Matthieu 24

Yeesu sòon̄ kunimbɔtidii wīitam pu

(Kpèè Maar 13.1-2, Luuki 21.5-6)

1Ŋyunti ŋun Yeesu nyáń kunimbɔtidiin ki cée, ní u-boonnooliibi sútìń ki pìl̄-u ní ki bí yii ú kpèè bi nín baasii máń kunimbɔtidii puee. 2Ní u bí-bi yii: «Kéè ni ká kɔkɔ neeyaa! Ibaamɔn ní m tùkù-ni, ditaŋkpal diba kaa làá dāá nīn gíti tɔ́kɔ́ di-juti pu, an kɔkɔ làá dāá wīī ní.»

Falaa un làá bàń kitiŋ kúntitamee

(Kpèè Maar 13.3-23, Luuki 21.7-24, 17.22-24)

3Yeesu nìn kā Ɔliifi sufii jool pu, ní u-boonnooliibi dɔ́miń ki ká-u bi-ŋmaniŋma ní ki bālifì-u yii: «Tùkù-ti ŋyunti ŋun tin a bàà lēe làá dāá bàńee, nì kudaaŋŋu kun làá dāá dàkà-ti ŋyunti ŋun a làá gítińee nì ŋyunti ŋun duulinya mun làá kúntée.»

4Niinee ní Yeesu kíí-bi yii: «Ní nīn nyíǹ ni-ba ubɔ ń taa ŋmàtiǹ-ni. 5Di sá yii binib tikpil làá dāá dū man yindi kí kpántí bi-yaŋ kí lì yii bíǹ di sá <Meesiya> ní ki làá dāá kīil̀ binib tikpil. 6Ni làá dāá gbìl̄ bi sòoǹ tijáti tin bi bíi jáàyee nì tin gíti bí ki dòońee bɔti ama, ní nīn nyíǹ ni-ba ni-pɔbiliŋ ń taa bīil̀. An máaǹ tíǹ kɔkɔ ń bàń, ama niin kaa dá láá sá duulinya kúntitam. 7Ditimbundi diba dāa yíkí kí jáǹ diba, ní dibeel diba yab mun ń jáǹ diba. Ŋkùm làá dāá nyā, ní kitiŋ ń dāá cìŋkì ajan kupaau pu. 8Tíǹ kɔkɔee dāa sá kii imatiŋween nín kífí puee ní.

9«Binib làá dāá cúú-ni kí tīī bí sàaǹ-ni ní kí kpɔ̀-ni. Atimbun kɔkɔ nib làá dāá nīn ná-ni ni nín fōō man ki kííyee pu. 10Ŋyunti gbantee, binib tikpil làá dāá fá bi-fookiiu un bi cáá man puee, kí nīn kíǹ ki nyáfí tɔb ki ná tɔb. 11Bin yíì bi-ba yii Unimbɔti bɔnaatiliibi kin kaa sée làá dāá dāan̄ kí ŋmàtiǹ binib tikpil mun. 12Tikpitil làá dāá wíiǹ, an puee, binib tikpil neendi làá dāá sɔ̀ŋkì. 13Ama un di yaa pɔ́ɔǹ mmɔntiimin ki tin kátì-kuee di dāa ŋmátí. 14Bi dāa sòoǹ Unimbɔti Beel bɔmɔntiiti nee kitiŋ jaŋŋi kɔkɔ pái, án nīn sá seera kí tīī atimbun kɔkɔ kí wàatī ní duulinya ń nín kúntí.»

Nnaabukpaan bɔti

(Kpèè Maar 13.14-23, Luuki 21.20-24)

