Matthieu 22

Tinimpucanjin bɔŋmantikaati

(Kpèè Luuki 14.15-24)

1Ní Yeesu tí dū tibɔŋmantikaal nee ki ŋmāntì ki lī yii: 2«Unimbɔti Beel nín náań nì kuŋyee sɔ̀. Ubɔti ubɔ di cáá unimpu ki tīī u-jipɔɔn ní ki ŋá tican kí tīī binib, 3ní ki dū u-tɔntɔnliibi ki tú bí cù kí tùkù binib bin u yíińee yii bí dāan̄, ama ní bi yíì kaa dɔ́miń. 4Ní u gíti dū u-tɔntɔnliibi biba mun ki tú ki bí-bi yii: <Cùú tùkùmaan bin m yíińee yii, tijikaal bɔ́ntì ki dóò, m kūū inajaa, ki kūū tiwaŋkuti tin cáá ŋkpamee, an kɔkɔ bɔ́ntì ki sí! Bí dāan̄ tí jī jiŋaal.> 5Ama bi-kansikin báà ubɔ kaa fātìi tɔ́, ní báà ŋma búntì u-laŋki: ubɔ búntì u-saaku, ubɔ mun búntì u-bantil, 6ní bin kíǹee cúú bitɔntɔnliibee ki sāaǹ ki kūū. 7Ní ubɔtee fōō diŋuul ní ki dū u-soojab ki tú bi cūtìi kūū binikpɔliibi gbanti ki sēē bi-tiŋki mun ŋŋmi. 8Niinee ní u bí u-tɔntɔnliibi yii: <Tijikaal bɔ́ntì ki sí dee, ama ní bin m bàà yíińee kaa kítì. 9Míǹ puee nín̄ cámaan isampuyakati pu kí nīn yíìń bin kɔkɔ ní ni yaa pée kée bí dāan̄ kí jī.> 10Ní bitɔntɔnliibee nyáń isantaan pu ki kpáfì bin kɔkɔ bi kée, bikpitib nì bimɔntiibi kɔkɔ, ní ki cáań-bi ki gbéeǹ kudii. 11«Ubɔtee kɔ́ kí kpèè bin u yíińee, ki dūu ká kijapaai kiba kíǹ kaa pēē jiŋaal bɔkutil din bin béeyee pēē ki dɔ́miń tinimpucan jiŋaaliuee. 12Ní u bālifì-u yii: <M-bɔɔ, ba ŋá ní a kɔ́nní doo kaa pēē dijiŋaabɔkutil?> Ní kijapaayee kā ki ŋmí. 13Niinee ní ubɔti bí u-tɔntɔnliibi yii: <Bóob́maan u-taaŋi nì u-ŋalii iŋmii kí dū-u kí tɔ̄ mmɔŋki dibɔmbɔndin. Niin ní u làá sɔ̄ u-nyiŋŋi ń nīn gà tɔb kàkaka.> 14Di sá yii bi yíiń kunipaau, ama ní ki lútì fiii.»

Bi bālifì Yeesu yii bí pà lampoooo?

(Kpèè Maar 12.13-17, Luuki 20.20-26)

15Niinee Fariisab cūtì ki sòon̄ ki bɔ́ntì bi nín làá dī min kí dū tibɔti kí píĺ Yeesu ú sòoǹ bí ŋmā kí cúú-uee. 16Ní bi dū bi-yab biba nì Eeroodi yab ki tú bí dāá bàlifì-u yii: «Ukpil, ti nyí yii sii di sòoǹ ibaamɔn ní ki dàkà min ní Unimbɔti là unil ń nīn bée, kaa fàŋkí binib nín dàkafī puee, kaa fàtīí tɔ̄ báà udaan yaa sá uŋyee. 17Mimmee á tùkù-ti sii nín dàkafī tibɔti nee pu miŋyee. Ti-marau pú-ti nsan tí pà lampoo kí tīī Room gɔminau Seesaaraaa, an kaa pú?» 18Ama ní Yeesu béè bi-landɔkɔkpitii, ní ki bí-bi yii: «Ipoonnyoondambi, ba pu ní ni píĺ-mi tibɔti kí kpèè m-nyɔkɔn míǹ? 19Dàkàmaan-mi animbil ŋin bi cáa pà lampooyee.» Ní bi lēē animbil ki dàkā-u. 20Ní u bālifì-bi yii: «Ŋma yil nì u-yindi di náká animbil pu na?» 21Ní bi kíí-u yii: «An sá Room gɔminau Seesaar.» Ní Yeesu bí-bi yii: «Dūmaan tin gɔmina yèe kí tīī gɔmina, kí dū Unimbɔti mun yati kí tīī Unimbɔti!» 22Bi nín gbìl̄ an bɔtee ní bi bākatì sèeee, ní ki yāntì-u ki búntì.

