign in
Biblia Aymara ©Sociedad Bíblica Boliviana 1997.
Mapas ©Sociedades Bíblicas Unidas, 1996
