Matthieu 23

Yeesu kpákáǹ bimaradakaliibi nì Fariisab

(Kpèè Maar 12.38-40, Luuki 11.37-54, 20.45-47)

1Niinee, Yeesu bí kunipaauee nì u-boonnooliibi yii: 2«Bimaradakaliibi nì Fariisab di bí ki dàkà Mooyiisi marab. 3Míǹ puee, ní nīn ŋáaḿmaan min bi dàkà-nee, ama ní taa fōō bíǹ bi-ba bimbim, kun puee baa ŋáań tin bi dàkà yii binib ń nīn ŋáańee. 4Bi nyāntí marab bin nyìm̀ kii awaŋgulee ní ki tūntí binib ní kaa là kí dū bi-ŋambiki kí dáb́ awaŋgulee kí tūtuǹ binib. 5Bi pée tūǹ bi-tuuŋŋi kɔkɔ binib ń nīn wāĺ-bi ní. Bi wàantí igban in pu bi ŋmà Unimbɔti bɔti ki cáa fìǹ bi-ŋalii nì bi-yigbeeŋee, ní ki fɔ̀kɔntí bi-bɔkutiŋ gbeeŋgbeeŋyi#23.5 Kpèè Dikà 15.38-41.. 6Bi néeń ki kàal̀ ikakaamɔnti diinabin nì nyɔkɔpu kakaai akpafidiinni, 7ki néeń bí nīn jáaḿ-bi binibin, ki néeń bí nīn yíì-bi <Ukpil, ukpil.> 8Ama nimbi ń taa yàntī bí nīn yíì-ni <Ukpil>, kun puee ni cáá ukpibaanti ní, ní ni-kɔkɔ sá nnabiyaamu. 9Ní taa yíiń ubɔ kitiŋ pu <ni-Baa>, kun puee ni-Baa pée sá ubambaanti ní, ki bí yilpu. 10Ní taa yàntī bí nīn yíì-ni <Uyidaan>, kun puee ubaanti di sá ni-Yidaaŋwu, úǹ di sá Meesiya. 11Un gíiǹ u-ba ni-tɔntɔnliuee di dāa sá ukpaan ni-kansikin. 12Un yaa yōoǹ u-ba yilpuee bi làá dāá sìntīǹ-u taapu, ní un yaa sīntiǹ u-ba taapuee, bi làá dāá yòon̄-u yilpu.»

Bimaradakaliibi nì Fariisab poonnyooŋŋu

(Kpèè Maar 12.40, Luuki 11.39-52, 20.45-47)

13Yeesu bí yii: «Mbusu dɔ̄ ki cí-ni, nimbi bimaradakaliibi nì Fariisab mpoonnyoondambi, kun puee ni pìintí binib Unimbɔti Beel punyɔkɔ. Naa làá kɔ́ ni-ba, ní kaa là bin bàà là kí kɔ́ee ń kɔ́.»

[ 14«Mbusu dɔ̄ ki cí-ni, nimbi bimaradakaliibi nì Fariisab mpoonnyoondambi, kun puee ni fìkì tin kɔkɔ bikpiipoobi cááyee, ní ki mèé ŋwimmeem min yúntí fɔ́rrree bí ká-ni. An pu ní Unimbɔti làá dāá dáaĺ ni-tafal tikpil#23.14 Uyakatikaa nee kaa bí tigbɔŋkpikil tikpil poon. Kpèè Maar 12.40.!]

15«Mbusu dɔ̄ ki cí-ni, nimbi bimaradakaliibi nì Fariisab mpoonnyoondambi, kun puee ni yìiǹ tiŋkub nì kitiŋ jaaŋŋi kɔkɔ pu ki nyàab̀ un làá kpántí ni-boonnooliuee, ní ni yaa ŋúń ki yāntì u kpántì u-bee, ní ní yàntī ú kpántí un làá dāá kɔ́ ditafadaaldinee mili pu kí jītíǹ nimbi.

16«Mbusu dɔ̄ ki cí-ni, nimbi bijɔfub bin kpòotī binibee, kun puee ni lì yii: <Unil yaa pūtì kunimbɔtidiiyee, an kaa sá tiba, ama un yaa pūtì sindaariya un bí kunimbɔtidiinee, ú ŋá min u pūtèe.> 17Bigbaambi, bijɔfub! Ba di páb́ ní? Sindaariyaaa, kunimbɔtidii kun yāntì sindaariyee kpántì circiree? 18Ni tí lì yii: <Unil yaa pūtì nsaraafanee, an kaa sá tiba, ama un di yaa pūtì saraa un pá nsaraafan puee, ú ŋá min u pūtèe.> 19Bijɔfub, tilati di páb́ ní? Saraayaaa, nsaraafan ŋun pu saraayee pá ki kpántì circiree ní? 20Un di yaa pūtì nsaraafanee, pūtì ki kpáaǹ tin kɔkɔ pá nsaraafan puee dee. 21Un di yaa pūtì kunimbɔtidiiyee, pūtì Unimbɔti un kóò kudii gbantinee dee. 22Un yaa pūtì kutaayee, pūtì Unimbɔti beejal nì Unimbɔti un kā di-puee dee#23.22 Dūú ŋmàntī nì Yees 66.1, Maat 5.34..

