LUCAS 8

Jesusaru yanapt'iri warminaka

1Uka qhipatsti, Jesusax jach'a markanakana, jisk'a markanakan Diosan qhapaq markapan suma arunakap yatichasaw sarnaqäna. Tunka payan yatiqiripax jupamp chikaw sarapxäna, 2ñanqha ajayunakata, usunakat k'umaraptaykatayna uka yaqhip warminakas sarapxarakïnwa. Jupanak chikasti Magdala markankir María, khitittix paqallqu ñanqha ajayunakax mistkatayna uka; 3ukhamaraki Cuza sat chachan Juana warmipa, Cuzax Herodesan yänakap apnaqirïnwa; Susanampi, yaqha warminakamp kuna, khitinakatix yänakapampi yanapapkän ukanaka.

Mä phawirxat yatichäwi

(Mt 13.1-9; Mc 4.1-9)

4Markanakat walja jaqipuniw Jesusar uñjir jutapxäna. Ukat jupax mä uñtasïwit jupanakar parläna: 5“Mä yapuchir jaqiw phawir mistuwayi. Phawkasinsti, yaqhip jathax thakxaruw puri, ukasti taksutaw uñjasi, ukatsti jamach'inakaw pallthapiwayxi. 6Yaqhip jathasti qalarar taypiruw puri; kunapachatix uka jathax misturxi ukkhasti, mäkiw wañsuwayxi jan umanïtap layku. 7Maya jathanakasti ch'aphinak taypiruw puri, ukatsti uka jathamp chik mistur ch'aphinakaw ukarux chhaqtayxaraki. 8Ukampis mä yaqhip jathax suma laq'awjaruw puri; jilsusinsti, suma achu churi, sapa mayatsti patakar kunaw achu.”

Uk sasinsti, Jesusax jach'at jupanakarux säna: “¡Jumanakatix ist'añ munapxstaxa, ist'apxam!” sasa.

¿Kunatsa Jesusax uñtasïwinak tuqi yatichänxa?

(Mt 13.10-17; Mc 4.10-12)

9Ukapachaw yatiqirinakapax jupar jiskt'apxäna:

—Aka uñtasïwix ¿kun sañsa muni? —sasa.

10Jesusasti jupanakar sarakïnwa: “Jumanakarux Diosaw yatiyapxtam kunanakatix qhapaq markapan imantatäki ukanaka; ukampis mayninakarux uñtasïwinak tuqiw parlta, uñjkasinsa jan uñjir tukupxañapataki, ist'kasinsa jan amuyt'apxañapataki” sasa.#8.10 Is 6.9-10.

Jesusax phawirit amuyt'ayi

(Mt 13.18-23; Mc 4.13-20)

11“Aka uñtasïwix akham sañ muni: Jathax Diosan arupawa; 12thakhir purki uka jathasti, khitinakatix Diosan arup ist'apki jupanakawa, ukat supayax jutasin uka arunak chuymapat apsuwayxi, ukhamat jan iyawsapxañapataki, jan qhispiyasipxañapatakiraki. 13Qala taypir purir jathasti, khitinakatix Diosan arup ist'apki, kusisiñamp katuqapki jupanakawa, ukampis janiw wali saphintatäpkiti, mä qawqha urunakatakikiw iyawsapxi, yant'anak sartipansti qhiparuw kutt'awayxapxi. 14Ch'aphinak taypir purir jathasti, khitinakatix aru ist'apki jupanakawa, ukampis juk'at juk'at kunayman llakisiñanakampi, qamir kankañampi, akapach kusist'añanakampiw atipjayasipxi, ukhamat achu jan churapkiti. 15Suma laq'ar purir jathasti, khitinakatix taqi chuymamp Diosan arup ist'apki, ukarjam sarnaqapki jupanakawa, taqi ch'amamp sayt'apxatapat suma achunak churapxi.

Jesusax micha qhanat amuyt'ayi

(Mc 4.21-25)

16“Janiw khitis mä micha qhantayasax phukhumpi k'umpxatkiti, janirakiw ikiñ manqharus uchkiti, jan ukasti alay chiqaruw uchi utar mantanirinakar qhant'añapataki. 17Uka kipkapï, janiw kuna imantatas jan qhanstirix utjkaniti, janirakiw jamasankki ukas jan yatisirix utjkaniti.

18“Ukhamasti, sum ist'apxam, khitintix utjki juparux juk'ampiw churasini; ukampis khitintix jan utjki jupatxa, kunatix utjañapäki ukamppach apaqasini”.#8.18 Mt 13.12; 25.29; Lc 19.26.

