LUCAS 10

Jesusan paqallq tunka payanir khithatapa

1Uka qhipatsti, Jesusax yaqha paqallq tunka payaniruw ajllïna,#10.1 Paqallq tunka payani: Yaqhip qillqatanakanxa paqallq tunka, sakiwa. jupanakarusti Jesusax kawkha markanakarutix sarañapäkän ukanakaruw jupat nayra panin panin khithäna.

2Sarakïnwa: “Qhanpachanxa, yapu apthapiñax waljapuniwa, ukampis apthapirinakax juk'anikiwa. Uka laykupï, yapunir mayipxam yapu apthapirinak khithaniñapataki.#10.2 Mt 9.37-38; Jn 4.35. 3Sarapxam, amuyasipxarakim, nayasti ovejanakarjamaw qamaqinak taypir khithapxsma.#10.3 Mt 10.16. 4Jan apapxamti: qullqi wayaqa, manq'añanaka, wiskhunaka; thakhinsti janirak khitir aruntañatakis qhiparapxamti. 5Mä utar mantapkäta ukkhasti, nayraqat aruntapxam: ‘Sumankañax#10.5 Sumankaña: Ukham arumpiw judionakax aruntasipxirïna. aka utan utjpan’ sasa. 6Uka utantix sumankañan jaqix utjchi ukaxa, jupatakïniw uka aruntaxa; jan ukhamäkchi ukasti, uka sumankañ aruntax jumanakampiw qhiparani. 7Uka pachpa utapar qhiparapxam; kuntix churapkätam uk manq'apxam, umapxarakim; irnaqiristi luräwipat katuqañapawa.#10.7 1 Co 9.14; 1 Ti 5.18. Jan utat uta sarapxamti. 8Mä markar purisinsti, kawkharuy katuqapxchïtam ukan kuntix churapkätam uk manq'apxam; 9usutanakarusti k'umaraptayapxam, ukatsti sapxarakim: ‘Diosan qhapaq markapaw jumanakar jak'achasini’ sasa. 10Ukampis mä markantix jan katuqapkätam ukaxa, thakhinakar mistunisin sapxam: 11‘¡Markaman laq'apax kayur makhatapkitu uksa, jumanakar ñanqhachañatakiw thalarasipxta! Ukampis ak yatipxam, Diosan qhapaq markapaw jumanakar jak'achasini’ sasa. 12Sapxsmawa, aka markan taripäwi urun mutuñ katuqañapax, Sodoma markankir jaqinakat sipan juk'amp jach'äniwa.

Jesusax jan iyawsir markanakaruw tuqinuqi

(Mt 11.20-24)

13“¡Ay, kunakïkani, Corazín marka! ¡Ay, kunakïkani, Betsaida marka! Tiro, Sidón markanakantix jumanak taypinjam muspharkañanak lurasisapänxa, niyaw jupanakax Diosar kutikipstapxasapäna; llaki isimp isthapita, qhillar qunusaraki. 14Ukampis taripäwi urunxa Tiro, Sidón markanakat sipan juk'ampïniw jumanakan mutuñamaxa. 15Jumasti, Cafarnaúm marka, ¿alaxpachkam aptatäñti amuyasta? ¡Mik'ay manqhakam jaquntataw uñjasïta!

16“¡Khititix jumanakar ist'ki ukax nayaruw ist'itu;#10.16 Mt 10.40; Mc 9.37; Lc 9.48; Jn 5.23; 13.20. khititix jumanakar jan katuqapktam ukanakasti nayaruw jan katuqkituti; nayar jan katuqirïki ukasti khithankitu ukaruw jan katuqkiti!”

Paqallqu tunka payanix kuttanxapxiwa

17Paqallq tunka payanix wali kusisitaw kuttanxapxäna, juparusti sapxänwa:

—Tatay, ñanqha ajayunakamppachaw sutimar jaysapxitu —sasa.

18Jesusasti jupanakarux sänwa:

—Jïsa, nayax supayar lliju llijur uñtat alaxpachat jalaqtanir uñjta.#10.18 Jn 12.31; Ro 16.20; Ap 20.1-3,10. 19Nayaw jumanakarux ch'am churapxsma katarinakaru, mich'isir laq'unakar takxatapxañamataki,#10.19 Sal 91.13; Mc 16.18; Hch 28.3-6. ukhamarak uñisirin taqi ch'amapar atipt'apxañamataki, ukatsti janiw kunas kamachapkätamti. 20Ukampis jan kusisipxamti ñanqha ajayunakan jumanakar jaysapxatam laykuxa, jan ukasti sutinakamax alaxpachan qillqantatäxatapat kusisipxam —sasa.#10.20 Dn 12.1; Flp 4.3; Ap 3.5; 13.8; 17.8; 20.12.

Jesusax Diosaruw yupaychi

(Mt 11.25-27; 13.16-17)

21Ukapachaw Jesusax Qullan Ajayu tuqi kusisiñampi phuqt'ata, akham säna: “Yupaychsmaw Awkixay, alaxpachansa, akapachansa Tatitupa, jumax akanak wali yatiñaninakata, amuyt'aninakat imantasaw juk'a yatiñan jaqinakarux uñacht'aytaxa. Jïsa, Awkixay, jumax ukham muntaxa.#10.21 1 Co 1.26-28.