15«Ni làá ká kuwaŋkpitiu kun cāabìń ntimbiilee, kun pu Unimbɔti bɔnaatiliu Daniyeel nìn sòon̄ee#24.15 Dani 9.27, 11.31, 12.11. sí kunimbɔtidiin. - Un kàaǹ tibɔti neeyee ń gbìl̄ ti-taapu! - 16Ŋyunti gbantee, Juudee tiŋki yab ń nīn sáń ki dàb̀ ajoon. 17Un yaa láa bí dicindee #24.17 bí dicindee: Isirayeel yab yaa nìn máń kudiiyee, baa nìn píǹ, bi nìn bɔ̀b̀ ní kí lēē dicindi kudiiyee yilpu, ní kí mā akɔl kí tin sāā dicindee. ń taa láa lì yii u làá kpákatí kí kɔ́ kudiin kí yòon̄ tiba, 18ní un yaa láa bí kusaauee ń taa láa lì yii u làá gítiń mmɔŋki kí yòon̄ u-bɔkutil. 19Ama falaa dɔ̄ ki cí bipɔdambi nì bimatib iwiin gbanti poon! 20Mèèmaan Unimbɔti an bɔtee ń taa bàń-ni kuseeun, kí taa nín̄ sá ŋwiŋŋuŋfikaa dal, 21kun puee doooo duulinya nín kíliń ki dāa sāā an yuntiŋuee, an nimbinaamandi juti kaa láá cúú binib, ki kpá kí gíti cúú-bi mun#24.21 Dani 12.1.. 22Unimbɔti yaa kaa bàà bātì falaayee wiiŋyi pu, unibaanti kaa bàà ŋmátí. Ama binib bin u lútì bi sá u-yabee pu ní u bātì iwiin gbanti pu. 23«Ŋyunti gbantee, ubɔ yaa tùkū-ni yii: <Meesiya bí doo,> àá <U bíń lapu,> ní taa fōō kí kíí. 24Di sá yii, bin làá dāá mɔ̄ntì yii bíǹ di sá Meesiya nì Unimbɔti bɔnaatiliibee, làá dāá nyā ki ŋáań tikpaŋkpantiil nì maamaaci tuuŋŋi ki nyàab̀ bi yaa ŋūǹ kí ŋmàtiǹ bin Unimbɔti lútèe gba. 25M tùkū-ni ki yóoǹ dee.

26«Míǹ puee bi yaa láa tùkū-ni yii, m dɔ́miń ki bí kuteeunee, taa cùmaan. Bi yaa láa tí bí-ni yii, m bí dilɔnlɔkɔlin kudiinaaa, taa fōō kí kíímaan. 27Kii utaa nín ŋmóò pu nyàlab báà ŋma wāĺee, kí kíliń ŋwìiń nyalaŋki pú kí cáá sāā ŋu-jeetilaŋki pú puee, míǹ ní man Kinibiki dāantam dāa bí. 28Laakin diwaŋkpil yaa dɔ̄ee, niin ní kaajiikub kpáfí.»

Yeesu gítintam

(Kpèè Maar 13.24-27, Luuki 21.25-28)

29Yeesu gíti lī yii: «Dinimbinaamandee yaa jítì kpalaayee, ŋwìiń dāa kpántí dibɔmbɔndi ní uŋmal mun kaa dāa gíti pīiǹ. Iŋmalbijaa dāa kìtīń kutaa pu ki lítiń, ní ipɔn in bí kutaa puee ń cìŋkì#24.29 Dūú ŋmàntī nì Yees 13.10, 34.4, Eesee 32.7, Joow 2.10, 3.4.. 30Niinee ní man Kinibiki daaŋku ń nyā kí páanní kutagbɔŋu pu, ní duulinya timbuliŋ kɔkɔ ń dāá fōō itiminsi, ní kí ká man Kinibiki ń páanní yilpu atagbanni nì mpɔn nì tinyool#24.30 Dani 7.13.. 31M làá tɔ̄ m-tuuŋyi kitiŋ jaŋŋi kɔkɔ kí tin sāā kutagbɔŋu nì kitiŋ kúntinyɔkɔ ní í búń dikantáŋkpaandi, kí kpāfì bin Unimbɔti lútèe#24.31 Dūú ŋmàntī nì Ditee 30.4, Saka 2.10, Neey 1.9..»