Bi bālifì Yeesu difìkitil bɔti

(Kpèè Maar 12.18-27, Luuki 20.27-40)

23Ŋwimbaanti gbantee, Sadusab biba mun dɔ́miń Yeesu cee. Bíǹ di sá dinikitil din lì yii difìkitil kaa bée#22.23 Dūú ŋmàntī nì Atuun 23.8.. Bi bālifì Yeesu yii: 24«Ukpil, Mooyiisi bí yii: <Ubɔ yaa kpíì, kaa màl̄ mbiyaamu, u-nabiki ń fōō ukpiipu kí màal̀ kí téeǹ u-nabiki kin kpíìyee yil#22.24 Kpèè Ditee 25.5-6..> 25Kun pu ti bàlifēe di sá nnabiyaamu mululi nìn bí ti-kansikin. Upeepeekaa cáá unimpu ní ki kpíì ki yāntì unimpuee, kaa màl̄ kibiki, ní u-naal fōō ukpiipu. 26Míǹ mbaantiim uliliitee kpíì, kaa cáá kibiki, ní utataati mun fōō ukpiipu ní ki mun kpíì. Bi pée fòol̄ ukpiipuee míǹ ní ki tin sāā ululuúti ní u mun kpíì. 27Boonee ní unimpuee mun dāa dūu kpíì. 28Difìkitil dalee, nnabiyaamu mululee kansikinee, ŋma di dāa yì unimpu dee? Kun puee bi-kɔkɔ pée cáá-u ki ká.»

29Ní Yeesu kíí-bi yii: «Ni bí diyìntil poon ní nee, kun puee naa nyí Unimbɔti gbɔŋku poon bɔtaaa, kaa nyí Unimbɔti pɔŋŋu mun. 30Di sá yii, binib yaa láa fīkitèe, dinimpucaal nì dicamɔndi dāa gíti kpá, báà ŋma dāa bí kii Unimbɔti tuuŋyi nín bí pu yilpuee ní. 31An yaa kíǹ bitaŋkpiibi fìkititamee, naa láá pée kàan̄ ki ká Unimbɔti nín sòon̄ nì ni pueeee? U bí yii: 32<Man di sá Abraam Nimbɔtiu, ki sá Isaaki Nimbɔtiu, ki sá Jaakɔb mun Nimbɔtiu#22.32 Disa 3.6..> Unimbɔti yaa bí yii u sá bin kpíìyee Nimbɔtiuee, mimmee an dàkà yii úǹ ceeyee, bíǹ kɔkɔ kaa kpíì dee.» 33Kunipaau kun nìn bíi pílifíǹ-uee nìn bākatì nì u-dàkatam.

Mara un sá ukpaanee bɔti

(Kpèè Maar 12.28-34, Luuki 10.25-28)

34 Fariisab nín gbìl̄ yii Yeesu sòon̄ ki líì Sadusabee ní bíǹ kpáfì, 35ní bi-kansikin umaradakal ubɔ là kí píĺ Yeesu tibɔti kí kpèè u-nyɔkɔnee ní ki bālifì-u yii: 36«Ukpil, marab kɔkɔ kansikinee, ulɔu di sá ukpaan ní?»

37Ní Yeesu kíí-u yii: «Á nīn néeń a-Dindaan a-Nimbɔtiu nì a-pɔbil kɔkɔ, nì a-naŋki kɔkɔ, nì a-landɔkɔŋu kɔkɔ#22.37 Ditee 6.5..» 38Mara un sá ukpaan ki līīyee dee. 39Ní maraliliiti un páb́ kii upeepeekaayee sèé: <Á nīn néeń a-juti kii sisi a-bee#22.39 Akoo 19.18..> 40Marab bili nee pu ní Mooyiisi marab nì Unimbɔti bɔnaatiliibi dàkatam kɔkɔ tɔ́kɔ́.»#22.40 Dūú ŋmàntī nì 7.12.

Meesiya nì ubɔti Daafiidi bɔti

(Kpèè Maar 12.35-37, Luuki 20.41-44)

41 Fariisab nín nìn dáá gbíntìi bí dicilpuee, ní Yeesu bālifì-bi dinyɔɔbundi nee yii: 42«Ni dàkafī Meesiya pu yii ba ní? Ŋma naantiiu ní u sá ní?» Ní bi kíí-u yii: «Daafiidi naantiiu.» 43Ní Yeesu bí-bi yii: «Kin, ba pu ní Unimbɔti Fam yāntì Daafiidi u-ba yíiń-u yii u-Dindaan ní? Di sá u bí yii:

44«<Ti-Dindaan tùkū m-Dindaan yii:

Kàl̄ m-ŋaŋgiil pú kí nīn cí ŋyunti ŋun

m làá yàntī á nīn kíǹ ki tɔ́kɔ́ a-nannanliibi puee#22.44 Ilan 110.1..>

45«Mimmee, Daafiidi yaa yíì Meesiya yii u-Dindaanee, mana ní u gíti ŋūǹ kí nīn sá u-naantiiu mun?» 46Bi-kansikin ubɔ kaa ŋúń ki kíí-u báà dinyɔɔbumbaantiil. Kí yòon̄ ŋyunti gbantee ubɔ kaa ti mākaǹ kí bàlifì-u tiba kí kpèè u-nyɔkɔn.

Currently Selected:

Matthieu 22: BASSARDC

Highlight

Copy