22“Awkixax taqi kun nayarux katuyxitu.#10.22 Jn 3.35. Janiw khitis Yuqan khitïtapsa yatkiti, jan ukasti Awkikiw yati; janirakiw khitis Awkin khitïtapsa yatkiti, jan ukasti Yuqakiw yati, khitinakarutix Yuqax Awkip uñt'ayañ munki jupanakarukiw uñt'ayi.”#10.22 Jn 1.18; 6.65; 10.14-15; Sab 9.17.

23Ukatsti yatiqirinakapan ukar kutikipstanisin jupanak saparukiw saraki: “Kuntix jumanakax uñjapkta uka uñjirinakax kusisiñaniwa; 24sapxsmawa, walja profetanakampi, reyinakampiw uñjapktas uk uñjañ munapxäna, ukampis janiw uñjapkänti; kuntix jumanakax ist'apktas uk ist'añ munapxäna, ukampis janiw ist'apkarakïnti” sasa.#10.24 Heb 11.13; 1 P 1.10-12.

Samariankir khuyapayasir jaqit yatichäwi

25Kamachi yatichir mä jilïriw Jesusamp parlir saräna, jupasti Jesusar yant'añatakiw jiskt'äna:

—Yatichiri, wiñay jakañ katuqañaxatakix ¿kuna lurañaxas wakisi? —sasa.

26Jesusasti juparux sänwa:

—¿Kunarak kamachin qillqatasti? ¿Kunarak ullartasti? —sasa.

27Kamachi yatichiristi sänwa:

—‘Tatit Diosamar munam, taqi chuymamampi, taqi ajayumampi, taqi ch'amamampi, taqi amuyumampi;#10.27 Dt 6.5. jaqi masimarusti juma kipkarjamarak munam’ —sasa.#10.27 Lv 19.18.

28Jesusasti sarakïnwa:

—Walik sasktaxa. Uktix lurätaxa, jakaskätawa —sasa.#10.28 Lv 18.5.

29Ukampis kamachi yatichirix askit uñt'ayasiñ laykux Jesusarux jiskt'askakïnwa:

—¿Khitirak jaqi masixasti? —sasa.

30Ukxaruw Jesusax sarakïna:

—Mä jaqiw Jerusalén markat Jericó markar saraqaskäna, ukatsti lunthatanakaw jupar jalxatasin isipamppacha q'al lluch'suwayapxäna; nuwjasinsti niya jiwatjam liwinukuwayasin sarxapxäna. 31Uka kipka thakhinjam mä sacerdotew saraskäna, uka jaqir uñjasasti maysa tuqi muyt'awayäna. 32Ukhamarakiw mä levitax uka chiq saraskäna, uka jaqir uñjasasti maysa muyt'awayäna. 33Ukampis Samariankir mä jaqiw uka kipka thakhinjam saraskäna, uka jaqir uñjasasti, wal khuyapt'ayasïna. 34Jupar jak'achasisinsti, usuchjatanakap aceitempi vinompi qullxatt'asaw ch'uqxatt'äna. Ukatsti uywapat mä qurpachasiñ utaruw apäna, ukan jupar uñjarakïna. 35Qhipärmanthisti, Samariankir jaqix, pä qullqi apsusisin qurpachir utanirux churäna, ukat sarakïna: “Aka tataruw uñjt'arapitäta, juk'amp kunsa aläta ukax, kutt'anxä ukkhaw churxäma” sasa. 36Ukhamasti amuyatamatxa aka kimsanit ¿kawkïris lunthatanakas jalxatkatayna uka jaqin masipaxa? —sasa.

37Kamachi yatichiristi sänwa:

—Khititix jupat khuyapt'ayaski ukawa —sasa.

Ukat Jesusax juparux sarakïna:

—Jichhax saram, ukatsti uka pachparak jumax luram —sasa.

Jesusax Martampina, Mariampin utapankiwa

38Jerusalén markar sarkasasti, Jesusax mä jisk'a markaruw purïna, ukansti Marta sat warmiw utapar katuqt'äna. 39Martax mä kullakanïnwa, jupasti María satänwa,#10.39 Jn 11.1; 12.2-3. Mariasti Jesús jak'aruw qunt'asïna kuntix siskän uk ist'iri. 40Ukampis Martax utan lurañanakamp aynacht'atänwa, ukat Jesusar jak'achasisin säna:

—Tatay, ¿walikïskit jumatakix kullakaxan naya saparuk taqi lurañampi apt'atapaxa? “Yanapt'itpan” sarapitaya —sasa.

41Jesusasti juparux sarakïnwa:

—Marta, Marta, walja lurañanakamp aynacht'atätawa, 42ukampis mayaw wakiskirixa. Mariax kunatix wakiskirïki uk ajllisi, janirakiw khitis uk apaqkaniti —sasa.

Currently Selected:

LUCAS 10: AYOPD

Highlight

Copy