Isufi túkutam nín dàkà-ti kuŋyee

32«Pīlifìmaan fiigi subu nín dàkà-ti tiŋyee. Di sá yii, ni yaa ká fiigi subu tɔ́ apan ki bíi túkù tifaapɔnee, ni béetí yii kuseeu tóobiń dee. 33Míǹ mbaantiim, ni yaa láa ká tin m máafì nee bíi jītée, béémaan yii m-dāantam tóobiń, m sútì ki pìlìń kipunyɔkɔ dee. 34Ibaamɔn ní m tùkù-ni, waanee nib kɔkɔ kaa làá kpú kí dóó ní an bɔtee kɔkɔ ń bàń. 35Kutagbɔŋu nì kitiŋ dāa bí kí kúntí, ama man bɔti kpá kí kúntí jaanjaan.»

Unimbɔti baba di nyí Yeesu gítintam yuntiŋu

(Kpèè Maar 13.32-37, Luuki 17.26-30,34-36)

36«Báà ubɔ kaa nyí ŋwiin nì kukúluu kun ni an bɔti làá bàńee. Unimbɔti tuuŋyi in bí yilpuee kaa nyí, man u-Jipɔɔn gba kaa nyí, see Ubaati Unimbɔti baba di nyí. 37Tin nìn jítì Noowa yuntiŋuee, man Kinibiki yaa làá dāá dāan̄ee, míǹ mbaantiim di làá tí jītí. 38Kí wàatī nnyiŋgbeen ń bàńee, binib nìn jīǹ ki nyù, ní ki cāab̀ binimpoobi ki cáá bi-bisalib ki pūǹ ticati, áli Noowa dāa kpáàa kɔ́ meelan#24.38 Kpèè Diny 6.9-7.6., 39ní baa kpáàa béè kun dɔ̄ ki cí-bee ní nnyiŋgbeen dɔ́miń ki yōoǹ bi-kɔkɔ. Míǹ mbaantiim ní man Kinibiki yaa làá dāá dāan̄ee, án làá ŋá#24.39 Kpèè Diny 7.7-24.. 40Bininjab bili dāa gbāā kusaaun ki kù, ní ḿ yòon̄ ubɔ kí yàntī un kíǹee. 41Binimpoobi bili mun dāa gbāā kunaau pu ki nà, ní ḿ yòon̄ ubɔ kí yàntī un kíǹee. 42An puee, ní taa nín̄ gèem̀maan, kun puee naa nyí ŋwiin ŋun ní ni-Dindaan làá fàtīí gítińee. 43Nín̄ nyímaan tiŋan yii, kudiidaan yaa bàà nyí kukúluu kun unaayuu làá dāan̄ kunyeeuee, u bàà kā ki cí ní, kí taa yàntī unaayuu ń cíĺ u-diiku. 44Míǹ puee, ni mun bɔ́ntímaan kí nīn cí, kun puee man Kinibiki làá dāan̄ kukúluu kun naa dàkafī yii m làá dāan̄ee ní.»

Utɔntɔŋkpiti nì utɔntɔmmɔnti bɔti

(Kpèè Luuki 12.41-48)

45«Ŋma di sá utɔntɔnli un bí deedee ki cáá iciinee ní? Úǹ di sá un u-kpiliu dū u-tɔntɔnjutiibi ki ŋúbiǹ ú nīn tìì-bi tijin ŋyunti ŋun máaǹ ú nīn tìì-bee. 46An sá mmɔn ki tīī utɔntɔnli gbanti u-kpiliu yaa láa fātìi bàn̄ ki ká-u, u bíi tūǹ u-tundee. 47Ibaamɔn ní m tùkù-ni, ukpilee dù u-gaajawanti kɔkɔ ní kí kūtì kí ŋúbíǹ utɔntɔnlee. 48Ama utɔntɔnlee yaa sá ukpitee, u làá dàkafì yii: <M-kpiliu kaa láá yàkań digitindi,> 49ní ú kíĺ ki bíi gbáà u-tɔntɔnjutiibi ní u nì bidanyɔgbiliibi bí ki jīǹ ki nyù. 50Niinee ní u-kpiliu ń dāá dūú túuǹ-u ŋwiin nì kukúluu kun pu waa nyí yii u làá bàńee, 51ní kí dáaĺ u-tafal ŋkpitim pu, kí pà-u mpoonnyoondambi paati. Niin ní u làá sɔ̄ ní u-nyiŋŋi ń nīn gà tɔb kàkaka.»

Currently Selected:

Matthieu 24: BASSARDC

Highlight

Copy