Jesusan taykapampi, jilanakapampi

(Mt 12.46-50; Mc 3.31-35)

19Ukapachaw Jesusan taykapampi jilanakapampix kawkhankkäntix jupax ukkhar purinipxäna; ukampis janiw juparux jak'achasipkänti, walja jaqinak ukankatap layku. 20Ukatsti mayniw Jesusar yatiyäna:

—Taykamampi, jilanakamampiw anqäxankaski, jumampiw jikisiñ munapxi —sasa.

21Jesusasti jupanakar sarakïnwa:

—Khitinakatix Diosan arunakap ist'apki, ukat ukarjam sarnaqapki ukanakaw taykaxasa, jilanakaxasa —sasa.#8.21 Ro 8.29.

Jesusax thayampiru quta mathapimpiruw t'akurayi

(Mt 8.23-27; Mc 4.35-41)

22Mä urux, Jesusax yatiqirinakapampiw mä boter mantäna, ukat sarakïna:

—Quta khurkatar makhatañäni —sasa.#8.22 Quta khurkata: Galilea quta inti jalsu tuqiwa, uka chiqan jan judiöpki jupanakaw jakapxäna.

Ukat botet sarapxäna, 23ukham sarapkipan Jesusax ikt'xäna. Ukatsti qutan mä jach'a thayaw sartäna, jupanakarux wal mulljäna; thayasti umampiw boterux phuqhantäna, botex jalantañampirakïnwa. 24Ukat Jesusarux sartayapxäna:

—¡Yatichiri! ¡Yatichiri! ¡Botew jalantirjama! —sasa.

Jesusasti sartasin mathapinakampiru, thayampiruw tuqinuqäna, ukatsti t'akurawayxänwa. 25Ukatsti yatiqirinakaparux sarakïnwa:

—¿Kawkinkis iyawsañanakamaxa? —sasa.

Jupanakasti mulljataw muspharasipxäna, ukatsti maynit maynikamaw jiskt'asipxäna:

—¿Khitirakïpach aka jaqisti, thayas, umas tuqinuqatax juparux jaysakirakisä? —sasa.#8.25 Sal 107.29.

Jesusax Gerasankir ñanqha ajayun mantat jaqiruw k'umaraptayi

(Mt 8.28-34; Mc 5.1-20)

26Ukatsti jupanakax Gerasa chiqaruw puripxäna, ukasti quta khurkatankiwa, Galilea uñkatasina. 27Jesusan botet mistkipan markankir mä jaqix jupar jak'achasinïna. Aka jaqisti walja maranakaw ñanqha ajayunakan mantat sarnaqäna. Janiw isimpi uchasirïkänti, janirakiw utansa jakirïkänti, jan ukasti amay imatanak taypin jakäna. 28Jesusar uñjasinsti jupan nayraqataparuw killt'asi, arnaqt'asisa:

—¡Jesús, alaxpachankir Diosan Yuqapa!, ¿kuna lurañamas nayamp utji? Achikt'assmawa, janiy t'aqhisiyistati —sasa.

29Jesusan uka ñanqha ajayur jupat mistxañapatak arsutapat ukham säna. Walja kutiw uka ñanqha ajayux katuntatayna; jaqinakasti cadenanakampiw amparapata, kayupata wal ñach'antapxirïna, ukampis jupax uk t'aqanuqakirïnwa, uka ñanqha ajayusti juparux wasar chiqanakaruw jaltayirïna. 30Jesusasti juparux jiskt'änwa:

—¿Kuna sutinïtasa? —sasa.

Jupasti sarakïnwa:

—Legión satätwa —sasa.#8.30 Legión ukax Romankir ejercitopan suxta waranqa (6.000) mä tama soldadönwa. Uka jaqix walja ñanqha ajayunak jupar mantatapat ukham uka suti aytasïna.

Uksti walja ñanqha ajayunak jupar mantapxatap laykuw ukham säna, 31uka ñanqha ajayunakasti Jesusarux jan manqhapachar khithañapatakiw mayipxäna. 32Uka qullunsti walja khuchhinakaw manq'asipkäna,#8.32 Judionakatakix khuchhix q'añu animalat uñt'atänwa (Lv 11.7), ukampis uka chiqan jakir jaqinakatakix janiw ukhamäkänti. uka ñanqha ajayunakax uka khuchhinakar mantañatakiw Jesusar achikt'asipxäna. Jesusasti jupanakarux uka khuchhinakar mantapxam sänwa. 33Ukapachaw ñanqha ajayunakax jaqit mistxasin khuchhinakar mantxapxäna, uka khuchhinakasti mä qarqa patat chhukt'asaw qutar jalantapxäna, ukan umampi axskatas jiwarapxäna.