23«Mbusu dɔ̄ ki cí-ni, nimbi bimaradakaliibi nì Fariisab mpoonnyoondambi, kun puee ni pà tikuŋfaal tin kɔkɔ ni kùee saalaa kamaa pu kubɔ kubɔ#23.23 Kpèè Akoo 27.30, Ditee 14.22., ama ní ki yíití, kaa nóó marab bin bɔti páb́ee, an dàkà yii: á nīn cáá ibaamɔn, kí nīn sūǹ binib saai, kí nīn yú deedee. Tin bàà máaǹ ní ŋée dee, ní kí nín dū tin kíǹee kí páań boon. 24Bikpootiliibi bin jɔ̀b̄ee! Ni jákà ki lèekī isii ni-nyɔkaatin, ama ní ki nátí igutaamu.

25«Mbusu dɔ̄ ki cí-ni, nimbi bimaradakaliibi nì Fariisab mpoonnyoondambi, kun puee ni fíntí tiyuti nì asambil boon, ama ní ni-naayutuuŋŋi nì tiwan tin ni fìkēe gbí poon. 26Fariisab bijɔfub! Ní péé kí fíntímaan kuyuu poon, ní boon mun ń kpáàa nyā.

27«Mbusu dɔ̄ ki cí-ni, nimbi bimaradakaliibi nì Fariisab mpoonnyoondambi, kun puee ni náań nì akaakul ŋin bi píil̀ boonee ní. Ŋi ŋān̄ nnimbikpee, ama ní ŋi-poonee anikpil sūū ní akpab gbí. 28Míǹ ní ni mun bí. Binib wāĺ-ni ŋgban puee yii ni sá deedeedambi, ama mpoonnyoon nì ikpiti di gbí ni ni.

29«Mbusu dɔ̄ ki cí-ni, nimbi bimaradakaliibi nì Fariisab mpoonnyoondambi, kun puee ni māā Unimbɔti bɔnaatiliibi akaakumɔnti ní ki nyāantí bin yúl̀ deedeeyee kaakuliŋ, 30ní ki lì yii: <Ti yaa bàà nìn bímaan ti-naanjab yuntiŋu, taa bàà nìn kútí bi-pu bí kpɔ̀ Unimbɔti bɔnaatiliibi gbanti.> 31Míǹ ní ni bíi lèekī ni-ba pu seera yii ni sá bin kūū Unimbɔti bɔnaatiliibee naantiibi. 32Mimmee, púntímaan ni-naanjab nín nìn kíĺ ditundi diŋyee! 33Nimbi bin tū kii ikoowaatee! Mana ní ni dàkafī yii ni ŋūǹ kí ŋmátí kí taa kɔ́ ditafadaaldi laŋki? 34An puee, ní pīlifìmaan: M làá tɔ̄ń ni-cee Unimbɔti bɔnaatiliibi nì biciŋfitiibi nì bidakaliibi. Ni làá kpɔ̀ biba, kí kpáá biba idɔpuntikaa pu, kí gbá biba anaalab ni-kpafidiiŋŋin, kí jà biba bí póotí ntimu. 35An puee nnikpaakoon tafadaaldi làá dāá lítí ni-pu, deedee nib bin kɔkɔ ni kūūyee pu, kí yòon̄ ŋyunti ŋun bi nìn kūū Abeelee kí tin sāā ŋyunti ŋun bi kūū Sakari Baaraasii jipɔɔn kunimbɔtidii nì nsaraafan kansikinee#23.35 Kpèè Diny 4.8, 2 Kroo 24.20-22.. 36Ibaamɔn ní m tùkù-ni, nnikpaakoonee tafadaaldi làá dāá lítí nimbi waanee nib pu ní.»

Yeesu yáliŋkì Jeerusaleem pu

(Kpèè Luuki 13.34-35)

37«Jeerusaleem yab, Jeerusaleem yab, nimbi di kù Unimbɔti bɔnaatiliibi ní ki cáá ataŋkpee ki yāŋkí ki kù bin Unimbɔti túnní ni-ceeyee! Miŋa pu ní maa mākaǹ kí bàà kóoǹ ni-kɔkɔ kí kpāfì m-cee kii ukoonaati nín kōontí u-biyaamu u-taapu puee? Ama ní ni yíì. 38Too, kɔŋkɔnnee Unimbɔti làá fá ni nì ni-diiku#23.38 Dūú ŋmàntī nì Yeer 22.5.. 39M tùkù-ni yii, kí yòon̄ díǹ kí nīn cée, naa làá ti ká-mi kí nīn cí ŋyunti ŋun ni làá dāá sòoǹ m-pu yii: <Unimbɔti ń bìin̄ un dòoń ti-Dindaan yindi puee#23.39 Ilan 118.26..>»

Currently Selected:

Matthieu 23: BASSARDC

Highlight

Copy