34Khuchhi awatirinakasti ukham uñjasax mulljataw ukawjat jaltxapxäna, ukat markankirinakaru, pampankirinakar yatiyiriw sarapxäna. 35Jaqinakasti kunatix luraskatayna uk uñjiriw mistunipxäna. Jesusan jak'apar purinisinsti, ñanqha ajayunakax mistkän uka jaqirux Jesusan jak'apar qunt'at jikxatapxäna, isthapita, suma amuyuniraki, uk uñjasasti jupanakax wal axsarapxäna. 36Uñjirinakasti, kunjämtix Jesusax uka ñanqha ajayun mantat jaqiru waliptaykän uk yatiyapxäna. 37Uk yatisinsti Gerasan utjir taqi jaqinakaw Jesusarux ukawjat sarxañapatak achikt'apxäna, jupanakan wal axsarapxatap layku. Ukat Jesusax boter mantasin sarawayxäna. 38Ñanqha ajayunak mistut jaqisti Jesusarux jupamp chik sarañatakiw achikt'asïna. Jesusasti juparux sänwa:

39—Utamar sarxam, ukatsti kuntix Diosax jumamp lurki uka yatiyarakim —sasa.

Uka jaqisti kuntix Jesusax jupamp lurkatayna uk taqi markpacharuw yatiyäna.

Jairon phuchhapampita, Jesusan isip llamkt'ir warmimpita

(Mt 9.18-26; Mc 5.21-43)

40Kunapachatix Jesusax quta khurkatar purxän ukkhasti, jaqix wali kusisitaw katuqäna, juparusti taqiniw suyasipkarakïna. 41Ukaruw Jairo sat mä jaqix purinïna, jupasti sinagogan mä jilïrïnwa. Jairosti Jesusan kayuparuw killt'asïna, ukat utapar sarañapatak achikt'asïna, 42jupasti mä sapa imill wawanikïnwa, niya tunka payan marani, uka imill wawasti jiwañampïskänwa.

Thakhinjam sarkipansti, jupar arkir walja jaqinakaw Jesusarux ñiqjapxäna. 43Uka jaqinak taypinsti mä warmiw utjäna, jupasti tunka payan maraw wila apa usumpi usurnukstatäna, jupasti qullirinakaruw taqi kunap inamay q'al tukjasitayna, janiw khitis juparux qullkataynati. 44Jupasti qhipäxat Jesusar jak'achasisin isipat llamkt'äna, wila apa usupasti ukspachaw t'akt'awayxäna. 45Ukat Jesusax jiskt'äna:

—¿Khitis llamkt'itu? —sasa.

Taqiniw ‘janiw khitis llamkt'ktamti’ sapxäna. Pedrosti sänwa:

—Yatichiri, jaqiw uksat aksat nukt'as ñiqjasktam —sasa.

46Ukampis Jesusax saskakïnwa:

—Mayniw llamkt'itu, ch'amaxampi maynir qullatax amuyasta —sasa.

47Warmisti, jan juk'amp imantasirjamäsin khathatt'asisaw Jesusan kayupar killt'asïna. Ukatsti taqi jaqin nayraqatapan arsusïna kunatsa llamkt'atayna, kunjämsa ukspach k'umar tukkatayna ukanaka. 48Jesusasti juparux sänwa:

—Waway, iyawsatam laykuw k'umaräxtaxa, jichhax sumak sarxam —sasa.#8.48 Lc 7.50; 17.19; 18.42.

49Jesusax parlaskakïnwa; ukhamaruw maynix Jairon utapat purinïna, ukat Jairorux säna:

—Phuchhamax jiwxiwa; jan Yatichirirux juk'amp parlxaykxamti —sasa.

50Jesusasti uk ist'asin juparux sänwa:

—Jan axsaramti; iyawsakim, wawamax k'umaräxaniwa —sasa.

51Utar purisinsti janiw khitirus jupamp chik mantaykänti, jan ukasti Pedro, Santiago, Juan, imill wawan awkiparu, taykaparu ukanakarukiw irpantäna. 52Taqiniw wal jachasipkäna. Jesusasti jupanakarux sarakïnwa:

—Jan jachapxamti; janiw wawamax jiwatäkiti, jan ukasti ikiskiwa —sasa.

53Jaqisti taqiniw jupat larusipxäna jiwatapunïtap yatisina. 54Jesusasti imill wawan amparat katusin jach'at art'äna:

—Imill wawa, sartasim —sasa.

55Jupasti jaktanxänwa, ukspacharakiw sarthapïna. Jesusasti manq'añ churapxañapatakiw mayïna. 56Awkipa, taykapasti wali muspharataw uñjasipxäna; ukampis Jesusax kunatix luraskatayna uk jan khitir yatiyapxañapatakiw mayïna.

Currently Selected:

LUCAS 8: AYOPD

Highlight

Copy